umr se dhokā khā ga.e parkhā nahīñ zamīr

bachcha bachcha hī rahā baḌhtā rahā sharīr

umr se dhoka kha gae parkha nahin zamir

bachcha bachcha hi raha baDhta raha sharir

mullā panDit sab yahāñ karte rahe fareb

soch rahā newton vahāñ girtā kyoñ hai seb

mulla panDit sab yahan karte rahe fareb

soch raha newton wahan girta kyon hai seb

apnī zid kī aag meñ zaḳhmī kiye gulāb

ik vahshī ne Daal kar kaliyoñ par tezāb

apni zid ki aag mein zaKHmi kiye gulab

ek wahshi ne Dal kar kaliyon par tezab

masjid meñ paidā huā sīkhī vahī zabān

totā mandir pe chaḌhā dene lagā azaan

masjid mein paida hua sikhi wahi zaban

tota mandir pe chaDha dene laga azan

maz.hab ne jo Thoñk dī hilī nahīñ vo kiil

qudrat har maḳhlūq ko roz kare tabdīl

mazhab ne jo Thonk di hili nahin wo kil

qudrat har maKHluq ko roz kare tabdil