ہمیں اصرار ملنے پر تمہیں انکار ملنے سے

نہ تم مانو نہ ہم مانیں نہ یہ کم ہو نہ وہ کم ہو

اے نوحؔ نہ ترک شاعری ہو

بے کار مباش کچھ کیا کر

فتنے دبے دبائے تھے جتنے پڑے ہوئے

بیٹھے کہیں ہو تم تو وہ سب اٹھ کھڑے ہوئے

جگر کی چوٹ اوپر سے کہیں معلوم ہوتی ہے

جگر کی چوٹ اوپر سے نہیں معلوم ہوتی ہے

خدا کے ڈر سے ہم تم کو خدا تو کہہ نہیں سکتے

مگر لطف خدا قہر خدا شان خدا تم ہو

بھری محفل میں ان کو چھیڑنے کی کیا ضرورت تھی

جناب نوح تم سا بھی نہ کوئی بے ادب ہوگا

ہم انتظار کریں ہم کو اتنی تاب نہیں

پلا دو تم ہمیں پانی اگر شراب نہیں

خدا کے سجدے بتوں کے آگے پھر ایسے سجدے کہ سر نہ اٹھے

عجب طرح کی ہماری نیت نئی طرح کی نماز میں ہے

سنتے رہے ہیں آپ کے اوصاف سب سے ہم

ملنے کا آپ سے کبھی موقع نہیں ملا

غیر کا عشق ہے کہ میرا ہے

صاف کہہ دو ابھی سویرا ہے

اشکوں کے ٹپکنے پر تصدیق ہوئی اس کی

بے شک وہ نہیں اٹھتے آنکھوں سے جو گرتے ہیں

پامال ہو کے بھی نہ اٹھا کوئے یار سے

میں اس گلی میں سایۂ دیوار ہو گیا

محفل میں تیری آ کے یوں بے آبرو ہوئے

پہلے تھے آپ آپ سے تم تم سے تو ہوئے

کعبہ ہو کہ بت خانہ ہو اے حضرت واعظ

جائیں گے جدھر آپ نہ جائیں گے ادھر ہم

اے نوحؔ آتے جاتے ہیں دونوں گھروں میں ہم

بت خانہ ہے قریب بہت خانقاہ سے

دوں گا جواب میں بھی بڑی شد و مد کے ساتھ

لکھا ہے اس نے مجھ کو بڑے کر و فر سے خط

دوستی کو برا سمجھتے ہیں

کیا سمجھ ہے وہ کیا سمجھتے ہیں

آپ جو کہتے ہیں سب حضرت ناصح ہے بجا

کیا کروں ذہن سے یہ لفظ اتر جاتے ہیں

ان سے سب حال دغاباز کہے دیتے ہیں

میرے ہم راز مرا راز کہے دیتے ہیں

مذہب عشق و وفا مجھ کو یہ دیتا ہے صلاح

تو جو کافر نہیں ہوتا تو مسلماں بھی نہ ہو

ہم نے یہ دیکھ لیا دیکھ لیا دیکھ لیا

آپ بھی نوحؔ کے طوفان سے ڈر جاتے ہیں

حسن مطلق کا نشاں کعبے میں تو ملتا نہیں

احتیاط آؤ چل کر دیکھ لیں بت خانہ ہم

اچھے برے کو وہ ابھی پہچانتے نہیں

کمسن ہیں بھولے بھالے ہیں کچھ جانتے نہیں

ابھی اس قیامت کو میں کیا کہوں

جو گزرے گی جی سے گزرنے کے بعد

ادا آئی جفا آئی غرور آیا حجاب آیا

ہزاروں آفتیں لے کر حسینوں پر شباب آیا

وہ بات کیا جو اور کی تحریک سے ہوئی

وہ کام کیا جو غیر کی امداد سے ہوا

ہزاروں رنج دل دے دے کے معشوقوں کو جھیلے ہیں

یہ پاپڑ کس نے بیلے ہیں یہ پاپڑ میں نے بیلے میں

جو وقت جائے گا وہ پلٹ کر نہ آئے گا

دن رات چاہئے سحر و شام کا لحاظ

خاک ہو کر ہی ہم پہنچ جاتے

اس طرف کی مگر ہوا بھی نہیں

طوفان نوح لانے سے اے چشم فائدہ

دو اشک بھی بہت ہیں اگر کچھ اثر کریں

میں کوئی حال ستم منہ سے کہوں یا نہ کہوں

اے ستم گر ترے انداز کہے دیتے ہیں

ہمارے دل سے کیا ارمان سب اک ساتھ نکلیں گے

کہ قیدی مختلف میعاد کے ہوتے ہیں زنداں میں

کمبخت کبھی جی سے گزرنے نہیں دیتی

جینے کی تمنا مجھے مرنے نہیں دیتی

دل کو تم شوق سے لے جاؤ مگر یاد رہے

یہ نہ میرا نہ تمہارا نہ کسی کا ہوگا

اس کم سنی میں ہو انہیں میرا خیال کیا

وہ کے برس کے ہیں ابھی سن کیا ہے سال کیا

چاہئے تھی شمع اس تاریک گھر کے واسطے

خانۂ دل میں چراغ عشق روشن ہو گیا

دکھائے پانچ عالم اک پیام شوق نے مجھ کو

الجھنا روٹھنا لڑنا بگڑنا دور ہو جانا

شرما کے بگڑ کے مسکرا کر

وہ چھپ رہے اک جھلک دکھا کر

آپ آئے بن پڑی میرے دل ناشاد کی

آپ بگڑے بن گئی میرے دل ناشاد پر

اے دیر و حرم والو تم دل کی طرف دیکھو

کعبے کا یہ کعبہ ہے بت خانے کا بت خانہ

ساقی جو دل سے چاہے تو آئے وہ زمانہ

ہر شخص ہو شرابی ہر گھر شراب خانہ

دل جو دے کر کسی کافر کو پریشاں ہو جائے

عافیت اس کی ہے اس میں کہ مسلماں ہو جائے

نہ ملو کھل کے تو چوری کی ملاقات رہے

ہم بلائیں گے تمہیں رات گئے رات رہے

برسوں رہے ہیں آپ ہماری نگاہ میں

یہ کیا کہا کہ ہم تمہیں پہچانتے نہیں

دل کے دو حصے جو کر ڈالے تھے حسن و عشق نے

ایک صحرا بن گیا اور ایک گلشن ہو گیا

تمہاری شوخ نظر اک جگہ کبھی نہ رہی

نہ یہ تھمی نہ یہ ٹھہری نہ یہ رکی نہ رہی

اللہ رے ان کے حسن کی معجز نمائیاں

جس بام پر وہ آئیں وہی کوہ طور ہو

ان کا وعدہ ان کا پیماں ان کا اقرار ان کا قول

جتنی باتیں ہیں حسینوں کی وہ بے بنیاد ہیں

اک ستم ڈھانے میں فرد ایک ستم سہنے میں

الغرض ہے نہ تمہارا نہ مرا دل ناقص

دل اپنا کہیں ٹھہرے تو ہم بھی کہیں ٹھہریں

اس کوچے میں آ رہنا اس کوچے میں جا رہنا