برائے نام سہی کوئی مہربان تو ہے

ہمارے سر پہ بھی ہونے کو آسمان تو ہے

یہ اور بات کہ وہ اب یہاں نہیں رہتا

مگر یہ اس کا بسایا ہوا مکان تو ہے

زندگی مجھ کو مری نظروں میں شرمندہ نہ کر

مر چکا ہے جو بہت پہلے اسے زندہ نہ کر

زندگی جس کے تصور میں بسر کی ہم نے

ہائے وہ شخص حقیقت میں کہانی نکلا

گمان ہی اثاثہ تھا یقین کا

یقین ہی گمان میں نہیں رہا

جو اپنے آپ سے بڑھ کر ہمارا اپنا تھا

اسے قریب سے دیکھا تو دور کا نکلا

شاید کوئی کمی میرے اندر کہیں پہ ہے

میں آسماں پہ ہوں مرا سایہ زمیں پہ ہے

ہوس کا رنگ چڑھا اس پہ اور اتر بھی گیا

وہ خود ہی جمع ہوا اور خود بکھر بھی گیا

مجھے کسی نے سنا ہی نہیں توجہ سے

میں بد زبان صدائے کرخت ہوں شاید

مری تلاش میں ہے کوئی ایسا لگتا ہے

کسی کا گم شدہ شادابؔ رخت ہوں شاید

ہوا جو سہل اس کے گھر کا راستہ

مزہ ہی کچھ تکان میں نہیں رہا

ہر ایک لمحہ سروں پہ ہے سانحہ ایسا

ہر ایک سانس گزرتی ہے حادثات ایسی

میں اپنے آپ کو کس طرح سنگسار کروں

مرے خلاف مرا دل اگر گواہی دے

آندھیاں سب کچھ اڑا کر لے گئیں

پیڑ پر پتہ نہ پھل دامن میں تھا

تھا جس پہ میری زندگی کا انحصار

اسی کا نام دھیان میں نہیں رہا

ہے لفظ و معنی کا رشتہ زوال آمادہ

خیال پیدا ہوا بھی نہ تھا کہ مر بھی گیا