kisī kī qabr pe jaise nishānī rakkhī ho

kuchh is tarah se tirā ġham ḳhushī pe rakkhā hai

kisi ki qabr pe jaise nishani rakkhi ho

kuchh is tarah se tera gham KHushi pe rakkha hai

bachā huā thā mire paas ek shaḳhs 'umar'

use bhī mujh se magar janvarī ne chhīn liyā

bacha hua tha mere pas ek shaKHs 'umar'

use bhi mujh se magar janwari ne chhin liya

vo pal sukūñ kā kahtā hai saarā jahāñ jise

allāh jāntā hai tire bin nahīñ milā

wo pal sukun ka kahta hai sara jahan jise

allah jaanta hai tere bin nahin mila

ġhazal rakhā hai tirā naam is liye mujh ko

sabhī pukārte haiñ ‘āshiq-e-ġhazal keh kar

ghazal rakha hai tera nam is liye mujh ko

sabhi pukarte hain ‘ashiq-e-ghazal keh kar

vo log bhī firāq pe kahne lage ġhazal

do din bhī Thiik se jo alam meñ nahīñ rahe

wo log bhi firaq pe kahne lage ghazal

do din bhi Thik se jo alam mein nahin rahe

maiñ us maqām pe huuñ hijr meñ jahāñ mujh ko

kisī kī baat pe hañsnā bhī jurm lagtā hai

main us maqam pe hun hijr mein jahan mujh ko

kisi ki baat pe hansna bhi jurm lagta hai

tire firāq meñ terī hī guftugū kar ke

phaTā libās pahantā rahā rafū kar ke

tere firaq mein teri hi guftugu kar ke

phaTa libas pahanta raha rafu kar ke

agar tū qalb meñ mere makīñ nahīñ hotā

to mujh ko 'ishq pe bilkul yaqīñ nahīñ hotā

agar tu qalb mein mere makin nahin hota

to mujh ko 'ishq pe bilkul yaqin nahin hota

ye tarbiyat hai mirī aap aap kartā huuñ

bhale hī aap kareñ baat mujh se tū kar ke

ye tarbiyat hai meri aap aap karta hun

bhale hi aap karen baat mujh se tu kar ke