kyā us se bichhaḌte ki mile hī na the jis se

ik-tarfa mohabbat ke bhī haiñ zāviye kyā kyā

kya us se bichhaDte ki mile hi na the jis se

ik-tarfa mohabbat ke bhi hain zawiye kya kya

apnī zanjīr-e-pā ko dekhtā huuñ

us kī pāzeb yaad aatī hai

apni zanjir-e-pa ko dekhta hun

us ki pazeb yaad aati hai

saañs khīñcheñ to misra’-e-ūlā

saañs chheḌeñ to misra'-e-sānī

sans khinchen to misra’-e-ula

sans chheDen to misra'-e-sani

jaane ḳhvāboñ kā kyā huā hogā

ek muddat se ham nahīñ so.e

jaane KHwabon ka kya hua hoga

ek muddat se hum nahin soe

'aql kuchh kaam kī na thī 'asrār'

'ishq ne is ko Thiik Thaak kiyā

'aql kuchh kaam ki na thi 'asrar'

'ishq ne is ko Thik Thak kiya