Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "HARCHARAN DASS CHAWLA"

Nazm MATCHES FOR "HarcHaran Dass cHawla"

Nazm

bimar laDka

hukm-e-maadar ko mai.n tabdiil karuu.n
maa.n kii nafrat bharii aa.nkho.n se kahii.n duur chalaa jaa.uu.n mai.n
be-niyaazii se phiruu.n
paap ke kaa.nTe chun kar
ruuh naapaak karuu.n
giit shahvat ke havas ke sun kar
zehn be-baak karuu.n
aise jiivan kii hai hasrat ab tak
pyaar... sab kahte hai.n vo pyaar mujhe kartii hai
pyaar kii raakh tale soyaa pa.Daa huu.n kab se
jhuuT kahte hai.n mai.n bezaar hu.aa huu.n sab se
phir lapak uTThegaa vo sho.ala, pur-ummiid huu.n mai.n
pyaar kii raakh tale dab ke hai jo duud hu.aa

Zahid Dar
Nazm

siyasat

maasii kii ik ajab adaa thii
galii mahle ke jis bachche par bhii us kaa daav chaltaa
mukko.n aur dhamko.n se
adh-mu.aa saa kar ke KHud chhup jaatii
fariyaadii bachche kii aah-o-zaarii san kar
rasta chalne vaale yaa bachche ke apne aa jaate to
majma.a chiir ke sab se pahle maasii aatii
rone vaale bachche ko siine se lagaatii
shahd bhare lamhe me.n kahtii
mere pyaare
aa.nkh ke taare
kis ne maaraa
bachcha phaTii phaTii aa.nkho.n se
maasii ko taktaa rah jaataa
aur qissa ThanDaa ho jaataa

Mansoora Ahmad
Nazm

shahr-e-nigar

aaj phir taa-ba-chaman dar-e-pai-e-gul-haa-e-chaman
gungunaataa hu.aa zambuur-e-bahaar aa hii gayaa

Asrarul Haq Majaz
Nazm

middle-class

tumhe.n maaluum hai naa
hamaaraa sahn chhoTaa hai aur us me.n chand KHvaab hii ba-mushkil puure utarte hai.n
itnaa khaanaa jo ghar me.n aa.e mehmaan par bhii puuraa ho
maa.n kii davaa.e.n vaqt par aa jaa.e.n
baap ko aKHbaar roz miltaa rahe
bachcho.n ko qadre-behtar school me.n pa.Dhaa sake.n
bahan kii shaadii ho jaa.e bhaa.ii bhii kisii qaabil ho jaa.e
mai.n baahar jaa kar tumhaare maa.n baap ke liye bhii kuchh karuu.ngaa
vaapas jab aa.u.ngaa tumhe.n ka.ngan dilvaa duu.ngaa
yahii.n kahii.n ko.ii chhoTii sii dukaan banaa luu.ngaa
so ye sab puuraa karne ko vo baahar des chalaa gayaa hai
use rozgaar mil gayaa hai sab achchhaa chal rahaa hai
lekin kuchh KHvaahishe.n hai.n naa-tamaam KHvaahishe.n
kabhii ikaTThe icecream khaanaa
us ke ka.ndhe par sar rakh kar so jaanaa
kabhii muskuraanaa kabhii ro denaa
kisii shaam halkii phuvaar me.n yuu.nhii us ke sang baahar nikal jaanaa
chhe saal ho ga.e hai.n
vo duur des me.n hai aur mai.n tanhaa
KHvaahishe.n hasrat kaa ruup dhaar chukii hai.n
magar mere ghar kaa aa.ngan bahut chhoTaa hai
merii hasrato.n kii jagah nahii.n hai us me.n
so mai.n bahut KHush huu.n muskuraatii rahtii huu.n
shukr hai sab achchhaa chal rahaa hai
vo duur des gayaa hai

Zehra Alvi
Nazm

naukri

kisii shaKHs ke saath leTaa hu.aa mai.n
nihaayat zaruurii kisii baat par
apnii saarii samajh laa ke mad.hosh huu.n
aur apne hii andar se chillaa rahaa huu.n
ki kal sub.h mujh ko kisii bhii tarah
is ajiib aadmii se mafar chaahiye
ki ye aadmii bhii mujhe ik jagah roknaa chaahtaa hai
magar mai.n to mai.n huu.n ki mujh ko to keval safar chaahiye
haa.n mafar chaahiye mujh ko is shaKHs se jo
mirii shakl me.n merii marzii se haT kar
mirii soch ke daa.ero.n se pare hii jiye jaa rahaa hai
jo karne nahii.n hai.n vo sab aise pesha kiye jaa rahaa hai
mafar chaahiye is kii naadaaniyo.n se
mafar chaahiye is ke hisse me.n aatii pareshaaniyo.n se
mafar chaahiye is kii us zaat se jis ko duniyaa
mire naam se to bhale jaantii hai magar ek shaa.ir nahii.n maantii
balki ik pesha-var aadmii kii tarah dekhtii rahtii hai
ab mai.n is ke binaa shaa.irii ke samundar me.n tanhaa safar chaahtaa huu.n
mai.n misro.n kii maujo.n pe bahtaa hu.aa apne haatho.n ke hisse hunar chaahtaa huu.n
mai.n Dar chaahtaa huu.n ki is nazm me.n bhii fauulun fauulun kii tai-shuda ravaanii banii hii rahe
kuchh zaruurii tavaazun-o-tartiib kho.e binaa is ke usluub me.n ik javaanii banii hii rahe
KHair ye shaKHs jo mere sang mere andar hii
leTaa hu.aa hai bahut DhiiT hai
is ko merii tarah ko.ii parvaa nahii.n hai
ki ab is kii duniyaa me.n duniyaa nahii.n hai
ai bujhte qamar ham-safiir-e-bashar
ab mai.n so jaataa huu.n aur ye tuu dekhnaa
raat kii vus.ate.n kyaa nigal jaa.e.ngii
aur mirii sub.h ke hisse kyaa aa.egaa

Nivesh Sahu
Nazm

anar-kali

tere Gam me.n kitnaa naazuk ho gayaa hai dil ki ab
is bhare baazaar me.n
har sadaa ik ajnabii ehsaas kaa aa.iina hai
aaj tere Gam se faariG ho ke mai.n
bah rahaa huu.n lazzat-e-iz.haar ke sailaab me.n
la.Dkha.Daate re.ngte la.ng.Daate ha.nste bolte
lafz aur un kaa dhu.aa.n KHushbuu chamak
chal rahe hai.n mil ke be-aaha.ng aavaazo.n ke ra.ng
ajnabii ho.nTo.n ke lafz
aarzu.o.n ke Gubaare hasrato.n kii titliyaa.n
chaar-suu u.Dtii hai.n mai.n KHaamosh huu.n
guftuguu ke daa.ero.n me.n phail kar
ra.ng bhartaa jaa rahaa hai un tamannaa.o.n kaa KHuu.n
jin ke lafzo.n ne zabaa.n dii sun.ne vaalo.n kaa KHayaal
un me.n Duubaa jaa rahaa hai bolte lafzo.n kaa sahar
us ko apne daam me.n laataa hu.aa
phail kar aataa hai mujh tak pech-o-KHam khaataa hu.aa
aur mai.n
us kii kaifiyat kaa Gaaza apne chehre par lagaa.e
ik na.ii aavaaz ke saa.e me.n huu.n
chaahtaa huu.n band aa.nkho.n se mai.n us sailaab me.n
kuud jaa.uu.n aur nazzaara karuu.n
apne kaano.n se dilo.n ke tarjumaa.n alfaaz kaa
suurat goyaa se ba.Dh kar hai suKHan-andaaz kaa

Yusuf Zafar
Nazm

jaDe ki bahaaren

jab maah aghan kaa Dhaltaa ho tab dekh bahaare.n jaa.De kii
aur ha.ns ha.ns puus sambhaltaa ho tab dekh bahaare.n jaa.De kii
din jaldii jaldii chaltaa ho tab dekh bahaare.n jaa.De kii
aur paalaa barf pighaltaa ho tab dekh bahaare.n jaa.De kii
chillaa Gam Tho.nk uchhaltaa ho tab dekh bahaare.n jaa.De kii
tan Thokar maar pichhaa.Daa ho aur dil se hotii ho kushtii sii
thar-thar kaa zor ukhaa.Daa ho bajtii ho sab kii battiisii
ho shor phaphuu huu-huu kaa aur dhuum ho sii-sii sii-sii kii
kalle pe kallaa lag lag kar chaltii ho mu.nh me.n chakkii sii
har daa.nt chane se daltaa ho tab dekh bahaare.n jaa.De kii
har ek makaa.n me.n sardii ne aa baa.ndh diyaa ho ye chakkar
jo har dam kap-kap hotii ho har aan ka.Daaka.D aur thar-thar
paiThii ho sardii rag rag me.n aur barf pighaltaa ho patthar
jha.D-baa.ndh mahaavaT pa.Dtii ho aur tis par lahre.n le le kar
sannaaTaa baav kaa chaltaa ho tab dekh bahaare.n jaa.De kii
har chaar taraf se sardii ho aur sehn khulaa ho koThe kaa
aur tan me.n niimaa shabnam kaa ho jis me.n KHas kaa itr lagaa
chhi.Dkaav hu.aa ho paanii kaa aur KHuub pala.ng bhii ho bhiigaa
haatho.n me.n piyaala sharbat kaa ho aage ik farraash kha.Daa
farraash bhii pa.nkhaa jhaltaa ho tab dekh bahaare.n jaa.De kii
jab aisii sardii ho ai dil tab roz maze kii ghaate.n ho.n
kuchh narm bichhaune maKHmal ke kuchh aish kii lambii raate.n ho.n
mahbuub gale se lipTaa ho aur kuhnii, chuTkii, laate.n ho.n
kuchh bose milte jaate ho.n kuchh miiThii miiThii baate.n ho.n
dil aish-o-tarab me.n paltaa ho tab dekh bahaare.n jaa.De kii
ho farsh bichhaa Gaaliicho.n kaa aur parde chhoTe ho.n aa kar
ik garm a.ngiiThii jaltii ho aur sham.a ho raushan aur tis par
vo dilbar, shoKH, parii, chanchal, hai dhuum machii jis kii ghar ghar
resham kii narm nihaalii par sau naaz-o-adaa se ha.ns ha.ns kar
pahluu ke biich machaltaa ho tab dekh bahaare.n jaa.De kii
tarkiib banii ho majlis kii aur kaafir naachne vaale ho.n
mu.nh un ke chaa.nd ke Tuk.De ho.n tan un ke ruu.ii ke gaale ho.n
poshaake.n naazuk ra.ngo.n kii aur o.Dhe shaal do-shaale ho.n
kuchh naach aur rang kii dhuume.n ho.n aish me.n ham matvaale ho.n
piyaale par pyaala chaltaa ho tab dekh bahaare.n jaa.De kii
har ek makaa.n ho KHalvat kaa aur aish kii sab tayyaarii ho
vo jaan ki jis se jii Gash ho sau naaz se aa jhankaarii ho
dil dekh 'naziir' us kii chhab ko har aan adaa par vaarii ho
sab aish muhayyaa ho aa kar jis jis armaan kii baaii ho
jab sab armaan nikaltaa ho tab dekh bahaare.n jaa.De kii

Nazeer Akbarabadi
Nazm

muhaqqiq

ye jo ik hazrat chale aate hai.n goristaan se
ye na samjhe.n aap hai.n be-zaar apnii jaan se
aap ko yuu.nhii hai aasaar-e-qadiima se lagaav
jis tarah chuunaa Dalii, katthe ko nisbat paan se
aap ko qabro.n se ulfat ishq viiraane se hai
aap ghabraate hai.n jiite-jaagte insaan se
ko.ii kitnaa hii ba.Daa ho falsafii shaa.er adiib
umr bhar is se rahaa karte hai.n aap anjaan se
haa.n magar jaise hii paa jaataa hai be-chaara vafaat
aap us ko chaahne lagte hai.n jii se jaan se
suu.nghte hai.n der tak marhuum kii KHaak-e-lahad
phir ye farmaate hai.n uTh kar aalimaana shaan se
tuul-o-arz-e-qabr se ye saaf chaltaa hai pataa
gorkan aa.e the atraaf-e-balochistan se
ye thaa ik ruKH saahib-e-tahqiiq kii tasviir kaa
duusraa ruKH bhii bayaa.n kartaa huu.n, suniye dhyaan se
hai.n ba-zom-e-KHud muhaqqiq aap hindostaan ke
aap ne nuqte gine hai.n 'miir' ke diivaan ke
kaaTte hai.n suut ko tahqiiq ke itnaa mahiin
aap ke aage jolaahe maat hai.n iiraan ke
zer-e-tahqiiq aap ke rahte hai.n ye sab mas.ale
kis qadar chuuhe pale the ghar me.n 'momin'-KHaan ke
paa.nch baj kar paa.nch par yaa paa.nch baj kar saat par
'daaG' ne to.Daa thaa dam zaanuu pe munnii-jaan ke
'rind' ne ik bevafaa ke ishq me.n khaa.ii thii jo
vo chhurii ke zaKHm the yaa ghaav the kirpaan ke
dhun hai ye saabit kare.n, dillii thaa 'miltan' kaa vatan
aur 'saudaa' ke chachaa butcher the inglistaan ke
al-Garaz rahtii hai roz o shab yahii bas ek fikr
ko.ii gul-dasta utaare.n taaq se nisyaan ke

Raza Naqvi Vahi
Nazm

ye basti meri basti hai

ajab kirdaar thaa usmaan baabaa kaa
har ik bachcha thaa us kaa sar-cha.Dhaa vo chaahe jis kaa ho
sakiina maarvii se le ke
vo galiyo.n me.n jhaa.Duu dene vaale
apne joseph daas kaa la.Dkaa talak us kaa chahiitaa thaa
ajab fihrist thii us kii ki us fihrist me.n ko.ii
na goraa thaa na kaalaa thaa na uu.nchaa thaa na niichaa thaa

Ishrat Afreen
Nazm

matam-e-nim-shab

tumhaaraa kyaa hogaa mere baGair
meraa kyaa hogaa tere baGair
mai.n to soch bhii nahii.n saktaa
ki to mere jiite-jii mar jaa.e
aur na ye soch saktaa huu.n
ki to kaise ro.egii
agar mai.n tum se pahle mar gayaa
ham kitne be-bas aur akele hai.n
kyaa ye mumkin nahii.n ki ham apnii jaane.n ik hii qaalib me.n samo le.n
taaki man-o-tuu kaa jhag.Daa hii miT jaa.e
ham ek hii shaaKH ke do phuul hai.n
hamaaraa mazaaq aur mizaaj ek hai
hamaaraa lutf-e-badan ek hai
hamaaraa sachchaa man ek hai
to phir ham judaa kyuu.n ho jaa.e.n
ko.ii raasta nahii.n kyaa
ko.ii chaara nahii.n kyaa
aisii ko.ii suurat banaa
ki ham do dilo.n ko dha.Daktaa
aur dino.n ko chamaktaa rakh sake.n
aur phir
mai.n shahr-dar-shahr jaagtaa phiruu.n
kuucha-o-baazaar me.n bhaagtaa phiruu.n
aur terii aavaaz hamesha aasmaa.n kii bulandiyo.n se
utartii rahe aur zamiin ko jagaatii rahe
aur mai.n mohabbat ke saagar par suro.n kii darshaa karuu.n
jism kitnaa nahiif hai
aur ham is liye is qaalib me.n Dhaale ga.e
ki fanaa kii lazzat se aashnaa ho jaa.e.n
mai.n maut ke baare me.n kuchh ziyaada hii sochtaa huu.n
jab terii saa.nse.n mere shaano.n par dastak nahii.n detii.n
to mai.n kaa.np uThtaa huu.n
mai.n maut ke sukuut se Dartaa huu.n
magar vo gha.Dii aa.egii
jab ham me.n se ek pahle zamiin mai.n utregaa
sausan ke safed aur kaasnii phuulo.n kii chaadar o.Dhe
har taraf se rone kii aavaaz aa.egii
phir KHaamoshii hogii
sukuut hogaa
aur qabr me.n sukuut achchhaa lagegaa
aur qabr se baahar jise sukuut bardaasht karne kii sazaa milegii
is kii haalat kitnii bhayaanak hogii
ab tuu hii bataa kyaa kare.n
kitnii mushkil suurat-e-haal hai
ki tere gudaaz badan ke lams se aur
tere lafzo.n kii khan-khanaahaT se hii
mai.n terii mohabbat ko samajh saktaa huu.n
badan se pare
sarhad-e-idraak ke us paar
mai.n tum tak rasaa.ii paane se qaasir huu.n
aur jab jism kaa ye rishta TuuT jaa.egaa
to jahaa.n ham us vaqt soch me.n gum hai.n
vahaa.n ek KHaalii pi.njra hogaa

Farooq Nazki
Nazm

mere pas kya kuchh nahin

mere paas raato.n kii taariikii me.n
khilne vaale phuul hai.n
aur be-KHvaabii
dino.n kii murjhaa.ii hu.ii raushnii hai
aur biinaa.ii
mere paas lauT jaane ko ek maazii hai
aur yaad...
mere paas masruufiyat kii tamaam tar ra.ngaa-ra.ngii hai
aur be-ma.anaviyat
aur in sab se pare khulne vaalii aa.nkh
mai.n aasmaa.n ko o.Dh kar chaltaa
aur zamiin ko bichhaunaa kartaa huu.n
jahaa.n mai.n huu.n
vahaa.n abdiyat apnii girhe.n kholtii hai
ja.ngal jhuumte hai.n
baadal baraste hai.n
mor naachte hai.n
mere siine me.n ek samundar ne panaah le rakkhii hai
mai.n apnii aag me.n jaltaa
apnii baarisho.n me.n nahaataa huu.n
merii aavaaz me.n
bahut sii aavaazo.n ne ghar kar rakkhaa hai
aur meraa libaas
bahut sii dhajjiyo.n ko jo.D kar tayyaar kiyaa gayaa hai
merii aa.nkho.n me.n
ek girte hu.e shahr kaa saaraa malba hai
aur ek mustaqil intizaar
aur aa.nsuu
aur in aa.nsu.o.n se phuul khilte hai.n
taalaab bante hai.n
jin me.n parinde nahaate hai.n
ha.nste aur KHvaab dekhte hai.n
mere paas
duniyaa ko sunaane ke liye kuchh giit hai.n
aur bataane ke liye kuchh baate.n
mai.n rad kiye jaane kii lazzat se aashnaa huu.n
aur paziiraa.ii kii dil-nashii.n muskuraahaT se
bharaa rahtaa huu.n
mere paas
ek aashiq kii vaaraftagii
dar-guzar aur be-niyaazii hai
tumhaarii is duniyaa me.n
mere paas kyaa kuchh nahii.n hai
vaqt aur tum par iKHtiyaar ke sivaa?

Abrar Ahmad
Nazm

wo kamra yaad aata hai

mai.n jab bhii
zindagii kii chilchilaatii dhuup me.n tap kar
mai.n jab bhii
duusro.n ke aur apne jhuuT se thak kar
mai.n sab se la.D ke KHud se haar ke
jab bhii us ek kamre me.n jaataa thaa
vo halke aur gahre kattha.ii ra.ngo.n kaa ik kamra
vo behad mehrbaa.n kamra
jo apnii narm muTThii me.n mujhe aise chhupaa letaa thaa
jaise ko.ii maa.n
bachche ko aa.nchal me.n chhupaa le
pyaar se Daa.nTe
ye kyaa aadat hai
jaltii dopahar me.n maare maare ghuumte ho tum
vo kamra yaad aataa hai
dabiiz aur KHaasaa bhaarii
kuchh zaraa mushkil se khulne vaalaa vo shiisham kaa darvaaza
ki jaise ko.ii akkha.D baap
apne khurdure siine me.n
shafqat ke samundar ko chhupaa.e ho
vo kursii
aur us ke saath vo ju.Dvaa.n bahan us kii
vo dono.n
dost thii.n merii
vo ik gustaaKH mu.nh-phaT aa.iina
jo dil kaa achchhaa thaa
vo be-ha.ngam sii almaarii
jo kone me.n kha.Dii
ik buu.Dhii annaa kii tarah
aa.iine ko tambiih kartii thii
vo ik gul-daan
nanhaa saa
bahut shaitaan
un dino.n pe ha.nstaa thaa
dariicha
yaa zehaanat se bharii ik muskuraahaT
aur dariiche par jhukii vo bel
ko.ii sabz sargoshii
kitaabe.n
taaq me.n aur shelf par
sanjiida ustaanii banii baiThii.n
magar sab muntazir is baat kii
mai.n un se kuchh puuchhuu.n
sirhaane
nii.nd kaa saathii
thakan kaa chaara-gar
vo narm-dil takiya
mai.n jis kii god me.n sar rakh ke
chhat ko dekhtaa thaa
chhat kii ka.Diyo.n me.n
na jaane kitne afsaano.n kii ka.Diyaa.n thii.n
vo chhoTii mez par
aur saamne diivaar par
aavezaa.n tasviire.n
mujhe apnaa.iyat se aur yaqii.n se dekhtii thii.n
muskuraatii thii.n
unhe.n shak bhii nahii.n thaa
ek din
mai.n un ko aise chho.D jaa.uu.ngaa
mai.n ik din yuu.n bhii jaa.uu.ngaa
ki phir vaapas na aa.uu.ngaa

Javed Akhtar
Nazm

chauraha

mire siine ke jangal se
ka.ii raste nikalte hai.n
yahaa.n se ek pagDanDii KHat-e-taariik par chaltii
shu’uurii laa-shu'uurii sarhado.n ke paar jaatii hai
kabhii us samt mat jaanaa
vahaa.n par azhdahe rahte hai.n maazii ke
nigal lete hai.n aane vaale raushan din
yahii.n se ek chamkiilii chakaa-chau.ndii sa.Dak duniyaa ko jaatii hai
havas range ishaaro.n se bulaatii hai
udhar ko mat chalii jaanaa
vahaa.n sab bhe.Diye baiThe hai.n
khaa jaate hai.n KHvaabo.n aur ummiido.n ke naazuk tan
yahaa.n se uu.nchaa niichaa raasta mu.D kar
hisaabii soch kii jaanib nikaltaa hai
vahaa.n suud-o-ziyaa.n ke anginat bichchhuu hai.n
Das lete hai.n jazbo.n ko

Shahzad Nayyar
Nazm

maut

kaun aavaara havaa.o.n kaa subuk-baar hujuum
aah ehsaas kii zanjiir garaa.n TuuT ga.ii
aur sarmaaya-e-anfaas pareshaa.n na rahaa
mere siine me.n ulajhne lagii fariyaad mirii
phir nigaaho.n pe uma.nD aayaa hai taariik dhu.aa.n
TimTimaanaa hai mire saath ye maayuus charaaG
aaj miltaa nahii.n afsos pata.ngo.n kaa nishaa.n
mere siine me.n ulajhne lagii fariyaad mirii
TuuT kar rah ga.ii anfaas kii zanjiir-e-giraa.n
to.D Daalegaa ye kambaKHt makaa.n kii diivaar
aur mai.n dab ke isii Dher me.n rah jaa.uu.ngaa
jii ulajhtaa hai mirii jaan pe ban jaa.egii
thak gayaa aaj shikaarii kii kamaa.n TuuT ga.ii
lauT aayaa huu.n bahut duur se KHaalii haatho.n
aaj ummiid kaa din biit gayaa shaam hu.ii
mai.n ne chaahaa bhii magar tum se mohabbat na hu.ii
ki chuke ab to KHudaa ke liye KHaamosh raho
ek mauhuum sii KHvaahish thii falak chhuune kii
za.ng-aaluud mohabbat ko tujhe sau.np diyaa
sard haatho.n se mirii jaan mire ho.nT na sii
gar kabhii lauT ke aa jaa.e vahii saa.nvlii raat
KHushk aa.nkho.n me.n jhalak aa.e na be-suud namii
zalzala uf ye dhamaakaa ye musalsal dastak
be-amaa.n raat kabhii KHatm bhii hogii ki nahii.n
uf ye maGmuum fazaa.o.n kaa alamnaak sukuut
mere siine me.n dabii jaatii hai aavaaz mirii
tiirgii uf ye dhu.ndlakaa mire nazdiik na aa
ye mire haath pe jaltii hu.ii kyaa chiiz girii
aaj is ashk-e-nadaamat kaa ko.ii mol nahii.n
aah ehsaas kii zanjiir-e-giraa.n TuuT ga.ii
aur ye merii mohabbat bhii tujhe jo hai aziiz
kal ye maazii ke ghane bojh me.n dab jaa.egii
kaun aayaa hai zaraa ek nazar dekh to lo
kyaa KHabar vaqt dabe paa.nv chalaa aayaa ho
zalzala uf ye dhamaakaa ye musalsal dastak
khaTkhaTaataa hai ko.ii der se darvaaze ko
uf ye maGmuum fazaao.n kaa alamnaak sukuut
kaun aayaa hai zaraa ek nazar dekh to lo
to.D Daalegaa ye kambaKHt makaa.n kii diivaar
aur mai.n dab ke isii Dher me.n rah jaa.uu.ngaa

Akhtarul Iman
Nazm

KHud-gharaz dost

dostii giida.D se thii ik uu.nT kii
rahte the jangal me.n dono.n saath hii
uu.nT ne giida.D se ik din yuu.n kahaa
khet hai us paar naddii ke haraa
neshkar jaa kar vahaa.n kuchh khaa.e.nge
peT bhar kar khet se phir aa.e.nge
uu.nT ne ye sun ke giida.D se kahaa
is se behtar baat ho saktii hai kyaa
phir vahaa.n se dono.n mil kar chal diye
aa ke poh.nche jab kinaare nahr ke
piiTh par baiThaa thaa giida.D uu.nT kii
is tarah dono.n ne naddii paar kii
khet me.n aa.e vo baaham yak-digar
so rahaa thaa us kaa maalik be-KHabar
khet me.n be-KHauf ho kar ghus ga.e
neshkar ko to.D kar khaate rahe
peT us giida.D kaa jis dam bhar gayaa
uu.nT se ho kar muKHaatib yuu.n kahaa
ye mirii 'aadat hai achchhii yaa burii
peT bhar jaataa hai meraa jis gha.Dii
KHuub chillaataa huu.n jab hotaa huu.n sair
chiiKHne me.n phir nahii.n kartaa huu.n der
kii KHushaamad uu.nT ne aur yuu.n kahaa
peT bhar jaane de meraa Thahr jaa
baat giida.D ne na maanii ziinhaar
KHuub chillaane lagaa vo naabakaar
us ne jab naa're lagaa.e zor ke
jaag uTThaa dahqaa.n apnii nii.nd se
ek lak.Dii le ke dau.Daa naa-gahaa.n
us taraf the uu.nT aur giida.D jahaa.n
us ko jab giida.D ne dekhaa dau.Dtaa
ho gayaa Gaa.eb na Thahraa ik zaraa
rah gayaa jab uu.nT akelaa be-KHabar
lii ga.ii phir us kii DanDo.n se KHabar
KHuub hii piTtaa hu.aa naadaa.n Gariib
aa ke pahu.nchaa jab ki naddii ke qariib
us ne dekhaa us kaa yaar-e-bevafaa
hai vahaa.n pahle hii se aa kar kha.Daa
dekh kar vo uu.nT ko kahne lagaa
shukr haq kaa bach ga.ii jaan ai chachaa
tum ko Gam karnaa na hargiz chaahiye
luu.ngaa badla mai.n KHud us kambaKHt se
kuchh na bolaa uu.nT bas KHaamosh thaa
aur us ko piiTh par apnii biThaa
biich me.n naddii ke jab vo aa gayaa
ham-safar giida.D se yuu.n kahne lagaa
dil me.n hai Gota lagaa.uu.n is gha.Dii
jaante hai.n sab ye 'aadat hai mirii
ye sunaa to hosh us ke u.D ga.e
phir KHushaamad se kahaa yuu.n uu.nT se
mujh ko tum pahu.nchaa do naddii se udhar
chaahe phir Gote lagaa.o jis qadar
baat giida.D kii na maanii uu.nT ne
biich nadii me.n lagaa vo Duubne
bah gayaa paanii me.n giida.D chiiKHtaa
uu.nT ne is tarh badla le liyaa
tum ne dekhaa kis tarah hai uu.nT kii
be-hayaa giida.D ke haatho.n gat banii
KHud-Garaz kii dostii achchhii nahii.n
vo pha.nsaa degaa tumhe.n hazrat kahii.n
tum ko 'faizii' yaad rakhnaa chaahiye
dosto.n se aise bachnaa chaahiye

Faizi Fatehabadi
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

madrasa ali-gaDh

KHudaa alii-ga.Dh ke madrase ko tamaam amraaz se shifaa de
bhare hu.e hai.n raiis-zaade amiir-zaade shariif-zaade
latiif o KHush-vaz.a chust o chaalaak o saaf o paakiiza shaad-o-KHurram
tabii.ato.n me.n hai in kii jaudat dilo.n me.n in ke hai.n nek iraade
kamaal-e-mehnat se pa.Dh rahe hai.n kamaal-e-Gairat se pa.Dh rahe hai.n
savaar mashriq raah me.n hai.n to maGribii raah me.n piyaade
har ik hai in me.n kaa be-shak aisaa ki aap use chaahte hai.n jaisaa
dikhaave mahfil me.n qadd-e-ra.anaa jo aap aa.e.n to sar jhukaa de
faqiir maa.nge to saaf kah de.n ki tuu hai mazbuut jaa kamaa khaa
qubuul farmaa.e.n aap daavat to apnaa sarmaaya kul khilaa de
buto.n se in ko nahii.n lagaavaT miso.n kii lete nahii.n vo aahaT
tamaam quvvat hai sarf-e-KHvaandan nazar ke bhole hai.n dil ke saade
nazar bhii aa.e jo zulf-e-pechaa.n to samjhe.n ye ko.ii policy hai
electric light us ko samjhe.n jo barq-vash ko.ii kuude
nikalte hai.n kar ke Gol-bandii ba-naam-e-tahziib o dard-mandii
ye kah ke lete hai.n sab se chande jo tum hame.n do tumhe.n KHudaa de
unhe.n isii baat par yaqii.n hai ki bas yahii asl kaar-e-dii.n hai
isii se hogaa faroG-e-qaumii isii se chamke.nge baap daade
makaan-e-college ke sab makii.n hai.n abhii unhe.n tajrabe nahii.n hai.n
KHabar nahii.n hai ki aage chal kar hai kaisii manzil hai.n kaise jaade
dilo.n me.n in ke hai.n nuur-e-iimaa.n qavii nahii.n hai magar nigahbaa.n
havaa-e-mantiq adaa-e-tiflii ye sham.a aisaa na ho bujhaa de
fareb de kar nikaale matlab sikhaa.e tahqiir-e-diin-o-mazhab
miTaa de aaKHir ko diin-o-maz.hab numuud-e-zaatii ko go ba.Dhaa de
yahii bas 'akbar' kii iltijaa hai janaab baarii me.n ye du.aa hai
uluum o hikmat kaa dars in ko professor de.n samajh KHudaa de

Akbar Allahabadi
Nazm

KHabar

mai.n yahii soch rahaa thaa ki sar-e-shaam mujhe
jaate suuraj ke bhii atvaar kuchh aise hii mile
us kaa mu.nh zard thaa ehsaas-e-judaa.ii hogaa
us ne ik badlii kaa mu.nh chuum liyaa chupke se
daf.atan badlii kaa mu.nh surKH hu.aa aur hayaa
dau.Dii KHuu.n ban ke rag-o-pai me.n ki gulnaar hu.ii
us ke daaman pe chhalak uTThe sitaare aa.nsuu
aur suuraj kii tarah KHud bhii vahii.n Duub ga.ii
vahii taare the magar raat ke aKHbaar-farosh
ye KHabar shaam se hii saare falak par pahu.nchii
pahle to laakho.n dariicho.n se nigahbaa.n jhaa.nke
chaa.ndnii chhiTkii to phir chaa.nd ne kii rakhvaalii
sub.h-dam nii.nd ke maate the sabhii ahl-e-falak
suuraj aayaa to kisii ko na rahaa is kaa KHayaal
vahii badlii thii ufuq par vahii unvaan-e-hayaa
dono.n takte rahe mab.huut nigaaho.n se jamaal
phir mohabbat ne kiyaa sabt salaam-e-ra.ngii.n
surKH badlii kaa lahuu dau.D gayaa chaar taraf
dono.n KHush the unhe.n ma.aluum thaa aazaad hai.n vo
un kaa milnaa nahii.n insaa.n kii nigaaho.n kaa hadaf
mai.n ne dekhii hai magar dono.n kii ye gustaaKHii
mai.n KHabar detaa huu.n aKHbaar ko dekho to sahii

Yusuf Zafar
Nazm

autograph

kha.Dii hai.n ye bhii raaste pe ik taraf
bayaaz-e-aarzuu ba-kaf
nazar nazar me.n naa-rasaa parstisho.n kii daastaa.n
laraz rahaa hai dam-ba-dam
kamaan-e-abruvaa.n kaa KHam
ko.ii jab ek naaz-e-be-niyaaz se
kitaabcho.n pe khi.nchtaa chalaa gayaa
Huruuf-e-kaj-taraash kii lakiir sii
to tham ga.ii.n labo.n pe muskuraahaTe.n shariir sii

Majeed Amjad
Nazm

sans KHushbu se ladi jati hai

jab udaasii dar-o-diivaar pe chhaa jaatii hai
dil ke taaro.n me.n kahii.n saat suro.n kii maalaa
ek KHaamosh chhanaake se bikhar jaatii hai
jab mai.n haalaat ke baKHshe hu.e maayuus a.ndhero.n me.n kahii.n duur bhaTak jaatii huu.n
haath ko haath sujhaa.ii nahii.n dene lagtaa
dil kisii zard sitaare kaa savaalii ban kar
ghup a.ndhere me.n kisii raah kii naakaam talab kartaa hai
tab kahii.n KHizr-sifat chaa.nd nikal aataa hai
shaaKH-e-jaa.n par na.ii ummiid kii kaliyaa.n sii mahak uThtii hai.n
saa.ns KHushbuu se ladii jaatii hai
mujh pe chaltaa nahii.n phir ghor a.ndhero.n kaa tilism
ki mujhe us kii uluuhii kirne.n
KHud me.n mahsuur kiye rahtii hai.n
chaa.nd kaa nuur ki mizraab kii maanind mirii zaat ke sur
mujh ko lauTaataa hai ik pyaar bharii lai ke saath
mai.n bhii ha.nstii hu.ii duniyaa me.n palaT aatii huu.n
in palaTte hu.e lamhaat kaa e.azaaz mire chaa.nd tujhe haasil hai
terii din-raat kii gardish hai mirii zaat ke gird
aur ik terii kashish se mire dil dariyaa me.n
har-dam ik madd-o-jazar rahtaa hai
tujh ko detaa hai tirii zaat kaa iiqaan agar meraa vajuud
mai.n bhii tujh se tirii kirne.n le kar
apne qadmo.n ko jamaa paatii huu.n
haa.n tujhe rabb-e-azal
taa-abad yuu.n hii mire sar pe chamaktaa rakkhe
merii maa.n
umr-e-ravaa.n kaa ehsaas

Saima Esma
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now