کی تلاش کا نتیجه | موضو - نظم, صفحہ chalan

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "chalan"

نظم کے متعلقہ نتیجہ "chalan"

نظم

کتنی صدیوں سے یہ وحشت کا چلن جاری ہے
کتنی صدیوں سے ہے قائم یہ گناہوں کا رواج

ساحر لدھیانوی

نظم

تم آج ہزاروں میل یہاں سے دور کہیں تنہائی میں
یا بزم طرب آرائی میں
میرے سپنے بنتی ہوں گی بیٹھی آغوش پرائی میں
اور میں سینے میں غم لے کر دن رات مشقت کرتا ہوں
جینے کی خاطر مرتا ہوں
اپنے فن کو رسوا کر کے اغیار کا دامن بھرتا ہوں
مجبور ہوں میں مجبور ہو تم مجبور یہ دنیا ساری ہے
تن کا دکھ من پر بھاری ہے
اس دور میں جینے کی قیمت یا دار و رسن یا خواری ہے
میں دار و رسن تک جا نہ سکا تم جہد کی حد تک آ نہ سکیں
چاہا تو مگر اپنا نہ سکیں
ہم تو دو ایسی روحیں ہیں جو منزل تسکیں پا نہ سکیں
جینے کو جئے جاتے ہیں مگر سانسوں میں چتائیں جلتی ہیں
خاموش وفائیں جلتی ہیں
سنگین حقائق زاروں میں خوابوں کی ردائیں جلتی ہیں
اور آج جب ان پیڑوں کے تلے پھر دو سائے لہرائے ہیں
پھر دو دل ملنے آئے ہیں
پھر موت کی آندھی اٹھی ہے پھر جنگ کے بادل چھائے ہیں
میں سوچ رہا ہوں ان کا بھی اپنی ہی طرح انجام نہ ہو
ان کا بھی جنوں ناکام نہ ہو
ان کے بھی مقدر میں لکھی اک خون میں لتھڑی شام نہ ہو
سورج کے لہو میں لتھڑی ہوئی وہ شام ہے اب تک یاد مجھے
چاہت کے سنہرے خوابوں کا انجام ہے اب تک یاد مجھے
ہمارا پیار حوادث کی تاب لا نہ سکا
مگر انہیں تو مرادوں کی رات مل جائے
ہمیں تو کشمکش مرگ بے اماں ہی ملی
انہیں تو جھومتی گاتی حیات مل جائے
بہت دنوں سے ہے یہ مشغلہ سیاست کا
کہ جب جوان ہوں بچے تو قتل ہو جائیں
بہت دنوں سے یہ ہے خبط حکمرانوں کا
کہ دور دور کے ملکوں میں قحط بو جائیں
بہت دنوں سے جوانی کے خواب ویراں ہیں
بہت دنوں سے ستم دیدہ شاہراہوں میں
نگار زیست کی عصمت پناہ ڈھونڈھتی ہے
چلو کہ آج سبھی پائمال روحوں سے
کہیں کہ اپنے ہر اک زخم کو زباں کر لیں
ہمارا راز ہمارا نہیں سبھی کا ہے
چلو کہ سارے زمانے کو رازداں کر لیں
چلو کہ چل کے سیاسی مقامروں سے کہیں
کہ ہم کو جنگ و جدل کے چلن سے نفرت ہے
جسے لہو کے سوا کوئی رنگ راس نہ آئے
ہمیں حیات کے اس پیرہن سے نفرت ہے
کہو کہ اب کوئی قاتل اگر ادھر آیا
تو ہر قدم پہ زمیں تنگ ہوتی جائے گی
ہر ایک موج ہوا رخ بدل کے جھپٹے گی
ہر ایک شاخ رگ سنگ ہوتی جائے گی
اٹھو کہ آج ہر اک جنگ جو سے یہ کہہ دیں
کہ ہم کو کام کی خاطر کلوں کی حاجت ہے
ہمیں کسی کی زمیں چھیننے کا شوق نہیں
ہمیں تو اپنی زمیں پر ہلوں کی حاجت ہے
کہو کہ اب کوئی تاجر ادھر کا رخ نہ کرے
اب اس جگہ کوئی کنواری نہ بیچی جائے گی
یہ کھیت جاگ پڑے اٹھ کھڑی ہوئیں فصلیں
اب اس جگہ کوئی کیاری نہ بیچی جائے گی
یہ سر زمین ہے گوتم کی اور نانک کی
اس ارض پاک پہ وحشی نہ چل سکیں گے کبھی
ہمارا خون امانت ہے نسل نو کے لئے
ہمارے خون پہ لشکر نہ پل سکیں گے کبھی
کہو کہ آج بھی ہم سب اگر خموش رہے
تو اس دمکتے ہوئے خاکداں کی خیر نہیں
جنوں کی ڈھالی ہوئی ایٹمی بلاؤں سے
زمیں کی خیر نہیں آسماں کی خیر نہیں
گذشتہ جنگ میں گھر ہی جلے مگر اس بار
عجب نہیں کہ یہ تنہائیاں بھی جل جائیں
گذشتہ جنگ میں پیکر جلے مگر اس بار
عجب نہیں کہ یہ پرچھائیاں بھی جل جائیں
تصورات کی پرچھائیاں ابھرتی ہیں

ساحر لدھیانوی

نظم

یہ دھوم دھڑکا ساتھ لیے کیوں پھرتا ہے جنگل جنگل
اک تنکا ساتھ نہ جاوے گا موقوف ہوا جب ان اور جل
گھر بار اٹاری چوپاری کیا خاصا نین سکھ اور ململ
چلون پردے فرش نئے کیا لال پلنگ اور رنگ محل
سب ٹھاٹھ پڑا رہ جاوے گا جب لاد چلے گا بنجارا

نظیر اکبرآبادی

نظم

جینے کا فن سکھایا مرنے کا بانکپن بھی
عزت کے گر بتائے رسوائی کے چلن بھی
کانٹے بھی راہ میں ہیں پھولوں کی انجمن بھی
تم فخر قوم بننا اور نازش وطن بھی

احمد حاطب صدیقی

نظم

کئی فاختاؤں کی چال میں
مجھے کرگسوں کا چلن لگا
کئی چاند بھی تھے سیاہ رو
کئی سورجوں کو گہن لگا

احمد فراز

نظم

وحشتوں کا چلن تجھ میں جاری رہا
قتل و خوں کا جنوں تجھ پہ طاری رہا

ساحر لدھیانوی

نظم

زبان ہند ہے اردو تو ماتھے کی شکن کیوں ہے
وطن میں بے وطن کیوں ہے
مری مظلوم اردو تیری سانسوں میں گھٹن کیوں ہے
تیرا لہجہ مہکتا ہے تو لفظوں میں تھکن کیوں ہے
اگر تو پھول ہے تو پھول میں اتنی چبھن کیوں ہے
وطن میں بے وطن کیوں ہے
یہ نانکؔ کی یہ خسروؔ کی دیاشنکرؔ کی بولی ہے
یہ دیوالی یہ بیساکھی یہ عید الفطر ہولی ہے
مگر یہ دل کی دھڑکن آج کل دل کی جلن کیوں ہے
وطن میں بے وطن کیوں ہے
یہ نازوں کی پلی تھی میرؔ کے غالبؔ کے آنگن میں
جو سورج بن کے چمکی تھی کبھی محلوں کے دامن میں
وہ شہزادی زبانوں کی یہاں بے انجمن کیوں ہے
وطن میں بے وطن کیوں ہے
محبت کا سبھی اعلان کر جاتے ہیں محفل میں
کہ اس کے واسطے جذبہ ہے ہمدردی کا ہر دل میں
مگر حق مانگنے کے وقت یہ بیگانہ پن کیوں ہے
وطن میں بے وطن کیوں ہے
یہ دوشیزہ جو بازاروں سے اٹھلاتی گزرتی تھی
لبوں کی نازکی جس کی گلابوں سی بکھرتی تھی
جو تہذیبوں کے سر کی اوڑھنی تھی اب کفن کیوں ہے
وطن میں بے وطن کیوں ہے
محبت کا اگر دعویٰ ہے تو اس کو بچاؤ تم
جو وعدہ کل کیا تھا آج وہ وعدہ نبھاؤ تم
اگر تم رام ہو تو پھر یہ راون کا چلن کیوں ہے
وطن میں بے وطن کیوں ہے

منظر بھوپالی

نظم

اپنی سوئی ہوئی دنیا کو جگا لوں تو چلوں
اپنے غم خانے میں اک دھوم مچا لوں تو چلوں
اور اک جام مئے تلخ چڑھا لوں تو چلوں
ابھی چلتا ہوں ذرا خود کو سنبھالوں تو چلوں
جانے کب پی تھی ابھی تک ہے مئے غم کا خمار
دھندلا دھندلا نظر آتا ہے جہان بیدار
آندھیاں چلتی ہیں، دنیا ہوئی جاتی ہے غبار
آنکھ تو مل لوں ذرا ہوش میں آ لوں تو چلوں
وہ مرا سحر وہ اعجاز کہاں ہے لانا
میری کھوئی ہوئی آواز کہاں ہے لانا
مرا ٹوٹا ہوا وہ ساز کہاں ہے لانا
اک ذرا گیت بھی اس ساز پہ گا لوں تو چلوں
میں تھکا ہارا تھا، اتنے میں جو آئے بادل
کسی متوالے نے چپکے سے بڑھا دی بوتل
اف وہ رنگین پر اسرار خیالوں کے محل
ایسے دو چار محل اور بنا لوں تو چلوں
مجھ سے کچھ کہنے کو آئی ہے مرے دل کی جلن
کیا کیا میں نے زمانے میں نہیں جس کا چلن
آنسوؤ تم نے تو بے کار بھگویا دامن
اپنے بھیگے ہوئے دامن کو سکھا لوں تو چلوں
میری آنکھوں میں ابھی تک ہے محبت کا غرور
میرے ہونٹوں کو ابھی تک ہے صداقت کا غرور
میرے ماتھے پہ ابھی تک ہے شرافت کا غرور
ایسے وہموں سے ذرا خود کو نکالوں تو چلوں

معین احسن جذبی

نظم

ایک لڑھکی ہوئی وادی میں
بہت نیچے خلاؤں سے
جہاں دھندلی فضاؤں کا چلن ہے
خستہ سا ایک مکاں مجھ کو وراثت میں ملا ہے

گلزار

نظم

ایک مجبور کا تن بکتا ہے من بکتا ہے
ان دکانوں میں شرافت کا چلن بکتا ہے
سودا ہوتا ہے اندھیروں میں گناہوں کا یہاں
زندگی نام ہے ہنستی ہوئی آہوں کا یہاں
زندہ لاشوں کے لیے سرخ کفن بکتا ہے
جھوٹی الفت کے اشاروں پہ وفا رقص کرے
چند سکوں کے چھناکے پہ حیا رقص کرے
حسن معصوم کا بے ساختہ پن بکتا ہے
بیچ کر اپنا لہو آگ کمائی جائے
آبرو قوم کی سیجوں پہ لٹائی جائے
سر بازار ہوس پیار کا فن بکتا ہے

مظفر وارثی

نظم

راحت بندۂ بے دام کہاں ہے آ جا
پیکر حسن سر بام کہاں ہے آ جا
رونق بزم ہے او جام کہاں ہے آ جا
زینت جلوہ گہ عام کہاں ہے آ جا
اے امید دل نا کام کہاں ہے آ جا
تیری فرقت خلل انداز سکون پیہم
تیری فرقت دل مایوس پہ اک طرفہ ستم
تیری فرقت سبب کاوش و بیداریٔ غم
تو نہیں ہے تو پھر آرام کہاں ہے آ جا
شاہد دور سیہ بخت و شب تار ہوں میں
خوگر نالۂ لذت کش آواز ہوں میں
دام طوفان حوادث میں گرفتار ہوں میں
روز و شب منتظر دید رخ یار ہوں میں
دل ہے وقف غم آلام کہاں ہے آ جا
شعلۂ بر کف گل داغ جگر تیرے بغیر
خار بردوش ہے دامان نظر تیرے بغیر
خوں فشاں ہے شب غم دیدۂ تر تیرے بغیر
چلن آتا ہی نہیں شام و سحر تیرے بغیر
منتظر ہوں سحر و شام کہاں ہے آ جا
دور تاریکیٔ غم سے شب تنہائی سے
دم بدم جوش جنوں کی ستم آرائی سے
کعبہ و دیر و کلیسا کی جبیں سائی سے
خوف مجبوری و ناکامی و رسوائی سے
عشق ہے لرزہ بر اندام کہاں ہے آ جا
منتشر ہونے لگی انجمن ناز حیات
بن گیا خواب ہر اک منظر آغاز حیات
دم شکستہ سا نظر آنے لگا ساز حیات
اب کوئی دم میں ہوا جاتا ہے وا راز حیات
آ گیا نزع کا ہنگام کہاں ہے آ جا

شکیل بدایونی

نظم

مادر ہند کے فن کار تھے مرزا غالبؔ
اپنے فن میں بڑے ہشیار تھے مرزا غالبؔ
آپ کا نام اسداللہ تھا نو شاہ لقب
مرزا غالب سے ہوئے بعد میں معروف ادب
آج بھی پڑھ کے کلام آپ کا حیرت میں ہیں سب
زلف اردو میں گرفتار تھے مرزا غالب
مادر ہند کے فن کار تھے مرزا غالب
اکبرآباد میں پیدا ہوئے دہلی میں رہے
عہد طفلی ہی سے دنیا کے بڑے ظلم سہے
اب بھی ہر اہل سخن آپ کو استاد کہے
سارے شعرا کے علم دار تھے مرزا غالب
مادر ہند کے فن کار تھے مرزا غالبؔ
تنگ دستی میں بھی چھوڑا نہ وفا کا دامن
مفلسی میں بھی نہ اپنائے خوشامد کے چلن
خون جذبات سے شاداب کیا باغ سخن
فطرتاً شاعر خوددار تھے مرزا غالبؔ
مادر ہند کے فن کار تھے مرزا غالب
آپ پر فارسی شعرا کا بھی تھا خوب اثر
مسئلہ خدمت اردو کا بھی تھا پیش نظر
اپنے اشعار کی عظمت سے بھی واقف تھے مگر
میرؔ جی کے بھی طرف دار تھے مرزا غالبؔ
مادر ہند کے فن کار تھے مرزا غالبؔ
خط نویسی کا دیا ایک انوکھا انداز
گونج اٹھی بزم ادب میں یہ نرالی آواز
آپ میدان سخن میں بھی تھے سب سے ممتاز
ساتھ ہی اک بڑے نثار تھے مرزا غالبؔ
مادر ہند کے فن کار تھے مرزا غالبؔ
بے نیاز غم و آلام ہر اک فکر سے دور
ہو مصیبت میں بھی رہتے تھے ہمیشہ مسرور
آج بھی جن کے لطیفے ہیں جہاں میں مشہور
مسکراتے ہوئے کردار تھے مرزا غالبؔ
مادر ہند کے فن کار تھے مرزا غالبؔ

کیف احمد صدیقی

نظم

بوڑھے غریب باپ کے مرنے پہ دفعتاً
بیٹے نے سوچا کیسے کروں دفن اور کفن
اپنے یہاں تو موت میں خرچے کا ہے چلن
غم سے نڈھال بیٹے کے ماتھے پہ تھی شکن
جو کچھ تھا پاس دفن و کفن میں اٹھا دیا
خرچے نے پھر تو موت کا صدمہ بھلا دیا
کرنا پڑا جو دفن کا تا صبح انتظار
میت کے پاس چلتی رہی چائے بار بار
اور موت میں جو آئے تھے بیرونی رشتہ دار
چائے سے ان کی توڑا گیا نیند کا خمار
اور اس کے بعد چلتا جو پھر پاندان ہے
لگتا ہے سوگوار نہیں میزبان ہے
پرسے کو صبح شام پھر آتے ہیں رشتہ دار
کھانا نہیں تو چائے کم از کم ہو ایک بار
چائے کے ساتھ وائے میں خرچے ہیں بے شمار
مردے کو چھوڑ خرچے کو روتا ہے سوگوار
تیجے کے بعد دسواں ہے پھر بیسواں بھی ہے
پھر چند روز بعد ہی چالیسواں بھی ہے
ہر روز فاتحہ کے لئے گوشت چاہئے
سالن بھی صرف ایک نہیں دو پکائیے
نذر و نیاز کے لئے حلوہ بنائیے
پھر روز آنے والوں کو چائے پلائیے
بیٹا بچارہ دب گیا قرضے کے بار سے
برسوں تک اب چھڑائے گا پیچھا ادھار کے
پھر اس کے بعد باتیں بناتی ہیں عورتیں
کیا کیا کمی رہی یہ بتاتی ہیں عورتیں
چالیسواں کچھ ایسے کراتی ہیں عورتیں
فرمائشوں کے ڈھیر لگاتی ہیں عورتیں
اس طرح موت کو بھی تماشہ بنا دیا
وہ اعتراض اٹھائے کلیجہ ہلا دیا
بیٹے نے نام کر دیا روشن جہان میں
ایسی کسی نے موت نہ کی خاندان میں
چالیسواں کچھ ایسا کیا آن بان میں
زیور بہو کا بک گیا مصنوعی شان میں
وہ موت کی کہ کنبے میں ڈنکا بجا دیا
چالیسویں پہ شہر کو کھانا کھلا دیا

نشتر امروہوی

نظم

سگریٹ سے جو سنے پان نے یہ تلخ سخن
بولا خاموش کہ اچھا نہیں حاسد کا چلن
جلتے رہنے سے دھواں بن کے مٹا تیرا بدن
تو لگا منہ کو تو غائب ہوئی خوشبوئے دہن
کاغذی پیرہن اور اس پہ تو فریادی ہے
خودبخود غصہ میں جل جانے کا تو عادی ہے

سید محمد جعفری

نظم

اے آفتاب حب وطن تو کدھر ہے آج
تو ہے کدھر کہ کچھ نہیں آتا نظر ہے آج
تجھ بن جہاں ہے آنکھوں میں اندھیر ہو رہا
اور انتظام دل ہے زبر زیر ہو رہا
ٹھنڈے ہیں کیوں دلوں میں ترے جوش ہو گئے
کیوں سب ترے چراغ ہیں خاموش ہو گئے
حب وطن کی جنس کا ہے قحط سال کیوں
حیراں ہوں آج کل ہے پڑا اس کا کال کیوں
کچھ ہو گیا زمانہ کا الٹا چلن یہاں
حب وطن کے بدلے ہے بغض الوطن یہاں
بن تیرے ملک ہند کے گھر بے چراغ ہیں
جلتے عوض چراغوں کے سینوں میں داغ ہیں
کب تک شب سیاہ میں عالم تباہ ہو
اے آفتاب ادھر بھی کرم کی نگاہ ہو
عالم سے تا کہ تیرہ دلی دور ہو تمام
اور ہند تیرے نور سے معمور ہو مدام
الفت سے گرم سب کے دل سرد ہوں بہم
اور جو کہ ہم وطن ہوں وہ ہمدرد ہوں بہم
تا ہو وطن میں اپنے زر و مال کا وفور
اور مملکت میں دولت و اقبال کا وفور
سب اپنے حاکموں کے لئے جاں نثار ہوں
اور گردن حریف پہ خنجر کی دھار ہوں
علم و ہنر سے خلق کو رونق دیا کریں
اور انجمن میں بیٹھ کے جلسے کیا کریں
لبریز جوش حب وطن سب کے جام ہوں
سرشار ذوق و شوق دل خاص و عام ہوں

محمد حسین آزاد

نظم

گھر کی قسمت جگی گھر میں آئے سجن
ایسے مہکے بدن جیسے چندن کا بن
آج دھرتی پہ ہے سورگ کا بانکپن
اپسرائیں نہ کیوں گائیں منگلاچرن
زندگی سے ہے حیران یمراج بھی
آج ہر دیپ اندھیرے پہ ہے خندہ زن
ان کے قدموں سے پھول اور پھلواریاں
آگمن ان کا مدھوماس کا آگمن
اس کو سب کچھ ملا جس کو وہ مل گئے
وہ ہیں بے آس کی آس نردھن کے دھن
ہے دیوالی کا تیوہار جتنا شریف
شہر کی بجلیاں اتنی ہی بد چلن
ان سے اچھے تو ماٹی کے کورے دیے
جن سے دہلیز روشن ہے آنگن چمن
کوڑیاں داؤں کی چت پڑیں چاہے پٹ
جیت تو اس کی ہے جس کی پڑ جائے بن
ہے دیوالی ملن میں ضروری نذیرؔ
ہاتھ ملنے سے پہلے دلوں کا ملن

نذیر بنارسی

نظم

نیا سال تم کو مبارک ہو بچو
سدا خوش رہو تم پھلو اور پھولو
خدا کی عنایت رہے تم پہ دائم
ہمیشہ رہو سیدھے رستے پہ قائم
ترقی کرو علم میں اور ہنر میں
بلندی ہو پیدا تمہاری نظر میں
غریبوں کی امداد کرتے رہو تم
دم ان کی محبت کا بھرتے رہو تم
رہو تم ہمیشہ قوی اور توانا
زمانہ پکارے تمہیں کہہ کے دانا
جو بگڑے بھی ہوں کام ان کو سنبھالو
کبھی آج کا کام کل پر نہ ٹالو
بنو نیک نیکی تمہارا چلن ہو
بھلائی کی دھن میں ہمیشہ مگن ہو
رہو سکھ سے دائم نہ دکھ پاس آئے
خدا تم کو بیماریوں سے بچائے
دعا ہے یہ نیرؔ کی تم نام پاؤ
اور اس سال میں کچھ نہ کچھ کر دکھاؤ

محمد شفیع الدین نیر

نظم

زمانے کی ہوا بدلی ادھر رنگ چمن بدلا
گلوں نے جب روش بدلی عنادل نے وطن بدلا
طریقہ آشنائی کا کبھی ایسا نہ بدلا تھا
کہ چال عشاق نے بدلی حسینوں نے چلن بدلا
بدلتے آئے ہیں یوں تو ہمیشہ دور گردوں کے
نہ ایسا بھی کہ ہم بدلے ہمارا کل جتن بدلا
مقاصد مذہب و ملت کے بدلے دور عالم نے
صحائف کی شرح بدلی کتابوں کا متن بدلا
بدل ڈالا ہے ایسا مغربی تہذیب نے ہم کو
مذاق خوان نعمت اور طرز پیرہن بدلا
پرانی چال بے ڈھنگی ہماری دیکھیں کب بدلے
ابھی تک جگ ہی بدلے تھے غضب یہ ہے قرن بدلا
نہ بدلا پر نہ بدلا ہائے طرز معشرت قومی
اگرچہ ساری دنیا کا ہنر اور علم و فن بدلا
نظام شاعری میں ہائے آیا انقلاب ایسا
کہ شان نظم بدلی اور انداز سخن بدلا
سلیقہ انتقاد جنس حرفت کا نہیں ہم کو
زر خالص سے ابریشم نما یورپ نے سن بدلا
نہ بدلا ہے نہ بدلے گا فقط قانون اسلامی
قمرؔ جب تک کہ قدرت نے نہ یہ چرخ کہن بدلا

سید تسلیم حیدر قمر

نظم

کیا شیخ مغل سید کا چلن
کیسے ٹھاکر پنڈت ہریجن
کیا چھوت اچھوت کا پاگل پن
سب ایک ہیں سب کا ایک وطن
جو گورے ہیں یا کالے ہیں
سب کے سب بھارت والے ہیں
سب بھارت کے رکھوالے ہیں

نازش پرتاپ گڑھی

نظم

ہم پیدا کرتے ہیں
ہم گیلی مٹی کو مٹھی میں بھینچا کرتے ہیں
تو شکلیں بنتی ہیں
ہم ان کی چونچیں کھول کے سانسیں پھونکا کرتے ہیں
جو مٹی تھے وہ چھو لینے سے طائر ہوتے ہیں
ہم شاعر ہوتے ہیں
کنعان میں رہتے ہیں
جب جلوہ کرتے ہیں
تو ششدر انگشتوں کو پوریں نشتر دیتی ہیں
پھر خون ٹپکتا ہے جو سرد نہیں ہوتا
اک سہما سا سکتہ ہوتا ہے درد نہیں ہوتا
یونان کے ڈاکو ہیں
ہم دیوتاؤں کے محل میں نقب لگایا کرتے ہیں
ہم آسمان کا نیلا شہ دروازہ توڑتے ہیں
ہم آگ چراتے ہیں
تو اس دنیا کی یخ چوٹی سے برف پگھلتی ہے
پھر جمے ہوئے سینے ملتے ہیں
سانس ہمکتی ہے
اور شریانوں کے منہ کھلتے ہیں
خون دھڑکتا ہے
جیون راماین میں
جب راون استبدادی کاروبار چلاتا ہے
ہم سیتا لکھتے ہیں
جب رتھ کے پہیے جسموں کے پوشاک کچلتے ہیں
تو گیتا لکھتے ہیں
جب ہونٹوں کے سہمے کپڑوں پر بخیہ ہوتا ہے
ہم بولا کرتے ہیں
جب منڈی سے ایک ایک ترازو غائب ہوتا ہے
تو جیون کو میزان پہ رکھ کر تولا کرتے ہیں
مزدوری کرتے ہیں
ہم لفظوں کے جنگل سے لکڑی کاٹا کرتے ہیں
ہم ارکشی کے ماہر ہیں انبار لگاتے ہیں
پھر رندہ پھیرتے ہیں پھر برما دیتے ہیں
پھر بدھ ملاتے ہیں پھر چول بٹھاتے ہیں
ہم تھوڑے تھوڑے ہوتے ہیں
اس بھری بھرائی دنیا میں ہم کم کم ہوتے ہیں
جب شہر میں جنگل در آئے اور اس کا چلن جنگلائے
تو ہم غار سے آتے ہیں
جب جنگل شہر کی زد میں ہو اور اس کا سکوں شہرائے
تو برگد سے نکلتے ہیں
ہم تھوڑے تھوڑے ہوتے ہیں
ہم کم کم ہوتے ہیں
ہم شاعر ہوتے ہیں

وحید احمد

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے