tumhārī yaad meñ duniyā ko huuñ bhulā.e hue

tumhāre dard ko siine se huuñ lagā.e hue

tumhaari yaad mein duniya ko hun bhulae hue

tumhaare dard ko sine se hun lagae hue

ye husn-e-dil-fareb ye aalam shabāb kā

goyā chhalak rahā hai piyāla sharāb kā

ye husn-e-dil-fareb ye aalam shabab ka

goya chhalak raha hai piyala sharab ka

jis husn kī hai chashm-e-tamannā ko justujū

vo āftāb meñ hai na hai māhtāb meñ

jis husn ki hai chashm-e-tamanna ko justuju

wo aaftab mein hai na hai mahtab mein

saarī duniyā se be-niyāzī hai

vaah ai mast-e-nāz kyā kahnā

sari duniya se be-niyazi hai

wah ai mast-e-naz kya kahna

tere shabāb ne kiyā mujh ko junūñ se āshnā

mere junūñ ne bhar diye rañg tirī shabāb meñ

tere shabab ne kiya mujh ko junun se aashna

mere junun ne bhar diye rang teri shabab mein

aah kyā kyā ārzūeñ nazr-e-hirmāñ ho ga.iiñ

roiye kis kis ko aur kis kis kā mātam kījiye

aah kya kya aarzuen nazr-e-hirman ho gain

roiye kis kis ko aur kis kis ka matam kijiye

sajde ke daaġh se na huī āshnā jabīñ

begāna-vār guzre har ik āstāñ se ham

sajde ke dagh se na hui aashna jabin

begana-war guzre har ek aastan se hum

ilāhī kashti-e-dil bah rahī hai kis samundar meñ

nikal aatī haiñ maujeñ ham jise sāhil samajhte haiñ

ilahi kashti-e-dil bah rahi hai kis samundar mein

nikal aati hain maujen hum jise sahil samajhte hain

jahāñ pe chhāyā sahāb-e-mastī baras rahī hai sharāb-e-mastī

ġhazab hai rañg-e-shabāb-e-mastī ki rind o zāhid bahak rahe haiñ

jahan pe chhaya sahab-e-masti baras rahi hai sharab-e-masti

ghazab hai rang-e-shabab-e-masti ki rind o zahid bahak rahe hain