vo ye kahte haiñ sadā ho to tumhāre jaisī

is kā matlab to yahī hai ki pukāre jaao

wo ye kahte hain sada ho to tumhaare jaisi

is ka matlab to yahi hai ki pukare jao

vo jo ik shaḳhs tumheñ yaad kiyā kartā thā

aaj masrūf bahut hai use tum yaad karo

wo jo ek shaKHs tumhein yaad kiya karta tha

aaj masruf bahut hai use tum yaad karo

yūñhī hañste hue chhoḌeñge ġhazal kī mahfil

ek aañsū se ziyāda koī rone kā nahīñ

yunhi hanste hue chhoDenge ghazal ki mahfil

ek aansu se ziyaada koi rone ka nahin

saarī ḳhushī hamārī āñkhoñ se chhan rahī hai

kuchh der tum ne gesū lahrā diye to kyā hai

sari KHushi hamari aankhon se chhan rahi hai

kuchh der tum ne gesu lahra diye to kya hai

jo bhī kuchh achchhā burā honā hai jaldī ho jaa.e

shahr jaage yā mirī niind hī gahrī ho jaa.e

jo bhi kuchh achchha bura hona hai jaldi ho jae

shahr jage ya meri nind hi gahri ho jae

jo dar-ba-dar haiñ vahī dar-ba-dar nahīñ haiñ 'razā'

makān vaale bhī ḳhālī makāñ meñ baiThe haiñ

jo dar-ba-dar hain wahi dar-ba-dar nahin hain 'raza'

makan wale bhi KHali makan mein baiThe hain

bas ye hotā hai ki sur-tāl badal jaatī hai

raqs rokā nahīñ jaatā hai bahār aane par

bas ye hota hai ki sur-tal badal jati hai

raqs roka nahin jata hai bahaar aane par

ye husn-e-zāt bhī kuchh chiiz hai agar samjho

vaqār aur baḌhā hai safed bāloñ se

ye husn-e-zat bhi kuchh chiz hai agar samjho

waqar aur baDha hai safed baalon se

is mulāqāt ko zanjīr kī sūrat kar de

ḳhud se miltā huuñ to aape meñ nahīñ rahtā huuñ

is mulaqat ko zanjir ki surat kar de

KHud se milta hun to aape mein nahin rahta hun

itnī ranjish meñ akelā nahīñ ho saktā maiñ

aaj kī raat bhī apnā nahīñ ho saktā maiñ

itni ranjish mein akela nahin ho sakta main

aaj ki raat bhi apna nahin ho sakta main

ye peḌ kaun sī duniyā kī baat karte haiñ

hameñ to saaya bhī apnā ḳharīd laanā paḌā

ye peD kaun si duniya ki baat karte hain

hamein to saya bhi apna KHarid lana paDa

vo shaḳhs thā hī kuchh aisā hañsātā rahtā thā

mujhe bhī sog ke 'ālam meñ muskurānā paḌā

wo shaKHs tha hi kuchh aisa hansata rahta tha

mujhe bhi sog ke 'alam mein muskurana paDa

is tarah logoñ ke īmān bigaḌ jaate haiñ

jis tarah us ne mujhe sāhib-e-īmān kiyā

is tarah logon ke iman bigaD jate hain

jis tarah us ne mujhe sahib-e-iman kiya

is darja ḳhamoshī ke gunah-gār na hote

ai kaash chhalak jaatī vahī āḳhrī chaa.e

is darja KHamoshi ke gunah-gar na hote

ai kash chhalak jati wahi aaKHri chae

is safar meñ mujhe paanī kī zarūrat na paḌe

jahāñ ārām karūñ tum mire siine meñ milo

is safar mein mujhe pani ki zarurat na paDe

jahan aaram karun tum mere sine mein milo

maiñ roz-o-shab kā tasavvur badalnā chāhtā huuñ

lagī huī hai mirī ḳhvāb bunñe vāloñ se

main roz-o-shab ka tasawwur badalna chahta hun

lagi hui hai meri KHwab bunne walon se

kahāñ ga.e vo shafīq lamhe

maiñ jin ko jī kar baḌā huā huuñ

kahan gae wo shafiq lamhe

main jin ko ji kar baDa hua hun

kisī bhī haal meñ us se judā nahīñ honā

bigāḌtā huuñ tabī'at agar sañbhaltī hai

kisi bhi haal mein us se juda nahin hona

bigaDta hun tabi'at agar sanbhalti hai

rafta rafta log 'aadī ho ga.e

raat ko din kī tarah bartā gayā

rafta rafta log 'adi ho gae

raat ko din ki tarah barta gaya

ham ko ādāb-e-takalluf bhī kahāñ aate haiñ

ham to pahlī hī mulāqāt meñ khul jā.eñge

hum ko aadab-e-takalluf bhi kahan aate hain

hum to pahli hi mulaqat mein khul jaenge

mirī āñkhoñ meñ aa jaanā to ik mā'mūl hai lekin

mohabbat zor kartī hai to vo sāñsoñ meñ aatā hai

meri aankhon mein aa jaana to ek ma'mul hai lekin

mohabbat zor karti hai to wo sanson mein aata hai

ab isī baat pe hairān huā baiThā huuñ

kyuuñ kisī baat pe hairān nahīñ hotā maiñ

ab isi baat pe hairan hua baiTha hun

kyun kisi baat pe hairan nahin hota main

raushnī dikhā.ī de chaap to sunā.ī de

ik kivāḌ 'ādatan rakhtā huuñ khulā huā

raushni dikhai de chap to sunai de

ek kiwaD 'adatan rakhta hun khula hua

maiñ jī uThā maiñ 'mar gayā maiñ phir se jī uThā

ye saarī vārdāt zarā der kī hai bas

main ji uTha main 'mar gaya main phir se ji uTha

ye sari wardat zara der ki hai bas

'razā' hamārī in āñkhoñ ke paas kuchh bhī nahīñ

bas ek raat hai jo bār-bār Dhaltī hai

'raza' hamari in aankhon ke pas kuchh bhi nahin

bas ek raat hai jo bar-bar Dhalti hai

haath joḌe hue phir sāmne faaqa aayā

aaj phir aadmī hone se mukarnā hai mujhe

hath joDe hue phir samne faqa aaya

aaj phir aadmi hone se mukarna hai mujhe

ab ye pathrā.ī huī āñkheñ liye phirte raho

maiñ ne kab tum se kahā thā mujhe itnā dekho

ab ye pathrai hui aankhen liye phirte raho

main ne kab tum se kaha tha mujhe itna dekho

saare nākām-e-tamannā mire dil tak aa jaa.eñ

aaj vo kaam kareñge ki jo hone kā nahīñ

sare nakaam-e-tamanna mere dil tak aa jaen

aaj wo kaam karenge ki jo hone ka nahin

usī meñ sau ramz sūjhte haiñ

jo baat kahne se rah ga.ī hai

usi mein sau ramz sujhte hain

jo baat kahne se rah gai hai

mire ḳhayāl meñ vo dilbarī kī manzil thī

tumheñ bhulānā paḌā aur tumheñ batānā paḌā

mere KHayal mein wo dilbari ki manzil thi

tumhein bhulana paDa aur tumhein batana paDa

is naġhmagī kā thoḌā gunah-gār maiñ bhī huuñ

mujh se bhī is jahān meñ halchal rahī hai dost

is naghmagi ka thoDa gunah-gar main bhi hun

mujh se bhi is jahan mein halchal rahi hai dost

haa.e vo shaḳhs jo māyūs mire ghar se gayā

apnī tanhā.iyāñ rakhne ke liye aayā thā

hae wo shaKHs jo mayus mere ghar se gaya

apni tanhaiyan rakhne ke liye aaya tha

ḳhudā se milne kī aarzū thī vo bandagī thī

ḳhudā ko mahsūs kar rahā huuñ ye shā'irī hai

KHuda se milne ki aarzu thi wo bandagi thi

KHuda ko mahsus kar raha hun ye sha'iri hai

kis se pūchheñ ki hameñ dasht meñ karnā kyā hai

kyā kiyā jaatā hai be-vaqt bahār aane par

kis se puchhen ki hamein dasht mein karna kya hai

kya kiya jata hai be-waqt bahaar aane par

maza to shaam kī mahfil ke intizār meñ hai

sahar meñ kuchh nahīñ ḳhvāb-e-sahar meñ kuchh bhī nahīñ

maza to sham ki mahfil ke intizar mein hai

sahar mein kuchh nahin KHwab-e-sahar mein kuchh bhi nahin

na jaane kitne nasīboñ ke saath Dhaltī hai

ye shab jo merī zarūrat se kam nikaltī hai

na jaane kitne nasibon ke sath Dhalti hai

ye shab jo meri zarurat se kam nikalti hai

maiñ shor huuñ terī ḳhāmushī kā

tamām ghar meñ machā huā huuñ

main shor hun teri KHamushi ka

tamam ghar mein macha hua hun

vo bhī ab kaun sā baaqī hai mirī ġhazloñ meñ

maiñ bhī ab dūsrī duniyā meñ kahīñ rahtā huuñ

wo bhi ab kaun sa baqi hai meri ghazlon mein

main bhi ab dusri duniya mein kahin rahta hun

kyā bhuul paḌ ga.ī hai raste sañbhālne meñ

ḳhud ko bhī yaad rakhnā dushvār ho rahā hai

kya bhul paD gai hai raste sanbhaalne mein

KHud ko bhi yaad rakhna dushwar ho raha hai

ham ko vaise bhī koī kaam nahīñ aatā hai

aur ye kaam haqīqat ko fasāna karnā

hum ko waise bhi koi kaam nahin aata hai

aur ye kaam haqiqat ko fasana karna

mere chehre se 'ayāñ kuchh bhī nahīñ

ye kamī hai to kamī hai mujh meñ

mere chehre se 'ayan kuchh bhi nahin

ye kami hai to kami hai mujh mein

yaqīñ ke josh meñ apnā qasīda likh Daalā

maiñ ḳhud-shanāsī ko samjhā ḳhudā-shanāsī hai

yaqin ke josh mein apna qasida likh Dala

main KHud-shanasi ko samjha KHuda-shanasi hai

mere siine se nikālo mirī buniyād kī jaan

itnī āsānī se vīrān nahīñ hotā maiñ

mere sine se nikalo meri buniyaad ki jaan

itni aasani se viran nahin hota main

kaash āvāz ko tasvīr kiyā jā saktā

ek hī lai meñ hue jhiil kā paanī aur maiñ

kash aawaz ko taswir kiya ja sakta

ek hi lai mein hue jhil ka pani aur main

tum koī aur na tasvīr ravāna karnā

merī palkoñ kī to 'ādat hai purānā karnā

tum koi aur na taswir rawana karna

meri palkon ki to 'adat hai purana karna

uljhan banī huī hai zaḳhmoñ kī tāza-kārī

har roz ik masīhā bīmār ho rahā hai

uljhan bani hui hai zaKHmon ki taza-kari

har roz ek masiha bimar ho raha hai

vo to bachchoñ kī patangoñ ne use gher liyā

varna chupke se nikal jaatī bahār aa.ī huī

wo to bachchon ki patangon ne use gher liya

warna chupke se nikal jati bahaar aai hui

bhīge lafzoñ kī zarūrat kyā thī

aisī kyā aag lagī hai mujh meñ

bhige lafzon ki zarurat kya thi

aisi kya aag lagi hai mujh mein

bas apne aap se bezār ho rahe haiñ ham

koī milā hī nahīñ zindagī ke lahje meñ

bas apne aap se bezar ho rahe hain hum

koi mila hi nahin zindagi ke lahje mein

kuchh nahīñ aglī mulāqāt kī ghabrāhaT hai

us ke jaane se pareshān nahīñ hotā maiñ

kuchh nahin agli mulaqat ki ghabrahaT hai

us ke jaane se pareshan nahin hota main