Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".wise"

Nazm MATCHES FOR ".wise"

Nazm

zulmat ko ziya sarsar ko saba bande ko KHuda kya likhna

ai mere vatan ke fankaaro zulmat pe na apnaa fan vaaro
ye mahl-saraa.o.n ke baasii qaatil hai.n sabhii apne yaaro
virse me.n hame.n ye Gam hai milaa is Gam ko nayaa kyaa likhnaa
zulmat ko ziyaa sarsar ko sabaa bande ko KHudaa kyaa likhnaa

Habib Jalib
Nazm

koi aashiq kisi mahbuba se!

gulshan-e-yaad me.n gar aaj dam-e-baad-e-sabaa
phir se chaahe ki gul-afshaa.n ho to ho jaane do
umr-e-rafta ke kisii taaq pe bisraa hu.aa dard
phir se chaahe ki farozaa.n ho to ho jaane do
jaise begaane se ab milte ho vaise hii sahii
aa.o do chaar gha.Dii mere muqaabil baiTho
garche mil-baiThe.nge ham tum to mulaaqaat ke baa'd
apnaa ehsaas-e-ziyaa.n aur ziyaada hogaa
ham-suKHan ho.nge jo ham dono.n to har baat ke biich
an-kahii baat kaa mauhuum saa parda hogaa
ko.ii iqraar na mai.n yaad dilaa.uu.ngaa na tum
ko.ii mazmuun vafaa kaa na jafaa kaa hogaa
gard-e-ayyaam kii tahriir ko dhone ke liye
tum se goyaa ho.n dam-e-diid jo merii palke.n
tum jo chaaho to suno aur jo na chaaho na suno
aur jo harf kare.n mujh se gurezaa.n aa.nkhe.n
tum jo chaaho to kaho aur jo na chaaho na kaho

Faiz Ahmad Faiz
Nazm

o des se aane wale bata

o des se aane vaale bataa
kyaa ab bhii vahaa.n ke baaGo.n me.n
mastaana havaa.e.n aatii hai.n
kyaa ab bhii vahaa.n ke parbat par
ghanghor ghaTaa.e.n chhaatii hai.n
kyaa ab bhii vahaa.n kii barkhaa.e.n
vaise hii dilo.n ko bhaatii hai.n
o des se aane vaale bataa

Akhtar Shirani
Nazm

waqt se pahle

yuu.n to har rishte kaa anjaam yahii hotaa hai
phuul khiltaa hai
mahaktaa hai
bikhar jaataa hai
tum se vaise to nahii.n ko.ii shikaayat
lekin
shaaKH ho sabz
to hassaas fazaa hotii hai
har kalii zaKHm kii suurat hii judaa hotii hai
tum ne
be-kaar hii mausam ko sataayaa varna
phuul jab khil ke mahak jaataa hai
KHud-ba-KHud
shaaKH se gir jaataa hai

Nida Fazli
Nazm

aadha kamra

baaqii aadhe kamre me.n kyaa ho rahaa hai
la.Dkiyaa.n
kyaa harf chun rahii hai.n
isti.aare ke lihaaz se
haraam ke bachche gin rahii hai.n
la.Dkiyo.n ke naam qaafiye kii vaj.h se
sartre ziyaada nahii.n rakh paa rahaa hai
is liye un kii Gazal chhoTii pa.D rahii hai
zamiin ke lihaaz se naqqaad
apne kamro.n se ukha.Dne ke liye tayyaar nahii.n
lekin unho.n ne vaada kiyaa hai
saare thinker ikaTThe ho.nge
aur bataa.e.nge ki society kiyaa hai
aur kyuu.n hai
vaise havaa.o.n kaa kaam hai chalte phirte rahnaa
duur-andesh kii aa.nkh kaisii hai
cigarette ke kash se ba.Dii hai
vo gha.De se patthar nikaal kar gin rahe the
aur kah rahe the mai.n is gha.De kaa baanii huu.n
chaa.e ke saath Giibat ke cake
zaruurii hote hai.n
aur chuGal-KHorii kii kitaab kaa diibaacha
har shaKHs likhtaa hai
zabaano.n me.n bujhe tiiro.n se maqtuul zinda ho rahe hai.n
ba.Daa iblaaG hai
society ke chehre pe vo zabaan chaltii hai
ki ek ek bande ke paas
kitaabo.n kii riyaasat bande se ziyaada hai

Sara Shagufta
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

meri pahli nazm

kyaa bachche suljhe hote hai.n
jab ge.nd se uljhe hote hai.n
vo is liye mujh ko bhaate hai.n
din biite yaad dilaate hai.n
vo kitne hasiin basere the
jab duur Gamo.n se Dere the
jo khel me.n haa.il hotaa thaa
nafriin ke qaabil hotaa thaa
har ik se ulajh kar rah jaanaa
ruk ruk ke bahut kuchh kah jaanaa
ha.ns denaa baato.n baato.n par
barsaat kii kaalii raato.n par
baadal kii subuk-raftaarii par
bulbul kii aah-o-zaarii par
aur sham.a kii lau kii garmii par
parvaano.n kii haT-dharmii par
duniyaa ke dhande kyaa jaane.n
aazaad ye phande kyaa jaane.n
ma.asuum fazaa me.n rahte the
ham to ye samajh hii baiThe the
KHushiyo.n kaa alam anjaam nahii.n
duniyaa me.n KHizaa.n kaa naam nahii.n
maahaul ne khaayaa phir palTaa
naagaah taGayyur aa jhapTaa
aur us kii karam-farmaa.ii se
haalaat kii ik a.ng.Daa.ii se
aa pahu.nche aise be.Do.n me.n
jo le ga.e hame.n thape.Do.n me.n
bachpan ke suhaane saa.e the
saa.e me.n zaraa sustaa.e the
vo daur-e-muqaddas biit gayaa
ye vaqt hii baazii jiit gayaa
ab vaise mire haalaat nahii.n
vo chiiz nahii.n vo baat nahii.n
jiine kaa safar ab duubhar hai
har gaam pe sau sau Thokar hai
vo dil jo ruuh-e-qariina thaa
aashaa.o.n kaa ek KHaziina thaa
is dil me.n nihaa.n ab naale hai.n
taaro.n se ziyaada chhaale hai.n
jo ha.nsnaa ha.nsaanaa hotaa hai
rone ko chhupaanaa hotaa hai
ko.ii Guncha dil me.n khiltaa hai
tho.Daa saa sukuu.n jab miltaa hai
Gam tez qadam phir bhartaa hai
KHushiyo.n kaa ta.aaqub kartaa hai
mai.n sochtaa rahtaa huu.n yuu.nhii
aaKHir ye tafaavut kyaa ma.anii
ye soch ajab ta.Dpaatii hai
aa.ankho.n me.n namii bhar jaatii hai
phir mujh se dil ye kahtaa hai
maazii ko tuu rotaa rahtaa hai
kuchh aa.he.n dabii sii rahne de
kuchh aa.nsuu baaqii rahne de
ye haal bhii maazii honaa hai
is par bhii tujhe kuchh ronaa hai

Anwar Masood
Nazm

jatri

ek aayaa gayaa duusraa aa.egaa der se dekhtaa huu.n yuu.nhii raat us kii guzar jaa.egii
mai.n kha.Daa huu.n yahaa.n kis liye mujh ko kyaa kaam hai yaad aataa nahii.n yaad bhii TimTimaataa
hu.aa ik diyaa ban ga.ii jis kii ruktii hu.ii aur jhijaktii hu.ii har kiran be-sadaa qahqaha hai
magar mere kaano.n ne kaise use sun liyaa ek aa.ndhii chalii chal ke miT
bhii ga.ii aaj tak mere kaano.n me.n maujuud hai saa.e.n saa.e.n machaltii hu.ii aur
ubaltii hu.ii phailtii phailtii der se mai.n kha.Daa huu.n yahaa.n ek aayaa gayaa
duusraa aa.egaa raat us kii guzar jaa.egii ek ha.ngaama barpaa hai dekhe.n jidhar
aa rahe hai.n ka.ii log chalte hu.e aur Tahalte hu.e aur rukte hu.e phir se
ba.Dhte hu.e aur lapakte hu.e aa rahe jaa rahe hai.n idhar se udhar aur udhar se
idhar jaise dil me.n mire dhyaan kii lahar se ek tuufaan hai vaise aa.nkhe.n
mirii dekhtii hii chalii jaa rahii hai.n ki ik TimTimaate diye kii kiran zindagii ko phisalte
hu.e aur girte hu.e Dhab se zaahir kiye jaa rahii hai mujhe dhyaan
aataa hai ab tiirgii ik ujaalaa banii hai magar is ujaale se ristii chalii jaa rahii
hai.n vo amrit kii buu.nde.n jinhe.n mai.n hathelii pe apnii sambhaale rahaa huu.n hathelii
magar TimTimaataa hu.aa ik diyaa ban ga.ii thii lapak se ujaalaa hu.aa lau girii phir a.ndheraa saa
chhaane lagaa baiThtaa baiThtaa baiTh kar ek hii pal me.n uThtaa hu.aa jaise aa.ndhii ke
tiikhe thape.Do.n se darvaaze ke taaq khulte rahe.n band hote rahe.n
pha.D.pha.Daate hu.e taa.ir-e-zaKHm-KHurda kii maanind mai.n dekhtaa hii rahaa ek aayaa
gayaa duusraa aa.egaa soch aa.ii mujhe paa.nv ba.Dhne se inkaar karte
ga.e mai.n kha.Daa hii rahaa dil me.n ik buu.nd ne ye kahaa raat yuu.nhii guzar jaa.egii
dil kii ik buu.nd ko aa.nkh me.n le ke mai.n dekhtaa hii rahaa pha.D.pha.Daate hu.e taa.ir
zaKHm-KHurda kii maanind darvaaze ke taaq ik baar jab mil ga.e mujh ko aahista aahista
ehsaas hone lagaa ab ye zaKHmii parinda na ta.Dpegaa lekin mire dil ko har vaqt
ta.Dpaa.egaa mai.n hathelii pe apnii sambhaale rahuu.ngaa vo amrit kii buu.nde.n jinhe.n aa.nkh
se merii risnaa thaa lekin mirii zindagii TimTimaataa hu.aa ik diyaa ban ga.ii jis kii ruktii hu.ii
aur jhijaktii hu.ii har kiran be-sadaa qahqaha hai ki is tiirgii me.n ko.ii baat aisii nahii.n
jis ko pahle a.ndhere me.n dekhaa ho mai.n ne safar ye ujaale a.ndhere kaa chaltaa
rahaa hai to chaltaa rahegaa yahii rasm hai raah kii ek aayaa gayaa duusraa
aa.egaa raat aise guzar jaa.egii TimTimaate sitaare bataate the raste kii
naddii bahii jaa rahii hai bahe jaa is uljhan se aise nikal jaa ko.ii siidhaa manzil pe jaataa
thaa lekin ka.ii qaafile bhuul jaate the anjum ke daur-e-yagaanaa ke mub.ham ishaare magar vo
bhii chalte hu.e aur ba.Dhte hu.e shaam se pahle hii dekh lete the maqsuud kaa band
darvaaza khulne lagaa hai magar mai.n kha.Daa huu.n yahaa.n mujh ko kyaa kaam hai meraa darvaaza
khultaa nahii.n hai mujhe phaile sahraa kii so.ii hu.ii reg kaa zarra zarra yahii kah rahaa hai
ke aise KHaraabe me.n suukhii hathelii hai ik aisaa talvaa ke jis ko kisii KHaar kii nok chubhne pe bhii
kah nahii.n saktii mujh ko ko.ii buu.nd apne lahuu kii pilaa do magar mai.n kha.Daa huu.n yahaa.n kis liye
kaam ko.ii nahii.n hai to mai.n bhii in aate hu.e aur jaate hu.e ek do tiin
laakho.n baguulo.n me.n mil kar yuu.nhii chalte chalte kahii.n Duub jaataa ke jaise yahaa.n
bahtii lahro.n me.n kashtii har ek mauj ko thaam letii hai apnii hathelii ke phaile ka.nval
me.n mujhe dhyaan aataa nahii.n hai ki is raah me.n to har ik jaane vaale ke bas
me.n hai manzil mai.n chal duu.n chaluu.n aa.iye aa.iye aap kyuu.n is jagah
aise chup-chaap tanhaa kha.De hai.n agar aap kahiye to ham ik achhuutii sii Tahnii se
do phuul bas bas mujhe is kii ko.ii zaruurat nahii.n hai mai.n ik
dost kaa raasta dekhtaa huu.n magar vo chalaa bhii gayaa hai mujhe phir bhii
taskiin aatii nahii.n hai ki mai.n ek sahraa kaa baashinda maaluum hone lagaa huu.n KHud
apnii nazar me.n mujhe ab ko.ii band darvaaza khultaa nazar aa.e ye baat mumkin nahii.n hai
mai.n ik aur aa.ndhii kaa mushtaaq huu.n jo mujhe apne parde me.n yaksar chhupaa le
mujhe ab ye mahsuus hone lagaa hai suhaanaa samaa.n jitnaa bas me.n thaa mere
vo sab ek bahtaa saa jho.nkaa banaa hai jise haath mere nahii.n rok sakte
ki merii hathelii me.n amrit kii buu.nde.n to baaqii nahii.n hai.n faqat ek phailaa hu.aa
KHushk be-barg be-ra.ng sahraa hai jis me.n ye mumkin nahii.n mai.n kahuu.n
ek aayaa gayaa duusraa aa.egaa raat merii guzar jaa.egii

Meeraji
Nazm

meri gali ke ghaliz bachcho

mirii galii ke Galiiz bachcho
tum apne maile badan kii saarii Galaazato.n ko udhaar samjho
tumhaarii aa.nkhe.n
udaasiyo.n se bharii hu.ii hai.n
azal se jaise Darii hu.ii hai.n
tumhaare ho.nTo.n pe pii.Dhiyo.n kii jamii hu.ii tah ye kah rahii hai
hayaat kii aabjuu pas-e-pusht bah rahii hai
tumhaarii jebe.n munaafiqat se aTii hu.ii hai.n
sabhii qamiise.n phaTii hu.ii hai.n
tumhaarii phiikii hatheliyo.n kii bujhii lakiire.n
baqaa kii abjad se ajnabii hai.n
tumhaarii qismat kii aasmaanii nishaaniyaa.n ab KHutuut-e-vahdaaniyat kaa maqsuum ho rahii hai.n
nazar se maaduum ho rahii hai.n
mirii galii ke Galiiz bachcho
tumhaare maa.n-baap ne tamaddun kaa qarz le kar
tumhaarii tahziib bech dii hai
tumhaaraa ustaad apnii TuuTii hu.ii chha.Dii le ke chup kha.Daa hai
ki is ke suukhe gale me.n naan-e-javii.n kaa Tuk.Daa a.Daa hu.aa hai
mirii galii ke Galiiz bachcho
tumhaare maile badan kii saarii Galaazate.n ab ga.e zamaano.n ke armuGaa.n hai.n
tumhaare virse kii daastaa.n hai.n
inhe.n sambhaalo
ki aane vaalaa har ek lamha tumhaare jha.Dte hu.e papoTo.n se jaane vaale dino.n dino.n kii utaar legaa
mirii galii ke Galiiz bachcho
zido.n ko chho.Do
qariib aa.o
ruto.n kii nafrat ko pyaar samjho
KHizaa.n ko rang-e-bahaar samjho
Galaazato.n ko udhaar samjho

Mohsin Naqvi
Nazm

holi

buraa.ii aaj na aise rahe na vaise rahe
safaa.ii dil me.n rahe aaj chaahe jaise rahe
Gubaar dil me.n kisii ke rahe to kaise rahe
abiir u.Dtii hai ban kar Gubaar holii me.n

Nazeer Banarasi
Nazm

hello best friend

mere hone kii zamaane me.n vazaahat karnaa
dil ke jazbaat kii duniyaa se hifaazat karnaa
vaise mushkil hai kisii par bhii ye nemat karnaa
phir bhii mumkin ho to taa-umr mohabbat karnaa

Balmohan panday
Nazm

muslim umma ka America se shikwa

kyuu.n gunahgaar banuu.n visa-faraamosh rahuu.n
kab talak KHauf-zada suurat-e-KHargosh rahuu.n
vaqt kaa ye bhii taqaaza hai ki KHaamosh rahuu.n
ham-navaa! mai.n ko.ii mujrim huu.n ki ruu-posh rahuu.n

Khalid Irfan
Nazm

sher aur KHargosh

to us ne bhii dikhlaa.e vaise hii daa.nt
ye Gurraayaa Gurraa.ii parchhaa.ii.n bhii
palaT ke ku.e.n se jo aavaaz lauTii

Gulzar
Nazm

bahrupni

jaane kis kokh ne janaa is ko
jaane kis sehn me.n javaan hu.ii
jaane kis des se chalii kam-baKHt
vaise ye har zabaan boltii hai
zaKHm khi.Dkii kii tarah kholtii hai

Kaifi Azmi
Nazm

ghaddar

des me.n basne vaalaa har ik sach-pasand
zulm-o-vahshat se duurii par har kaar-band
saa.ns lene kaa haq maa.ngne vaalaa har naujavaa.n
zindagii kii ramaq khojne vaalaa har KHaandaa.n
saare Gaddaar hai.n
saare jaasuus hai.n
haakim-o-sipah-saalaar-o-ashraafiya
ke ishaaro.n pe na naachne vaale kuffaar hai.n
naaqidii.n saazishii
sochne vaale
gustaaKH hai.n
aur vo saare qalamkaar
agnet hai.n
jo niguu.n-sar nahii.n
vo jinhe.n fitrat-e-sabz ne
jaa.n-fishaanii se logo.n ke chehro.n pe ugtii thakan
vahshate.n tiirgii
duur pur-shor kii sachchii taariiKH me.n tonic dene kii gustaaKHiyo.n
kaa jariida kiyaa
aayat-e-muflisii se ko.ii sar-kashii
gumbad-e-tishnagii par shikaayat ko.ii
maz.hab-e-tiira-baKHtii kii tauhiin hai
apnii dhartii ke gale se apne liye ko.ii hissa talab karnaa ilhaad hai
aur vaise bhii gandum to shaitaaniyat hii kii iijaad hai
bhuuk Gaddaar hai

Atif tauqeer
Nazm

fana

duniyaa me.n ko.ii shaad ko.ii dard-naak hai
yaa KHush hai yaa alam ke sabab siina-chaak hai
har ek dam se jaan kaa har-dam tapaak hai
naapaak tan paliid najis yaa ki paak hai
jo KHaak se banaa hai vo aaKHir ko KHaak hai
hai aadmii kii zaat kaa us jaa ba.Daa zuhuur
le arsh taa-ba-farsh chamaktaa hai jis kaa nuur
guzre hai un kii qabr pe jab vahsh aur tuyuur
ro ro yahii kahe hai har ik qabr ke huzuur
jo KHaak se banaa hai vo aaKHir ko KHaak hai
duniyaa se jab ki ambiyaa aur auliyaa uThe
ajsaam-e-paak un ke isii KHaak me.n rahe
ruuhe.n hai.n KHuub jaan me.n ruuho.n ke hai.n maze
par jism se to ab yahii saabit hu.aa mujhe
jo KHaak se banaa hai vo aaKHir ko KHaak hai.n
vo shaKHs the jo saat vilaayat ke baadshaah
hashmat me.n jin kii arsh se uu.nchii thii baargaah
marte hii un ke tan hu.e galiyo.n kii KHaak-e-raah
ab un ke haal kii bhii yahii baat hai gavaah
jo KHaak se banaa hai vo aaKHir ko KHaak hai
kis kis tarah ke ho ga.e mahbuub-e-kaj-kulaah
tan jin ke misl-e-phuul the aur mu.nh bhii rashk-e-maah
jaatii hai un kii qabr pe jis-dam mirii nigaah
rotaa huu.n jab to mai.n yahii kah kah ke dil me.n aah
jo KHaak se banaa hai vo aaKHir ko KHaak hai
vo gore gore tan ki jinho.n kii thii dil me.n jaa.e
hote the maile un ke ko.ii haath gar lagaa.e
so vaise tan ko KHaak banaa kar havaa u.Daa.e
ronaa mujhe to aataa hai ab kyaa kahuu.n mai.n haa.e
jo KHaak se banaa hai vo aaKHir ko KHaak hai
umdo.n ke tan ko taa.nbe ke sanduuq me.n dharaa
muflis kaa tan pa.Daa rahaa maaTii-upar pa.Daa
qaa.em yahaa.n ye aur na saabit vo vaa.n rahaa
dono.n ko KHaak khaa ga.ii yaaro kahuu.n me.n kyaa
jo KHaak se banaa hai vo aaKHir ko KHaak hai
gar ek ko hazaar ruupe kaa milaa kafan
aur ek yuu.n pa.Daa rahaa hai be-kas barhana-tan
kii.De mako.De khaa ga.e dono.n ke tan-badan
dekhaa jo ham ne aah to sach hai yahii suKHan
jo KHaak se banaa hai vo aaKHir ko KHaak hai
jitne jahaa.n me.n naach hai.n ka.ngnii se taa-gehuu.n
aur jitne meva-jaat hai.n tar KHushk guunaaguu.n
kap.De jahaa.n talak hai.n sapiida o siyah numuu.n
kim-KHvaab taash baadila kis kis kaa naam luu.n
jo KHaak se banaa hai vo aaKHir ko KHaak hai
jitne daraKHt dekho ho buuTe se taa-ba-jhaa.D
ba.D piipal aa.nb niib chhu.aaraa khajuur taa.D
sab KHaak ho.nge jab ki fanaa Daalegii ukhaa.D
kiyaa buuTe Dhe.Dh paat ke kyaa jhaa.D kyaa pahaa.D
jo KHaak se banaa hai vo aaKHir ko KHaak hai
jitnaa ye KHaak kaa hai tilismaat ban rahaa
phir KHaak us ko hotaa hai yaaro judaa judaa
tarkaarii saag paat zahr amrit aur davaa
zar siim kau.Dii laal zamurrad aur in savaa
jo KHaak se banaa hai vo aaKHir ko KHaak hai
ga.D.h coat top rahakla teG o kamaan-o-tiir
baaG-o-chaman mahall-o-makaanaat dil-paziir
honaa hai sab ko aah isii KHaak me.n KHamiir
merii zabaa.n pe ab to yahii baat hai 'naziir'
jo KHaak se banaa hai vo aaKHir ko KHaak hai

Nazeer Akbarabadi
Nazm

fana ka safar

us kii KHvaahish kaa iz.haar
ma.asuum had tak rivaayat kii bandish me.n uljhaa hu.aa thaa
ki mai.n us ke haatho.n pe meh.ndii lagaa.uu.n
magar shaa.erii ek devii hai jis kii jalan ko
kabhii likhne vaalo.n ke haatho.n pe itnaa taras hii nahii.n aa sakaa hai
ki baaGii dimaaGo.n me.n bhii aam rasto.n kii taqliid bhartii
yaa haatho.n kii jumbish KHirad ke tasallut se aazaad kartii
mire haath bhii zehn me.n ghuumte kuchh savaalo.n ke saa.nche banaane lage
us ke haatho.n pe meh.ndii se atom ke model banaane lage
aur model bhii aise jo matruuk the
jis me.n zarra bahut duur se ghuumtaa jhuumtaa daa.era daa.era
rafta rafta kisii markaze kii taraf gaamzan
bas tasalsul se ba.Dhtii hu.ii ik kashish ke asar me.n rahe
ik yaqiinii fanaa ke safar me.n rahe
saal-haa-saal chiize.n badaltii ga.ii.n
vaqt ne dard ke jo bhii lyrics likhe un ko gaanaa pa.Daa
jaane kaise magar
us ko jaanaa pa.Daa
mai.n ne vaise to ye umr bhar sochnaa hii nahii.n thaa
magar shaa.erii ek devii jalan
nostalgic zamaano.n kii tasviir logic ke kuchh mas.ale
puuchhne lag ga.e hai.n
bhalaa aisaa jaahil kahaa.n par milegaa
ki jo kiimiyaa pa.Dh ke bhii
ik ta'alluq me.n pahle to zarra bane
aur nibhaate hu.e
dynamics ke vo hii matruuk model chune
aur tasalsul se ba.Dhtii hu.ii ik kashish ke asar me.n rahe
ik yaqiinii fanaa ke safar me.n rahe

Sohaib Mugheera Siddiqi
Nazm

brake up

ta.alluq
tark karnaa hai
ta.alluq
tark
kar lenaa
magar
vaise nahii.n
jaise
zamaana
tark
kartaa hai
dilo.n me.n
farq
kartaa hai
vafaa ko
Garq kartaa hai.n
ta.alluq
tark karnaa hai
ta.alluq
tark kar lenaa
magar
ik mashvara sun lo
ise tum iltijaa samjho
tumhe.n bas itnaa
karnaa hai
ki is
anjaam se pahle
meraa aaGaaz dohraa do
mujhe phir mujh se milvaa do
tumhe.n bas itnaa
karnaa hai
mohabbat
ke mahiine kii
vahii taariiKH chunnii hai
vahii
ik vaqt
rakhnaa hai
vahii
kap.De pahan.ne hai.n
vahii
KHushbuu lagaanii hai
jo pahle din lagaa.ii thii
mohabbat kii
vo
pahlii
muskuraahaT
saath laanii hai
usii cafe me.n aanaa hai
usii Table ko chun.naa hai
vahii coffee ma.ngaanii hai
ki jo us din ma.ngaa.ii thii
chamak
aa.nkho.n me.n
vo hii ho
khanak
baato.n me.n
vo hii ho
hathelii par
usii andaaz me.n
meh.ndii rachaa lenaa
ki jo
us din rachaa.ii thii
suno jaanaa.n
mohabbat kaa
miraa pahlaa
lifaafa
vo gulaabii KHat
use tum saath le aanaa
tumhaaraa
KHat
ki jis ke rang
ab tak
huu-ba-huu vo hai.n
use mai.n saath laa.uu.ngaa
lifaafe ham
badal le.nge
ta.alluq
tark kar le.nge
usii din
kii tarah
cafe se jaate vaqt
mu.D kar dekh paa.o to
ye tum par chho.Dtaa huu.n mai.n
ta.alluq to.Dtaa huu.n mai.n
jahaa.n se
ibtidaa kii thii
vahii.n par
intihaa karnaa
ta.alluq
tark karnaa hai
ta.alluq
tark
kar lenaa
magar
vaise nahii.n
jaise
zamaana
tark
kartaa hai

Siraj Faisal Khan
Nazm

shahzade

zehn me.n azmat-e-ajdaad ke qisse le kar
apne taariik gharo.ndo.n ke KHalaa me.n kho jaa.o
marmarii.n KHvaabo.n kii pariyo.n se lipaT kar so jaa.o
abr paaro.n pe chalo, chaa.nd sitaaro.n me.n u.Do
yahii ajdaad se virse me.n milaa hai tum ko
duur maGrib kii fazaa.o.n me.n dahaktii hu.ii aag
ahl-e-sarmaaya kii aavezish-e-baaham na sahii
ja.ng-e-sarmaaya o mehnat hii sahii
duur maGrib me.n hai mashriq kii fazaa me.n to nahii.n
tum ko maGrib ke bakhe.Do.n se bhalaa kyaa lenaa?
tiirgii KHatm hu.ii surKH shu.aa.e.n phailii.n
duur maGrib kii fazaa.o.n me.n taraane guu.nje
fat.h-e-jamhuur ke insaaf ke aazaadii ke
saahil-e-sharq pe gaiso.n kaa dhu.aa.n chhaane lagaa
aag barsaane lage ajnabii topo.n ke dahan
KHvaab-gaaho.n kii chhate.n girne lagii.n
apne bistar se uTho
na.e aaqaa.o.n kii ta.aziim karo
aur phir apne gharo.ndo.n ke KHalaa me.n kho jaa.o
tum bahut der bahut der talak so.e rahe

Sahir Ludhianvi
Nazm

kabhi kabhi

kabhii kabhii lagtaa hai
jaise zindagii
kaan mai.n aa kar kah rahii ho
yaar mere saath kar kyaa rahe ho
vaise sach me.n
hame.n karnaa kyaa thaa
aur ham kar kyaa rahe.n hai.n
hame.n ban.naa kyaa thaa
aur ham ban kyaa ga.e hai.n
ronaa chaahe.n
to khul kar rote nahii.n hai.n
ha.nsnaa chaahe.n
to khul kar ha.nste nahi.n hai.n
KHvaabo.n me.n yuu.n bahte hai.n aksar
haqiiqat me.n ham rahte nahii.n hai.n
ye chaa.ndnii raate.n
vo taaro.n se baate.n
tho.Daa raato.n me.n jaagnaa
tho.Daa sach se bhaagnaa
kuchh pyaare sapne
kuchh burii yaade.n
kuchh puurii zaruurate.n
kuchh adhuurii KHvaahishe.n
sab hai.n
agar kuchh nahii.n hai
to vo hai.n ham

Rashmi Bhardwaj
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now