Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".dab"

Nazm MATCHES FOR ".dab"

Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

shikast

rah gayaa dab ke giraa.n-baar salaasil ke tale
merii darmaa.nda javaanii kii uma.ngo.n kaa KHarosh

Sahir Ludhianvi
Nazm

aaj

saathiyo! mai.n ne barso.n tumhaare liye
chaa.nd taaro.n bahaaro.n ke sapne bune
husn aur ishq ke giit gaataa rahaa
aarzuu.o.n ke aivaa.n sajaataa rahaa
mai.n tumhaaraa muGannii tumhaare liye
jab bhii aayaa na.e giit laataa rahaa
aaj lekin mire daaman-e-chaak me.n
gard-e-raah-e-safar ke sivaa kuchh nahii.n
mere barbat ke siine me.n naGmo.n kaa dam ghuT gayaa
taane.n chiiKHo.n ke ambaar me.n dab ga.ii hai.n
aur giito.n ke sur hichkiyaa.n ban ga.e hai.n
mai.n tumhaaraa muGannii huu.n naGma nahii.n huu.n
aur naGme kii taKHliiq kaa saaz-o-saamaa.n
saathiyo! aaj tum ne bhasm kar diyaa hai
aur mai.n apnaa TuuTaa hu.aa saaz thaame
sard laasho.n ke ambaar ko tak rahaa huu.n
mere chaaro.n taraf maut kii vahshate.n naachtii hai.n
aur insaa.n kii haivaaniyat jaag uThii hai
barbariyat ke KHuu.n-KHaar ifriit
apne naapaak jab.Do.n ko khole
KHuun pii pii ke Gurraa rahe hai.n

Sahir Ludhianvi
Nazm

bewa ki KHud-kushi

ye a.ndherii raat ye saarii fazaa so.ii hu.ii
pattii pattii manzar-e-KHaamosh me.n kho.ii hu.ii
maujzan hai bahr-e-zulmat tiirgii kaa josh hai
shaam hii se aaj qindiil-e-falak KHaamosh hai
chand taare hai.n bhii to be-nuur pathraa.e hu.e
jaise baasii haar me.n ho.n phuul kumhlaa.e hu.e
khap gayaa hai yuu.n ghaTaa me.n chaa.ndnii kaa saaf ra.ng
jis tarah maayuusiyo.n me.n dab ke rah jaa.e uma.ng
umDii hai kaalii ghaTaa duniyaa Dubone ke liye
yaa chalii hai baal khole raa.nD rone ke liye
jitnii hai gunjaan bastii utnii hii viiraan hai
har galii KHaamosh hai har raasta sunsaan hai
ik makaa.n se bhii makii.n kii kuchh KHabar miltii nahii.n
chilmane.n uThtii nahii.n zanjiir-e-dar hiltii nahii.n
so rahe hai.n mast-o-be-KHud ghar ke kul piir-o-javaa.n
ho ga.ii hai.n band husn-o-ishq me.n sargoshiyaa.n
haa.n magar ik samt ik goshe me.n ko.ii nauhagar
le rahii hai karvaTo.n par karvaTe.n dil thaam kar
dil sambhaltaa hii nahi.n hai siina-e-sad-chaak me.n
phuul saa chehra aTaa hai bevgii kii KHaak me.n
u.D chalii hai ra.ng-e-ruKH ban kar hayaat-e-musta.aar
ho rahaa hai qalb-e-murda me.n javaanii kaa fishaar
hasrate.n dam to.Dtii hai.n yaas kii aaGosh me.n
saik.Do.n shikve machalte hai.n lab-e-KHaamosh me.n
umr aamaada nahii.n murda-parastii ke liye
baar hai ye zinda mayyat dosh-e-hastii ke liye
chaahtii hai laakh qaabuu dil pe paatii hii nahii.n
haa.e-re zaalim javaanii bas me.n aatii hii nahii.n
thartharaa kar girtii hai jab suune bistar par nazar
le ke ik karvaT paTak detii hai vo takiya pe sir
jab khanak uThtii hai.n sotii la.Dkiyo.n kii chuu.Diyaa.n
aah ban kar uThne lagtaa hai kaleja se dhu.aa.n
ho ga.ii beva kii KHaatir nii.nd bhii jaise haraam
muKHtasar saa ahd-e-vaslat de gayaa soz-e-davaam
dopahar kii chhaa.nv daur-e-shaadmaanii ho gayaa
pyaas bhii bujhne na paa.ii KHatm paanii ho gayaa
le rahii hai karvaTo.n par karvaTe.n baa-iztiraar
aag me.n paara hai yaa bistar pe jism-e-be-qaraar
pa.D ga.ii ik aah kar ke ro ke uTh baiThii kabhii
u.ngliyo.n me.n le ke zulf-e-KHam-ba-KHam ai.nThii kabhii
aa ke ho.nTo.n par kabhii maayuus aahe.n tham ga.ii.n
aur kabhii suunii kalaa.ii par nigaahe.n jam ga.ii.n
itnii duniyaa me.n kahii.n apnii jagah paatii nahii.n
yaas is had kii ki shauhar kii bhii yaad aatii nahii.n
aa rahe hai.n yaad paiham saas nando.n ke suluuk
phaT rahaa hai Gam se siina uTh rahii hai dil me.n huuk
apnii maa.n bahno.n kaa bhii aa.nkhe.n churaanaa yaad hai
aisii duniyaa me.n kisii kaa chho.D jaanaa yaad hai
baaGbaa.n to qabr me.n hai kaun ab dekhe bahaar
KHud usii ko tiir us ke karne vaale hai.n shikaar
jab nazar aataa nahii.n detaa ko.ii bekas kaa saath
zahr kii shiishii kii jaanib KHud-ba-KHud ba.Dhtaa hai haath
dil ta.Dap kar kah rahaa hai jald is duniyaa ko chho.D
chuu.Diyaa.n to.Dii.n to phir zanjiir-e-hastii ko bhii to.D
dam agar niklaa to kho.ii zindagii mil jaa.egii
ye nahi.n to KHair tanhaa qabr hii mil jaa.egii
vaa.n tujhe zillat kii nazro.n se na dekhegaa ko.ii
chaahe ha.nsnaa chaahe ronaa phir na rokegaa ko.ii
vaa.n sab ahl-e-dard hai.n sab saahab-e-insaaf hai.n
rahbar aage jaa chukaa raahe.n bhii terii saaf hai.n
dil inhii.n baato.n me.n uljhaa thaa ki dam ghabraa gayaa
haath le kar zahr kii shiishii labo.n tak aa gayaa
tilmilaatii aa.nkh jhapkaatii jhijaktii haa.nptii
pii ga.ii kul zahr aaKHir thartharaatii kaa.nptii
maut ne jhaTkaa diyaa kul uzv Dhiile ho ga.e
saa.ns ukh.Dii, nabz Duubii, ho.nT niile ho ga.e
aa.nkh jhapkii ashk Tapkaa hichkii aa.ii kho ga.ii
maut kii aaGosh me.n ik aah bhar kar so ga.ii
aur kar ik aah sulge hind kii rasmo.n kaa daam
ai javaanaa-marg beva tujh pe 'kaifii' kaa salaam

Kaifi Azmi
Nazm

aurat nama

ye izzat bojh hai shaayad
jahaa.n par dab ga.ii huu.n mai.n
har ik shab jaagte guzrii
ki sone kab ga.ii huu.n mai.n

Maaham Shah
Nazm

aaKHiri sach

chehre tamaam dhu.ndle nazar aa rahe hai.n kyuu.n
kyuu.n KHvaab ratjago.n kii havelii me.n dab ga.e
hai kal kii baat u.nglii paka.D kar kisii kii mai.n
mele mai.n ghuumtaa thaa khilauno.n ke vaaste
jitne varaq likhe the mirii zindagii ne sab
aa.ndhii ke ek jho.nke me.n bikhre hu.e hai.n sab
mai.n chaahtaa huu.n phir se sameTuu.n ye zindagii
bachche tamaam paas kha.De hai.n bujhe bujhe
shoKHii na jaane kyaa hu.ii ra.ngat kahaa.n ga.ii
jaise kitaab chho.D ke jaate hu.e varaq
jaise ki bhuulne lage bachcha ko.ii sabaq
jaise jabii.n ko chhuune lage maut kaa araq
jaise charaaG nii.nd kii aaGosh kii taraf
ba.Dhne lage a.ndhere kii zulfe.n bikher kar
bhuule hu.e hai.n ho.nT ha.nsii kaa pata talak
darvaaza dil kaa band hu.aa chaahtaa hai ab
kyaa sochnaa ki phuul se bachcho.n kaa saath hai
ab mai.n huu.n aspataal kaa bistar hai raat hai

Munawwar Rana
Nazm

siyasi leader ke nam

saal-haa-saal ye be-aasraa jak.De hu.e haath
raat ke saKHt o siyah siine mai.n paivast rahe
jis tarah tinkaa samundar se ho sargarm-e-satiiz
jis tarah tiitarii kohsaar pe yalGaar kare
aur ab raat ke sa.ngiin o siyah siine me.n
itne ghaav hai.n ki jis samt nazar jaatii hai
jaa-ba-jaa nuur nai ik jaal saa bun rakhaa hai
duur se sub.h kii dha.Dkan kii sadaa aatii hai
teraa sarmaaya tirii aas yahii haath to hai.n
aur kuchh bhii to nahii.n paas yahii haath to hai.n
tujh ko manzuur nahii.n Galba-e-zulmat lekin
tujh ko manzuur hai ye haath qalam ho jaa.e.n
aur mashriq kii kamii.n-gah me.n dha.Daktaa hu.aa din
raat kii aahanii mayyat ke tale dab jaa.e!

Faiz Ahmad Faiz
Nazm

tulu-e-ishtirakiyat

shaahii darbaaro.n ke dar se faujii pahre KHatm hu.e hai.n
zaatii jaagiiro.n ke haq aur mohmal da.ave KHatm hu.e hai.n

Sahir Ludhianvi
Nazm

nur-jahan ka mazar

hasrat hai Tapaktii dar-o-diivaar se kyaa kyaa
hotaa hai asar dil pe in aasaar se kyaa kyaa
naale hai.n nikalte dil-afgaar se kyaa kyaa
uThte hai.n sharar aah sharbaar se kyaa

Tilok Chand Mahroom
Nazm

ek manzum KHat

note me.n vo badan bhii nahii.n aa.e.nge
jin kii KHvaahish me.n tum roz marte rahe
note me.n fitrii jazbe nahii.n aa.e.nge
jo kisii zaabte yaa 'aqiide yaa maz.hab ke
Dar ke tale dab ga.e

Shoaib Kiani
Nazm

ehsas

mere kamre me.n pa.Dii
Table ke KHaano.n se nikal kar
KHat havaa me.n u.D rahe ho.n
box me.n rakhaa hu.aa ruumaal
sho.ala ban gayaa ho
barf ke tuudo.n tale dab kar zehn bhii
munjamid hone ke badle jal rahaa ho

Aabid Adeeb
Nazm

abba ka chaaliswan

buu.Dhe Gariib baap ke marne pe daf.atan
beTe ne sochaa kaise karuu.n dafn aur kafan
apne yahaa.n to maut me.n KHarche kaa hai chalan
Gam se niDhaal beTe ke maathe pe thii shikan
jo kuchh thaa paas dafn-o-kafan me.n uThaa diyaa
KHarche ne phir to maut kaa sadma bhulaa diyaa
karnaa pa.Daa jo dafan kaa taa-sub.h intizaar
mayyat ke paas chaltii rahii chaa.e baar baar
aur maut me.n jo aa.e the bairuunii rishta-daar
chaa.e se un kii to.Daa gayaa nii.nd kaa KHumaar
aur is ke baa'd chaltaa jo phir pandaan hai
lagtaa hai sogvaar nahii.n mezbaan hai
purse ko sub.h shaam phir aate hai.n rishta-daar
khaanaa nahii.n to chaa.e kam-az-kam ho ek baar
chaa.e ke saath vaa.e me.n KHarche hai.n be-shumaar
murde ko chho.D KHarche ko rotaa hai sogvaar
tiije ke baa'd dasvaa.n hai phir biisvaa.n bhii hai
phir chand roz baa'd hii chaaliisvaa.n bhii hai
har roz faatiha ke liye gosht chaahiye
saalan bhii sirf ek nahii.n do pakaa.iye
nazr-o-niyaaz ke liye halva banaa.iye
phir roz aane vaalo.n ko chaa.e pilaa.iye
beTaa bichaara dab gayaa qarze ke baar se
barso.n tak ab chhu.Daa.egaa piichhaa udhaar ke
phir is ke baa'd baate.n banaatii hai.n aurte.n
kyaa kyaa kamii rahii ye bataatii hai.n aurte.n
chaaliisvaa.n kuchh aise karaatii hai.n aurte.n
farmaa.isho.n ke Dher lagaatii hai.n aurte.n
is tarah maut ko bhii tamaasha banaa diyaa
vo e'tiraaz uThaa.e kaleja hilaa diyaa
beTe ne naam kar diyaa raushan jahaan me.n
aisii kisii ne maut na kii KHaandaan me.n
chaaliisvaa.n kuchh aisaa kiyaa aan-baan me.n
zevar bahuu kaa bik gayaa masnuu.ii shaan me.n
vo maut kii ki kumbe me.n Da.nkaa bajaa diyaa
chaaliisve.n pe shahr ko khaanaa khilaa diyaa

Nashtar Amrohvi
Nazm

maut

kaun aavaara havaa.o.n kaa subuk-baar hujuum
aah ehsaas kii zanjiir garaa.n TuuT ga.ii
aur sarmaaya-e-anfaas pareshaa.n na rahaa
mere siine me.n ulajhne lagii fariyaad mirii
phir nigaaho.n pe uma.nD aayaa hai taariik dhu.aa.n
TimTimaanaa hai mire saath ye maayuus charaaG
aaj miltaa nahii.n afsos pata.ngo.n kaa nishaa.n
mere siine me.n ulajhne lagii fariyaad mirii
TuuT kar rah ga.ii anfaas kii zanjiir-e-giraa.n
to.D Daalegaa ye kambaKHt makaa.n kii diivaar
aur mai.n dab ke isii Dher me.n rah jaa.uu.ngaa
jii ulajhtaa hai mirii jaan pe ban jaa.egii
thak gayaa aaj shikaarii kii kamaa.n TuuT ga.ii
lauT aayaa huu.n bahut duur se KHaalii haatho.n
aaj ummiid kaa din biit gayaa shaam hu.ii
mai.n ne chaahaa bhii magar tum se mohabbat na hu.ii
ki chuke ab to KHudaa ke liye KHaamosh raho
ek mauhuum sii KHvaahish thii falak chhuune kii
za.ng-aaluud mohabbat ko tujhe sau.np diyaa
sard haatho.n se mirii jaan mire ho.nT na sii
gar kabhii lauT ke aa jaa.e vahii saa.nvlii raat
KHushk aa.nkho.n me.n jhalak aa.e na be-suud namii
zalzala uf ye dhamaakaa ye musalsal dastak
be-amaa.n raat kabhii KHatm bhii hogii ki nahii.n
uf ye maGmuum fazaa.o.n kaa alamnaak sukuut
mere siine me.n dabii jaatii hai aavaaz mirii
tiirgii uf ye dhu.ndlakaa mire nazdiik na aa
ye mire haath pe jaltii hu.ii kyaa chiiz girii
aaj is ashk-e-nadaamat kaa ko.ii mol nahii.n
aah ehsaas kii zanjiir-e-giraa.n TuuT ga.ii
aur ye merii mohabbat bhii tujhe jo hai aziiz
kal ye maazii ke ghane bojh me.n dab jaa.egii
kaun aayaa hai zaraa ek nazar dekh to lo
kyaa KHabar vaqt dabe paa.nv chalaa aayaa ho
zalzala uf ye dhamaakaa ye musalsal dastak
khaTkhaTaataa hai ko.ii der se darvaaze ko
uf ye maGmuum fazaao.n kaa alamnaak sukuut
kaun aayaa hai zaraa ek nazar dekh to lo
to.D Daalegaa ye kambaKHt makaa.n kii diivaar
aur mai.n dab ke isii Dher me.n rah jaa.uu.ngaa

Akhtarul Iman
Nazm

zinda pani sachcha

ek qamiis chalii aatii hai jaane kahaa.n se bahtii hu.ii
jis me.n naaKHun gaa.D diye hai.n ab ik aabii jhaa.Dii ne
is kaa maalik bichha.D gayaa hai ye bhii us ke paas chalii
ik bahte darvaaze par ik bhiigii billii baiThii hai
jo aane vaale lamho.n kii baabat sochtii jaatii hai
sochte sochte us kii aa.nkhe.n ho jaa.e.ngii sehr-zada
aur us ke baalo.n kaa resham paanii me.n mil jaa.egaa
lahar kii ik diivaar girii aur bulbule dab kar TuuT ga.e
jin kii phuuTtii aa.nkho.n se kuchh KHvaab nikal kar bhaag chale
ye KHvaabo.n ke dekhne vaale aaKHir kyuu.n nahii.n sochte hai.n
sab afsaane jhuuTe hai.n, sab KHvaab bikharne vaale hai.n
is laa-faanii jhuuT ke piichhe sach hai agar to itnaa hai
ye sab kuchh hotaa rahtaa hai paanii bahtaa rahtaa hai

Saqi Faruqi
Nazm

diwali

dosto kyaa kyaa divaalii me.n nashaat-o-aish hai
sab muhayyaa hai jo is ha.ngaam ke shaayaan hai
is tarah hai.n kuucha-o-baazaar par naqsh-o-nigaar
ho ayaa.n husn-e-nigaarisataa.n kii jin se KHuub re
garm-joshii apnii baa-jaam-e-charaaGaa.n lutf se
kyaa hii raushan kar rahii hai har taraf roGan kii mai
maa.il-e-sair-e-charaaGaa.n naKHl har jaa dam-ba-dam
haasil-e-nazzaaraa husn-e-sham-e-ruuyaa.n pai-ba-pai
aashiqaa.n kahte hai.n maashuuqo.n se baa-ijz-o-niyaaz
hai agar manzuur kuchh lenaa to haazir hai.n ruupe
gar mukarrar arz karte hai.n to kahte hai.n vo shoKH
ham se lete ho miyaa.n takraar-o-hujjat taa-ba-kai
kahte hai.n ahl-e-qimaar aap me.n garm iKHtilaat
ham to Dab me.n sau rupe rakhte hai.n tum rakhte ho kai
jiit kaa pa.Dtaa hai jis kaa daano.n vo kahtaa hai yuu.n
suu-e-dast-e-raast hai mere ko.ii farKHanda-pai
hai dasahre me.n bhii yuu.n go farhat-o-ziinat 'naziir'
par diivaalii bhii ajab paakiiza-tar tyauhaar hai

Nazeer Akbarabadi
Nazm

ziyarat

kisii kii haadsaatii maut achaanak be-zamiirii kaa natiija thii
bahut se dab ga.e malbe me.n diivaar-e-anaa ke aap hii apnii
mare kuchh raabto.n kii KHushk-saalii me.n

Abdul Ahad Saaz
Nazm

faisla

aaj sochaa hai ki ehsaas ko zaa.il kar duu.n
apne shoriida iraade ko apaahij kar luu.n
apnii majruuh tamannaa kaa mudaavaa na karuu.n
apnii KHvaabiida mohabbat kaa alamnaak ma.aal
apnii be-KHvaab javaanii ko sunaayaa na karuu.n
apne be-kaif tasavvur ke sahaare ke liye
ek bhii sham.a sar-e-raah jalaayaa na karuu.n
apne be-suud taKHayyul ko bhaTak jaane duu.n
zindagii jaise guzartii hai guzar jaane duu.n
chand lamho.n me.n guzarne ko hai ha.ngaama-e-shab
so ga.e jaam suraahii kaa sahaaraa le kar
sard pa.Dne lagaa uj.Dii hu.ii mahfil kaa gudaaz
thak ga.ii gardish-e-yak-ra.ng se saaqii kii nazar
chand bedaar fasaano.n kaa asar luuT gayaa
dab gayaa talKH haqiiqat me.n nasha taa-ba-kamar
mai.n abhii aaKHirii mai-nosh huu.n maiKHaane me.n
dekhnaa kyaa hai mirii samt ba.Dhaa jaam ba.Dhaa
laa suraahii ko mire paas shikasta hii sahii
chhe.D TuuTe hu.e taaro.n ko karaahe.n to zaraa
sochtaa kyaa hai u.nDel aur u.nDel aur u.nDel
sard pa.Dtii hu.ii mahfil ke mukaddar pe na jaa
apne bedaar tafakkur kii halaakat pe ha.nsuu.n
aaj sochaa hai ki ehsaas ko zaa.il kar duu.n

Akhtarul Iman
Nazm

muddat hui aurat hue

mujh se sahelii ne kahaa
mumtaaz aisaa likhtii jaa
jis me.n ho.n kuchh chuu.Diyo.n
jhankaar kii baate.n
kuchh tazkire ho.n chunriyo.n ke
iz.haar kii baate.n
u.Dte sunahrii aa.nchalo.n me.n
motiyo.n kii sii la.Dii
pahlii vo shaitaanii merii
pahlii vo jo merii ha.nsii
baalii umr kii dil-kashii
vo bachpane kii shoKHiyaa.n
KHvaabo.n me.n KHvaahish ke saraab
dha.Dkan kii vo sargoshiyaa.n
goTaa kanaarii Taa.nkte
u.ngliyo.n me.n suu.ii kii chubhan
daa.nto.n me.n u.nglii daab kar
hotii shuruu.a phir se lagan
pahlii dafa dha.Dkaa thaa kab
ye dil tujhe kuchh yaad hai
vo KHushbuu.o.n ra.ngo.n kii duniyaa
ab bhii kyaa aabaad hai
mai.n ne kahaa merii sakhii
duniyaa kyaa tuu ne na takii
masruuf itnii zindagii
ki chuu.Diyaa.n pahnii nahii.n
jo chunariyaa.n ra.ngiin thii.n
vo dhuup le kar u.D ga.ii.n
merii umr kii titliyaa.n
ab aur jaanib mu.D ga.ii.n
ab dupaTTo.n par kabhii na
goTaa motii Taa.nktii huu.n
suu.iyaa.n haatho.n par nahii.n ab
dil ko apne Taa.nktii huu.n
KHushbu.o.n ke des se
mai.n duur itnii aa ga.ii
jiine kii KHaatir
mard saa
andaaz mai.n apnaa ga.ii
rishto.n ko naato.n ko nibhaate
farz adaa karte hu.e
tuu ne jo chau.nkaayaa lagaa
muddat hu.ii aurat hu.e

Mumtaz Malik
Nazm

maut ka git

jaan lo qahr kaa sailaab kise kahte hai.n
naa-gahaa.n maut kaa girdaab kise kahte hai.n
qabr ke pahlu.o.n kii daab kise kahte hai.n
daur-e-naa-shaad ko ab shaad kiyaa jaa.egaa
ruuh-e-insaa.n ko aazaad kiyaa jaa.egaa

Makhdoom Mohiuddin
Nazm

dar-madh-am

hotaa agar ta.aam tumhe.n kaun puuchhtaa
is fasl me.n bas aam hii guThlii ke daam hai

Khalid Mahmood
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now