اب اس مقام پہ ہے موسموں کا سرد مزاج

کہ دل سلگنے لگے اور دماغ جلنے لگے

ہے میری آنکھوں میں عکس نوشتہ دیوار

سمجھ سکو تو مرا نطق بے زباں لے لو

حوصلہ سب نے بڑھایا ہے مرے منصف کا

تم بھی انعام کوئی میری سزا پر لکھ دو

اب مجھ سے سنبھلتی نہیں یہ درد کی سوغات

لے تجھ کو مبارک ہو سنبھال اپنی یہ دنیا

مرے سجدے کبھی رسوا نہ ہوں گے

تمہارا سنگ در ہو جاؤں گا میں

یوں بھی کیا ہے ہم نے حق دلبری ادا

اپنی ہی جیت اپنے ہی ہاتھوں سے ہار دی

متاع درد مآل حیات ہے شاید

دل شکستہ مری کائنات ہے شاید

ہوں واردات کا عینی گواہ میں مجھ سے

یہ میری موت سے پہلے مرا بیاں لے لو

تجھے خبر ہی نہیں ہے یہ قصۂ کوتاہ

جہاں پہ بت نہ گرے کب وہاں حرم اترا

انہیں گماں کہ مجھے ان سے ربط ہے سالمؔ

مجھے یہ وہم انہیں التفات ہے شاید

عام ہے اذن کہ جو چاہو ہوا پر لکھ دو

عشق زندہ ہے ذرا دست صبا پر لکھ دو

عکس کچھ نہ بدلے گا آئنوں کو دھونے سے

آذری نہیں آتی پتھروں پہ رونے سے

ہیں ان میں بند کسی عہد رستخیز کے عکس

یہ میری آنکھیں عجائب گھروں میں رکھ آنا

گزر کر دشت سے سالمؔ جنوں کے

سفر کی آبرو ہو جاؤں گا میں

شوق بے حد نے کسی گام ٹھہرنے نہ دیا

ورنہ کس گام مرا خون تمنا نہ ہوا