کی تلاش کا نتیجه | موضو - نظم, صفحہ aurte.n

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "aurte.n"

نظم کے متعلقہ نتیجہ "aurte.n"

نظم

جب درخت خاموش تھے
اور بادل شور کر رہے تھے
میں تمہیں یاد کر رہا تھا
جب عورتیں آگ روشن کر رہی تھیں
میں تمہیں یاد کر رہا تھا
جب میدان سے ایک بچے کا جنازہ گزر رہا تھا
میں تمہیں یاد کر رہا تھا
جب قیدیوں کی گاڑی عدالت کے سامنے کھڑی تھی
میں تمہیں یاد کر رہا تھا
جب لوگ عبادت گاہوں کی طرف جا رہے تھے
میں تمہیں یاد کر رہا تھا
جب دنیا میں ہر شخص کے پاس ایک نہ ایک کام تھا
میں تمہیں یاد کر رہا تھا

ثروت حسین

نظم

یہ ہم گنہ گار عورتیں ہیں
جو اہل جبہ کی تمکنت سے نہ رعب کھائیں
نہ جان بیچیں
نہ سر جھکائیں
نہ ہاتھ جوڑیں

کشور ناہید

نظم

جہاں زاد
وہ حلب کی کارواں سرا کا حوض، رات وہ سکوت
جس میں ایک دوسرے سے ہم کنار تیرتے رہے
محیط جس طرح ہو دائرے کے گرد حلقہ زن
تمام رات تیرتے رہے تھے ہم
ہم ایک دوسرے کے جسم و جاں سے لگ کے
تیرتے رہے تھے ایک شاد کام خوف سے
کہ جیسے پانی آنسوؤں میں تیرتا رہے
ہم ایک دوسرے سے مطمئن زوال عمر کے خلاف
تیرتے رہے
تو کہہ اٹھی: 'حسن یہاں بھی کھینچ لائی
جاں کی تشنگی تجھے!'
(لو اپنی جاں کی تشنگی کو یاد کر رہا تھا میں
کہ میرا حلق آنسوؤں کی بے بہا سخاوتوں
سے شاد کام ہوگیا!)
مگر یہ وہم دل میں تیرنے لگا کہ ہو نہ ہو
مرا بدن کہیں حلب کے حوض ہی میں رہ گیا
نہیں، مجھے دوئی کا واہمہ نہیں
کہ اب بھی ربط جسم و جاں کا اعتبار ہے مجھے
یہی وہ اعتبار تھا
کہ جس نے مجھ کو آپ میں سمو دیا
میں سب سے پہلے 'اپ 'ہوں
اگر ہمیں ہوں تو ہو اور میں ہوں پھر بھی میں
ہر ایک شے سے پہلے آپ ہوں!
اگر میں زندہ ہوں تو کیسے آپ سے دغا کروں؟
کہ تیرے جیسی عورتیں، جہاں زاد،
ایسی الجھنیں ہیں
جن کو آج تک کوئی نہیں 'سلجھ' سکا
جو میں کہوں کہ میں 'سلجھ' سکا تو سر بسر
فریب اپنے آپ سے!
کہ عورتوں کی ساخت ہے وہ طنز اپنے آپ پر
جواب جس کا ہم نہیں
(لبیب کون ہے؟ تمام رات جس کا ذکر
تیرے لب پہ تھا
وہ کون تیرے گیسوؤں کو کھینچتا رہا
لبوں کو نوچتا رہا
جو میں کبھی نہ کر سکا
نہیں یہ سچ ہے میں ہوں یا لبیب ہو
رقیب ہو تو کس لیے تری خود آگہی کی بے ریا نشاط ناب کا
جو صد نوا و یک نوا خرام صبح کی طرح
لبیب ہر نوائے ساز گار کی نفی سہی!)
مگر ہمارا رابطہ وصال آب و گل نہیں، نہ تھا کبھی
وجود آدمی سے آب و گل سدا بروں رہے
نہ ہر وصال آب و گل سے کوئی جام یا سبو ہی بن سکا
جو ان کا ایک واہمہ ہی بن سکے تو بن سکے!

ن م راشد

نظم

وہ کیسی عورتیں تھیں
جو گیلی لکڑیوں کو پھونک کر چولہا جلاتی تھیں
جو سل پر سرخ مرچیں پیس کر سالن پکاتی تھیں
سحر سے شام تک مصروف لیکن مسکراتی تھیں
بھری دوپہر میں سر اپنا جو ڈھک کر ملنے آتی تھیں
جو پنکھے ہاتھ کے جھلتی تھیں اور بس پان کھاتی تھیں
جو دروازے پہ رک کر دیر تک رسمیں نبھاتی تھیں
پلنگوں پر نفاست سے دری چادر بچھاتی تھیں
بصد اصرار مہمانوں کو سرہانے بٹھاتی تھیں
اگر گرمی زیادہ ہو تو روح افزا پلاتی تھیں
جو اپنی بیٹیوں کو سوئیٹر بننا سکھاتی تھیں
سلائی کی مشینوں پر کڑے روزے بتاتی تھیں
بڑی پلیٹوں میں جو افطار کے حصے بناتی تھیں
جو کلمے کاڑھ کر لکڑی کے فریموں میں سجاتی تھیں
دعائیں پھونک کر بچوں کو بستر پر سلاتی تھیں
اور اپنی جا نمازیں موڑ کر تکیہ لگاتی تھیں
کوئی سائل جو دستک دے اسے کھانا کھلاتی تھیں
پڑوسن مانگ لے کچھ با خوشی دیتی دلاتی تھیں
جو رشتوں کو برتنے کے کئی نسخے بتاتی تھیں
محلے میں کوئی مر جائے تو آنسو بہاتی تھیں
کوئی بیمار پڑ جائے تو اس کے پاس جاتی تھیں
کوئی تہوار ہو تو خوب مل جل کر مناتی تھیں
وہ کیسی عورتیں تھیں
میں جب گھر اپنے جاتی ہوں تو فرصت کے زمانوں میں
انہیں ہی ڈھونڈھتی پھرتی ہوں گلیوں اور مکانوں میں
کسی میلاد میں جزدان میں تسبیح دانوں میں
کسی بر‌ آمدے کے طاق پر باورچی خانوں میں
مگر اپنا زمانہ ساتھ لے کر کھو گئی ہیں وہ
کسی اک قبر میں ساری کی ساری سو گئی ہیں وہ

اسنی بدر

نظم

دھوپ میں تیزی نہیں
ایسے آتا ہے ہر اک جھونکا ہوا کا جیسے
دست شفقت ہے بڑی عمر کی محبوبہ کا
اور مرے شانوں کو اس طرح ہلا جاتا ہے
جیسے میں نیند میں ہوں
عورتیں چرخے لیے بیٹھی ہیں
کچھ کپاس اوٹتی ہیں
کچھ سلائی کے کسی کام میں مصروف ہیں یوں
جیسے یہ کام ہے دراصل ہر اک شے کی اساس
ایک سے ایک چہل کرتی ہے
کوئی کہتی ہے مری چوڑیاں کھنکیں تو کھنکھاری مری ساس
کوئی کہتی ہے بھری چاندنی آتی نہیں راس
رات کی بات سناتی ہے کوئی ہنس ہنس کر
بات کی بات سناتی ہے کوئی ہنس ہنس کر
لذت وصل ہے آزار، کوئی کہتی ہے
میں تو بن جاتی ہوں بیمار، کوئی کہتی ہے
میں بھی گھس آتا ہوں اس شیش محل میں دیکھو
سب ہنسی روک کے کہتی ہیں نکالو اس کو

اختر الایمان

نظم

بچے ماؤں کی گودوں میں سہمے ہوئے ہیں
عصمتیں سر برہنہ پریشان ہیں
ہر طرف شور آہ و بکا ہے
اور میں اس تباہی کے طوفان میں
آگ اور خوں کے ہیجان میں
سرنگوں اور شکستہ مکانوں کے ملبے سے پر راستوں پر
اپنے نغموں کی جھولی پسارے
در بدر پھر رہا ہوں
مجھ کو امن اور تہذیب کی بھیک دو
میرے گیتوں کی لے میرا سر میری نے
میرے مجروح ہونٹوں کو پھر سونپ دو
ساتھیو! میں نے برسوں تمہارے لیے
انقلاب اور بغاوت کے نغمے الاپے
اجنبی راج کے ظلم کی چھاؤں میں
سرفروشی کے خوابیدہ جذبے ابھارے
اور اس صبح کی راہ دیکھی
جس میں اس ملک کی روح آزاد ہو
آج زنجیر محکومیت کٹ چکی ہے
اور اس ملک کے بحر و بر بام و در
اجنبی قوم کے ظلمت افشاں پھریرے کی منحوس چھاؤں سے آزاد ہیں
کھیت سونا اگلنے کو بے چین ہیں
وادیاں لہلہانے کو بیتاب ہیں
کوہساروں کے سینے میں ہیجان ہے
سنگ اور خشت بے خواب و بے دار ہیں
ان کی آنکھوں میں تعمیر کے خواب ہیں
ان کے خوابوں کو تکمیل کا روپ دو
ملک کی وادیاں گھاٹیاں کھیتیاں
عورتیں بچیاں
ہاتھ پھیلائے خیرات کی منتظر ہیں
ان کو امن اور تہذیب کی بھیک دو
ماؤں کو ان کے ہونٹوں کی شادابیاں
ننھے بچوں کو ان کی خوشی بخش دو
ملک کی روح کو زندگی بخش دو
مجھ کو میرا ہنر میری لے بخش دو
آج ساری فضا ہے بھکاری
اور میں اس بھکاری فضا میں
اپنے نغموں کی جھولی پسارے
در بدر پھر رہا ہوں
مجھ کو پھر میرا کھویا ہوا ساز دو
میں تمہارا مغنی تمہارے لیے
جب بھی آیا نئے گیت لاتا رہوں گا

ساحر لدھیانوی

نظم

دفعتاً گونجی صدا پھر عالم انوار میں
عورتیں دنیا کی حاضر ہوں مرے دربار میں

جوش ملیح آبادی

نظم

وہ رات وہ حلب کی کارواں سرا کا حوض
جس کو میں نے جسم و جان کی خوشبوئیں کشید کر کے
قطرہ قطرہ نو برس میں آنسوؤں سے پر کیا
وہ ایک رات صرف ایک رات میں تمام خشک ہو گیا
ہم اپنے وصل کی تمازتوں میں ایسے جل بجھے
کہ راکھ تک نہیں بچی
یہ ایک جاں کی تشنگی
مجھے تجھے بہ یک زماں بھلا کہاں کہاں نہ کھینچتی پھری
مگر یہ تو نے کیا کہا
کہ تیرے جیسی عورتیں جہاں زاد
ایسی الجھنیں ہیں جن کو آج تک کوئی نہیں سلجھ سکا
کہ عورتوں کی ذات ہے وہ طنز اپنے آپ پر
جواب جن کا ہم نہیں
تو پھر یہ جام و مینا و سبو و حوض و رود نیل
اس زمیں کی گود میں
ازل کی حرف گیر تابناکی کے لئے
کہیں بھی کچھ بہم نہیں

عشرت آفریں

نظم

تمہیں معلوم ہے تیمور کی فوجیں جس وقت
اپنے دشمن پہ بڑھا کرتی تھیں
عورتیں پیچھے رہا کرتی تھیں
اور جو عالم تھے فاضل تھے ان انسانوں کا جرگہ سب کے
پیچھے پیچھے ہی چلا کرتا تھا
کس لیے سب کو رہ زیست پہ ہر گام بڑھانے والے
سب سے پیچھے ہی چلا کرتے ہیں
علم میں ایک ہی بنیادی کمی ہے ورنہ
علم ہر ایک زمانے میں ہر ایک شے سے ترقی پاتا
آج اقبال یہ کہتا ہے کہ عورت ہی کا شعلہ وہ جس سے یونان
حشر تک علم فلاطون سے رہے گا زندہ
آج اسکول میں کالج میں مقام اول
عورتوں کے لیے مخصوص کیے جاتے ہیں
آج انگریزی پڑھی جاتی ہے جغرافیہ تاریخ ہر اک علم یہاں
ایسے استاد سکھاتا ہے کہ جیسے ہم کو
یہی معلوم نہیں ہے کہ جو عالم تھے جو فاضل تھے ان انسانوں کا جرگہ سب سے
پیچھے پیچھے ہی بڑھا کرتا تھا
عورتیں ان سے ذرا آگے رہا کرتی تھیں
عورتیں آج بھی آگے ہی رہا کرتی ہیں
عورتیں آج بھی کہتی ہیں ہمارے گیسو
چاہے بکھرے ہوں کہ ایک جوڑے میں پابند کیے بیٹھے ہوں
دیکھنے والوں کی ناکام تمناؤں کو
ایک ہی ہاتھ کے پابند ہوا کرتے ہیں
وہی اک ہاتھ جو تلوار کو پہلو میں لیے
سب سے آگے ہی چلا کرتا ہے
اس کو کچھ علم کی پرواہ نہیں (عورت کی بھی پرواہ کیا ہے)
اس کو کچھ علم نہیں کیسے فلاطوں پل میں
اک شرر بن کے بجھا کرتا ہے

میراجی

نظم

ہر جگہ پھر سینۂ نخچیر میں
اک نیا ارماں نئی امید پیدا ہو چلی
حجلۂ سیمیں سے تو بھی پیلۂ ریشم نکل
وہ حسیں اور دور افتادہ فرنگی عورتیں
تو نے جن کے حسن روز افزوں کی زینت کے لئے
سالہا بے دست و پا ہو کر بنے ہیں تار ہائے سیم و زر
ان کے مردوں کے لئے بھی آج اک سنگین جال
ہو سکے تو اپنے پیکر سے نکال
شکر ہے دنبالۂ زنجیر میں
اک نئی جنبش نئی لرزش ہویدا ہو چلی
کوہساروں ریگ زاروں سے صدا آنے لگی
ظلم پروردہ غلامو بھاگ جاؤ
پردۂ شبگیر میں اپنے سلاسل توڑ کر
چار سو چھائے ہوئے ظلمات کو اب چیر جاؤ
اور اس ہنگام باد آور کو
حیلۂ شب خوں بناؤ

ن م راشد

نظم

گلنار دیکھتی ہے یہ مزدور عورتیں
چہروں پہ خاک دھول کے پونچھے ہوئے نشاں
تو اور رنگ غازہ و گلگونہ و شہاب
سوچا بھی کس کے خون کی بنتی ہیں سرخیاں
گلنار دیکھتی ہے یہ مزدور عورتیں
میلے پھٹے لباس ہیں محروم شست و شو
تو اور عطر و عنبر و مشک و عبیر و عود
مزدور کے بھی خون کی آتی ہے اس میں بو
گلنار دیکھتی ہے یہ مزدور عورتیں
تن ڈھانکنے کو ٹھیک سے کپڑا نہیں ہے پاس
تو اور حریر و اطلس و کم خواب و پرنیاں
چبھتا نہیں بدن پہ ترے ریشمی لباس
گلنار دیکھتی ہے یہ مزدور عورتیں
چاندی کا کوئی گنجھ نہ سونے کا کوئی تار
تو اور ہیکل زر و آویزۂ گہر
سینہ پہ کوئی دم بھی دھڑکتا ہے تیرا ہار
گلنار دیکھتی ہے یہ مزدور عورتیں
صدیوں سے ہر نگاہ ہے فاقوں کی رہ گزر
تو اور ضیافتوں میں بصد ناز جلوہ گر
کس کے لہو سے گرم ہے یہ میز کی بہار
گلنار دیکھتی ہے یہ مزدور عورتیں
تاریک مقبروں سے مکاں ان کے کم نہیں
تو اور زیب و زینت الوان زر نگار
کیا تیرے قصر ناز کی ہلتی نہیں زمیں
گلنار دیکھتی ہے یہ مزدور عورتیں
محنت ہی ان کا ساز ہے محنت ہی ان کا راگ
تو اور شغل رامش و رقص و رباب و رنگ
کیا تیرے ساز میں بھی دہکتی ہے کوئی آگ
گل نار دیکھتی ہیں یہ مزدور عورتیں
محنت پہ اپنے پیٹ سے مجبور عورتیں

جاں نثار اختر

نظم

وہ جا رہی ہیں سروں پہ پتھر
اٹھائے مزدور عورتیں کچھ
یہ کھردرے ہاتھ میلے پاؤں
جمی ہیں ہونٹوں پہ پپڑیاں سی
اور پسینے میں ہیں شرابور
سلگتی دوپہر میں وہ مل کر
ایک دیوار چن رہی ہیں
حصار سنگیں بنے گا کوئی
یہ دیکھ کر حال ان کا مجھ کو
خیال رہ رہ کے آ رہا ہے
کہاں ہیں وہ مرمریں سی باہیں
وہ گدگدے ہاتھ نرم و نازک
وہ گیسوئے عنبریں و مشکیں
وہ تیر مژگاں کمان ابرو
وہ لعل لب اور وہ روئے زیبا
وہ نازنیں عورتیں کہاں ہیں
وہ مہ جبیں عورتیں کہاں ہیں
وہ جن کی تعریف کرتے کرتے
ادیب و شاعر نہیں ہیں تھکتے

فخر زمان

نظم

بوڑھے غریب باپ کے مرنے پہ دفعتاً
بیٹے نے سوچا کیسے کروں دفن اور کفن
اپنے یہاں تو موت میں خرچے کا ہے چلن
غم سے نڈھال بیٹے کے ماتھے پہ تھی شکن
جو کچھ تھا پاس دفن و کفن میں اٹھا دیا
خرچے نے پھر تو موت کا صدمہ بھلا دیا
کرنا پڑا جو دفن کا تا صبح انتظار
میت کے پاس چلتی رہی چائے بار بار
اور موت میں جو آئے تھے بیرونی رشتہ دار
چائے سے ان کی توڑا گیا نیند کا خمار
اور اس کے بعد چلتا جو پھر پاندان ہے
لگتا ہے سوگوار نہیں میزبان ہے
پرسے کو صبح شام پھر آتے ہیں رشتہ دار
کھانا نہیں تو چائے کم از کم ہو ایک بار
چائے کے ساتھ وائے میں خرچے ہیں بے شمار
مردے کو چھوڑ خرچے کو روتا ہے سوگوار
تیجے کے بعد دسواں ہے پھر بیسواں بھی ہے
پھر چند روز بعد ہی چالیسواں بھی ہے
ہر روز فاتحہ کے لئے گوشت چاہئے
سالن بھی صرف ایک نہیں دو پکائیے
نذر و نیاز کے لئے حلوہ بنائیے
پھر روز آنے والوں کو چائے پلائیے
بیٹا بچارہ دب گیا قرضے کے بار سے
برسوں تک اب چھڑائے گا پیچھا ادھار کے
پھر اس کے بعد باتیں بناتی ہیں عورتیں
کیا کیا کمی رہی یہ بتاتی ہیں عورتیں
چالیسواں کچھ ایسے کراتی ہیں عورتیں
فرمائشوں کے ڈھیر لگاتی ہیں عورتیں
اس طرح موت کو بھی تماشہ بنا دیا
وہ اعتراض اٹھائے کلیجہ ہلا دیا
بیٹے نے نام کر دیا روشن جہان میں
ایسی کسی نے موت نہ کی خاندان میں
چالیسواں کچھ ایسا کیا آن بان میں
زیور بہو کا بک گیا مصنوعی شان میں
وہ موت کی کہ کنبے میں ڈنکا بجا دیا
چالیسویں پہ شہر کو کھانا کھلا دیا

نشتر امروہوی

نظم

بڑی شدتیں عورتیں سہہ رہی ہے
کھڑی اپنے اشکوں میں وہ بہہ رہی ہے
رقم لے کے ہاتھوں میں یہ کہہ رہی ہے
یہ روپیہ اگر مل بھی جائے تو کیا ہے

ف س اعجاز

نظم

ادھر سے گنگا کو جا رہے ہیں کچھ آدمی چھاگلیں سنبھالے
ادھر سے گنگا سے آ رہی ہے کچھ عورتیں نور میں نہائے

نشور واحدی

نظم

حسب نسب ہے نہ تاریخ و جائے پیدائش
کہاں سے آیا تھا مذہب نہ ولدیت معلوم
مقامی چھوٹے سے خیراتی اسپتال میں وہ
کہیں سے لایا گیا تھا وہاں یہ ہے مرقوم
مریض راتوں کو چلاتا ہے ''مرے اندر
اسیر زخمی پرندہ ہے اک، نکالو اسے
گلو گرفتہ ہے یہ حبس دم ہے خائف ہے
ستم رسیدہ ہے مظلوم ہے بچا لو اسے''
مریض چیختا ہے درد سے کراہتا ہے
یہ وتنام، کبھی ڈومنیکن، کبھی کشمیر
زر کثیر، سیہ قومیں، خام معدنیات
کثیف تیل کے چشمے، عوام، استحصال
زمیں کی موت بہائم، فضائی جنگ، ستم
اجارہ داری، سبک گام، دل ربا، اطفال
سرود و نغمہ، ادب، شعر، امن، بربادی
جنازہ عشق کا، دف کی صدائیں، مردہ خیال
ترقی، علم کے گہوارے، روح کا مدفن
خدا کا قتل، عیاں زیر ناف زہرہ جمال
تمام رات یہ بے ربط باتیں کرتا ہے
مریض سخت پریشانی کا سبب ہے یہاں
غرض کہ جو تھا شکایت کا ایک دفتر تھا
نتیجہ یہ ہے اسی روز منتقل کرکے
اسے اک اور شفا خانے کو روانہ کیا
سنا گیا ہے وہاں نفسیات کے ماہر
طبیب حاذق و نباض ڈاکٹر کتنے
طلب کیے گئے اور سب نے اتفاق کیا
یہ کوئی ذہنی مرض ہے، مریض نے شاید
کبھی پرندہ کوئی پالا ہوگا لیکن وہ
عدم توجہی یا اتفاق سے یونہی
بچارہ مر گیا اس موت کا اثر ہے یہ
عجیب چیز ہے تحت شعور انساں کا
یہ اور کچھ نہیں احساس جرم ہے جس نے
دل و دماغ پہ قبضہ کیا ہے اس درجہ
مریض قاتل و مجرم سمجھتا ہے خود کو!
کسی کی رائے تھی پسماندہ قوم کا اک فرد
مریض ہوگا اسی واسطے سیہ قومیں
غریب کے لیے اک ٹیبو بن گئیں افسوس
کوئی یہ کہتا تھا یہ اصل میں ہے حب وطن
مریض چاہتا تھا ہم کفیل ہوں اپنے
کسی بھی قوم کے آگے نہ ہاتھ پھیلائیں
یہیں پہ تیل کے چشمے ہیں، وہ کریں دریافت!
گمان کچھ کو تھا یہ شخص کوئی شاعر ہے
جو چاہتا تھا جہاں گردی میں گزارے وقت
حسین عورتیں مائل ہوں لطف و عیش رہے
قلم کے زور سے شہرت ملے زمانے میں
زر کثیر بھی ہاتھ آئے اس بہانے سے
مگر غریب کی سب کوششیں گئیں ناکام
شکست پیہم و احساس نارسائی نے
یہ حال کر دیا مجروح ہوگئے اعصاب
غرض کہ نکتہ رسی میں گزر گیا سب وقت
وہ چیختا ہی رہا درد کی دوا نہ ملی
نشست بعد نشست اور معائنے شب و روز
انہیں میں وقت گزرتا گیا شفا نہ ملی
پھر ایک شام وہاں سرمہ در گلو آئی
جو اس کے واسطے گویا طبیب حاذق تھی
کسی نے پھر نہ سنی درد سے بھری آواز
کراہتا تھا جو خاموش ہو گیا وہ ساز

اختر الایمان

نظم

بین کرتی عورتیں
رونقیں ہیں موت کی

منیر نیازی

نظم

کالی عینک لگائے گھومتے رہنا سورج میں سڑکوں پر ہوٹلوں میں
تھئیٹروں میں مسجدوں میں دکانوں میں ریلوے پلیٹ فارم پر
بھٹیار گلیوں میں شامل ہونا بجھے بجھے چہروں والی بھیڑ میں تاکتے رہنا
سفید دیواروں کو اکیلے لایعنی ہے سب کچھ اور جو دکھائی دیتا ہے
وہ نہیں ہے پھر بھی دکھائی دیتا ہے کوئی فرق نہیں پڑتا پاؤں ہیں جرابیں
نہ ہونے سے لائف اور ٹائم نہ پڑھنے سے یہی کیا کم ہے کہ صبح سے
شام تک جمع کرتے ہیں لفظوں کو ریڈیو سنتے ہیں اور دیکھتے ہیں مرے
ہوئے کبوتر کی آنکھ اسکول سے لوٹتے ہوئے بچے شراب کی جھیل میں تیرتے
شکارے پچاس سے کم شعر کی غزل نہیں لکھتے فراق آج بھی قبائلی
کمر سے باندھے پھرتے ہیں چالیں گز کی شلوار کیا ہوتا ہے نام سے
یا شعر کہنے سے یا دن بھر اونگھتے رہنے سے یا کتابیں سونگھنے سے
تاش کھیلنے کا مزہ ہی اور ہے احمدآباد ہو یا لاہور ہر جگہ ہوتا ہے
سورج گھر بیٹھے گنگا ہے بھائی کانگریس میں پھوٹ پڑے یا سات
ہزار انسان مار دئے جائیں بھوکے اٹھتے ہیں ہر صبح بستر سے کسی نے
دیکھے ہیں بیکیٹ اور پکاسو کبڈی کے میدان میں یا گنسبرگ کو
استری کرتے ہوئے نکسن سے لے کر مرار جی تک کوئی بھی روک نہ سکا
چھینک اور کھانسی اب آنکھیں کھول دیجیے حضرت دیکھیے پورا
امریکہ چھینک رہا ہے کھانس رہا ہے ادھر دیکھیے یہ ہندوستان
بھی چھینک رہا ہے کھانس رہا ہے کھانس رہا ہے چھینک رہا ہے
کہاں سے شروع ہوئی ہے تاریخ اور کہاں جا کر رکنا ہے لوگوں کو
اداس رہتی ہیں حاملہ عورتیں بس اور سنیما کی قطار میں گھیر رکھی ہے
زمین بھکاریوں نے اور منگاؤ چرس اور گانجا پھر بھی الگ کرنا مشکل
ہے پرانی کو نئی دلی سے لاشوں کو دیکھ کر محفوظ نہیں ہوتے تم کیسے
آدمی ہو کہاں گئیں وہ طوائفیں کہاں گئے وہ قوال معنی تو ہر لفظ
میں موجود ہے لیکن

عادل منصوری

نظم

پاگلوں سے نہیں
بہت ڈر لگتا ہے، مجھے
نارمل اور ذہین لوگوں سے
کچھ بھی کر سکتے ہیں
وہ
اپنی محبوبیت میں
قہر اور فتنے سے بھری
خود پسندی میں
کچھ بھی سوچ سکتے ہیں
کچھ بھی چاہ سکتے ہیں
منصوبے بنانا
اور سازشیں کرنا مشکل نہیں ہوتا
ان کے لیے
یقین رہتا ہے انہیں
کچھ بھی کر سکتی ہے ذہانت
اگر مشکل کوئی وار کرے گی
تو ڈھال بن جائے گی ذہانت
نارمل
بہت متأثر ہوتے ہیں ان سے
ان جیسا ہونا چاہتے ہیں
انہی کا ساتھ دیتے ہیں
کسی بھی عورت کے بارے میں
کچھ بھی سوچ سکتے ہیں
ذہین اور نارمل
منطق سے چلتے ہیں اور حساب سے
عشق نہیں کر سکتے اسی لیے
یہ بات تو ثابت نہیں
کہ عشق
پہلے محبوب کے دل میں پیدا ہوتا ہے
عورتیں یہ سب سمجھتی ہیں
مردوں سے کہیں زیادہ
احمق ترین لگنے والی عورت بھی
ان معاملوں میں
کہیں آگے ہوتی ہے کسی بھی مرد سے
پھر بھی
پھنس ہی جاتی ہیں بے چاری
پھنستی چلی جاتی ہے
پاگلوں کو قبول نہیں کرتیں وہ
حالانکہ وہی جانتی ہیں سب سے زیادہ
عشق تو کام ہے صرف پاگلوں کا
ناچ سکتے ہیں پاگل
ان کے خیال میں
یاد کر سکتے ہیں انہیں
پھولوں کو دیکھ کر
سن سکتے ہیں ہوا سے ان کی باتیں
جو ان کی طرف سے نہ بھی آئی ہو
درختوں کو چلتا ہوا دیکھ سکتے ہیں
ان کے ساتھ
بھری دوپہروں میں
دھوپ پر حیران ہو سکتے ہیں
ان کے مقابل کھڑا کر سکتے ہیں
دھوپ اور سائے کو پاگل
اور شاعری بن سکتی ہیں
ان کے بارے میں
صرف پاگلوں کی باتیں

انور سین رائے

نظم

اس نے چار شادیاں کیں
اور بارہ معاشقے
عورتیں اس پر فدا تھیں
وہ انہیں کسی بھی وقت
جوائے رائڈ دے سکتا تھا

سید کاشف رضا

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے