tū ye na pūchh mire gaañv meñ haiñ ghar kitne

ye pūchh kaun se ghar meñ azaab kitne haiñ

tu ye na puchh mere ganw mein hain ghar kitne

ye puchh kaun se ghar mein azab kitne hain

phuul to kyā ḳhaar bhī manzūr haiñ

be-ruḳhī se yuuñ magar pheñko nahīñ

phul to kya KHar bhi manzur hain

be-ruKHi se yun magar phenko nahin

josh-e-takmīl-e-tamannā hai ḳhudā ḳhair kare

ḳhaak hone kā andesha hai ḳhudā ḳhair kare

josh-e-takmil-e-tamanna hai KHuda KHair kare

KHak hone ka andesha hai KHuda KHair kare

bhūle se aa gayā huuñ farishtoñ ke des meñ

kis se pata karūñ ki yahāñ fard kaun hai

bhule se aa gaya hun farishton ke des mein

kis se pata karun ki yahan fard kaun hai

har ḳhushī dil se kyuuñ lagā baiTheñ

kis meñ ġham ho pata nahīñ hotā

har KHushi dil se kyun laga baiThen

kis mein gham ho pata nahin hota

bhiig jaane par bhī jo bujhtā na thā

aaj vo sho.ala dhuāñ hone ko hai

bhig jaane par bhi jo bujhta na tha

aaj wo shoala dhuan hone ko hai

shāyad nikal hī aa.e koī chāragar 'figār'

ik baar aur dekh sadā kar ke shahr meñ

shayad nikal hi aae koi chaaragar 'figar'

ek bar aur dekh sada kar ke shahr mein

machaltī shoḳh maujoñ ko maiñ apne naam kyuuñ likkhūñ

ki āḳhir ḳhushk hogā mausam-e-barsāt kā dariyā

machalti shoKH maujon ko main apne nam kyun likkhun

ki aaKHir KHushk hoga mausam-e-barsat ka dariya