gardish-e-ayyām se chaltī hai nabz-e-kā.enāt

vaqt kā pahiya rukā to zindagī ruk jā.egī

gardish-e-ayyam se chalti hai nabz-e-kaenat

waqt ka pahiya ruka to zindagi ruk jaegi

ḳhud apne aap se rahtā hai aadmī nārāz

udāsiyoñ ke bhī apne mizāj hote haiñ

KHud apne aap se rahta hai aadmi naraaz

udasiyon ke bhi apne mizaj hote hain

taaza havā ḳharīdne aate haiñ gaañv meñ

'shāhid' shahar ke log bhī kaise ajiib haiñ

taza hawa KHaridne aate hain ganw mein

'shahid' shahar ke log bhi kaise ajib hain

mujh se to koī tāj-mahal bhī na ban sakā

be-nām dil kī qabr meñ dafnā diyā tujhe

mujh se to koi taj-mahal bhi na ban saka

be-nam dil ki qabr mein dafna diya tujhe

ye aur baat ki tū do qadam pe bhuul gayā

hameñ to hashr talak terā intizār rahā

ye aur baat ki tu do qadam pe bhul gaya

hamein to hashr talak tera intizar raha

ġham ko ehsās kī miTTī meñ ḳhudā ne gūñdhā

aur kuchh ashk milā.e to phir insān kiyā

gham ko ehsas ki miTTi mein KHuda ne gundha

aur kuchh ashk milae to phir insan kiya

dūsroñ kī baat aa.ī to payambar thā vo shaḳhs

apnī baarī par mohabbat se hī murtad ho gayā

dusron ki baat aai to payambar tha wo shaKHs

apni bari par mohabbat se hi murtad ho gaya

vo mujh se pyaar kab kartā hai bas miltā milātā hai

kirā.e ke makāñ meñ kab koī paudā lagātā hai

wo mujh se pyar kab karta hai bas milta milata hai

kirae ke makan mein kab koi pauda lagata hai

mirī āñkhoñ meñ kīleñ Thoñk do hoñToñ ko silvā do

basīrat jurm hai merā sadāqat merī aadat hai

meri aankhon mein kilen Thonk do honTon ko silwa do

basirat jurm hai mera sadaqat meri aadat hai

rail kī paTrī fasurda shaam terā suitcase

phir se āñkhoñ meñ tire jaane kā manzar aa gayā

rail ki paTri fasurda sham tera suitcase

phir se aankhon mein tere jaane ka manzar aa gaya

paḌhtā hai baḌe shauq se vo merī kitābeñ

jis baat se Dartā huuñ vahī baat na paḌh le

paDhta hai baDe shauq se wo meri kitaben

jis baat se Darta hun wahi baat na paDh le

mujhe ḳhāmoshiyāñ paḌhne kā fan aatā to paḌh letā

tumhārī jhiil sī ḳhāmosh āñkhoñ kī pashemānī

mujhe KHamoshiyan paDhne ka fan aata to paDh leta

tumhaari jhil si KHamosh aankhon ki pashemani

chhiḌkā gayā hai zahr fazāoñ meñ is tarah

maaoñ ne apnī kokh se būḌhe janam diye

chhiDka gaya hai zahr fazaon mein is tarah

maon ne apni kokh se buDhe janam diye

bāñdh ke ahd-e-vafā log chale jaate haiñ

chhoḌ jaate haiñ faqat jism kī uljhī gāñTheñ

bandh ke ahd-e-wafa log chale jate hain

chhoD jate hain faqat jism ki uljhi ganThen

ab ke ummīd-e-vafā bāñdh rahā huuñ jis se

log kahte haiñ ki vo shaḳhs bhī harjā.ī hai

ab ke ummid-e-wafa bandh raha hun jis se

log kahte hain ki wo shaKHs bhi harjai hai

mohabbat ruup meñ Dhaltī to vo ik devtā hotā

maiñ us ko pūjne lagtā agar vo bā-vafā hotā

mohabbat rup mein Dhalti to wo ek dewta hota

main us ko pujne lagta agar wo ba-wafa hota

jaane haiñ kis hasīn ta'alluq kī yādgār

mujh ko bahut aziiz haiñ merī ye vahshateñ

jaane hain kis hasin ta'alluq ki yaadgar

mujh ko bahut aziz hain meri ye wahshaten

ishtiyāq-e-raqs meñ had se nikalte jā rahe

dā.ere ko khīñch kar auqāt meñ laanā paḌā

ishtiyaq-e-raqs mein had se nikalte ja rahe

daere ko khinch kar auqat mein lana paDa

mire vijdāñ kī girheñ kholtā hai

mirā ham-zād mujh meñ boltā hai

mere wijdan ki girhen kholta hai

mera ham-zad mujh mein bolta hai

vo shaḳhs bol rahā thā ḳhudā ke lahje meñ

maiñ sun rahā thā magar maiñ kalīm-e-vaqt na thā

wo shaKHs bol raha tha KHuda ke lahje mein

main sun raha tha magar main kalim-e-waqt na tha

mujh se lipTā hai amarbel ke mānind koī

mujh ko be-barg na kartā to samar detā kyā

mujh se lipTa hai amarbel ke manind koi

mujh ko be-barg na karta to samar deta kya

takallum ham se kartā hai to yuuñ jaise shahanshah ko

mohabbat kā koī nusḳha qalandar pesh kartā hai

takallum hum se karta hai to yun jaise shahanshah ko

mohabbat ka koi nusKHa qalandar pesh karta hai