میں سامنے ہوں ابھی گفتگو کرو مجھ سے

کہ بعد میں مری تصویر دیکھتے رہنا

اپنی پلکیں جھکا رہی ہوں میں

کوئی آنسو بچا رہی ہوں میں

اس سے باتیں تو بہت کرنی تھیں پر سوچ لیا

اس کی ہر بات پہ کہنا ہے کوئی بات نہیں

سچ پوچھو تو ہم کو ہماری

آنکھوں نے برباد کیا ہے

سچ پوچھو تو ہم کو ہماری

آنکھوں نے برباد کیا ہے

ہم نے اشک بہائے کب ہیں

پانی کو آزاد کیا ہے

خدا کا شکر ہے اس رابطے پر

اسے منزل مجھے رستہ بنایا

پہلے اس کو یاد کیا ہے

پھر آنسو ایجاد کیا ہے

مان لیتی میں کہا اس کا مگر

وہ گزارش کر رہا ہے ضد نہیں

تمام رات میں خود سے سوال کرتی رہی

جسے چھوا ہو حقیقت میں خواب کیسے ہوا

میں نے اسرار اذیت میں ہی کھلتے دیکھے

بات چھوٹی ہے مگر سب کو بتا دی جائے

ایسا ویسا کوئی نہ سمجھے مجھے

میرؔ غالبؔ کی شاعری ہوں میں

میں اپنی آنکھوں سے دنیا کو جیت لاؤں گی

تو میرے پاؤں کی زنجیر دیکھتے رہنا

تجھ کو دیکھوں تو یہی سوچتی ہوں میں اکثر

دیکھ حیراں مجھے حیران کوئی اور نہ ہو

جس کے چہرے پہ میں مرتی ہوں ستم تو یہ ہے

اس کی تصویر ہی البم میں مرے ساتھ نہیں

موج دریا کی جسے چھوتی نہ ہو

اس کنارے سے کنارا کر رہے ہیں

یوں ہی تھوڑی وہ مل گیا مجھ کو

مدتوں لاپتا رہی ہوں میں

کبھی دریا کبھی صحرا بنایا

کسی کے عشق نے کیا کیا بنایا

کتنے چہرے ہیں مصور کے تصور میں نہاں

پر وہ تصویر بناتا ہے مجھے صرف مجھے

دستور ہی الگ ہے تری بزم ناز کا

الزام دے کے کہہ دیا الزام ہی تو ہے

اسی کے چہرے پہ آنکھیں ہماری رہ جائیں

کسی کو اتنا بھی کیا دیکھنا ضروری ہے

سامنے آئے بنا اس سے مخاطب رہنا

ایک جادو ہے جو آتا ہے مجھے صرف مجھے