مل ملا کے دونوں نے دل کو کر دیا برباد

حسن نے کیا بے خود عشق نے کیا آزاد

نقش قدم ہیں راہ میں فرہاد و قیس کے

اے عشق کھینچ کر مجھے لایا ادھر کہاں

شعر کیا ہے آہ ہے یا واہ ہے

جس سے ہر دل کی ابھر آتی ہے چوٹ

یوں تو ہر دین میں ہے صاحب ایماں ہونا

ہم کو اک بت نے سکھایا ہے مسلماں ہونا

کتاب درس مجنوں مصحف رخسار لیلیٰ ہے

حریف نکتہ دان عشق کو مکتب سے کیا مطلب

ازل سے ہم نفسی ہے جو جان جاں سے ہمیں

پیام دم بدم آتا ہے لا مکاں سے ہمیں

غم موجود غلط اور غم فردا باطل

راحت اک خواب ہے جس کی کوئی تعبیر نہیں

تھا انا الحق لب منصور پہ کیا آپ سے آپ

تھا جو پردے میں چھپا بول اٹھا آپ سے آپ

وا ہوتے ہیں مستی میں خرابات کے اسرار

رندی مرا ایمان ہے مستی ہے مرا فرض

عہد‌ میثاق کا لازم ہے ادب اے واعظ

ہے یہ پیمان وفا رشتۂ زنار نہ توڑ

جو لا مذہب ہو اس کو ملت و مشرب سے کیا مطلب

مرا مشرب ہے رندی رند کو مذہب سے کیا مطلب

اے پری رو ترے دیوانے کا ایماں کیا ہے

اک نگاہ غلط انداز پہ قرباں ہونا

میں دیوانہ ہوں اور دیر و حرم سے مجھ کو وحشت ہے

پڑی رہنے دو میرے پاؤں میں زنجیر مے خانہ

کیا شوق کا عالم تھا کہ ہاتھوں سے اڑا خط

دل تھام کے اس شوخ کو لکھنے جو لگا خط

ہم گدائے در مے خانہ ہیں اے پیر مغاں

کام اپنا ترے صدقہ میں چلا لیتے ہیں

پابندئ احکام شریعت ہے وہاں فرض

رندوں کو رخ ساقی و ساغر ہوئے مخصوص

ہے صنم خانہ مرا پیمان عشق

ذوق مے خانہ مجھے سامان عشق

آتے ہوئے اس تن میں نہ جاتے ہوئے تن سے

ہے جان مکیں کو نہ لگاوٹ نہ رکاوٹ

بے نشاں ساحر نشاں میں آ کے شاید بن گیا

لا مکاں ہو کر مکاں میں خود مکیں ہوتا رہا

کونین عین علم میں ہے جلوہ گاہ حسن

جیب خرد سے عینک عرفاں نکالئے

قدم ہے عین حدوث اور حدوث عین قدم

جو تو نہ جلوہ میں آتا تو میں کہاں ہوتا

قلزم فکر میں ہے کشتئ ایماں سالم

نا خدا حسن ہے اور عشق ہے لنگر اپنا

عیاں علیمؔ سے ہے جسم و جان کا الحاق

مکیں مکاں میں نہ ہوتا تو لا مکاں ہوتا