diye ab shahr meñ raushan nahīñ haiñ

havā kī hukmarānī ho ga.ī kyā

diye ab shahr mein raushan nahin hain

hawa ki hukmarani ho gai kya

āvāzoñ kī bhiiḌ meñ itne shor-sharābe meñ

apnī bhī ik raa.e rakhnā kitnā mushkil hai

aawazon ki bhiD mein itne shor-sharabe mein

apni bhi ek rae rakhna kitna mushkil hai

kabhī to sard lagā dopahar kā sūraj bhī

kabhī badan ke liye ik kiran ziyāda huī

kabhi to sard laga dopahar ka suraj bhi

kabhi badan ke liye ek kiran ziyaada hui

lafz bhī jis ahd meñ kho baiThe apnā e'tibār

ḳhāmushī ko is meñ kitnā mo'tabar maiñ ne kiyā

lafz bhi jis ahd mein kho baiThe apna e'tibar

KHamushi ko is mein kitna mo'tabar main ne kiya

ba-nām-e-amn-o-amāñ kaun maarā jā.egā

na jaane aaj yahāñ kaun maarā jā.egā

ba-nam-e-amn-o-aman kaun mara jaega

na jaane aaj yahan kaun mara jaega

jo baat kī thī havā meñ bikharne vaalī thī

jo ḳhat likhā thā vo purzoñ meñ baTne vaalā thā

jo baat ki thi hawa mein bikharne wali thi

jo KHat likha tha wo purzon mein baTne wala tha

safar kā marhala-e-saḳht hī ġhanīmat thā

Thahar ga.e to badan kī thakan ziyāda huī

safar ka marhala-e-saKHt hi ghanimat tha

Thahar gae to badan ki thakan ziyaada hui

jo yād-e-yār se guft-o-shunīd kar lī hai

to goyā phuul se ḳhushbū kashīd kar lī hai

jo yaad-e-yar se guft-o-shunid kar li hai

to goya phul se KHushbu kashid kar li hai

hudūd-e-vaqt ke darvāze muntazir haiñ 'nasīm'

ki tū ye fāsle kar ke ubuur dastak de

hudud-e-waqt ke darwaze muntazir hain 'nasim'

ki tu ye fasle kar ke ubur dastak de