رات دن پھر رہا ہوں گلیوں میں

میرا اک شخص کھو گیا ہے یہاں

ہو بہ ہو آپ ہی کی مورت ہے

زندگی کتنی خوبصورت ہے

جل کر گرا ہوں سوکھے شجر سے اڑا نہیں

میں نے وہی کیا جو تقاضا وفا کا تھا

ہوا سہلا رہی ہے اس کے تن کو

وہ شعلہ اب شرارے دے رہا ہے

کئی حرفوں سے مل کر بن رہا ہوں

بجائے لفظ کے الفاظ ہوں میں

لباس میں ہے وہ طرز تپاک آرائش

جو انگ چاہے چھپانا جھلک جھلک جائے

کوئی نادیدہ انگلی اٹھ رہی ہے

مری جانب اشارہ ہو رہا ہے

گو راہزن کا وار بھی کچھ کم نہ تھا مگر

جو وار کارگر ہوا وہ رہنما کا تھا

فن کار بضد ہے کہ لگائے گا نمائش

میں ہوں کہ ہر اک زخم چھپانے میں لگا ہوں

کتنا مان گمان ہے دینے والے کو

درد دیا ہے اور مداوا روک لیا

کہیں تو حرف آخر ہوں میں اکبرؔ

کسی کا نقطۂ آغاز ہوں میں

ایسے حالات میں اک روز نہ جی سکتے تھے

ہم کو زندہ ترے پیمان وفا نے رکھا

ابھی زمین کو ہفت آسماں بنانا ہے

اسی جہاں کو مجھے دو جہاں بنانا ہے

نفس نفس ہو صبا کی طرح بہار انگیز

افق افق گل ہستی مہک مہک جائے

کبھی جو وقت زمانے کو دیتا ہے گردش

مرے مکاں سے بھی کچھ لا مکاں گزرتے ہیں

کسی کو اپنے سوا کچھ نظر نہیں آتا

جو دیدہ ور ہے طلسم نظر سے نکلے گا

وہ بھی دن تھا کہ ترے آنے کا پیغام آیا

تب مرے گھر میں قدم باد صبا نے رکھا

یہ عکس آب ہے یا اس کا دامن رنگیں

عجیب طرح کی سرخی سی بادبان میں ہے