ہم جو ٹوٹے ہیں بتا ہار بھلا کس کی ہوئی

زندگی تیری اٹھائی ہوئی سوگند تھے ہم

اب کے تعبیر مسئلہ نہ رہے

یہ جو دنیا ہے اس کو خواب کرو

مسکرانے کا فن تو بعد کا ہے

پہلے ساعت کا انتخاب کرو

سمندر ہے کوئی آنکھوں میں شاید

کناروں پر چمکتے ہیں گہر سے

ایک نشہ ہے خود نمائی بھی

جو یہ اترے تو پھر تجھے دیکھوں

کشش تجھ سی نہ تھی تیرے غموں میں

لب و لہجہ مگر ہاں ہو بہ ہو تھا

ملے اب کے تو روئے ٹوٹ کر ہم

گناہ اپنی سزا کے رو بہ رو تھا

ہوس شامل ہے تھوڑی سی دعا میں

ابھی اس لو میں ہلکا سا دھواں ہے

میں سارے فاصلے طے کر چکا ہوں

خودی جو درمیاں تھی درمیاں ہے

زیر لب رکھ چھپا کے نام اس کا

لفظ ہوتے ہیں کچھ بیاں سے خراب

شام اتری ہے پھر احاطے میں

جسم پر روشنی کے گھاؤ لیے

سمت دنیا کے ہم گئے ہی نہیں

اس علاقے سے دشمنی سی رہی

وہی آنسو وہی ماضی کے قصے

جسے دیکھو کٹے کو کاٹتا ہے

اتر جاتا تو رسوائی بہت ہوتی

کہ سر کا بوجھ بھی دستار جیسا تھا

ہمیں اس طرح ہی ہونا تھا آباد

ہمارے ساتھ ویرانے لگے ہیں

بعد مدت یہ جلا کس کے ہنر نے بخشی

بعد مدت مرے آئینے میں چہرہ آئے

خواب ندی سا گزر جائے گا

دشت آنکھوں میں ٹھہر جانا ہے

اور کچھ دیر غم نظر میں رکھ

کیا خبر مل ہی جائے تھاہ کہیں

آئنہ میں ہے پھر وہی صورت

یوں ہی ہوتی ہے ترجمانی کیا

تعلق ترک تو کر لیں سبھی سے

بھلے لگتے ہیں کچھ نقصان لیکن