ستارہ آنکھ میں دل میں گلاب کیا رکھنا

کہ ڈھلتی عمر میں رنگ شباب کیا رکھنا

اب دل بھی دکھاؤ تو اذیت نہیں ہوتی

حیرت ہے کسی بات پہ حیرت نہیں ہوتی

دو چار برس جتنے بھی ہیں جبر ہی سہہ لیں

اس عمر میں اب ہم سے بغاوت نہیں ہوتی

اب درد بھی اک حد سے گزرنے نہیں پاتا

اب ہجر میں وہ پہلی سی وحشت نہیں ہوتی

بس اتنا یاد ہے اک بھول سی ہوئی تھی کہیں

اب اس سے بڑھ کے دکھوں کا حساب کیا رکھنا

وقت کہاں رکا بھلا پر یہ کسے گمان تھا

عمر کی زد میں آئے گا تجھ سا پری جمال بھی

چڑھے ہوئے ہیں جو دریا اتر بھی جائیں گے

مرے بغیر ترے دن گزر بھی جائیں گے

مجھ پہ آساں ہے کہے لفظ کا ایفا کرنا

اس کو مشکل ہے تو وہ اپنی سہولت دیکھے

ہمیشہ ایک سی حالت پہ کچھ نہیں رہتا

جو آئے ہیں تو کڑے دن گزر بھی جائیں گے

دیکھ یہ دل جو کبھی حد سے گزر جاتا تھا

دیکھ دریا میں کوئی شور نہ طغیانی ہے

گم تو ہونا تھا بہ ہر حال کسی منظر میں

دل ہوا خواب میں گم آنکھ ہوئی آب میں گم

دل خوش جو نہیں رہتا تو اس کا بھی سبب ہے

موجود کوئی وجہ مسرت نہیں ہوتی

پاؤں اٹھتے ہیں کسی موج کی جانب لیکن

روک لیتا ہے کنارہ کہ ٹھہر پانی ہے

عجب تقاضا ہے مجھ سے جدا نہ ہونے کا

کہ جیسے کون و مکاں میرے اختیار میں ہے

مکاں کی کوئی خبر لا مکاں کو کیسے ہو

سفیر روح ابھی جسم کے حصار میں ہے