توحید زیب کی غزل میں غیر روایتی الفاظ کا تخلیقی استعمال، معاصر عالمگیر صورت حال کا ادراک، اظہار کا بے ساختہ پن اور بالخصوص اس کی غزلوں کے مطلعے اس کے تخلیقی اضطراب، بے چینی، جستجو اور روایتی سانچوں پر عدم اطمینان کا پتا دیتے ہیں۔ یہی عدم اطمینان اس کی نظم میں راست طرز اظہار کا سبب بھی ہے۔ ان کی طویل نظم ”بختاور“ اور دوسری کئی نظمیں رومانی ہوتے ہوئے بھی رومانی نہیں ہیں۔ ممکن ہے یہ کسی ذاتی تجربے کی بازگشت ہوں لیکن اپنے تخلیقی رنگ میں اجتماعی انسانی تجربے سے ہم آمیز ہو گئی ہیں۔