جہاں نہ اپنے عزیزوں کی دید ہوتی ہے

زمین ہجر پہ بھی کوئی عید ہوتی ہے

ہے ایک ہی لمحہ جو کہیں وصل کہیں ہجر

تکلیف کسی کے لیے آرام کسی کا

ہر ایسے ویسے سے قفل قفس نہیں کھلتا

اس امتحاں کے لیے کچھ حقیر ہوتے ہیں

جی لگا رکھا ہے یوں تعبیر کے اوہام سے

زندگی کیا ہے میاں بس ایک گھر خوابوں کا ہے

میں اپنا کار وفا آزماؤں گا پھر بھی

کہاں میں تیرے ستم یاد کرنے والا ہوں

تو جو اس دنیا کی خاطر اپنا آپ گنواتا ہے

اے دل من اے میرے مسافر کام ہے یہ نادانوں کا

ایک بستی تھی ہوئی وقت کے اندوہ میں گم

چاہنے والے بہت اپنے پرانے تھے ادھر

میں اس گھڑی اپنے آپ کا سامنا بھی کرنے سے بھاگتا ہوں

وہ زینہ زینہ اترنے والی شبیہ جب مجھ میں جاگتی ہے

اسی قدر ہے حیات و اجل کے بیچ کا فرق

یہ ایک دھوپ کا دریا وہ اک کنارۂ شام

آج بھی اس کے مرے بیچ ہے دنیا حائل

آج بھی اس کے مرے بیچ کی مشکل ہے وہی

ایک خوشبو تھی جو ملبوس پہ تابندہ تھی

ایک موسم تھا مرے سر پہ جو طوفانی تھا

بے ہنر دیکھ نہ سکتے تھے مگر دیکھنے آئے

دیکھ سکتے تھے مگر اہل ہنر دیکھ نہ پائے

اک ذرا چین بھی لیتے نہیں تابش صاحب

ملک غم سے نئے فرمان نکل آتے ہیں

روز اک مرگ کا عالم بھی گزرتا ہے یہاں

روز جینے کے بھی سامان نکل آتے ہیں