adā aa.ī jafā aa.ī ġhurūr aayā hijāb aayā

hazāroñ āfateñ le kar hasīnoñ par shabāb aayā

ada aai jafa aai ghurur aaya hijab aaya

hazaron aafaten le kar hasinon par shabab aaya

ham intizār kareñ ham ko itnī taab nahīñ

pilā do tum hameñ paanī agar sharāb nahīñ

hum intizar karen hum ko itni tab nahin

pila do tum hamein pani agar sharab nahin

sunte rahe haiñ aap ke ausāf sab se ham

milne kā aap se kabhī mauqa.a nahīñ milā

sunte rahe hain aap ke ausaf sab se hum

milne ka aap se kabhi mauqa nahin mila

ishq meñ kuchh nazar nahīñ aayā

jis taraf dekhiye añdherā hai

ishq mein kuchh nazar nahin aaya

jis taraf dekhiye andhera hai

dil ke do hisse jo kar Daale the husn-o-ishq ne

ek sahrā ban gayā aur ek gulshan ho gayā

dil ke do hisse jo kar Dale the husn-o-ishq ne

ek sahra ban gaya aur ek gulshan ho gaya