اک آگ ہماری منتظر ہے

اک آگ سے ہم نکل رہے ہیں

اب زمیں بھی جگہ نہیں دیتی

ہم کبھی آسماں پہ رہتے تھے

گزر رہا ہوں کسی جنت جمال سے میں

گناہ کرتا ہوا نیکیاں کماتا ہوا

پہلے تراشا کانچ سے اس نے مرا وجود

پھر شہر بھر کے ہاتھ میں پتھر تھما دیئے

خواب گلیوں میں پھر رہے تھے اور

لوگ اپنے گھروں میں سوئے تھے

تجھے خبر نہیں اس بات کی ابھی شاید

کہ تیرا ہو تو گیا ہوں مگر میں ہوں اس کا

ہم آئے روز نیا خواب دیکھتے ہیں مگر

یہ لوگ وہ نہیں جو خواب سے بہل جائیں

آئے عدم سے ایک جھلک دیکھنے تری

رکھا ہی کیا تھا ورنہ جہان خراب میں

دل و نگاہ پہ طاری رہے فسوں اس کا

تمہارا ہو کے بھی ممکن ہے میں رہوں اس کا

سنا گیا ہے یہاں شہر بس رہا تھا کوئی

کہا گیا ہے یہاں پر مکان ہوتے تھے

جسموں سے نکل رہے ہیں سائے

اور روشنی کو نگل رہے ہیں

تمہارے ہونے کا شاید سراغ پانے لگے

کنار چشم کئی خواب سر اٹھانے لگے

یہیں کہیں پہ کوئی شہر بس رہا تھا ابھی

تلاش کیجئے اس کا اگر نشاں کوئی ہے