hameñ isrār milne par tumheñ inkār milne se

na tum maano na ham māneñ na ye kam ho na vo kam ho

hamein israr milne par tumhein inkar milne se

na tum mano na hum manen na ye kam ho na wo kam ho

ai 'nūh' na tark-e-shā.erī ho

be-kār-mabāsh kuchh kiyā kar

ai 'nuh' na tark-e-shaeri ho

be-kar-mabash kuchh kiya kar

fitne dabe-dabā.e the jitne paḌe hue

baiThe kahīñ ho tum to vo sab uTh khaḌe hue

fitne dabe-dabae the jitne paDe hue

baiThe kahin ho tum to wo sab uTh khaDe hue

jigar kī choT uupar se kahīñ ma.alūm hotī hai

jigar kī choT uupar se nahīñ ma.alūm hotī hai

jigar ki choT upar se kahin malum hoti hai

jigar ki choT upar se nahin malum hoti hai

ḳhudā ke Dar se ham tum ko ḳhudā to kah nahīñ sakte

magar lutf-e-ḳhudā qahr-e-ḳhudā shān-e-ḳhudā tum ho

KHuda ke Dar se hum tum ko KHuda to kah nahin sakte

magar lutf-e-KHuda qahr-e-KHuda shan-e-KHuda tum ho

bharī mahfil meñ un ko chheḌne kī kyā zarūrat thī

janāb-e-nūh tum sā bhī na koī be-adab hogā

bhari mahfil mein un ko chheDne ki kya zarurat thi

janab-e-nuh tum sa bhi na koi be-adab hoga

ham intizār kareñ ham ko itnī taab nahīñ

pilā do tum hameñ paanī agar sharāb nahīñ

hum intizar karen hum ko itni tab nahin

pila do tum hamein pani agar sharab nahin

ḳhudā ke sajde butoñ ke aage phir aise sajde ki sar na uTThe

ajab tarah kī hamārī niyyat na.ī tarah kī namāz meñ hai

KHuda ke sajde buton ke aage phir aise sajde ki sar na uTThe

ajab tarah ki hamari niyyat nai tarah ki namaz mein hai

sunte rahe haiñ aap ke ausāf sab se ham

milne kā aap se kabhī mauqa.a nahīñ milā

sunte rahe hain aap ke ausaf sab se hum

milne ka aap se kabhi mauqa nahin mila

ġhair kā ishq hai ki merā hai

saaf kah do abhī saverā hai

ghair ka ishq hai ki mera hai

saf kah do abhi sawera hai

ashkoñ ke Tapakne par tasdīq huī us kī

be-shak vo nahīñ uThte āñkhoñ se jo girte haiñ

ashkon ke Tapakne par tasdiq hui us ki

be-shak wo nahin uThte aankhon se jo girte hain

pāmāl ho ke bhī na uThā kū-e-yār se

maiñ us galī meñ sāya-e-dīvār ho gayā

pamal ho ke bhi na uTha ku-e-yar se

main us gali mein saya-e-diwar ho gaya

mahfil meñ terī aa ke yuuñ be-ābrū hue

pahle the aap aap se tum tum se tū hue

mahfil mein teri aa ke yun be-abru hue

pahle the aap aap se tum tum se tu hue

ka.aba ho ki but-ḳhāna ho ai hazrat-e-vā.iz

jā.eñge jidhar aap na jā.eñge udhar ham

kaba ho ki but-KHana ho ai hazrat-e-waiz

jaenge jidhar aap na jaenge udhar hum

ai 'nūh' aate jaate haiñ donoñ gharoñ meñ ham

but-ḳhāna hai qarīb bahut ḳhānqāh se

ai 'nuh' aate jate hain donon gharon mein hum

but-KHana hai qarib bahut KHanqah se

dūñgā javāb maiñ bhī baḌī shadd-o-mad ke saath

likkhā hai us ne mujh ko baḌe karr-o-farr se ḳhat

dunga jawab main bhi baDi shadd-o-mad ke sath

likkha hai us ne mujh ko baDe karr-o-farr se KHat

dostī ko burā samajhte haiñ

kyā samajh hai vo kyā samajhte haiñ

dosti ko bura samajhte hain

kya samajh hai wo kya samajhte hain

aap jo kahte haiñ sab hazrat-e-nāseh hai bajā

kyā karūñ zehn se ye lafz utar jaate haiñ

aap jo kahte hain sab hazrat-e-naseh hai baja

kya karun zehn se ye lafz utar jate hain

un se sab haal daġhābāz kahe dete haiñ

mere hamrāz mirā raaz kahe dete haiñ

un se sab haal daghabaz kahe dete hain

mere hamraaz mera raaz kahe dete hain

maz.hab-e-ishq-o-vafā mujh ko ye detā hai salāh

tū jo kāfir nahīñ hotā to musalmāñ bhī na ho

mazhab-e-ishq-o-wafa mujh ko ye deta hai salah

tu jo kafir nahin hota to musalman bhi na ho

ham ne ye dekh liyā dekh liyā dekh liyā

aap bhī 'nūh' ke tūfān se Dar jaate haiñ

hum ne ye dekh liya dekh liya dekh liya

aap bhi 'nuh' ke tufan se Dar jate hain

husn-e-mutlaq kā nishāñ ka.abe meñ to miltā nahīñ

ehtiyāt aao chal kar dekh leñ but-ḳhāna ham

husn-e-mutlaq ka nishan kabe mein to milta nahin

ehtiyat aao chal kar dekh len but-KHana hum

achchhe bure ko vo abhī pahchānte nahīñ

kamsin haiñ bhole-bhāle haiñ kuchh jānte nahīñ

achchhe bure ko wo abhi pahchante nahin

kamsin hain bhole-bhaale hain kuchh jaante nahin

abhī us qayāmat ko maiñ kyā kahūñ

jo guzregī jī se guzarne ke ba.ad

abhi us qayamat ko main kya kahun

jo guzregi ji se guzarne ke baad

adā aa.ī jafā aa.ī ġhurūr aayā hijāb aayā

hazāroñ āfateñ le kar hasīnoñ par shabāb aayā

ada aai jafa aai ghurur aaya hijab aaya

hazaron aafaten le kar hasinon par shabab aaya

vo baat kyā jo aur kī tahrīk se huī

vo kaam kyā jo ġhair kī imdād se huā

wo baat kya jo aur ki tahrik se hui

wo kaam kya jo ghair ki imdad se hua

hazāroñ rañj-e-dil de de ke māshūqoñ ko jhele haiñ

ye pāpaḌ kis ne bele haiñ ye pāpaḌ maiñ ne bele meñ

hazaron ranj-e-dil de de ke mashuqon ko jhele hain

ye papaD kis ne bele hain ye papaD main ne bele mein

jo vaqt jā.egā vo palaT kar na aa.egā

din raat chāhiye sahar-o-shām kā lihāz

jo waqt jaega wo palaT kar na aaega

din raat chahiye sahar-o-sham ka lihaz

ḳhaak ho kar hī ham pahuñch jaate

us taraf kī magar havā bhī nahīñ

KHak ho kar hi hum pahunch jate

us taraf ki magar hawa bhi nahin

tūfān-e-nūh laane se ai chashm fā.eda

do ashk bhī bahut haiñ agar kuchh asar kareñ

tufan-e-nuh lane se ai chashm faeda

do ashk bhi bahut hain agar kuchh asar karen

maiñ koī hāl-e-sitam muñh se kahūñ yā na kahūñ

ai sitamgar tire andāz kahe dete haiñ

main koi haal-e-sitam munh se kahun ya na kahun

ai sitamgar tere andaz kahe dete hain

hamāre dil se kyā armān sab ik saath nikleñge

ki qaidī muḳhtalif mī.ād ke hote haiñ zindāñ meñ

hamare dil se kya arman sab ek sath niklenge

ki qaidi muKHtalif miad ke hote hain zindan mein

kambaḳht kabhī jī se guzarne nahīñ detī

jiine kī tamannā mujhe marne nahīñ detī

kambaKHt kabhi ji se guzarne nahin deti

jine ki tamanna mujhe marne nahin deti

dil ko tum shauq se le jaao magar yaad rahe

ye na merā na tumhārā na kisī kā hogā

dil ko tum shauq se le jao magar yaad rahe

ye na mera na tumhaara na kisi ka hoga

is kam-sinī meñ ho unheñ merā ḳhayāl kyā

vo kai baras ke haiñ abhī sin kyā hai saal kyā

is kam-sini mein ho unhen mera KHayal kya

wo kai baras ke hain abhi sin kya hai sal kya

chāhiye thī sham.a is tārīk ghar ke vāste

ḳhāna-e-dil meñ charāġh-e-ishq raushan ho gayā

chahiye thi shama is tarik ghar ke waste

KHana-e-dil mein charagh-e-ishq raushan ho gaya

dikhā.e pāñch aalam ik payām-e-shauq ne mujh ko

ulajhnā rūThnā laḌnā bigaḌnā duur ho jaanā

dikhae panch aalam ek payam-e-shauq ne mujh ko

ulajhna ruThna laDna bigaDna dur ho jaana

sharmā ke bigaḌ ke muskurā kar

vo chhup rahe ik jhalak dikhā kar

sharma ke bigaD ke muskura kar

wo chhup rahe ek jhalak dikha kar

aap aa.e ban paḌī mere dil-e-nāshād kī

aap bigḌe ban ga.ī mere dil-e-nāshād par

aap aae ban paDi mere dil-e-nashad ki

aap bigDe ban gai mere dil-e-nashad par

ai dair-o-haram vaalo tum dil kī taraf dekho

ka.abe kā ye ka.aba hai but-ḳhāne kā but-ḳhāna

ai dair-o-haram walo tum dil ki taraf dekho

kabe ka ye kaba hai but-KHane ka but-KHana

saaqī jo dil se chāhe to aa.e vo zamāna

har shaḳhs ho sharābī har ghar sharāb-ḳhāna

saqi jo dil se chahe to aae wo zamana

har shaKHs ho sharabi har ghar sharab-KHana

dil jo de kar kisī kāfir ko pareshāñ ho jaa.e

āfiyat us kī hai is meñ ki musalmāñ ho jaa.e

dil jo de kar kisi kafir ko pareshan ho jae

aafiyat us ki hai is mein ki musalman ho jae

na milo khul ke to chorī kī mulāqāt rahe

ham bulā.eñge tumheñ raat ga.e raat rahe

na milo khul ke to chori ki mulaqat rahe

hum bulaenge tumhein raat gae raat rahe

barsoñ rahe haiñ aap hamārī nigāh meñ

ye kyā kahā ki ham tumheñ pahchānte nahīñ

barson rahe hain aap hamari nigah mein

ye kya kaha ki hum tumhein pahchante nahin

dil ke do hisse jo kar Daale the husn-o-ishq ne

ek sahrā ban gayā aur ek gulshan ho gayā

dil ke do hisse jo kar Dale the husn-o-ishq ne

ek sahra ban gaya aur ek gulshan ho gaya

tumhārī shoḳh-nazar ik jagah kabhī na rahī

na ye thamī na ye Thahrī na ye rukī na rahī

tumhaari shoKH-nazar ek jagah kabhi na rahi

na ye thami na ye Thahri na ye ruki na rahi

allāh-re un ke husn kī mojiz-numā.iyāñ

jis baam par vo aa.eñ vahī koh-e-tūr ho

allah-re un ke husn ki mojiz-numaiyan

jis baam par wo aaen wahi koh-e-tur ho

un kā va.ada un kā paimāñ un kā iqrār un kā qaul

jitnī bāteñ haiñ hasīnoñ kī vo be-buniyād haiñ

un ka wada un ka paiman un ka iqrar un ka qaul

jitni baaten hain hasinon ki wo be-buniyaad hain

ik sitam Dhāne meñ fard ek sitam sahne meñ

al-ġharaz hai na tumhārā na mirā dil nāqis

ek sitam Dhane mein fard ek sitam sahne mein

al-gharaz hai na tumhaara na mera dil naqis

dil apnā kahīñ Thahre to ham bhī kahīñ Thahreñ

is kūche meñ aa rahnā us kūche meñ jā rahnā

dil apna kahin Thahre to hum bhi kahin Thahren

is kuche mein aa rahna us kuche mein ja rahna