kaun sā jurm ḳhudā jaane huā hai sābit

mashvare kartā hai munsif jo gunahgār ke saath

kaun sa jurm KHuda jaane hua hai sabit

mashware karta hai munsif jo gunahgar ke sath

aaj rakkhe haiñ qadam us ne mirī chaukhaT par

aaj dahlīz mirī chhat ke barābar huī hai

aaj rakkhe hain qadam us ne meri chaukhaT par

aaj dahliz meri chhat ke barabar hui hai

ham aadmī kī tarah jī rahe haiñ sadiyoñ se

chalo 'salīm' ab insān ho ke dekhte haiñ

hum aadmi ki tarah ji rahe hain sadiyon se

chalo 'salim' ab insan ho ke dekhte hain

apne jiine ke ham asbāb dikhāte haiñ tumheñ

dosto aao ki kuchh ḳhvāb dikhāte haiñ tumheñ

apne jine ke hum asbab dikhate hain tumhein

dosto aao ki kuchh KHwab dikhate hain tumhein

umr bhar jis ke liye peT se bāñdhe patthar

ab vo gin gin ke khilātā hai nivāle mujh ko

umr bhar jis ke liye peT se bandhe patthar

ab wo gin gin ke khilata hai niwale mujh ko

ab zamīnoñ ko bichhā.e ki falak ko oḌhe

muflisī to bharī barsāt meñ be-ghar huī hai

ab zaminon ko bichhae ki falak ko oDhe

muflisi to bhari barsat mein be-ghar hui hai

ik ek harf kī rakhnī hai aabrū mujh ko

savāl dil kā nahīñ hai mirī zabān kā hai

ek ek harf ki rakhni hai aabru mujh ko

sawal dil ka nahin hai meri zaban ka hai

huuñ pārsā tire pahlū meñ shab guzār ke bhī

maiñ be-libās nahīñ pairahan utaar ke bhī

hun parsa tere pahlu mein shab guzar ke bhi

main be-libas nahin pairahan utar ke bhi

ḳhauf āñkhoñ meñ mirī dekh ke chiñgārī kā

kar diyā raat ne sūraj ke havāle mujh ko

KHauf aankhon mein meri dekh ke chingari ka

kar diya raat ne suraj ke hawale mujh ko

ḳharīdne ke liye us ko bik gayā ḳhud hī

maiñ vo huuñ jis ko munāfe meñ bhī ḳhasārā huā

KHaridne ke liye us ko bik gaya KHud hi

main wo hun jis ko munafe mein bhi KHasara hua

beḌiyāñ Daal ke parchhā.īñ kī pairoñ meñ mire

qaid rakhte haiñ añdheroñ meñ ujāle mujh ko

beDiyan Dal ke parchhain ki pairon mein mere

qaid rakhte hain andheron mein ujale mujh ko

zaḳhm-dar-zaḳhm suḳhan aur bhī hotā hai vasī.a

ashk-dar-ashk ubhartī hai qalamkār kī guuñj

zaKHm-dar-zaKHm suKHan aur bhi hota hai wasia

ashk-dar-ashk ubharti hai qalamkar ki gunj

aaj phir apnī samā.at sauñp dī us ne hameñ

aaj phir lahja hamārā iḳhtiyār us ne kiyā

aaj phir apni samaat saunp di us ne hamein

aaj phir lahja hamara iKHtiyar us ne kiya

kaj-kulāhī pe na maġhrūr huā kar itnā

sar utar aate haiñ shāhoñ ke bhī dastār ke saath

kaj-kulahi pe na maghrur hua kar itna

sar utar aate hain shahon ke bhi dastar ke sath

ik dhuñdlakā huuñ zarā der meñ chhaT jā.ūñgā

maiñ koī raat nahīñ huuñ jo sahar tak jā.ūñ

ek dhundlaka hun zara der mein chhaT jaunga

main koi raat nahin hun jo sahar tak jaun