Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ",GsFU"

Nazm MATCHES FOR ",Gsfu"

Nazm

KHizr-e-rah

kyaa sunaataa hai mujhe turk-o-arab kii daastaa.n
mujh se kuchh pinhaa.n nahii.n islaamiyo.n kaa soz-o-saaz
le ga.e tasliis ke farzand miiraas-e-KHaliil
KHisht-e-buniyaad-e-kaliisaa ban ga.ii KHaak-e-hijaaz
ho ga.ii rusvaa zamaane me.n kulaah-e-laala-ra.ng
jo saraapaa naaz the hai.n aaj majbuur-e-niyaaz
le rahaa hai mai-faroshaan-e-fara.ngistaan se paars
vo mai-e-sarkash haraarat jis kii hai miinaa-gudaaz
hikmat-e-maGrib se millat kii ye kaifiyyat hu.ii
Tuk.De Tuk.De jis tarah sone ko kar detaa hai gaaz
ho gayaa maanind-e-aab arzaa.n musalmaa.n kaa lahuu
muztarib hai tuu ki teraa dil nahii.n daanaa-e-raaz
guft ruumii har banaa-e-kuhanaa ki-aabaadaa.n kunand
mii na-daanii avval aa.n buniyaad raa viiraa.n kunand
mulk haatho.n se gayaa millat kii aa.nkhe.n khul ga.ii.n
haq tiraa chashme 'ataa kar dast-e-Gaafil dar nigar
momyaa.ii kii gadaa.ii se to behtar hai shikast
mor-e-be-par haajate pesh-e-sulaimaane mabar
rabt-o-zabt-e-millat-e-baizaa hai mashriq kii najaat
asia vaale hai.n is nukte se ab tak be-KHabar
phir siyaasat chho.D kar daaKHil hisaar-e-dii.n me.n ho
mulk-o-daulat hai faqat hifz-e-haram kaa ik samar
ek huu.n muslim haram kii paasbaanii ke liye
niil ke saahil se le kar taa-ba-KHaak-e-kaashGar
jo karegaa imtiyaaz-e-ra.ng-o-KHuu.n miT jaa.egaa
turk-e-KHargaahii ho yaa aaraabii-e-vaalaa-guhar
nasl agar muslim kii maz.hab par muqaddam ho ga.ii
u.D gayaa duniyaa se tuu maanind-e-KHaak-e-raah-guzar
taa-KHilaafat kii binaa duniyaa me.n ho phir ustuvaar
laa kahii.n se Dhuu.nD kar aslaaf kaa qalb-o-jigar
ai ki na-shinaasii KHafii raa az jalii hushiyaar baash
ai giraftaar-e-abuu-bakr-o-alii hushiyaar-baash
'ishq ko fariyaad laazim thii so vo bhii ho chukii
ab zaraa dil thaam kar fariyaad kii taasiir dekh
tuu ne dekhaa satvat-e-raftaar-e-dariyaa kaa 'uruuj
mauj-e-muztar kis tarah bantii hai ab zanjiir dekh
'aam hurriyat kaa jo dekhaa thaa KHvaab islaam ne
ai musalmaa.n aaj tuu us KHvaab kii taa'biir dekh
apnii KHaakistar samundar ko hai saamaan-e-vajuud
mar ke phir hotaa hai paidaa ye jahaan-e-piir dekh
khol kar aa.nkhe.n mire aa.iina-e-guftaar me.n
aane vaale daur kii dhundlii sii ik tasviir dekh
aazmuuda fitna hai ik aur bhii garduu.n ke paas
saamne taqdiir ke rusvaa.ii-e-tadbiir dekh
muslim astii siina raa az aarzuu-aabaad daar
har zamaa.n pesh-e-nazar laa-yuKHlif-ul-mii.aad daar

Allama Iqbal
Nazm

aadmi ki talash

abhii maraa nahii.n zinda hai aadmii shaayad
yahii.n kahii.n use Dhuu.nDo yahii.n kahii.n hogaa
badan kii andhii guphaa me.n chhupaa hu.aa hogaa
ba.Dhaa ke haath
har ik raushnii ko gul kar do
havaa.e.n tez hai.n jhanDe lapeT kar rakh do
jo ho sake to un aa.nkho.n pe paTTiyaa.n kas do
na ko.ii paa.nv kii aahaT
na saa.nso.n kii aavaaz
Daraa hu.aa hai vo
kuchh aur bhii na Dar jaa.e
badan kii andhii guphaa se na kuuch kar jaa.e
yahii.n kahii.n use Dhuu.nDo
vo aaj sadiyo.n baad
udaas udaas hai
KHaamosh hai
akelaa hai
na jaane kab ko.ii paslii pha.Dak uThe us kii
yahii.n kahii.n use Dhuu.nDo yahii.n kahii.n hogaa
barhana ho to use phir libaas pahnaa do
a.ndherii aa.nkho.n me.n suuraj kii aag dahkaa do
bahut ba.Dii hai ye bastii kahii.n bhii dafnaa do
abhii maraa nahii.n
zinda hai aadmii shaayad

Nida Fazli
Nazm

kisan

zer-e-lab arz o samaa me.n baahamii guft-o-shunuud
mish.al-e-garduu.n ke bujh jaane se ik halkaa saa duud

Josh Malihabadi
Nazm

ise kahna

use kahnaa december aa gayaa hai
december ke guzarte hii baras ik aur maazii kii guphaa me.n Duub jaa.egaa
use kahnaa december lauT aa.egaa
magar jo KHuun so jaa.egaa jismo.n me.n na jaa.egaa
use kahnaa havaa.e.n sard hai.n aur zindagii ke kohre diivaaro.n me.n larzaa.n hai.n
use kahnaa shaguufe Tahniyo.n me.n so rahe hai.n
aur un par barf kii chaadar bichhii hai
use kahnaa agar suuraj na niklegaa
to kaise barf pighlegii
use kahnaa ki lauT aa.e

Arsh Siddiqui
Nazm

adl-e-faruqi ka ek namuna

ek din hazrat-e-faaruuq ne mimbar pe kahaa
kyaa tumhe.n hukm jo kuchh duu.n to karoge manzuur
ek ne uTh ke kahaa ye ki na maane.nge kabhii
ki tire adl me.n ham ko nazar aataa hai futuur
chaadare.n maal-e-Ganiimat me.n jo ab ke aa.ii.n
sehan-e-masjid me.n vo taqsiim hu.ii.n sab ke huzuur
un me.n har ek ke hisse me.n faqat ik aa.ii
thaa tumhaaraa bhii vahii haq ki yahii hai dastuur
ab jo ye jism pe tere nazar aataa hai libaas
ye usii luuT kii chaadar se banaa hogaa zaruur
muKHtasar thii vo ridaa aur tiraa qad hai daraaz
ek chaadar me.n tiraa jism na hogaa mastuur
apne hisse se ziyaada jo liyaa tuu ne to ab
tuu KHilaafat ke na qaabil hai na ham hai.n maamuur
garche vo had-e-manaasib se ba.Dhaa jaataa thaa
sab ke sab mohr-ba-lab the che inaas o che zakuur
rok de ko.ii kisii ko ye na rakhtaa thaa majaal
nashsha-e-adl-o-masaavaat se sab the maKHmuur
apne farzand se faaruuq-e-mo.azzam ne kahaa
tum ko hai haalat-e-aslii kii haqiiqat pe ubuur
tumhii.n de sakte ho is kaa mirii jaanib se javaab
ki na pak.De mujhe mahshar me.n miraa rabb-e-Gafuur
bole ye ibn-e-umar sab se muKHaatib ho kar
is me.n kuchh vaalid-e-maajid kaa nahii.n jurm o qusuur
ek chaadar me.n jo puuraa na hu.aa un kaa libaas
kar sakii is ko gavaaraa na mirii tab-e-Gayuur
apne hisse kii bhii mai.n ne unhe.n chaadar de dii
vaaqi.a kii ye haqiiqat hai ki jo thii mastuur
nukta-chii.n ne ye kahaa uTh ke ki haa.n ai faaruuq
hukm de ham ko ki ab ham use maane.nge zaruur

Shibli Nomani
Nazm

election

saaqii sharaab de ki election hai aaj-kal
barse.nge vote jis me.n vo saavan hai aaj-kal
jamhuuriyat ke paa.nv me.n jhaa.njan hai aaj-kal
ye mulk us ke naach kaa aa.ngan hai aaj-kal
saudaa hai leaderii kaa jo dil ko sataa.e hai
''dil phir tavaaf-e-kuu-e-malaamat ko jaa.e hai''
lo ho gayaa hai uu.nT election kaa be-nakel
ab laTh chale.nge jalso.n me.n aabaad ho.nge jail
phir leadero.n kii hogii akhaa.Do.n me.n rel-pel
voto.n kii har dukaan pe hogii grand sale
voto.n se ba.Dh ke ab ko.ii hathiyaar bhii nahii.n
''la.Dte hai.n aur haath me.n talvaar bhii nahii.n''
zinda hai vo ki jis kaa register me.n naam hai
aur zindagii shariifo.n ke uupar haraam hai
hai.n jis ke paas vote madaar-ul-mahaam hai
lailaa-e-leaderii kii vo thaame lagaam hai
leader ke mu.nh pe shahar ke kuucho.n kii gard hai
''ishq-e-nabard-pesha talabgaar-e-mard hai''
vaqt aa gayaa zamiir kii bai-o-KHariid kaa
import ke licence ke va.ade-va.iid kaa
din hai biraadrii o qabaa.il kii iid kaa
aapas me.n gallabaano.n kii guft-o-shuniid kaa
muslim ko be-shak aisii musaavaat chaahiye
''aarif hamesha mast-e-mai-e-zaat chaahiye''
da.nggal kii kashtiyo.n me.n har ik chiiz hai ravaa
ya.anii milegii millat-e-aasii ko har davaa
naGme kaa daur, daur-e-mai-o-raqs kaa mazaa
jis ko zabaan kah na sake us se bhii sivaa
likkhaa hu.aa hai qismat-e-ummiid-vaar me.n
''u.Dtii phiregii KHaak tirii kuu-e-yaar me.n''
ahl-e-basiirat ab nahii.n dekhe.nge khoT ko
haasil kare.nge laakh tariiqo.n se vote ko
paanii hii kii tarah se bahaa.enge note ko
roke.ngi zar kii Dhaal pe dushman kii choT ko
voter ko baKHshaa jaa.egaa bhaarii mushaahra
phir jiit kii KHushii me.n kare.nge mushaa.era
aa.e.nge vote dene ko jab jaahilaan-e-qaum
un ko dikhaa.e jaa.e.nge pahle nishaan-e-qaum
gai.nDaa nishaan rakkhegaa ik pahlavaan-e-qaum
hai uu.nT ko.ii ko.ii yake-az-KHaraan-e-qaum
insaaniyat kii qaid se sab ho ga.e barii
un kaa mua.aalijaa ho to hogaa veterinary

Syed Mohammad Jafri
Nazm

baba guru-nanak dev

ek jism-e-naa-tavaa.n itnii dabaao.n kaa hujuum
ik charaaG-e-sub.h aur itnii havaa.o.n kaa hujuum
manzile.n gum aur itne rahnumaa.o.n kaa hujuum
e'tiqaad-e-KHaam aur itne KHudaa.o.n kaa hujuum
kashmakash me.n apne hii ma.abad se katraataa hu.aa
aadmii phirtaa thaa dar dar Thokare.n khaataa hu.aa
haq ko hotii thii har ik maidaa.n me.n baatil se shikast
sar-niguu.n sar-dar-garebaa.n sar-basar the zerdast
fan thaa ik matlab-baraarii log the matlab-parast
is-qadar big.Daa hu.aa thaa zindagii kaa bandobast
haamii-e-jaur-o-sitam har tarah maalaa-maal thaa
jis kii laaThii thii usii kii bhai.ns thii ye haal thaa
kyaa KHudaa kaa KHauf kaisaa jazba-e-hubb-e-vatan
barsar-e-paikaar the aapas me.n shaiKH-o-barahman
baaGbaa.n jo the vo KHud the mahv-e-taKHriib-e-chaman
al-Garaz big.Dii hu.ii thii anjuman kii anjuman
maz.hab-e-insaaniyat kaa paasbaa.n ko.ii na thaa
kaarvaa.n laakho.n the miir-e-kaarvaa.n ko.ii na thaa
ruuh-e-insaa.n ne KHudaa ke saamne fariyaad kii
jo zamii.n par ho rahaa thaa sab bayaa.n ruudaad kii
aur kahaa had ho chukii hai kufr kii ilhaad kii
ek duniyaa muntazir hai aap ke irshaad kii
tab ye farmaayaa KHudaa ne sab ko samjhaa.uu.ngaa mai.n
aadmii kaa ruup dhaaran kar ke KHud aa.uu.ngaa mai.n
is tarah aaKHir hu.aa duniyaa me.n naanak kaa zuhuur
farsh-e-tilwanDii pe utraa arsh se rabb-e-Gafuur
uTh gayaa zulmaat kaa Deraa ba.Dhaa har samt nuur
mamba.a-e-anvaar se phailii.n shu.aa.e.n duur duur
mehr-e-taabaa.n ne do-aalam me.n ujaalaa kar diyaa
aadmii ne aadmii kaa bol-baalaa kar diyaa

Kunwar Mahendra Singh Bedi Sahar
Nazm

aaKHiri bus

aaKHirii bas
tairtii sii jaa rahii hai
shab kii farsh-e-marmarii.n par
shabnam-aagii.n dhund kii niilii guphaa me.n
bas ke andar har ko.ii baiThaa hai

Rajinder Manchanda Bani
Nazm

waqt ke kaTahre mein

suno tumhaaraa jurm tumhaarii kamzorii hai
apne jurm pe
ra.ng-bira.nge lafzo.n kii be-jaan ridaa.e.n mat Daalo
suno tumhaare KHvaab tumhaaraa jurm nahii.n hai.n
tum KHvaabo.n kii ta.abiir se Dar kar
lafzo.n kii taariik guphaa me.n chhup rahne ke mujrim ho
tum ne havaa.o.n ke ziine par
paa.nv rakh kar
qaus-e-quzah ke rang sameTe
aur KHalaa.o.n me.n u.Dte
farzii taaro.n sayyaaro.n kii baate.n kii.n
tum mujrim ho us nannhii ko.npal ke jis ne
sub.h kii pahlii shoKH kiran se sargoshii kii
tum mujrim ho us aa.ngan ke jis me.n shaayad
ab bhii tumhaare bachpan kii ma.asuum sharaarat zinda hai
tum mujrim ho tum ne apne paa.nv se lipTii miTTii ko
ek izaafii chiiz samajh kar jhaa.D diyaa

Bashar Nawaz
Nazm

asasa

mai.n apnii qiimtii chiize.n bhii aksar bhuul jaatii huu.n
kahii.n bhii jaa ke Thahruu.n mai.n
kisii ke paas bhii jaa.uu.n
kabhii terrace kabhii aa.ngan kabhii kamre me.n bhii aksar
kuchh apnii pichhlii yaado.n ko kabhii kuchh chaa.nd raato.n ko
aur aksar adh-bune se kuchh adhuure KHvaab ke guchchhe
vahii.n par chho.D aatii huu.n
mai.n aksar bhuul jaatii huu.n
vo jo mai.n aaKHirii mausam me.n tum se milne aa.ii thii
to kuchh taare chamelii kii bahut tho.Dii sii vo KHushbuu
mohabbat ke sunahrii narm resham se bane be-saaKHta jumle
yahii.n par rah ga.e mere
yahaa.n diivaar par mai.n ne chamaktaa chaa.nd chho.Daa thaa
ha.nsii ke motiyo.n kii ek maalaa thii jo tum ne gift me.n dii thii
yahii.n par rah ga.ii vo bhii
mai.n Thahruu.ngii nahii.n mujh ko bas apnii qiimtii chiize.n hii lenii hai.n
tumhe.n zahmat bahut hogii magar ye sab mujhe de do
tumhaare paas to duniyaa ke ab saare KHazaane hai.n
mai.n KHaalii haath baiThii huu.n yahii meraa asaasa hai

Seema Ghazal
Nazm

sab din ek jaise nahin hote

sab din ek jaise nahii.n hote
kal kaa din to aisaa nahii.n thaa
jaisaa aaj kaa hai
har din apnii apnii guphaa me.n
chhupaa
jab savere savere
ham se saamnaa kartaa hai
to kahtaa hai
aaj kaa din guzaaro to jaane.n
aur ham
kamar-basta ho jaate hai.n
aaj ke din ke guzaarne ko
vo din ham guzaar lete hai.n
aur ham is guzre hu.e
din ko
piichhe palaT kar dekhte hai.n
suuraj ke saath
Duubte
a.ndhere me.n mu.nh chhupaate
bahut Tho.nk kar aayaa thaa
KHud ko
jaise hame.n ye din guzaarne na degaa
aur gi.Dgi.Daa.e.nge ham
us ke saamne
aur apnii gardan jo ham hamesha
ak.Dii rakhte hai.n
us ke saamne jhukaa de.nge
aur apnii aa.nkhe.n
phaTii phaTii kar ke us ke saamne iltijaa kare.nge
ki aaj kaa din vaisaa hii guzre
jaisaa
ek din guzaaraa thaa
jaise ham kabhii nahii.n bhuulte
bhale se
saare din aise vaise guzarte rahe.n
ham nahii.n jhukaa.e.nge apnii
gardan
aur lagaa de.nge is me.n
hamesha ke liye
cluff
jo us ke saamne hame.n
jhukne nahii.n degaa
bhale vo din kitnaa hii buraa guzre

Azra Abbas
Nazm

qaid se najat

baare aa.ii najaat kii baarii
khul gayaa uqda-e-giraftaarii
ham ko mansab milaa rihaa.ii kaa
qaid ko jaa.edaad-e-bekaarii
paa.nv ko chho.D bhaage maar-e-do-sar
sar ko pushtaara-e-giraa.nbaarii
kuuch Thahraa maqaam-e-Gurbat se
ab vatan chalne kii hai tayyaarii
ruKHsat ai dostaan-e-zindaanii
alvidaa ai Gam-e-giraftaarii
arrahiil ai mashaqqat-e-har-zor
al-firaaq ai hujuum-e-naa-chaarii
daal fe ain ai kitaabat-e-qaid
gaaf miim ai hisaab-e-sarkaarii
daal chaaval se kah do ruKHsat ho.n
paanii me.n Duube ye namak khaarii
machhliyo.n se kaho ki haT ke sa.De.n
ghaas khode yahaa.n kii tarkaarii
chiinii barhamaa malaa.ii madraasii
ahl-e-aashaam ja.ngalii taataarii
apne diidaar se maaf kare.n
apnii baato.n se de.n subuk-saarii
kaale paanii se hote hai.n ruKHsat
ashk-e-shaadii hai.n aa.nkho.n se jaarii
baiThte hai.n jahaaz duurii par
uThte hai.n la.ngar-e-giraa.nbaarii
karam ai KHizr al-madad ai nuuh
rahm ai fazl-e-hazrat-e-baarii
assalaam ai KHarosh-e-bahr-e-muhiit
assafar ai safiina-e-jaarii
zaad-e-raah-e-safar tavakkul hai
rahnumaa.ii ko us kii Gaffaarii
hai iraada ki fikr-e-sher kare.n
taaki ho duur ra.nj-e-bekaarii
bas-ki barso.n rahaa huu.n zindaa.n me.n
bhuulii qasr-e-suKHan kii memaarii

Muneer Shikohabadi
Nazm

jo KHud mein tashkil ho raha hai

jahaa.n kabhii
budh ke ilm kaa ik KHazaana thaa
jis jagah
shlok aur mantar maahaul me.n
nahii.n
KHud mire hii andar
mirii sadaa me.n
himaaliyaa.ii havaa.o.n kii tarah guu.njte the
ajiib azmat ke saath mai.n yuu.n alag-thalak thaa
ki jis tarah merii maut kii baat
qarnahaa qarn se hai vo raaz
mai.n hii bas jis ko jaantaa huu.n
mai.n apne andar vo aatmaa huu.n
jise kabhii
ik aziim peshen-go.ii kaa sail-e-be-samaa.at
mahal samet aasmaan me.n le u.Daa thaa
yaa phir
mai.n ik tanaav huu.n
aasmaano.n kii samt
bachpan ke hairat-a.ngez KHvaab ke be bane mahal saa
jahaa.n mire chaaro.n samt raahe.n
safed ret aur barf kii
apnii apnii had se
mirii taraf ba.Dh rahii hai.n
jaise
mai.n devtaa.o.n kaa huu.n vo maskan
jo sab ko apnii taraf bulaataa hai aur
sab kii pahu.nch se kuchh is tarah pare hai
ki jaise mai.n dekhne kii had huu.n
mai.n ek parbat huu.n
vaadiyaa.n jis ne baa.nT dii hai.n
mai.n ik guphaa huu.n
jo vaadiyo.n ko milaa rahii hai
mai.n jaise sadiyo.n kii yaatraa kii vo gahrii aavaaz huu.n jo ab tak
guphaa ke andar se aa rahii hai
mai.n ek bhikshuu huu.n
jo kabhii kaa
isii guphaa me.n samaa chukaa hai
jo KHud me.n tashkiil ho rahaa thaa
jo KHud me.n tashkiil ho rahaa hai

Manmohan Talkh
Nazm

qahat-sali mein eid

kahte hai.n eid hai aaj apnii bhii eid hotii
bahbuud-e-mulk kii gar ham ko umiid hotii
haale me.n chaa.nd gar kal ham ko dikhaa.ii detaa
qufl-e-KHazaana apnaa apnii kaliid hotii
uf be-zarii kaa aalam allah re qahat-saalii
kyaa KHaak eid hotii kyaa KHaak eid hotii
kaTte agar na hindii talvaar-e-muflisii se
ye eid ham-damo.n phir be-shak sa.iid hotii
karte agar tavajjoh mulkii mu.aamlo.n par
jo ko.ii baat hotii apne mufiid hotii
hukkaam chaahe.n jo kuchh dil me.n KHayaal kar le.n
thii baat tab ki baaham guft-o-shuniid hotii
logo.n ne kar diyaa hai kyo.n chaa.nd ko muqaddam
gar ham 'falak’ na hote kis tarah eid hotii

Lal Chand Falak
Nazm

ghas mein chhupe sanp

mai.n ghaas huu.n
harii-bharii ghaas
paanii mile to harii-bharii na mile to ghaas-phuus
tho.Dii nargisiyat kii ijaazat diijiye
are jab ugtii huu.n to kyaa joban hotaa hai mujh par
na.ii na.ii ghaas par suuraj kii kirne.n pa.Dtii hai.n to
andho.n kii aa.nkho.n me.n bhii taraavat utar aatii hai janaab
aur haa.e vo taaza taaza ghaas kii KHushbuu
par afsos jab der tak baarish na ho to piilii pa.D jaatii huu.n
magar dhuup pahle mujhe sonaa aur phir kundan banaa detii hai
zamiin par iistaada hazaaro.n pahaa.Diyo.n par meraa hii rang cha.Dhaa hotaa hai
aa.nkh rakhne vaale kahte hai.n
sabze se Dhakii pahaa.Diyaa.n kitnii bhii hasiin ho.n
sone se Dhakii pahaa.Diyo.n kii baat hii alag hai
lekin ye mai.n kyaa ba.D haa.nkne baiTh ga.ii
aamdan barsar-e-matlab mai.n saa.npo.n ke baare me.n kuchh kahnaa chaahtii huu.n
saa.np jo ghaas me.n chhup kirdaar karte hai.n
ghaas se Dhake lawn baaG aur park
karo.Do.n insaano.n ko taskiin dete hai.n
bachche ghaas par bhaagte dau.Dte uchhalte kuudte aur loT-poT hote hai.n
javaan mujh par chalte hu.e mohabbato.n kaa iz.haar aur iqraar karte hai.n
umr-rasiida log duur duur tak phaile sabze ko dekh kar
dil kii ghuTan aur ehsaas-e-ziyaa.n bhuul jaate hai.n
mai.n KHush hotii huu.n ki kisii ke kaam aa hii huu.n
lekin merii KHushii dukh aur sharmindagii me.n badal jaatii hai
jab mere andar chhupe hu.e saa.np insaano.n ko Das lete hai.n
sochtii huu.n in saa.npo.n kaa kyaa ilaaj karuu.n
sochtii huu.n in saa.npo.n kaa ko.ii ilaaj hai bhii yaa nahii.n
sochtii huu.n saa.np mujhii me.n to nahii.n chhupe
vo to zamiin ke kone kone me.n maujuud hai.n
us ke andar bhii us ke baahar bhii
sochtii huu.n jis tezii se saa.npo.n kii ta.adaad ba.Dh rahii hai
kal ye saarii zamiin par na chhaa jaa.e.n
sochtii huu.n ko.ii sailaab hii aa jaa.e jo unhe.n bahaa le jaa.e
phir KHayaal aataa hai ye bah kar jaa.e.nge kahaa.n
aaKHir ek na ek din paanii utregaa aur ye dobaara KHushkii par cha.Dh aa.e.nge
aur mere hii daaman me.n panaah le le.nge
sochtii huu.n KHudaa ne mujhe banaayaa thaa to unhe.n kyuu.n banaayaa
aur agar banaayaa hii thaa to un ke andar zahar kyuu.n bhar diyaa
kyuu.n ho ga.e ye insaan ke dushman
magar saare saa.np to zahriile nahii.n hote
aur kyaa insaano.n ke andar bhii zahr nahii.n bhartaa jaa rahaa hai ab
sochtii huu.n insaan saa.np se Dartaa hai to
saa.np bhii insaan se Dartaa hai
insaan ne saa.np me.n shaitaan kii shakl dekhii thii
jis ne use jannat se nikalvaa diyaa thaa
insaan ke andar shaitaan se baraabar utarne kii talab rakh dii ga.ii hai
jahaa.n kahii.n saa.np ko dekhtaa hai use maarne kii koshish kartaa hai
saa.np ko bhii insaan ke us azlii-o-abdii iraade kii KHabar hai
isii liye to insaan kii aahaT yaa buu paate hii bhaag kha.Daa hotaa hai
KHaraabii to merii vaj.h se hotii hai
ghaas me.n chhupaa saa.np insaan ko dekh kar bhaagtaa hai
lekin insaan use dekh nahii.n paataa aur naa-daanista us kaa paa.nv saa.np par pa.D jaataa hai
aur saa.np apnii jaan bachaane ke liye use Das letaa hai
yuu.n mai.n zariiya ban jaatii huu.n insaan kii maut kaa
mujhe apnaa ye kirdaar hargiz pasand nahii.n
sochtii huu.n insaano.n aur saa.npo.n ne aapas me.n la.Dnaa hii hai to
merii aa.D me.n na la.De.n
sa.Dko.n par la.De.n gharo.n ke andar la.De.n
chaTyal maidaano.n me.n la.De.n sahraa.o.n me.n la.De.n
phir KHayaal aataa hai in jag.ho.n par to pahle hii ghamsaan kii la.Daa.ii ho rahii hai
insaan insaan se la.D rahaa hai
aur us ne tarah tarah ke
mohlik kiimiyaa.ii jauharii aur nafsiyaatii hathiyaar iijaad kar liye hai.n
ek duusre ko dukh dene aur maarne ke liye

Mohammad Haneef Rame
Nazm

ye rasta

yahaa.n se jo dekho to jaise... kahii.n hadd-e-imkaa.n talak
gum-shuda vaqt jaisii a.ndherii guphaa hai
yahaa.n se jo dekho... to
ummiid jaisaa bahut hairat-afzaa... ajab silsila hai
jo is ta.ng, taariik nuqte se
mumkin ke maanind, ik raushnii-zaad qarye kii jaanib khulaa hai
fazaa me.n kahii.n niil-guu.n sabz, halke sunahre
kahii.n bas hare hii hare... saKHt gahre
bahut uu.nghte Dolte ra.ng
suukhe hu.e surKH patto.n ke maanind
us be-amaa.n raaste par pa.De hai.n

Sameena Raja
Nazm

parinde

parinda jo ho.nTo.n pe par taultaa thaa
use baaz rakhne kii KHaatir ik aaseb thaa mere dar pe
qad us kaa falak naaptaa thaa
nigaahe.n uThaa.o jo chehre kii jaanib
to ghuTne se aTkii.n
mujhe us ne mohre kii suurat uThaayaa
aur ik swimming-pool me.n laa ke Daalaa
vo ye chaahtaa thaa ki paanii me.n ye aag bha.Dkaane vaalii hasii.n machhliyaa.n
mujh ko ra.ngo.n me.n apne jaka.D le.n
mire KHuu.n me.n ye aatish rang bhar kar
mujhe bhasm kar de.n
magar jab na ho paayaa aisaa
to us ne mujhe ik pahaa.Dii guphaa me.n utaaraa
jahaa.n siim-o-zar kaa ik ambaar saa thaa
us ambaar me.n khul jaa sim-sim kii yaad aa.ii
chaaliis choro.n kii dahshat dar aa.ii
mujhe us ne qaasim kii suurat me.n dekhaa thaa
us ko yaqii.n thaa
chakaa-chau.nd zar kii mujhe dasht-e-naa-buud kii raah par Daal degii
magar jab na ho paayaa aisaa
to us ne mirii ik kaf-e-dasht par chaa.nd aur duusrii pe
rakhaa laa ke suuraj
aur KHud apnii Taa.ngo.n se a aur v u.ngliyo.n se banaa kar
ajab tuntune se kha.Daa thaa
mire haath ne us kii v par ye chaa.nd aur suuraj uchhaale
chhanaakaa havaa zor kaa mai.n ne dekhaa zamii.n par
ye chaa.nd aur suuraj shikasta the
aur ho.nT ke mustaqar se
parinda fazaa.o.n ke aaGosh me.n tairtaa thaa
zamii.n aasmaa.n ke qulaabe milaataa hu.aa dev aaseb
qad me.n
mirii uu.nchii gardan ke juute ke ham-sar hu.aa thaa

Adeeb Sohail
Nazm

nai ibtida

chalo aa.o chale.n
chale.n phir lauT ke vaapas
usii andhii guphaa me.n ham
jahaa.n raushan hu.ii thii aag pahle-pahal
ki ab
kaalii havaa.o.n se bachaa.o kaa yahii ik raasta hai
chalo aa.o
unhii.n Gaaro.n kii jaanib
phir chale.n jaanaa.n
aur andar kii barastii baarisho.n me.n
jam ke bhiige.n
bhiigte jaa.e.n
ThiThur jaa.e.n
ThiThur kar sard pa.Dte jism-o-jaa.n ko ham
usii pahle-pahal kii aag se
raahat dilaa.e.n
usii pahle janam se phir kare.n naa ibtidaa jaanaa.n
chalo aa.o

Kahkashan Tabassum
Nazm

pas-e-diwar-e-shab

chaa.nd ko baahar falak par chho.D kar
vaqt kii andhii guphaa me.n
duur tak andar pahu.nch
aag ke aur raushnii ke aabshaaro.n me.n nahaataa huu.n
aur isii rishte se baahar aan kar
chaa.nd kii gardan me.n apnaa haath Daale
anjuman-taa-anjuman aavaargii kaa lutf letaa huu.n
niim-shab ko aish-e-bistar chho.D kar

Ameeq Hanafi
Nazm

the gift of magi

mai.n ne apne lambe baal tumhaarii KHaatir bech diye hai.n
aur ab ghar ghar jaane vaale
mere ghar bhii aa.e.nge
aur mai.n terii KHaatir
ujle din kii KHaatir
rakhe jaane vaale tohfe
kis kis ko taqsiim karuu.ngii
aur tum kis ke vaaste sandal sandal ghuumoge
tum bhii shaayad apnii aaKHirii KHvaahish bech chuke ho
varna ghar mat aanaa

Mohammad Anvar Khalid
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now