mahv-e-dīdār hue jaate haiñ rah-rau saare

ik tamāsha huā goyā ruḳh-e-dilbar na huā

mahw-e-didar hue jate hain rah-rau sare

ek tamasha hua goya ruKH-e-dilbar na hua

aayā unheñ pasand to un kā hī ho gayā

kam thā hamāre dil se hamārā kalām kyā

aaya unhen pasand to un ka hi ho gaya

kam tha hamare dil se hamara kalam kya

hai fahm us kā jo har insān ke dil kī zabāñ samjhe

suḳhan vo hai jise har shaḳhs apnā hī bayāñ samjhe

hai fahm us ka jo har insan ke dil ki zaban samjhe

suKHan wo hai jise har shaKHs apna hi bayan samjhe

mohabbat meñ nahīñ hai ibtidā yā intihā koī

ham apne ishq ko hī ishq kī manzil samajhte haiñ

mohabbat mein nahin hai ibtida ya intiha koi

hum apne ishq ko hi ishq ki manzil samajhte hain

dozaḳh se bhī ḳharāb kahūñ maiñ bahisht ko

do-chār agar vahāñ pe bhī sarmāya-dār hoñ

dozaKH se bhi KHarab kahun main bahisht ko

do-chaar agar wahan pe bhi sarmaya-dar hon

ek aañsū bhī agar ro de to jānūñ tujh ko

merī taqdīr mujhe dekh kar hañstī kyā hai

ek aansu bhi agar ro de to jaanun tujh ko

meri taqdir mujhe dekh kar hansti kya hai

zamāna ye aa gayā hai 'rahbar' ki ahl-e-bīnash ko kaun pūchhe

jame haiñ makkār kursiyoñ par dikhā rahe haiñ gañvār āñkheñ

zamana ye aa gaya hai 'rahbar' ki ahl-e-binash ko kaun puchhe

jame hain makkar kursiyon par dikha rahe hain ganwar aankhen

farishta har bashar ko har zamīñ ko āsmāñ samjhe

ki ham to ishq meñ duniyā ko hī jannat-nishāñ samjhe

farishta har bashar ko har zamin ko aasman samjhe

ki hum to ishq mein duniya ko hi jannat-nishan samjhe

kaisī kashish hai ishq ke TuuTe mazār meñ

mela lagā huā hai hamāre dayār meñ

kaisi kashish hai ishq ke TuTe mazar mein

mela laga hua hai hamare dayar mein

tū ne hī rah na dikhā.ī to dikhā.egā kaun

ham tirī raah meñ gumrāh hue baiThe haiñ

tu ne hi rah na dikhai to dikhaega kaun

hum teri rah mein gumrah hue baiThe hain

vahī sifteñ jo batlātā hai tū vaa.iz sab us meñ haiñ

diyā hai jis ko dil ham ne vahī terā ḳhudā hogā

wahi siften jo batlata hai tu waiz sab us mein hain

diya hai jis ko dil hum ne wahi tera KHuda hoga

ham rū-ba-rū-e-sham.a haiñ is intizār meñ

kuchh jaañ paroñ meñ aa.e to uḌ kar nisār hoñ

hum ru-ba-ru-e-shama hain is intizar mein

kuchh jaan paron mein aae to uD kar nisar hon

khiñchte jaate haiñ ḳhud mirī jānib

mujh ko jyuuñ jyuuñ vo āzmāte haiñ

khinchte jate hain KHud meri jaanib

mujh ko jyun jyun wo aazmate hain

tañg paimā.ī kā shikva sāqī-e-azalī se kiyā

ham ne samjhā hī nahīñ dastūr-e-mai-ḳhāna abhī

tang paimai ka shikwa saqi-e-azali se kiya

hum ne samjha hi nahin dastur-e-mai-KHana abhi

mohabbat sī shai us ne mujh ko atā kī

ki ḳhush ḳhush chalūñ umr barbād kar ke

mohabbat si shai us ne mujh ko ata ki

ki KHush KHush chalun umr barbaad kar ke

chhupe haiñ saat pardoñ meñ ye sab kahne kī bāteñ haiñ

unheñ merī nigāhoñ ne jahāñ DhūñDā vahāñ nikle

chhupe hain sat pardon mein ye sab kahne ki baaten hain

unhen meri nigahon ne jahan DhunDa wahan nikle

suḳhan-sāzī meñ lāzim hai kamāl-e-ilm-o-fan honā

mahz tuk-bandiyoñ se koī shā.er ho nahīñ saktā

suKHan-sazi mein lazim hai kamal-e-ilm-o-fan hona

mahz tuk-bandiyon se koi shaer ho nahin sakta

har shai meñ har bashar meñ nazar aa rahā hai tū

sajde meñ apne sar ko jhukā.ūñ kahāñ kahāñ

har shai mein har bashar mein nazar aa raha hai tu

sajde mein apne sar ko jhukaun kahan kahan

āñkhoñ āñkhoñ meñ pilā dī mire saaqī ne mujhe

ḳhauf-e-zillat hai na andesha-e-rusvā.ī hai

aankhon aankhon mein pila di mere saqi ne mujhe

KHauf-e-zillat hai na andesha-e-ruswai hai

phir vahī saudā vahī vahshat vahī tarz-e-jūn.un

haiñ nishāñ maujūd saare ishq kī tāsīr ke

phir wahi sauda wahi wahshat wahi tarz-e-junun

hain nishan maujud sare ishq ki tasir ke

qudrat kī barkateñ haiñ ḳhazāna basant kā

kyā ḳhuub kyā ajiib zamāna basant kā

qudrat ki barkaten hain KHazana basant ka

kya KHub kya ajib zamana basant ka

dil ko bahut aziiz hai aanā basant kā

'rahbar' kī zindagī meñ samānā basant kā

dil ko bahut aziz hai aana basant ka

'rahbar' ki zindagi mein samana basant ka

paiġhām-e-lutf-e-ḳhās sunānā basant kā

dariyā-e-faiz-e-ām bahānā basant kā

paigham-e-lutf-e-KHas sunana basant ka

dariya-e-faiz-e-am bahana basant ka

har samt sabza-zār bichhānā basant kā

phūloñ meñ rañg-o-bū ko luTānā basant kā

har samt sabza-zar bichhana basant ka

phulon mein rang-o-bu ko luTana basant ka

tasvīr-e-rū-e-yār dikhānā basant kā

aTkheliyoñ se dil ko lubhānā basant kā

taswir-e-ru-e-yar dikhana basant ka

aTkheliyon se dil ko lubhana basant ka

rashk-e-jināñ chaman ko banānā basant kā

har har kalī meñ rañg dikhānā basant kā

rashk-e-jinan chaman ko banana basant ka

har har kali mein rang dikhana basant ka

dil us kā jigar us kā hai jaañ us kī ham us ke

kis baat se inkār kiyā jaa.e kisī ko

dil us ka jigar us ka hai jaan us ki hum us ke

kis baat se inkar kiya jae kisi ko