پڑھتا رہتا ہوں آپ کا چہرہ

اچھی لگتی ہے یہ کتاب مجھے

انکار ہی کر دیجیے اقرار نہیں تو

الجھن ہی میں مر جائے گا بیمار نہیں تو

دن میں آنے لگے ہیں خواب مجھے

اس نے بھیجا ہے اک گلاب مجھے

چند یادیں ہیں چند سپنے ہیں

اپنے حصے میں اور کیا ہے جی

سخت جانی کی بدولت اب بھی ہم ہیں تازہ دم

خشک ہو جاتے ہیں ورنہ پیڑ ہل جانے کے بعد

جی چاہتا ہے جینا جذبات کے مطابق

حالات کر رہے ہیں حالات کے مطابق

اک بڑی جنگ لڑ رہا ہوں میں

ہنس کے تجھ سے بچھڑ رہا ہوں میں

اس شوخئ گفتار پر آتا ہے بہت پیار

جب پیار سے کہتے ہیں وہ شیطان کہیں کا

تم نے رسماً مجھے سلام کیا

لوگ کیا کیا گمان کر بیٹھے

کیا بتاؤں کہ کتنی شدت سے

تم سے ملنے کو چاہتا ہے جی

راے اس پر مت کرو قائم کوئی

جانتے جس کو نہیں نزدیک سے

لے جائے جہاں چاہے ہوا ہم کو اڑا کر

ٹوٹے ہوئے پتوں کی حکایت ہی الگ ہے

ایک موسم کی کسک ہے دل میں دفن

میٹھا میٹھا درد سا ہے مستقل

کس کس کو بتاؤں کہ میں بزدل نہیں راغبؔ

اس دور میں مفہوم شرافت ہی الگ ہے

بے سبب راغبؔ تڑپ اٹھتا ہے دل

دل کو سمجھانا پڑے گا ٹھیک سے

دل میں کچھ بھی تو نہ رہ جائے گا

جب تری چاہ نکل جائے گی

یہ وصل کی رت ہے کہ جدائی کا ہے موسم

یہ گلشن دل ہے کہ بیابان کہیں کا

راغبؔ وہ میری فکر میں خود کو بھی بھول جائیں

ایسی تو کوئی بات نہیں چاہتا تھا میں

کیا بتاؤں دل میں کس کی یاد کا

ایک کانٹا چبھ رہا ہے مستقل

تقدیر وفا کا پھوٹ جانا

میں بھولا نہ دل کا ٹوٹ جانا

وہ کہتے ہیں کہ راغبؔ تم نہیں رکھتے خیال اپنا

میں کہتا ہوں کہ ہر دم فکر دامن گیر کس کی ہے