sard ho saktā nahīñ sargarm insāñ kā lahū

hādisāt-e-nau-ba-nau meñ zindagānī ho to kyā

sard ho sakta nahin sargarm insan ka lahu

hadisat-e-nau-ba-nau mein zindagani ho to kya

apnā jiinā ek dhokā apnā marnā ik fareb

zindagī se zindagī kī tarjumānī ho to kyā

apna jina ek dhoka apna marna ek fareb

zindagi se zindagi ki tarjumani ho to kya

kuchh nahīñ hai tire hāthoñ meñ lakīroñ ke sivā

baat nāseh kī hai lekin ḳhat-e-taqdīr bhī hai

kuchh nahin hai tere hathon mein lakiron ke siwa

baat naseh ki hai lekin KHat-e-taqdir bhi hai

hujūm-e-nāz meñ jalva-farebiyoñ ke sivā

'kalīm' aur koī hādisa huā to nahīñ

hujum-e-naz mein jalwa-farebiyon ke siwa

'kalim' aur koi hadisa hua to nahin

ġham natīja hai ḳhushī kī intihā kā ai 'kalīm'

dil kī ik ik mauj mauj-e-shādmānī ho to kyā

gham natija hai KHushi ki intiha ka ai 'kalim'

dil ki ek ek mauj mauj-e-shadmani ho to kya

kis tarah ishq-e-majāzī ko haqīqī kar luuñ

sāmne tū hai baġhal meñ tirī tasvīr bhī hai

kis tarah ishq-e-majazi ko haqiqi kar lun

samne tu hai baghal mein teri taswir bhi hai

dahr kī fazāoñ meñ kaun raqs kartā hai

kaun kar rahā hai yuuñ aap apnī rusvā.ī

dahr ki fazaon mein kaun raqs karta hai

kaun kar raha hai yun aap apni ruswai

fareb khaa.e na kyuuñ kar kisī kā saada dil

zamāna-sāz nigāhoñ se āshnā to nahīñ

fareb khae na kyun kar kisi ka sada dil

zamana-saz nigahon se aashna to nahin

kahīñ girī to hai bijlī zarā nazar kiije

kisī ġharīb kī palTī huī duā to nahīñ

kahin giri to hai bijli zara nazar kije

kisi gharib ki palTi hui dua to nahin

hamārā maqsad-e-avval hai jazb-e-shauq-o-sar-mastī

yahī vo zindagī hai jis ko ham kāmil samajhte haiñ

hamara maqsad-e-awwal hai jazb-e-shauq-o-sar-masti

yahi wo zindagi hai jis ko hum kaamil samajhte hain

chheḌtī hai mujhe aa aa ke mirī āzādī

go maiñ qaidī huuñ mire paañv meñ zanjīr bhī hai

chheDti hai mujhe aa aa ke meri aazadi

go main qaidi hun mere panw mein zanjir bhi hai