کی تلاش کا نتیجه | موضو - نظم, صفحہ zirah

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "zirah"

نظم کے متعلقہ نتیجہ "zirah"

نظم

سلسلۂ روز و شب نقش گر حادثات
سلسلۂ روز و شب اصل حیات و ممات
سلسلۂ روز و شب تار حریر دو رنگ
جس سے بناتی ہے ذات اپنی قبائے صفات
سلسلۂ روز و شب ساز ازل کی فغاں
جس سے دکھاتی ہے ذات زیر و بم ممکنات
تجھ کو پرکھتا ہے یہ مجھ کو پرکھتا ہے یہ
سلسلۂ روز و شب صیرفی کائنات
تو ہو اگر کم عیار میں ہوں اگر کم عیار
موت ہے تیری برات موت ہے میری برات
تیرے شب و روز کی اور حقیقت ہے کیا
ایک زمانے کی رو جس میں نہ دن ہے نہ رات
آنی و فانی تمام معجزہ ہائے ہنر
کار جہاں بے ثبات کار جہاں بے ثبات
اول و آخر فنا باطن و ظاہر فنا
نقش کہن ہو کہ نو منزل آخر فنا
ہے مگر اس نقش میں رنگ ثبات دوام
جس کو کیا ہو کسی مرد خدا نے تمام
مرد خدا کا عمل عشق سے صاحب فروغ
عشق ہے اصل حیات موت ہے اس پر حرام
تند و سبک سیر ہے گرچہ زمانے کی رو
عشق خود اک سیل ہے سیل کو لیتا ہے تھام
عشق کی تقویم میں عصر رواں کے سوا
اور زمانے بھی ہیں جن کا نہیں کوئی نام
عشق دم جبرئیل عشق دل مصطفی
عشق خدا کا رسول عشق خدا کا کلام
عشق کی مستی سے ہے پیکر گل تابناک
عشق ہے صہبائے خام عشق ہے کاس الکرام
عشق فقیہہ حرام عشق امیر جنود
عشق ہے ابن السبیل اس کے ہزاروں مقام
عشق کے مضراب سے نغمۂ تار حیات
عشق سے نور حیات عشق سے نار حیات
اے حرم قرطبہ عشق سے تیرا وجود
عشق سراپا دوام جس میں نہیں رفت و بود
رنگ ہو یا خشت و سنگ چنگ ہو یا حرف و صوت
معجزۂ فن کی ہے خون جگر سے نمود
قطرۂ خون جگر سل کو بناتا ہے دل
خون جگر سے صدا سوز و سرور و سرود
تیری فضا دل فروز میری نوا سینہ سوز
تجھ سے دلوں کا حضور مجھ سے دلوں کی کشود
عرش معلی سے کم سینۂ آدم نہیں
گرچہ کف خاک کی حد ہے سپہر کبود
پیکر نوری کو ہے سجدہ میسر تو کیا
اس کو میسر نہیں سوز و گداز سجود
کافر ہندی ہوں میں دیکھ مرا ذوق و شوق
دل میں صلوٰۃ و درود لب پہ صلوٰۃ و درود
شوق مری لے میں ہے شوق مری نے میں ہے
نغمۂ اللہ ہو میرے رگ و پے میں ہے
تیرا جلال و جمال مرد خدا کی دلیل
وہ بھی جلیل و جمیل تو بھی جلیل و جمیل
تیری بنا پائیدار تیرے ستوں بے شمار
شام کے صحرا میں ہو جیسے ہجوم نخیل
تیرے در و بام پر وادی ایمن کا نور
تیرا منار بلند جلوہ گہ جبرئیل
مٹ نہیں سکتا کبھی مرد مسلماں کہ ہے
اس کی اذانوں سے فاش سر کلیم و خلیل
اس کی زمیں بے حدود اس کا افق بے ثغور
اس کے سمندر کی موج دجلہ و دنیوب و نیل
اس کے زمانے عجیب اس کے فسانے غریب
عہد کہن کو دیا اس نے پیام رحیل
ساقی ارباب ذوق فارس میدان شوق
بادہ ہے اس کا رحیق تیغ ہے اس کی اصیل
مرد سپاہی ہے وہ اس کی زرہ لا الہ
سایۂ شمشیر میں اس کی پنہ لا الہ
تجھ سے ہوا آشکار بندۂ مومن کا راز
اس کے دنوں کی تپش اس کی شبوں کا گداز
اس کا مقام بلند اس کا خیال عظیم
اس کا سرور اس کا شوق اس کا نیاز اس کا ناز
ہاتھ ہے اللہ کا بندۂ مومن کا ہاتھ
غالب و کار آفریں کار کشا کارساز
خاکی و نوری نہاد بندۂ مولا صفات
ہر دو جہاں سے غنی اس کا دل بے نیاز
اس کی امیدیں قلیل اس کے مقاصد جلیل
اس کی ادا دل فریب اس کی نگہ دل نواز
آج بھی اس دیس میں عام ہے چشم غزال
اور نگاہوں کے تیر آج بھی ہیں دل نشیں
بوئے یمن آج بھی اس کی ہواؤں میں ہے
رنگ حجاز آج بھی اس کی نواؤں میں ہے
دیدۂ انجم میں ہے تیری زمیں آسماں
آہ کہ صدیوں سے ہے تیری فضا بے اذاں
کون سی وادی میں ہے کون سی منزل میں ہے
عشق بلا خیز کا قافلۂ سخت جاں
دیکھ چکا المنی شورش اصلاح دیں
جس نے نہ چھوڑے کہیں نقش کہن کے نشاں
حرف غلط بن گئی عصمت پیر کنشت
اور ہوئی فکر کی کشتئ نازک رواں
چشم فرانسیس بھی دیکھ چکی انقلاب
جس سے دگر گوں ہوا مغربیوں کا جہاں
ملت رومی نژاد کہنہ پرستی سے پیر
لذت تجدیدہ سے وہ بھی ہوئی پھر جواں
روح مسلماں میں ہے آج وہی اضطراب
راز خدائی ہے یہ کہہ نہیں سکتی زباں
نرم دم گفتگو گرم دم جستجو
رزم ہو یا بزم ہو پاک دل و پاک باز
نقطۂ پرکار حق مرد خدا کا یقیں
اور یہ عالم تمام وہم و طلسم و مجاز
عقل کی منزل ہے وہ عشق کا حاصل ہے وہ
حلقۂ آفاق میں گرمئ محفل ہے وہ
کعبۂ ارباب فن سطوت دین مبیں
تجھ سے حرم مرتبت اندلسیوں کی زمیں
ہے تہ گردوں اگر حسن میں تیری نظیر
قلب مسلماں میں ہے اور نہیں ہے کہیں
آہ وہ مردان حق وہ عربی شہسوار
حامل خلق عظیم صاحب صدق و یقیں
جن کی حکومت سے ہے فاش یہ رمز غریب
سلطنت اہل دل فقر ہے شاہی نہیں
جن کی نگاہوں نے کی تربیت شرق و غرب
ظلمت یورپ میں تھی جن کی خرد راہ بیں
جن کے لہو کے طفیل آج بھی ہیں اندلسی
خوش دل و گرم اختلاط سادہ و روشن جبیں
دیکھیے اس بحر کی تہہ سے اچھلتا ہے کیا
گنبد نیلوفری رنگ بدلتا ہے کیا
وادی کہسار میں غرق شفق ہے سحاب
لعل بدخشاں کے ڈھیر چھوڑ گیا آفتاب
سادہ و پرسوز ہے دختر دہقاں کا گیت
کشتئ دل کے لیے سیل ہے عہد شباب
آب روان کبیر تیرے کنارے کوئی
دیکھ رہا ہے کسی اور زمانے کا خواب
عالم نو ہے ابھی پردۂ تقدیر میں
میری نگاہوں میں ہے اس کی سحر بے حجاب
پردہ اٹھا دوں اگر چہرۂ افکار سے
لا نہ سکے گا فرنگ میری نواؤں کی تاب
جس میں نہ ہو انقلاب موت ہے وہ زندگی
روح امم کی حیات کشمکش انقلاب
صورت شمشیر ہے دست قضا میں وہ قوم
کرتی ہے جو ہر زماں اپنے عمل کا حساب
نقش ہیں سب ناتمام خون جگر کے بغیر
نغمہ ہے سودائے خام خون جگر کے بغیر

علامہ اقبال

نظم

وہ موسم ہے کہ خوبان چمن بنتے سنورتے ہیں
یہ عالم ہے کہ جیسے رنگ تصویروں میں بھرتے ہیں
ہے خوابیدہ جو سبزہ آئنہ خانے میں شبنم کے
نفس دزدیدہ باد صبح کے جھونکے گزرتے ہیں
پر طوطی پہ ہوتا ہے دم طاؤس کا دھوکا
ہوا سے اڑ کے برگ گل جو سبزہ پر بکھرتے ہیں
ملا ہے سبزہ نوخیز کو کیا رنگ زنگاری
ہوا لگنے سے جس کی زخم دل لالہ کے بھرتے ہیں
شگوفہ ریز ہو کر ڈالیاں مدہوش کرتی ہیں
کہ میکش جانتے ہیں طاق سے شیشے اترتے ہیں
نزاکت سے ادا سے جھوم کر کہتی ہے شاخ گل
یونہی اک جام پی کر رنگ مستوں کے نکھرتے ہیں
بشاشت کہہ رہی ہے چہرۂ گل کی ادھر دیکھو
یوں ہی محفل میں ہنس دیتے ہیں پیمانے جو بھرتے ہیں
چمن کی بڑھ کے شاخیں ابر سے کرتی ہیں گل بازی
گلوں کی آئنہ داری پر طاؤس کرتے ہیں
گماں ہوتا ہے کی لشکر کشی باد بہاری نے
زرہ پوش آب ہو جاتا ہے جب بادل گزرتے ہیں
دم صبح بہاری ہے رخ خور پر نقاب افگن
کسی آئینہ پر تار نفس جیسے بکھرتے ہیں
وہیں جا کر تھمے گا کاروان لالہ و گل بھی
نسیم صبح کے جھونکے جہاں جا کر ٹھہرتے ہیں
نہالان چمن کر لیں گے قبضہ سارے عالم پر
وہاں سے پھر نہیں ہٹتے جہاں پہ پاؤں دھرتے ہیں
زمیں پر جال پھیلایا ہے کوسوں زلف سنبل نے
عنادل ان دنوں آتے ہوئے گلشن میں ڈرتے ہیں
جواب جشن جم ہے گرمئ ہنامۂ گلشن
کہ لے کر کشتئ مے تخت پریوں کے اترتے ہیں
عنادل مل چکے ہیں خاک میں جو کیا خبر ان کو
کہ شاخیں جھومتی ہیں پھول تربت پر بکھرتے ہیں

نظم طبا طبائی

نظم

میں نے ایک بہادر کی مانند
اوچھا ہتھیار استعمال نہ کرنے کا فیصلہ کیا تھا
لیکن جوں ہی میرے گرد حصار تنگ ہونے لگتا ہے
میری زرہ بکتر کے حلقے ٹوٹنے لگتے ہیں
اور بچاؤ کے ہر راستے پر
ٹکٹکی دکھائی دیتی ہے
تو میں کوئی نہ کوئی اوچھا ہتھیار
استعمال کرنے پر مجبور ہو جاتا ہوں
کسی سرکش خیال کے پیٹ میں
چپکے سے خنجر اتار دیتا ہوں
کسی گستاخ جذبے کو
مفاہمت کے بہانے بلا کر
دیوار میں چن دیتا ہوں

جاوید شاہین

نظم

سورج کا زرہ بکتر
چمکا تو میں گھبرایا
ٹوٹی ہوئی کھڑکی سے
لہراتا ہوا نیزہ
کوندے کی طرح آیا
میں درد سے چلایا

وزیر آغا

نظم

میں اپنے آپ کو
ایک لوہے کے لباس میں پاتا ہوں
شاید کبھی
یہ کوئی زرہ رہی ہو
لیکن اب یہ میری قبر ہے
میں اپنے تحفظ کے معاملے میں
بہت محتاط رہا ہوں
اور اب
ایک لوہے کے لباس میں
گھٹ کر مر رہا ہوں
یہ لباس
مجھے بہت سے ہتھیاروں کی مار سے محفوظ رکھتا ہے

سعید الدین

نظم

گر مجھے اس کا یقیں ہو مرے ہمدم مرے دوست
گر مجھے اس کا یقیں ہو کہ ترے دل کی تھکن
تری آنکھوں کی اداسی تیرے سینے کی جلن
میری دل جوئی مرے پیار سے مٹ جائے گی
گر مرا حرف تسلی وہ دوا ہو جس سے
جی اٹھے پھر ترا اجڑا ہوا بے نور دماغ
تیری پیشانی سے ڈھل جائیں یہ تذلیل کے داغ
تیری بیمار جوانی کو شفا ہو جائے
گر مجھے اس کا یقیں ہو مرے ہمدم مرے دوست
روز و شب شام و سحر میں تجھے بہلاتا رہوں
میں تجھے گیت سناتا رہوں ہلکے شیریں
آبشاروں کے بہاروں کے چمن زاروں کے گیت
آمد صبح کے، مہتاب کے، سیاروں کے گیت
تجھ سے میں حسن و محبت کی حکایات کہوں
کیسے مغرور حسیناؤں کے برفاب سے جسم
گرم ہاتھوں کی حرارت میں پگھل جاتے ہیں
کیسے اک چہرے کے ٹھہرے ہوئے مانوس نقوش
دیکھتے دیکھتے یک لخت بدل جاتے ہیں
کس طرح عارض محبوب کا شفاف بلور
یک بیک بادۂ احمر سے دہک جاتا ہے
کیسے گلچیں کے لیے جھکتی ہے خود شاخ گلاب
کس طرح رات کا ایوان مہک جاتا ہے
یونہی گاتا رہوں گاتا رہوں تیری خاطر
گیت بنتا رہوں بیٹھا رہوں تیری خاطر
پر مرے گیت ترے دکھ کا مداوا ہی نہیں
نغمہ جراح نہیں مونس و غم خوار سہی
گیت نشتر تو نہیں مرہم آزار سہی
تیرے آزار کا چارہ نہیں نشتر کے سوا
اور یہ سفاک مسیحا مرے قبضے میں نہیں
اس جہاں کے کسی ذی روح کے قبضے میں نہیں
ہاں مگر تیرے سوا تیرے سوا تیرے سوا

فیض احمد فیض

نظم

اک مولوی صاحب کی سناتا ہوں کہانی
تیزی نہیں منظور طبیعت کی دکھانی
شہرہ تھا بہت آپ کی صوفی منشی کا
کرتے تھے ادب ان کا اعالی و ادانی
کہتے تھے کہ پنہاں ہے تصوف میں شریعت
جس طرح کہ الفاظ میں مضمر ہوں معانی
لبریز مئ زہد سے تھی دل کی صراحی
تھی تہہ میں کہیں درد خیال ہمہ دانی
کرتے تھے بیاں آپ کرامات کا اپنی
منظور تھی تعداد مریدوں کی بڑھانی
مدت سے رہا کرتے تھے ہمسائے میں میرے
تھی رند سے زاہد کی ملاقات پرانی
حضرت نے مرے ایک شناسا سے یہ پوچھا
اقبالؔ کہ ہے قمرئ شمشاد معانی
پابندئ احکام شریعت میں ہے کیسا
گو شعر میں ہے رشک کلیم ہمدانی
سنتا ہوں کہ کافر نہیں ہندو کو سمجھتا
ہے ایسا عقیدہ اثر فلسفہ دانی
ہے اس کی طبیعت میں تشیع بھی ذرا سا
تفضیل علی ہم نے سنی اس کی زبانی
سمجھا ہے کہ ہے راگ عبادات میں داخل
مقصود ہے مذہب کی مگر خاک اڑانی
کچھ عار اسے حسن فروشوں سے نہیں ہے
عادت یہ ہمارے شعرا کی ہے پرانی
گانا جو ہے شب کو تو سحر کو ہے تلاوت
اس رمز کے اب تک نہ کھلے ہم پہ معانی
لیکن یہ سنا اپنے مریدوں سے ہے میں نے
بے داغ ہے مانند سحر اس کی جوانی
مجموعۂ اضداد ہے اقبالؔ نہیں ہے
دل دفتر حکمت ہے طبیعت خفقانی
رندی سے بھی آگاہ شریعت سے بھی واقف
پوچھو جو تصوف کی تو منصور کا ثانی
اس شخص کی ہم پر تو حقیقت نہیں کھلتی
ہوگا یہ کسی اور ہی اسلام کا بانی
القصہ بہت طول دیا وعظ کو اپنے
تا دیر رہی آپ کی یہ نغز بیانی
اس شہر میں جو بات ہو اڑ جاتی ہے سب میں
میں نے بھی سنی اپنے احبا کی زبانی
اک دن جو سر راہ ملے حضرت زاہد
پھر چھڑ گئی باتوں میں وہی بات پرانی
فرمایا شکایت وہ محبت کے سبب تھی
تھا فرض مرا راہ شریعت کی دکھانی
میں نے یہ کہا کوئی گلہ مجھ کو نہیں ہے
یہ آپ کا حق تھا ز رہ قرب مکانی
خم ہے سر تسلیم مرا آپ کے آگے
پیری ہے تواضع کے سبب میری جوانی
گر آپ کو معلوم نہیں میری حقیقت
پیدا نہیں کچھ اس سے قصور ہمہ دانی
میں خود بھی نہیں اپنی حقیقت کا شناسا
گہرا ہے مرے بحر خیالات کا پانی
مجھ کو بھی تمنا ہے کہ اقبالؔ کو دیکھوں
کی اس کی جدائی میں بہت اشک فشانی
اقبالؔ بھی اقبالؔ سے آگاہ نہیں ہے
کچھ اس میں تمسخر نہیں واللہ نہیں ہے

علامہ اقبال

نظم

یہ احساس
کہ اک ذی روح
مری آواز کے شعلے سے
جل سکتا ہے
خاموشی کے ریشم سے
کٹ سکتا ہے
اتنا جاں پرور ہے کہ آنکھیں
بند ہوئی جاتی ہیں خوشی سے
بھیگی جاتی ہیں

ساقی فاروقی

نظم

سوچ لو
ہے وقت اب بھی
ورنہ پھر اے
بانوئے معصوم و زیرک
رنجشیں کتنی کھڑی ہیں راہ میں
پھر نہ ساحل تھا
نہ وہ ساحل کا پتھر
جو نظر آیا
وہ تا حد نظر پھیلا ہوا
اک پر آشوب و پر اسرار
بحر نا پیدا کنار
ہم نے انساں کا جنم پایا
ستارے گا رہے تھے
کس عمل کے اجرا میں
پایا ستارو
تم نے انساں کا جنم
ہم تو انساں کے جنم میں بھی ستارے ہی رہے
بے کراں نیلاہٹوں میں
رو جھمک اٹھتی ہے رہ رہ کر
انا
کہکشاں در کہکشاں بکھرے ثوابت
اور سیاروں کے بیچ
فاصلے جذب و کشش کے
ان کی پیمودہ حدیں
بڑھتے بڑھتے زاری دائم
بنات النعش کی
گھٹتے گھٹتے ورطہ دام فنا
دھوم کیتو بے مہاری میں مگن
ایک جھالا سا برس کر کھل گیا چنگاریوں کا
کتنی تہذیبیں شہابی ٹمٹما کر بجھ گئیں

شفیق فاطمہ شعریٰ

نظم

یہ دنیا تو ان شعلہ سامان لوگوں نے آپس میں تقسیم کر لی
جو ہتھیار کی شکل میں رنج و غم ڈھالتے ہیں
یا گولہ بارود کے کارخانوں کے مالک ہیں
یا پھر ثنا خواں ہیں ان کے
ہمارے لیے صرف نعرے بچے ہیں
صنعتی دور کے کج کلاہوں کی داد و دہش روح پرور ہو یا جان لیوا
مگر زندہ باد، آفریں، مرحبا، کے سوا کچھ نہیں پاس اپنے
یہ سب جانتا ہے ہماری شجاعت کی پرواز کیا ہے
ہماری جواں مردی اک صوبہ جاتی تعصب سے
یا فرقہ واری فسادات سے آگے کچھ بھی نہیں ہے
فتوحات اسکندری ہم نے تختی پہ لکھ کر مٹا دی ہیں کب کی
ہمارے بعد زمیں کے تلے سو رہے ہیں
عجائب گھروں میں لٹکتی ہیں تلواریں ان کی
اور ان کے زریں لبادوں کو گھن کھا گیا ہے
ذرہ بکتروں پر کلونس آ گئی ہے
یہ سب جانتا ہے ہماری تگ و تاز کیا ہے
ہمارے شکم گر ہمارے سروں پہ نہ ہوتے
اور چہروں میں اعضائے جنسی
تو ہم اچھے انسان بنتے
ہمارے گھروں کے کم و بیش سب عقبی دروازے پیہم کھلے ہیں
ہمارے لہو میں ہرے لال پیلے بہت سارے پرچم کھلے ہیں
کہیں سے مگر حق کی آواز آتی نہیں ہے
ہماری زباں دل کی ساتھی نہیں ہے
ہمارے لیے کھوکھلا لفظ جمہوریت ہے، تقاریر ہیں لیڈروں کی
ہمارے لیے روز ناموں کے صفحات ہیں، اشتہارات ہیں نیم جنسی
ہمارے لیے دیوتاؤں کے بت ہیں، خدا کے فرامین ہیں اور عقبیٰ
جو بد رنگ ہے حال کی طرح اور کورے لٹھے کی بو سے بھری ہے
ہمارے لیے صرف روٹی کی جد و جہد
عورتوں کے برہنہ بدن کی تمنا سے آگے کہیں کچھ نہیں ہے
ہماری رگوں میں جو تیزاب ہے اس کی شدت کبھی کم نہ ہوگی!

اختر الایمان

نظم

مجھے سبز حیرت سے کیوں دیکھتے ہو
وہی تتلیاں جمع کرنے کی ہابی
ادھر کھینچ لائی
مگر تتلیاں اتنی زیرک ہیں
ہجرت کے ٹوٹے پروں پر
ہوا کے دوشالے میں لپٹی
مرے خوف سے اجنبی جنگلوں میں
کہیں جا چھپیں۔۔۔

ساقی فاروقی

نظم

اور پھر ایک اتوار کو
اس کے دونوں بڑے بھائیوں بھابیوں نے
حساب اور چولھے الگ جب کیے
اس نے اماں کو خود اعتمادی سے دیکھا
کہ اب اس کے اپنے دوپٹے قمیص اور شلوار چپل کے جوڑے
نمک مرچ آلو مٹر پیاز لہسن چقندر ٹماٹر
پودینہ، کڑھی پات زیرہ، مسالے،
چنے مونگ ماش اور مسر، ساری دالیں
مہینے میں دو بار قیمہ یا مرغی کا سالن
چھٹی کلاس میں پڑھنے والے غبی چھوٹے بھائی کی ٹیوشن
کتابوں کا خرچہ
یہ سب اس اکیلی کی ہے ذمہ داری

حارث خلیق

نظم

میں نے کہا کہ پیاز کا لہسن کا کیا کریں
کہنے لگے بگھار میں زیرہ لیا کریں

نشتر امروہوی

نظم

اے ارض و سما کے خالق
بے عیب و دانا رحیم و مالک
نہ جانے کتنی ہے مخلوق تیری
حساب کیسے تو رکھتا ہوگا
کہیں پہ انساں کہیں پہ شیطاں
فرشتے جن اور طیور و حیواں
بحر و بر میں زمیں کے بھیتر
سنگ و چوب اور فضا کے اندر
ہیں اور بھی تو کروڑوں ذی روح
ہیں سب کے سب جو مطیع و قائل
مگر وہ عالم فہیم جس کو
کہ تو نے احسن تریں بنایا
اشرف الخلق ذکی بنایا
وہی جو ہم ہیں کہ یعنی انساں
ہے دعویٰ جس کو پیمبری کا
ملائک و جن پہ برتری کا
ہے جس کی خدمت میں چاند سورج
ہوا سمندر پہاڑ بادل
زمیں کا مدفن فضا کی وسعت
نہ جانے پھر کیا ہوا یہ ہم کو
رذیل بنتے چلے گئے ہم
بچوں بوڑھوں پہ قہر ڈھا کر
خبیث بنتے چلے گئے ہم
خود اپنی بیٹی بہن کو اپنے
ہوس کا لقمہ بنا رہے ہیں
اپنی ماں کو بہو کو اپنی
اشکوں میں ہم ڈبو رہے ہیں
امن کی جگہوں کو روند ڈالا
تمہیں بھی حصوں میں بانٹ ڈالا
خدایا کوئی خطا ہوئی ہے
یا شاید ہم سے یا شاید تجھ سے
حساب میں تیرے کمی ہے شاید
یا میری فطرت بدل گئی ہے
اے خالق کائنات و برتر
بس ایک فریاد اور سن لے
حساب اپنا تو ٹھیک کر لے
یا پھر سے فطرت بدل دے میری

ابوبکر عباد

نظم

خداوندا وہ کیسا مرحلہ تھا!
اب یہ کیسا مرحلہ ہے!
ایک سنسانی کا عالم ہے
گلی چپ ہے
کسی ذی روح کی آہٹ نہیں آتی
یہ کیسی ساعت منحوس ہے
جس میں ابھی تک
کوئی ننھا سا پرندہ یا پتنگا
یا کوئی موہوم چیونٹی ہی نہیں گزری
کسی بھی مرد و زن کی
میں نے صورت ہی نہیں دیکھی
سواری اونٹ کی ہے
اور میں شہر شکستہ کی
کسی سنساں گلی میں سر جھکائے
ہاتھ میں بد رنگ چمڑے کی مہاریں تھام کر
اس گھر کی جانب جا رہا ہوں
یا کسی محشر
خموشی کے کسی محشر کی جانب جا رہا ہوں
ہچکیوں اور سسکیوں کے بعد کا محشر
کوئی منظر
کوئی منظر کہ جس میں اک گلی ہے
ایک بھورا اونٹ ہے
اور ایک بزدل شخص کی ڈھیلی رفاقت ہے
سفر نا مختتم
جیسے ابد تک کی کوئی لمبی مسافت ہے!

رفیق سندیلوی

نظم

نیلا نیلا امبر کیوں ہے
دھرتی کھاتی چکر کیوں ہے
بلی چوہے کیوں ہے کھاتی
کالی کوئل کیوں ہے گاتی
کیوں پانی میں رہتی مچھلی
کیوں چرخے پر گھومے تکلی
تتلی رنگ برنگی کیوں ہے
یہ دنیا بے ڈھنگی کیوں ہے
ہندو مسلم سکھ عیسائی
کیوں رکھتے مذہب کی کھائی
کچھ گورے کچھ کالے کیوں ہیں
اونچے پیسے والے کیوں ہیں
چیزیں اتنی مہنگی کیوں ہیں
جانیں اتنی سستی کیوں ہیں
جھگڑا کرتے کیوں ہیں انساں
دھن پر مرتے کیوں ہیں انساں
خود غرضی ہی پیاری کیوں ہے
مطلب کی ہی یاری کیوں ہے
ہر دم بم کے خطرے کیوں ہیں
جنگ کے بادل بکھرے کیوں ہیں
صدہا باتیں من میں اٹھتیں
گھیرے مجھ کو سوچیں رہتیں
میں ہوں ننھا منا بالک
اوروں جیسا کب ہوں زیرک
پاپا تم ہو عالم فاضل ہر فن میں ہو پورے کامل
پاپا مجھ کو بتلاؤ نا
ساری باتیں سمجھاؤ نا

مختار ٹونکی

نظم

غیروں کا تو کہنا کیا محرم سے نہیں کہتا
میں عالم غم اپنا عالم سے نہیں کہتا
پڑھ لیتی ہیں کیفیت کچھ تڑپی ہوئی نظریں
دکھ اپنا میں ہر چشم پر نم سے نہیں کہتا
رہ گیر ہوں میں ایسا ہر خم سے گزرتا ہے
دعوت پہ جو رندان خرم سے نہیں کہتا
موسم ہمہ گردش ہے پس ماندۂ گردش میں
لب تشنہ کوئی یہ شے کیوں جم سے نہیں کہتا
کسب متحرک سے پابستہ نسب طغرے
یہ کیا ہے کوئی اہل خاتم سے نہیں کہتا
آ داغ محبت کے سانچے میں تجھے ڈھالوں
خاتم سے میں کہتا ہوں درہم سے نہیں کہتا
کچھ بات تھی کہنے کی کچھ بھول گیا اب میں
فطرت سے نہیں کہتا آدم سے نہیں کہتا
کہئے تو نہیں باور نا کہئے تو کافر تر
کہنے کی قسم مجھ کو کو میں ذم سے نہیں کہتا
کہلانے میں خود ان کا کچھ تکملہ نا رس ہے
الٹے انہیں شکوے ہیں کیوں ہم سے نہیں کہتا
ہاں میری یہ الجھن تو ہر دل میں کھٹکتی ہے
کچھ مڑ کے کوئی زلف برہم سے نہیں کہتا
کیوں ہو نہ جنوں کم گو جب ہوتا ہے یہ زیرک
دہراتی ہوئی باتیں محروم سے نہیں کہتا
کہنے سے ہوا گہرا کچھ اور غم پنہاں
میں سائے سے کہتا ہوں ہمدم سے نہیں کہتا
جس لمحے سے دیکھا ہے اک شعر سراپا کو
دانستہ کوئی مصرع اس دم سے نہیں کہتا
دیتے ہیں وہ محفل میں یوں داد لطیفیؔ کو
اشعار یہ کیا اکثر مبہم سے نہیں کہتا

م حسن لطیفی

نظم

زمانے! تہنیت تجھ کو
کہ پھر میدان مارا ہے
مگر اب کے جو ہارا ہے
بڑا ہی سخت جاں نکلا
مقابل تیرے آنے کو بہت تیار پھرتا تھا
لیے ہتھیار پھرتا تھا
وفا کے، ظرف کے
آنکھوں میں روشن خوش گمانی کے
لبوں پر کھیلتی خواہش،
سخن میں ناچتی اک حوصلہ مندی
رگوں میں دوڑتا سیال ارادہ تھا
بدن پر خواب کی پہنے ذرہ بکتر
جبیں پر بے نیازی خود کی صورت ٹکائی تھی
گرا کے فرش پر اس کو
بڑا عرصہ لگا تجھ کو
کہ اس کاشانۂ امید بھی لمس زمیں چکھے
پھر اس کے بعد
کتنی دیر تک اس کا
عدم تسلیم پسپائی میں چلاتے ہوئے رہنا۔۔۔

صائمہ اسما

نظم

زمیں اب چلتے چلتے تھک چکی ہے
سمندر خشک ہوتا جا رہا ہے
فلک بھی کتنا بوڑھا ہو چکا ہے
ستارے روشنی کھونے لگے ہیں
یہ سیارے جو گردش کر رہے ہیں
یہ سیارے زمیں پر آ گئے ہیں
بکھر جائے گا یہ شیرازہ اک دن
سبھی ذی روح سارے جانور انساں
یہ اک اک سانس مانگیں گے زمیں پر
بگڑ جائے گا جس دن بھی توازن
ہماری کائنات رنگ و بو کا
زمیں پر حسن فطرت کو نہ کچلو
یہ پوری نسل آدم کے لیے اک خودکشی ہے

نسیم انصاری

نظم

کوئی ذی روح نہ تھا
اطراف میں ویرانی تھی
وقت بیمار تھا دم توڑ رہا تھا شاید

فیصل ہاشمی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے