اب ترا رستہ جدا میرا جدا

دیکھ قسمت کا لکھا ہوتے ہوئے

صاحبو میں نے تراشے نہیں پتھر کے صنم

میرے ہاتھوں سے بنا اور بنا ایک ہی شخص

جہاں تک ہو سکے خود کو بچا بدنام ہونے سے

محبت ختم ہوتی ہے محبت عام ہونے سے

بہت اچھا بہت اچھا بہت اچھا ہے تو لیکن

تجھے کوئی کہے اچھا مجھے اچھا نہیں لگتا

بس اتنا سا ہے خلاصہ مری کہانی کا

کہ ابتدا تری آنکھیں ہیں انتہا مرا عشق

ایسے ملیں کہ ہم کو بچھڑنے کا ڈر نہ ہو

وہ عشق کوئی عشق ہے جو عمر بھر نہ ہو

ابھی تو خوش ہوں ترے عشق میں بہت خوش ہوں

یہ ایک دن مرا جینا عذاب کر دے گا

حاکم شہر کی خواہش کہ حکومت کی جائے

ورنہ حالات تو ایسے ہیں کہ ہجرت کی جائے

کہیں بھی بات ہو میرا حوالہ آ ہی جاتا ہے

محبت نے بچایا ہے مجھے گمنام ہونے سے

الوداعی شام آ پہنچی یہاں

چپ ہے تو میرا خدا ہوتے ہوئے

وہ تو انجمؔ خواب تھا بس خواب تھا

کب ترا تھا وہ ترا ہوتے ہوئے

اس لیے سانپ مجھے ڈھونڈ رہے ہیں پیارے

میں مہکتا ہوں ترے ہجر میں صندل ہو کر

بالکونی پہ کھڑی لڑکیاں کب سوچتی ہیں

یہ جگہ ٹھیک نہیں آئنہ داری کے لیے

تو بتا کیسے گزاری شب ہجراں تو نے

میں تو جب رو نہ سکا میں نے غزل خوانی کی

اس لیے کشکول میں پڑتی ہے بھیک

ہم نے ہے لاٹھی سے لٹکایا ہوا

مرے پنجرے کو توڑتے کیوں ہو

جب میں آزاد ہو نہیں سکتا

گلاب رت کی طرح عرصۂ جمال میں آ

ہوائے غم سے نکل موسم وصال میں آ

ان کی چہکار سے یادوں میں خلل پڑتا ہے

گھر کی دیوار سے چڑیوں کو اڑا دو انجمؔ

عشق وقت دگر پہ کیوں چھوڑیں

یہ ترے بعد ہو نہیں سکتا

تو زندگی کا مری انتساب ہے مرے دوست

سو تیرے نام ہی پہلی کتاب ہے مرے دوست

میں چاہتا ہوں کہ تجھ سا دکھائی دوں میں بھی

جمال یار کبھی میرے خد و خال میں آ

اب تو ہوائے شہر بھی بالکل تری طرح

یہ چاہتی ہے کوئی دیا بام پر نہ ہو

میں اگر حرف غلط تھا تو لکھا ہی کیوں تھا

لکھ دیا ہے تو خدارا نہ مٹایا جائے