اس پردے میں یہ حسن کا عالم ہے الٰہی

بے پردہ وہ ہو جائیں تو کیا جانئے کیا ہو

تیری آنکھیں جسے چاہیں اسے اپنا کر لیں

کاش ایسا ہی سکھا دیں کوئی افسوں مجھ کو

اللہ اللہ خصوصیت ذات حسنین

ساری امت کے ہیں پوتوں سے نواسے بڑھ کر

دل میں مرے جگر میں مرے آنکھ میں مری

ہر جا ہے دوست اور نہیں ملتی ہے جائے دوست

تمام چارہ گروں سے تو مل چکا ہے جواب

تمہیں بھی درد محبت سنائے دیتے ہیں

حضرت ناصح بھی مے پینے لگے

اب مجھے سمجھانے والا کون تھا

جی میں آتا ہے کہ پھولوں کی اڑا دوں خوشبو

رنگ اڑا لائے ہیں ظالم تری رعنائی کا

پارسا بن کے سوئے مے خانہ

سر جھکائے ہوئے ہم جاتے ہیں

تصور نے ترے آباد جب سے گھر کیا میرا

نکلتا ہی نہیں دن رات اپنے گھر میں رہتا ہے

جس کو چاہا تو نے اس کو مل گیا

ورنہ تجھ کو پانے والا کون تھا

دخت رز اور تو کہاں ملتی

کھینچ لائے شراب خانے سے

قدموں پہ گرا تو ہٹ کے بولے

اندھا ہے تو دیکھتا نہیں ہے

کم سنی جن کی ہمیں یاد ہے اور کل کی ہی بات

آج انہیں دیکھیے کیا ہو گئے کیا سے بڑھ کر

عشاق کے آگے نہ لڑا غیروں سے آنکھیں

ڈر ہے کہ نہ ہو جائے لڑائی ترے در پر

اب تو مے خانوں سے بھی کچھ بڑھ کر

جام چلتے ہیں خانقاہوں میں

انتہائے معرفت سے اے شرفؔ

میں نے جو دیکھا جو سمجھا کچھ نہ تھا

عالم عشق میں اللہ رے نظر کی وسعت

نقطۂ وہم ہوا گنبد گردوں مجھ کو

شیخ کچھ اپنے آپ کو سمجھیں

میکشوں کی نظر میں کچھ بھی نہیں

دخت رز زاہد سے بولی مجھ سے گھبراتے ہو کیوں

کیا تمہیں ہو پاک دامن پارسا میں بھی تو ہوں

پامالیوں کا زینہ ہے عرش سے بھی اونچا

دل اس کی راہ میں ہے کیا سرفراز میرا

حیرت میں ہوں الٰہی کیوں کر یہ ختم ہوگا

کوتاہ روز محشر قصہ دراز میرا

ایک کو ایک نہیں رشک سے مرنے دیتا

یہ نیا کوچۂ قاتل میں تماشا دیکھا