yahāñ ġharīb ko sab kuchh to de diyā us ne

zamīñ bichhā.e hai aur āsmān oḌhe hai

yahan gharib ko sab kuchh to de diya us ne

zamin bichhae hai aur aasman oDhe hai

maiñ to niklā thā charāġhoñ ko jalāne ke liye

log kam-zarf the dāman ko bachā kar bhāge

main to nikla tha charaghon ko jalane ke liye

log kam-zarf the daman ko bacha kar bhage

dariyā chaḌhā to gaañv ke gaañv bahā gayā

utrā to kitne shahr ke naqshe banā gayā

dariya chaDha to ganw ke ganw baha gaya

utra to kitne shahr ke naqshe bana gaya

kabhī to baaḌh aa ke apne saath sab bahā ga.ī

kabhī kisān bārishoñ kī raah dekhtā rahā

kabhi to baDh aa ke apne sath sab baha gai

kabhi kisan barishon ki rah dekhta raha

us ko ye dil bhuul sakegā mushkil lagtā hai

mushkil se to jā ke kisī se ye dil lagtā hai

us ko ye dil bhul sakega mushkil lagta hai

mushkil se to ja ke kisi se ye dil lagta hai

ḳhudā hamārī samā'at ko jab rasā.ī de

vo jo bhī soche hameñ duur se sunā.ī de

KHuda hamari sama'at ko jab rasai de

wo jo bhi soche hamein dur se sunai de

mere us ke darmiyāñ kuchh bad-gumānī aa ga.ī

phir haqīqat meñ vahī jhūTī kahānī aa ga.ī

mere us ke darmiyan kuchh bad-gumani aa gai

phir haqiqat mein wahi jhuTi kahani aa gai

har gaam pe dushvārī har moḌ pe pahre haiñ

ab aap se milne ke din kitne sunahre haiñ

har gam pe dushwari har moD pe pahre hain

ab aap se milne ke din kitne sunahre hain

hameñ ḳhabar na huī aur raat aa pahuñchī

kahāñ se dekho kahāñ tak hayāt aa pahuñchī

hamein KHabar na hui aur raat aa pahunchi

kahan se dekho kahan tak hayat aa pahunchi

qātil ho tum haar na maano

jaan hai mujh meñ baaqī aur

qatil ho tum haar na mano

jaan hai mujh mein baqi aur

aaj vo kuchh aur bhī achchhā lagā

us kā chehra mujh ko ā.īna lagā

aaj wo kuchh aur bhi achchha laga

us ka chehra mujh ko aaina laga

achchhe logoñ se mil-jul kar dekho nā

ham bhī haiñ ham se bhī khul kar dekho nā

achchhe logon se mil-jul kar dekho na

hum bhi hain hum se bhi khul kar dekho na

zehn meñ ek baat baiTh ga.ī

ab vo utre to koī baat kareñ

zehn mein ek baat baiTh gai

ab wo utre to koi baat karen

ye kaise log haiñ ye kaun sī 'adāvat hai

zarā sī baat meñ jo ḳhāndān tak jaa.eñ

ye kaise log hain ye kaun si 'adawat hai

zara si baat mein jo KHandan tak jaen

raaz hai lekin phir bhī tum ko sachchī baat batāte haiñ

apne ghar ke diye se aksar haath mire jal jaate haiñ

raaz hai lekin phir bhi tum ko sachchi baat batate hain

apne ghar ke diye se aksar hath mere jal jate hain

hamāre naam ye paiġhām thā ki jal jaao

aur us ke naam ke aage bahār likkhā thā

hamare nam ye paigham tha ki jal jao

aur us ke nam ke aage bahaar likkha tha

use hunar hai nigāhoñ se baat karne kā

maiñ be-zabān sā lagtā huuñ ye zabān liye

use hunar hai nigahon se baat karne ka

main be-zaban sa lagta hun ye zaban liye

zamīn paaoñ meñ aur sar pe āsmān liye

bhaTak rahā huuñ maiñ itnā baḌā makān liye

zamin paon mein aur sar pe aasman liye

bhaTak raha hun main itna baDa makan liye

dar-e-rasā.ī bhī ab band ho gayā varna

ham apnī aañkh se us kī zabān tak jaa.eñ

dar-e-rasai bhi ab band ho gaya warna

hum apni aankh se us ki zaban tak jaen

merī āñkhoñ meñ ga.ī raat kā manzar rakh de

maiñ huuñ qatra mire pahlū meñ samundar rakh de

meri aankhon mein gai raat ka manzar rakh de

main hun qatra mere pahlu mein samundar rakh de

jab itne shauq se duniyā na.ī basā.ī thī

kisī charāġh se phir shart kyuuñ lagā.ī thī

jab itne shauq se duniya nai basai thi

kisi charagh se phir shart kyun lagai thi

kuchh aisā pyaas kā ġhalba thā har taraf taarī

har ek aañkh se lab tak furāt aa pahuñchī

kuchh aisa pyas ka ghalba tha har taraf tari

har ek aankh se lab tak furaat aa pahunchi

maiñ sūraj thā mujh ko raat bhigo Daalā

shabnam ne saarā manzar hī dho Daalā

main suraj tha mujh ko raat bhigo Dala

shabnam ne sara manzar hi dho Dala

raushnī us ghar kī zīnat ban ga.ī

mere ghar sūraj pe phir pahrā lagā

raushni us ghar ki zinat ban gai

mere ghar suraj pe phir pahra laga

apne hāthoñ se zahr mat diije

ye kahīñ zindagī na ban jaa.e

apne hathon se zahr mat dije

ye kahin zindagi na ban jae

hamāre us ke darmiyāñ ye kaisā fāsla rahā

use bhī sab ḳhabar rahī hameñ bhī sab patā rahā

hamare us ke darmiyan ye kaisa fasla raha

use bhi sab KHabar rahi hamein bhi sab pata raha