Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ",ryD"

Nazm MATCHES FOR ",ryD"

Nazm

tarana-e-hindi

saare jahaa.n se achchhaa hindostaa.n hamaaraa
ham bulbule.n hai.n is kii ye gulsitaa.n hamaaraa
Gurbat me.n ho.n agar ham rahtaa hai dil vatan me.n
samjho vahii.n hame.n bhii dil ho jahaa.n hamaaraa
parbat vo sab se uu.nchaa ham-saaya aasmaa.n kaa
vo santarii hamaaraa vo paasbaa.n hamaaraa
godii me.n kheltii hai.n is kii hazaaro.n nadiyaa.n
gulshan hai jin ke dam se rashk-e-jinaa.n hamaaraa
ai aab-ruud-e-ga.ngaa vo din hai yaad tujh ko
utraa tire kinaare jab kaarvaa.n hamaaraa
maz.hab nahii.n sikhaataa aapas me.n bair rakhnaa
hindii hai.n ham vatan hai hindostaa.n hamaaraa
yuunaan o misr o ruumaa sab miT ga.e jahaa.n se
ab tak magar hai baaqii naam-o-nishaa.n hamaaraa
kuchh baat hai ki hastii miTtii nahii.n hamaarii
sadiyo.n rahaa hai dushman daur-e-zamaa.n hamaaraa
'iqbaal' ko.ii mahram apnaa nahii.n jahaa.n me.n
maaluum kyaa kisii ko dard-e-nihaa.n hamaaraa

Allama Iqbal
Nazm

hasan kuza-gar (1)

jahaan-zaad niiche galii me.n tire dar ke aage
ye mai.n soKHtaa-sar hasan-kuuzaa-gar huu.n!
tujhe sub.h baazaar me.n buu.Dhe attaar yuusuf
kii dukkaan par mai.n ne dekhaa
to terii nigaaho.n me.n vo taabnaakii
thii mai.n jis kii hasrat me.n nau saal diivaana phirtaa rahaa huu.n
jahaa.n-zaad nau saal diivaana phirtaa rahaa huu.n!
ye vo daur thaa jis me.n mai.n ne
kabhii apne ranjuur kuuzo.n kii jaanib
palaT kar na dekhaa
vo kuuze mere dast-e-chaabuk ke putle
gil-o-ra.ng-o-roGan kii maKHluuq-e-be-jaa.n
vo sar-goshiy.n me.n ye kahte
hasan kuuza-gar ab kahaa.n hai?
vo ham se KHud apne amal se
KHudaa-vand ban kar KHudaa.o.n ke maanind hai ruu-e-gardaa.n!
jahaa.n-zaad nau saal kaa daur yuu.n mujh pe guzraa
ki jaise kisii shahr-e-madfuun par vaqt guzre
taGaaro.n me.n miTTii
kabhii jis kii KHushbuu se vaarafta hotaa thaa mai.n
sa.ng-basta pa.Dii thii
suraahii-o-miinaa-o-jaam-o-subuu aur faanuus o gul-daa.n
mirii hech-maayaa ma.iishat ke iz.haar-e-fan ke sahaare
shikasta pa.De the
mai.n KHud mai.n hasan kuuza-gar paa-ba-gil KHaak-bar-sar barhana
sar-e-chaak zholiidaa-muu sar-ba-zaanuu
kisii Gam-zada devtaa kii tarah vaahima ke
gil-o-laa se KHvaabo.n ke sayyaal kuuze banaataa rahaa thaa
jahaa.n-zaad nau saal pahle
tuu naadaa.n thii lekin tujhe ye KHabar thii
ki mai.n ne hasan kuuza-gar ne
tirii qaaf kii sii ufuq-taab aa.nkho.n
me.n dekhii hai vo taabnaakii
ki jis se mere jism o jaa.n abr o mahtaab kaa
rah-guzar ban ga.e the
jahaa.n-zaad baGdaad kii KHvaab-guu.n raat
vo ruud-e-dajlaa kaa saahil
vo kashtii vo mallaah kii band aa.nkhe.n
kisii KHasta-jaa.n ra.nj-bar kuuza-gar ke liye
ek hii raat vo kohrbaa thii
ki jis se abhii tak hai paivast us kaa vajuud
us kii jaa.n us kaa paikar
magar ek hii raat kaa zauq dariyaa kii vo lahr niklaa
hasan kuuza-gar jis me.n Duubaa to ubhraa nahii.n hai!

Noon Meem Rashid
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

radd-e-amal

chand kaliyaa.n nashaat kii chun kar
muddato.n mahv-e-yaas rahtaa huu.n
teraa milnaa KHushii kii baat sahii
tujh se mil kar udaas rahtaa huu.n

Sahir Ludhianvi
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

barkha-rut

garmii kii tapish bujhaane vaalii
sardii kaa payaam laane vaalii
qudrat ke ajaa.ibaat kii kaa.n
aarif ke liye kitaab-e-irfaa.n
vo shaaKH-o-daraKHt kii javaanii
vo mor-o-malaKH kii zindagaanii
vo saare baras kii jaan barsaat
vo kaun-e-KHudaa kii shaan barsaat
aa.ii hai bahut du.aa.o.n ke ba.ad
vo saik.Do.n iltijaa.o.n ke ba.ad
vo aa.ii to aa.ii jaan me.n jaa.n
sab the ko.ii din ke varna mehmaa.n
garmii se ta.Dap rahe the jaan-daar
aur dhuup me.n tap rahe the kohsaar
bhuubal se sivaa thaa reg-e-sahraa
aur khaul rahaa thaa aab-e-dariyaa
saa.nDe the bilo.n me.n mu.nh chhupaa.e
aur haa.np rahe the chaarpaa.e
thii.n loma.Diyaa.n zabaa.n nikaale
aur luu se hiran hu.e the kaale
chiito.n ko na thii shikaar kii sudh
hirno.n ko na thii qataar kii sudh
the sher pa.De kachhaar me.n sust
gha.Diyaal the ruud-baar me.n sust
Dhoro.n kaa hu.aa thaa haal patlaa
bailo.n ne diyaa thaa Daal kandhaa
bhai.nso.n ke lahuu na thaa badan me.n
aur duudh na thaa ga.uu ke than me.n
gho.Do.n kaa chhuTaa thaa ghaas daana
thaa pyaas kaa un pe taaziyaana
garmii kaa lagaa hu.aa thaa bhabkaa
aur ans nikal rahaa thaa sab kaa
tuufaan the aa.ndhiyo.n ke barpaa
uThtaa thaa baguule par baguulaa
aare the badan pe luu ke chalte
sho.ale the zamiin se nikalte
thii aag kaa de rahii havaa kaam
thaa aag kaa naam muft bad-naam
rasto.n me.n savaar aur paidal
sab dhuup ke haath se the bekal
gho.Do.n ke na aage uThte the paa.nv
miltii thii kahii.n jo ruukh kii chhaa.nv
thii sab kii nigaah suu-e-aflaak
paanii kii jagah barastii thii KHaak

Altaf Hussain Hali
Nazm

aurat

tuu prem mandir kii paak devii tuu husn kii mamlikat kii raanii
hayaat-e-insaa.n kii qismato.n par tirii nigaaho.n kii hukmaraanii
jahaan-e-ulfat tirii qalam-rau hariim-e-dil terii raajdhaanii
bahaar-e-fitrat tire lab-e-laal-guu.n kii doshiiza muskuraahaT
nizaam-e-kaunain terii aa.nkho.n ke surKH Doro.n kii thartharaahaT
faroG-e-sad-kaa.enaat terii jabiin siimii.n kii zau-fishaanii
bha.Dakte siino.n me.n bas rahii hai.n qaraar ban kar tirii adaa.e.n
tarastii ruuho.n ko jaam-e-ishrat pilaa rahii hai.n tirii vafaa.e.n
rag-e-jahaa.n me.n thirak rahii hai sharaab ban kar tirii javaanii
dimaaG-e-parvar-digaar me.n jo azal ke din se machal rahaa thaa
zabaan-e-taKHliiq-e-dahr se bhii na jis kaa iz.haar ho sakaa thaa
numuud terii usii muqaddas hasii.n taKHayyul kii tarjumaanii
hai vaadi-e-niil par tiraa abr-e-zulf saaya-kunaa.n abhii tak
hai.n jaam-e-iiraa.n kii mai me.n tere labo.n kii shiiriiniyaa.n abhii tak
fasaana-go hai tirii abhii tak hadiis-e-yuunaa.n kii KHuu.n-chakaanii'
hai terii ulfat ke raag par mauj-e-ruud-e-ga.ngaa ko vajd ab tak
tirii mohabbat kii aag me.n jal rahaa hai sahraa-e-najd ab tak
jamaal-e-zahra tire malaa.ek fareb jalvo.n kii ik nishaanii
tirii nigaaho.n ke sahar se gul-fishaa.n hai sher o adab kii duniyaa
tire tabassum ke kaif se hai ye Gam kii duniyaa tarab kii duniyaa
tire labo.n kii miThaas se shakkarii.n hai zahraab-e-zindagaanii
tiraa tabassum kalii kalii me.n tiraa tarannum chaman chaman me.n
rumuuz-e-hastii ke pech-o-KHam tere gesu.o.n kii shikan shikan me.n
kitaab-e-taariiKH-e-zindagii ke varaq varaq par tirii kahaanii
jo tuu na hotii to yuu.n daraKHshanda sham-e-bazm-e-jahaa.n na hotii
vajuud-e-arz-o-samaa na hotaa numuud-e-kaun-o-makaa.n na hotii
bashar kii mahduudiyat kii KHaatir tarastii aalam kii be-karaanii

Majeed Amjad
Nazm

jahan zad

vo raat vo halab kii kaarvaa.n siraa kaa hauz
jis ko mai.n ne jism-o-jaan kii KHushbuu.e.n kashiid kar ke
qatra qatra nau baras me.n aa.nsu.o.n se pur kiyaa
vo ek raat sirf ek raat me.n tamaam KHushk ho gayaa
ham apne vasl kii tamaazato.n me.n aise jal bujhe
ki raakh tak nahii.n bachchii
ye ek jaa.n kii tishnagii
mujhe tujhe ba-yak zamaa.n bhalaa kahaa.n kahaa.n na khii.nchtii phirii
magar ye tuu ne kyaa kahaa
ki tere jaisii aurte.n jahaa.n zaad
aisii uljhane.n hai.n jin ko aaj tak ko.ii nahii.n sulajh sakaa
ki aurato.n kii zaat hai vo tanz apne aap par
javaab jin kaa ham nahii.n
to phir ye jaam-o-miinaa-o-subuu-o-hauz-o-ruud niil
is zamii.n kii god me.n
azal kii harf-giir taabnaakii ke liye
kahii.n bhii kuchh baham nahii.n

Ishrat Afreen
Nazm

KHaka

ye merii mohabbat kaa gahraa ta.assub bhii ho saktaa hai
par ye aafaaqiyat kaa.enaatii mohabbat kaa radd-e-amal hai
ki KHaako.n me.n mai.n terii aa.nkho.n pe saalo.n se aTkaa hu.aa huu.n

Sohaib Mugheera Siddiqi
Nazm

zarqa

to kyaa vo jhuuT thaa
tuu ne jo us la.Dkii se bolaa thaa
mai.n terii jhiil jaisii
niilii aa.nkho.n par Gazal ke sher likkhuu.ngaa
mai.n terii reshmii zulfo.n me.n
apnii nazm ke motii piro.uu.ngaa
mai.n terii duudhiyaa ra.ngat kalaa.ii me.n
tilaa.ii chuu.Diyo.n aise
khanakte giit pahnaane kaa KHvaahaa.n huu.n
mujhe ma.aluum hai fursat nahii.n miltii
bahut se aur mauzuaat bhii
maanaa zaruurii hai.n
magar us se kiyaa va.ada
bhalaa kyaa kam zaruurii hai
tuu aisaa kar
ko.ii apnii puraanii nazm us ke naam kar de
yaa
Gazal ke sher me.n radd-o-badal kar ke
kisii suurat bhii us kaa tazkira kar de
jo terii shaa.irii ke aa.ine ke saamne
si.nghaar karne baiTh jaatii hai
nahii.n
mujh se to aisaa bhii nahii.n mumkin
use merii sabhii nazme.n
sabhii Gazle.n
zabaanii yaad hotii hai.n
use to merii vo Gazle.n bhii azbar hai.n
jo mai.n ne
jaa ke sadiyo.n baa'd kahnii hai.n
mai.n un yaaquut ho.nTo.n par
faqat
KHaamoshiyaa.n hii sabt kartaa huu.n

Rana Saeed Doshi
Nazm

baghi

ra.ad huu.n barq huu.n bechain huu.n paaraa huu.n mai.n
KHud-parastaar KHud-aagaah KHud-aaraa huu.n mai.n
KHirman-e-jaur jalaa de vo sharaaraa huu.n mai.n

Makhdoom Mohiuddin
Nazm

mere pas kya kuchh nahin

mere paas raato.n kii taariikii me.n
khilne vaale phuul hai.n
aur be-KHvaabii
dino.n kii murjhaa.ii hu.ii raushnii hai
aur biinaa.ii
mere paas lauT jaane ko ek maazii hai
aur yaad...
mere paas masruufiyat kii tamaam tar ra.ngaa-ra.ngii hai
aur be-ma.anaviyat
aur in sab se pare khulne vaalii aa.nkh
mai.n aasmaa.n ko o.Dh kar chaltaa
aur zamiin ko bichhaunaa kartaa huu.n
jahaa.n mai.n huu.n
vahaa.n abdiyat apnii girhe.n kholtii hai
ja.ngal jhuumte hai.n
baadal baraste hai.n
mor naachte hai.n
mere siine me.n ek samundar ne panaah le rakkhii hai
mai.n apnii aag me.n jaltaa
apnii baarisho.n me.n nahaataa huu.n
merii aavaaz me.n
bahut sii aavaazo.n ne ghar kar rakkhaa hai
aur meraa libaas
bahut sii dhajjiyo.n ko jo.D kar tayyaar kiyaa gayaa hai
merii aa.nkho.n me.n
ek girte hu.e shahr kaa saaraa malba hai
aur ek mustaqil intizaar
aur aa.nsuu
aur in aa.nsu.o.n se phuul khilte hai.n
taalaab bante hai.n
jin me.n parinde nahaate hai.n
ha.nste aur KHvaab dekhte hai.n
mere paas
duniyaa ko sunaane ke liye kuchh giit hai.n
aur bataane ke liye kuchh baate.n
mai.n rad kiye jaane kii lazzat se aashnaa huu.n
aur paziiraa.ii kii dil-nashii.n muskuraahaT se
bharaa rahtaa huu.n
mere paas
ek aashiq kii vaaraftagii
dar-guzar aur be-niyaazii hai
tumhaarii is duniyaa me.n
mere paas kyaa kuchh nahii.n hai
vaqt aur tum par iKHtiyaar ke sivaa?

Abrar Ahmad
Nazm

jannat-e-kashmir yahi hai

jis KHaak kii hai auj pe taqdiir yahii hai
jo radd-e-Gulaamii kii hai iksiir yahii hai
bedaarii-e-jamhuur kii tasviir yahii hai
aazaadii-e-afraad kii ta.amiir yahii hai

Arsh Malsiyani
Nazm

holi

jo ghir ke abr kabhii is maze me.n aataa hai
to baadalo.n me.n vo kyaa kyaa hii rang laataa hai
KHushii se ra.ad bhii Dholak kii gat lagaataa hai
havaa ko holiyaa.n gaa gaa ke kyaa nachaataa hai
tamaam rang se pur hai bahaar holii me.n

Nazeer Akbarabadi
Nazm

barkha-rut

aasmaa.n par chhaa rahaa hai abr-paaro.n kaa hujuum!
nau-bahaaro.n kaa hujuum
aah ye ra.ngiin aavaara nazaaro.n kaa hujuum
kohsaaro.n kaa hujuum
badliyaa.n hai.n yaa kisii ke bhuule-bisre KHvaab hai.n
be-KHud o betaab hai.n!
yaa havaa par tairtaa hai ruud-baaro.n kaa hujuum
aabshaaro.n kaa hujuum
phirtii hai.n aavaara matvaalii ghaTaa.e.n is tarah
aur havaa.e.n is tarah
jhuumtaa phirtaa ho jaise mai-gusaaro.n kaa hujuum
baada-KHvaaro.n kaa hujuum
vaadii-e-ga.ngaa hai, barkhaa-rut hai, kaalii raat hai
raat hai barsaat hai
aur fazaa me.n tairne vaale nazaaro.n kaa hujuum
nashsha-zaaro.n kaa hujuum
niil-guu.n pariyaa.n ufuq me.n par hai.n phailaa.e hu.e
baal bikhraa.e hu.e
yaa uma.nD aayaa hai saavan kii bahaaro.n kaa hujuum
abr-paaro.n kaa hujuum
nannhii nannhii buu.nde.n girtii hai.n hijaab-e-abr se
yaa naqaab-e-abr se
chhan rahaa hai qatre ban ban kar sitaaro.n kaa hujuum
nuur-paaro.n kaa hujuum
ye ghaTaa.e.n hai.n ki KHvaabo.n ke safiine hai.n ravaa.n
be-qariine hai.n ravaa.n
baadbaano.n me.n chhupaa.e chashma-saaro.n kaa hujuum
juu-e-baaro.n kaa hujuum
bijlii hai yaa nuur kii zanjiir lahraa.ii hu.ii
pech-o-KHam khaa.ii hu.ii
yaa KHamiida marmarii.n phuulo.n ke haaro.n kaa hujuum
aur sitaaro.n kaa hujuum
ye samaa.n bijlii kaa ye mahtaab kii sii vaadiyaa.n
KHvaab kii sii vaadiyaa.n
nashshe me.n bhiigaa hu.aa ye sabza-zaaro.n kaa hujuum
kohsaaro.n me.n KHushii kii bastiyaa.n aabaad hai.n
mastiyaa.n aabaad hai.n
chaar-suu bikhraa pa.Daa hai sabza-zaaro.n kaa hujuum
marG-zaaro.n kaa hujuum
yuu.n nazar aate hai.n kohsaar-e-masuurii duur se
mast se maKHmuur se
juu.n samundar se jaziiro.n kii qataaro.n kaa hujuum
sabza-zaaro.n kaa hujuum
ye safar, ye raat, ye barsaat aur phir ham-safar
al-amaan o al-hazar
ek husn-e-yaasmii.n ra.ngii.n bahaaro.n kaa hujuum
maah-paaro.n kaa hujuum
ye suhaane manzar aKHtar muddato.n yaad aa.e.nge
muddato.n ta.Dpaaye.nge
aah ye raat, uf ye mastaana nazaaro.n kaa hujuum
ye bahaaro.n kaa hujuum

Akhtar Shirani
Nazm

holi

idhar gulaal kaa baadal bhii chhaa gayaa ghanghor
sadaa-e-ra.ad hu.ii har kisii kaa Gul aur shor
ye la.Dke naaznii.n bole.n hai.n kokalaa juu.n mor
tamaam rang kii bauchhaar se hai.n shoraabor
ajab hai rang lagii barshgaal holii me.n

Nazeer Akbarabadi
Nazm

ek suar se

Darte Darte
hairatii reD-indian amriciyo.n kii tarah
dhartii kii dhamak sunte hu.e
tum paas aa.e
paas aakar be-yaqiinii se mujhe takne lage the
mai.n tumhe.n taskiin denaa.....
phir... se bhalmansii kaa rishta jo.D lenaa chaahtaa thaa
aur apne sa.ng-basta haath se
jab tumhe.n sahlaa rahaa thaa
aur tumhaare khurdure baalo.n me.n
apnii u.ngliyaa.n uljhaa rahaa thaa
ek albelii masarrat
ik na.ii lazzat milii
vo jo nafrat kii kamaanii
dil kii tah me.n ga.D ga.ii thii
TuuTtii jaatii thii
mere andar kii kale.n khulne lagii thii
mai.n pighaltaa jaa rahaa thaa

Saqi Faruqi
Nazm

farar

is se pahle mai.n darvaaza kholuu.n
kuchh boluu.n
afvaaho.n kii gard me.n lipTe zahr-aaluud mohabbat-naame liye hu.e tum
udh.De hu.e rishto.n ke jaame siye hu.e tum
mujh me.n aan samaa.e
mai.n rahne ke liye banaa huu.n
jo aa.e mujh me.n rah jaa.e
mujhe sajaa.e
jitnaa pyaar kare utnaa sukh paa.e
tum se pahle bhii kuchh log yuu.nhii aa.e the
apne andar mujh me.n tabdiilii ke KHvaab sajaa laa.e the
aur phir ik din
jis ne jo bhii ahd kyaa vo to.D diyaa
jis ne jo bhii baat kahii vo radd kar dii
lekin tum ne to had kar dii
mere din viiraan hu.e hai.n
merii sub.h ke chehre par kitnii raato.n ke zaKHm lage hai.n
merii shaam udaas kha.Dii hai
mere ufuq par suuraj lahuuluhaan pa.Daa hai
diivaaro.n se KHuu.n ristaa hai
darvaazo.n se meraa ik ik raaz ayaa.n hai
mere sahn me.n dushman kii saazish raqsaa.n hai
sunaa hai ab is haal me.n mujh ko chho.D ke tum jaane vaale ho
mere baahar baiTh ke merii yaad kaa Gam khaane vaale ho
tum se aur ummiid bhii kyaa ho
tum bhii to duniyaa vaale ho
jab tak ishq se ishq nahii.n miltaa tanhaa dukh sahnaa hai
ghar kii fikr to us ko hogii jis ko ghar me.n rahnaa hai

Saleem Kausar
Nazm

wahi kashf-e-zat ki aarzu

miraa dil giro mirii jaa.n giro
chalaa aa ki hai miraa dar khulaa
tuu miraa nasiib hai raah-rau
ye havaa ye barq ye ra.ad-o-abr ye tiirgii
rah-e-intizaar kii naarasii
mire jaan-o-dil pe hai.n lau buto
mire mehmaa.n mire raah-rau
ai gurez-paa tuu saraab-e-dasht KHalaa na ban
vo navaa na ban jo fareb-e-raah-guzaar ho
vo fusuun-e-arz-o-samaa na ban
jise dil-girafto.n se aar ho
jo tujhe bulaatii hai pai-ba-pai
vo sadaa jilaajal-e-jaa.n kii hai
vo sadaa muruur-e-zamaa.n kii hai
kise us sadaa se faraar ho
miraa dil giro mirii jaa.n giro
tirii kun-ma-kun tirii rau-ma-rau
mujhe baar-e-jaa.n
ki mai.n harf jis kaa bayaa.n hai tuu
mai.n vo jism jis kii ravaa.n hai tuu
tuu kalaam hai mai.n tirii zabaa.n
tuu vo sham.a hai ki mai.n jis kii lau
kisii naqsh-e-kaar kaa ik nafas
ka.ii suurate.n jo sadaa se tishna-e-ra.ng thii.n
hu.ii.n vasl-e-ma.anii se baarvar
kisii but-taraash kii ik nigah
ka.ii sa.ng-e-aziyat-e-yaas-o-marg
se bach ga.e
hu.e samt-e-raah se baa-KHabar
chalaa aa ki merii nidaa me.n bhii
vahii ruuyat-e-azalii ki hai
jise yaad Gaayat-e-ra.ng-o-buu
jise yaad raaz-e-mai-o-subuu
jise yaad vaada-e-taar-o-puu
chalaa aa ki merii nidaa me.n bhii
isii kashf-e-zaat kii aarzuu

Noon Meem Rashid
Nazm

ganga

ai aab-ruud-e-ga.ngaa uf rii tirii safaa.ii
ye teraa husn dil-kash ye tarz-o-dil-rubaa.ii
terii tajalliyaa.n hai.n jalva-farosh ma.anii
tanviir me.n hai terii ik shaan-e-kibriyaa.ii
jamunaa tirii sahelii go saath kii hai khelii
us me.n magar kahaa.n hai terii sii jaa.n-fazaa.ii
be-laus teraa daaman hai daaG-e-ma.asiyat se
mauzuu.n hai tere qad par malbuus-e-paarsaa.ii
dil-band ham hai.n tere laKHt-e-jigar hai.n tere
naKHl-e-muraad hai tau aur ham samar hai.n tere

Suroor Jahanabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now