فائز دہلوی کا ذکر عام طور پر تذکروں میں موجود نہیں صرف کریم الدین نے مختصر طور پر ان کا ذکر کیا ہے ۔ نام ان کا صدالدین محمد خاں بن زبردست خاں بن ابراہیم خاں بن مردان علی خاں تھا ۔ دہلی کے منصب داروں میں سے تھے فارسی کے شاعر تھے ۔ ولیؔ کے دیوان نے دوسروں کی طرح ان پر بھی اثر کیا اور اپنے دیوان پر جو وہ 1127ھ مطابق1715ء میں مکمل کرچکے تھے ۔1142ھ مطابق 1729ء میں نظر ثانی کی ۔ اردو کے کلام میں چند مثنویاں اور متعدد غزلیں پائی جاتی ہیں اردو کی غزلیں بیش تر ولیؔ کی غزلوں پر ہیں ۔ماہ صفر1151ھ مطابق1738ء میں وفات پائی ۔