مجھے اس خواب نے اک عرصہ تک بے تاب رکھا ہے

اک اونچی چھت ہے اور چھت پر کوئی مہتاب رکھا ہے

مرے صحن پر کھلا آسمان رہے کہ میں

اسے دھوپ چھاؤں میں بانٹنا نہیں چاہتا

ہاتھ لگاتے ہی مٹی کا ڈھیر ہوئے

کیسے کیسے رنگ بھرے تھے خوابوں میں

جہاں تم ہو وہاں سے دور پڑتی ہے زمیں میری

جہاں میں ہوں وہاں سے آسماں نزدیک پڑتا ہے

اک عرصہ بعد ہوئی کھل کے گفتگو اس سے

اک عرصہ بعد وہ کانٹا چبھا ہوا نکلا

سنا رہی ہے جسے جوڑ جوڑ کر دنیا

تمام ٹکڑے ہیں وہ میری داستان کے ہی

یہ دل حد سے گزرنا چاہتا تھا

مگر مجبور ہو کر رہ گیا ہے

افق پر ڈوبنے والا ستارا

کئی امکان روشن کر گیا ہے

زوال عہد تو شاید مجھے نہ پہچانے

میں اک حوالہ ہوں اور کربلا سے آیا ہوں

مرے اور اس کے بیچ اک دھند سی موجود رہتی ہے

یہ دنیا آ رہی ہے میرے اس کے درمیاں شاید

یہ دل یہ شہر وفا کب اسے پسند آیا

وہ بے قرار تھا اس کو یہاں سے جانا تھا

بدل لیا ہے ذرا خواب کے علاقے کو

مکاں کو چھوڑ کے اب لا مکاں میں رہتا ہوں

مکاں نزدیک ہے یا لا مکاں نزدیک پڑتا ہے

کہیں آ جاؤ مجھ کو ہر جہاں نزدیک پڑتا ہے