kāmyābī kī duā.eñ mujhe dene vaale

maiñ tire ishq meñ nākām huā jaatā huuñ

kaamyabi ki duaen mujhe dene wale

main tere ishq mein nakaam hua jata hun

falak pe bhiiḌ lagī thī shikasta aahoñ kī

duā se pahle mujhe rāsta banānā paḌā

falak pe bhiD lagi thi shikasta aahon ki

dua se pahle mujhe rasta banana paDa

tumhārī yaad kī shiddat meñ bahne vaalā ashk

zamīñ meñ bo diyā jaa.e to aañkh ug aa.e

tumhaari yaad ki shiddat mein bahne wala ashk

zamin mein bo diya jae to aankh ug aae

achchhā tirī nazar meñ bahut muḳhtalif huuñ maiñ

ya.anī tirī nazar meñ koī dūsrā bhī hai

achchha teri nazar mein bahut muKHtalif hun main

yani teri nazar mein koi dusra bhi hai

vo mujh ko dekhne mere qarīb aayā hai

ye dhund saare mahīnoñ meñ kyuuñ nahīñ paḌtī

wo mujh ko dekhne mere qarib aaya hai

ye dhund sare mahinon mein kyun nahin paDti

añdherī shab kā safar thā havā thī sahrā thā

diye ko maiñ ne bachāyā thā aur diye ne mujhe

andheri shab ka safar tha hawa thi sahra tha

diye ko main ne bachaya tha aur diye ne mujhe

pahle kī baat aur hai jab dil meñ the muqīm

ab tum ragoñ meñ dauḌte ho ḳhuun kī tarah

pahle ki baat aur hai jab dil mein the muqim

ab tum ragon mein dauDte ho KHun ki tarah

maiñ chaah kar bhī use kuchh na de sakā 'hāris'

vo bhaav pūchh ke merī dukāñ se lauT gayā

main chah kar bhi use kuchh na de saka 'haaris'

wo bhaw puchh ke meri dukan se lauT gaya

ye rivāyat hai kitāboñ meñ utāre jaa.eñ

vo jo ḳhushbū ke safar meñ kahīñ maare jaa.eñ

ye riwayat hai kitabon mein utare jaen

wo jo KHushbu ke safar mein kahin mare jaen

vo añdherā hai ki bujhtī huī āñkheñ mujh se

pūchhtī haiñ ki vo aa.egā saverā hogā

wo andhera hai ki bujhti hui aankhen mujh se

puchhti hain ki wo aaega sawera hoga

milī haiñ sūkhte dariyā ko bahr kī lahreñ

tire gilass meñ paanī piyā hai shahzādī

mili hain sukhte dariya ko bahr ki lahren

tere gilass mein pani piya hai shahzadi

ya.anī darvāza bhī ik ism hai jis ko paḌh kar

log dīvār ke andar se guzāre jaa.eñ

yani darwaza bhi ek ism hai jis ko paDh kar

log diwar ke andar se guzare jaen

saarī hisoñ kī Dor samā.at ko sauñp kar

is dil pe kaan rakh ki ḳhudā boltā bhī hai

sari hison ki Dor samaat ko saunp kar

is dil pe kan rakh ki KHuda bolta bhi hai

phir is ke ba.ad se muḌ kar bhī dekhtā huuñ maiñ

kisī kiran se milāyā thā aa.ine ne mujhe

phir is ke baad se muD kar bhi dekhta hun main

kisi kiran se milaya tha aaine ne mujhe

vo darmiyān se niklā to ye khulā mujh par

ki ho ga.e haiñ musallat ka.ī ḳhudā mujh par

wo darmiyan se nikla to ye khula mujh par

ki ho gae hain musallat kai KHuda mujh par