Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "KHasaara"

Nazm MATCHES FOR "KHasaara"

Nazm

mazafat

aa.nsuu.o.n kii bastii me.n
rasne-basne vaalo.n ko
kab ko.ii Garaz is se
kaarobaar-e-hastii me.n
nafaa kyaa KHasaara kyaa
umr ke KHazaane me.n
besh-o-kam kaa yaaraa kyaa

Ishrat Afreen
Nazm

makashafa

suno agar tum KHatm karnaa hii chaahte ho
to aadmii ko aadmii se karne vaale aadmii ko KHatm kar do
us se vo sab kuchh chhiin lo
jo tumhaare paas bahut pahle bhii nahii.n thaa
aur baa'd me.n bhii nahii.n hai
jab aag aur barf kii taasiir ek hii hai
to dono.n kii alag alag shakl
tumhe.n kyaa de saktii hai
yaa tum is se kyaa le sakte ho
sivaa.e is ke ki tum aag ko KHatm kar do
aur barf ko bhii KHatm kar do
magar jo aag aur barf tumhaarii ruuh me.n kahii.n rakhii hu.ii thii
yaa to tum ne kabhii lams nahii.n kiyaa
yaa jo aadmii ruuh me.n rakhaa hu.aa thaa
use to tum ne kabhii nahii.n chhu.aa
phir maaluum nahii.n us kaa kaun saa jism
tumhaare haath lagaa
ki tum ne us ke Tuk.De Tuk.De kar ke
use rishto.n me.n taqsiim kar diyaa
maa.n baap beTaa beTii bhaa.ii bahan
aur un par hukuumat karne vaale
badtariin mahkuum bhii tum hii nikle
ya.anii kisii maa.n baap ne
apne beTe aur beTii kii aag ko janm de ke
kabhii is par gha.Dii-bhar sar rakh ke sonaa chaahaa
to use sone nahii.n diyaa gayaa
phir jab bhaa.ii bahan alag alag
apnii aag aur barf kii tijaarat ko nikle
to is me.n aadmii hii shaamil nahii.n thaa
yaa shaayad aadmii kaa hii naam KHasaara rakhaa gayaa
phir bhii jab tumhaaraa bisaat bhar honaa hii
tumhaaraa muqaddar Thahraa
to yaad karo ki vo tum hii the yaa tum nahii.n the
yaa jise KHudaa ke aaKHirii javaab me.n
aavaaz dii ga.ii pukaaraa gayaa
is se ba.Dh ke bhii ko.ii dukh kyaa ho saktaa hai ki
bichh.Dii hu.ii zindagii ke bichh.De hu.e pe.D yaad na rahe.n
phir bhii zaraa mu.D ke dekho to sahii
ki kahii.n suuraj savaa-neze pe to nahii.n aa chukaa
kaa.enaat kahaa.n hai
zamiin to kaa.enaat se KHaalii hai
binaa kaa.enaat ke bhii ko.ii zamiin zamiin ho saktii hai
binaa suuraj ke bhii ko.ii dhuup dhuup ho saktii hai
binaa chaa.nd ke bhii ko.ii chaa.ndnii chaa.ndnii ho saktii hai
ya.anii ko.ii din din nahii.n
ya.anii ko.ii raat raat nahii.n
ya.anii ko.ii aab-o-havaa aab-o-havaa nahii.n
ya.anii ko.ii mausam mausam nahii.n
ya.anii zamiin par zamiin hii nahii.n aur bahut kuchh hai
agar darvaaza ko kholne aur band karne vaalaa hii na ho to
ko.ii khulaa darvaaza band darvaaza se bhii ziyaada band hotaa hai
ko.ii shahr chaaro.n taraf se khulaa ho aur band bhii ho
to samajh lo ki is me.n rahne vaale rahte hu.e bhii nahii.n rahte
is me.n ko.ii maKHluuq rahtii hai
zamiin ke kisii mulk me.n bhii taariiKH kii viiraanii ke sivaa
ko.ii aabaad nahii.n
jab aadmii ke mu.nh aa.nkh naak aur kaan ke hote hu.e bhii
aadmii kii shakl nahii.n bantii
to ko.ii aavaaz aavaaz hote hu.e bhii aavaaz kaise ho saktii hai
to bolte hu.e bhii kaise bol saktaa hai
to ko.ii dekhte hu.e bhii kaise dekh saktaa hai
to ko.ii suu.nghte hu.e bhii kaise suu.ngh saktaa hai
to ko.ii sunte hu.e bhii kaise sun saktaa hai
suno ummiid to maut ke haath me.n ek kaam hai
jise vo tumhaarii gardan me.n shikanja kar ke aage hii aage chaltii chalii jaatii hai
aur tum ke us piichhe kashaa.n kashaa.n khi.nche chale jaate ho
magar vo duniyaa to ab kahii.n nahii.n rahii
vo to tumhaarii zamiin me.n yaa tum me.n kahii.n gum ho ga.ii

Ahmad Hamesh
Nazm

nazm

mai.n raahe.n mo.D to laa.uu.n
sitaare to.D to laa.uu.n
magar fursat nahii.n ab ke
bahut se kaam baaqii hai.n
bahut se qarz hai.n aise
jo mere naam baaqii hai.n
abhii kitne fasaano.n ke
kahii.n aaGaaz hai.n baaqii
kahii.n anjaam baaqii hai.n
tumhe.n bhii to mohabbat hai
balaa kaa 'ishq hai to phir
KHaraaj-e-vasl na maa.ngo
mire mahjuur lamho.n se
ba.De majbuur lamho.n se
balaa kaa 'ishq hai to phir
malaal-e-dard kyaa karnaa
giraa.n-baarii se kyaa Darnaa
KHasaare chho.D do tum bhii
shumaare chho.D do tum bhii
ki mere qarz jitne hai.n
qazaa hai.n farz jitne hai.n
zaraa un kii adaa.ii me.n
sahaaraa to bano tum bhii
KHasaara to saho tum bhii
sitaare to.D laane kii
yaa raste mo.D laane kii
giraa.n-baarii uThaa.o ab
nahii.n to phir nishaat-e-jaa.n
mujhe tum bhuul jaa.o ab

Zaheer Mushtaq Rana
Nazm

atlantic city

zamiin-e-nuur o naGma par
KHudaa-e-ra.ng ke bikhre hu.e jalva.o.n ko pahchaane.n
use samjhe.n. use jaane.n
yaqii.n aa jaa.e to maane.n
yahaa.n to kahkashaa.n muTThii me.n hai
laal-o-javaahir pairahan par hai.n shu.aa.o.n ke ka.ii dhabbe har ik ujle badan par hai.n
yahaa.n ra.ngii.n mashiine.n daa.ero.n me.n jhuk ke miltii hai.n
kisii se ruuTh jaate hai.n kisii ke saath chalte hai.n
yahaa.n ke saamrii goyaa.ii le lete hai.n
aur palko.n pe hairat ke dariiche khol dete hai.n
yahaa.n har naf.a ke KHaane me.n poshiida KHasaara hai
fusuu.n kam ho to phir baahar kaa har manzar hamaaraa hai
jise ham chaa.nd samjhe hai.n bhaTaktaa saa sitaara hai
yahii suuraj se jiitaa hai yahii jugnuu se haaraa hai
ye fitrat kaa ishaara hai
chalo tanviir-shaah! uTTho

Ghulam Mohammad Qasir
Nazm

ek nazm sirf tumhaare liye

mujh me.n aatish jo chhupii hai use bha.Dkaane me.n
vasl se ziyaada tire hijr kii KHvaahish hai mujhe
jism aur jaan se aage bhii ko.ii duniyaa hai
aur un raaho.n me.n tanhaa hii bhaTaknaa hai mujhe
aur un raaho.n me.n tanhaa hii bhaTaknaa hai mujhe
tujh ko tasKHiir-e-badan kii hii rahii hai KHvaahish
aur mai.n ruuh ke saude ke liye sochtii huu.n
tujh ko maaluum hai jo shai bhii mayassar aa jaa.e
us kii phir qadr kahaa.n rahtii hai
mai.n tujhe sau.np duu.n KHud ko to KHasaara hai bahut
Duubne ke liye aa.nkho.n kaa kinaara hai bahut
kyaa ye mumkin hai ki tuu rang me.n bhii rang le apne
aur daaman pe mire daaG bhii ko.ii na lage
vasl ke baad to hairat me.n kamii aatii hai
phir junuu.n-KHezii kii shiddat me.n kamii aatii hai
hairat-e-ishq kii gum-naam musaafir huu.n mujhe
aisaa radd kar mirii hairat me.n izaafa ho jaa.e
aur is ishq kii shiddat me.n izaafa ho jaa.e

Tasneem Abidi
Nazm

mudawa ho nahin sakta

mudaavaa ho nahii.n saktaa
dil-e-saada
ab is aatish-numaa ke saamne ijz-e-mohabbat kaa i.aada ho nahii.n saktaa
ye kyaa kam hai
ki apne aap tak ko bhuul kar
us husn-e-KHud-aagaah kii KHaatir na jaane kitne roz-o-shab the
jo ham ne ginvaa.e the
bahut saare dino.n kii gaTh.Diyaa.n thii.n
jin ko kholaa tak na thaa ham ne
bas ik tah-KHaana-e-umr-e-guzishta me.n
ham in sab gaTh.Diyo.n ko Dher karte jaa rahe the un ghanii
palko.n kii ThanDii chhaa.nv ko mahsuus karne kii tamannaa me.n hame.n
ye dhyaan kab thaa kaun sii gaTh.Dii me.n kitnaa KHuubsuurat din
ba.ndhaa hai aur us be-daam din kii sub.h-saahir kis havaa
ke tahat se utrii hai kin phuulo.n kii KHushbuu zeb-e-tan
kar ke savaad-e-shab se jhaa.nkii hai
lab-o-ruKHsaar ko qaus-e-quzah ke rang dene kii
abas KHvaahish me.n ham ko dhyaan kab thaa kaun sii gaTh.Dii
mai.n kis din kii dopahar apne tilism-aasaar raazo.n ko sunahrii
dhuup ke thal me.n jagaatii hai
chhato.n par suukhtii mircho.n
galii me.n guu.njtii asraar me.n Duubii hu.ii sii KHaamushii me.n
kaun se lamhe sulagte hai.n
hame.n ye dhyaan kab tak
us tamannaa-zaar ke pairaahan-e-sad-ra.ng ke andar bahaktii garm KHushbuu
ke KHiraam-e-taaza me.n kho.e hu.o.n ko dhyaan kab thaa kaun
se din kii suhaanii shaam kin ufuqo.n ko rotii hai
bahut saare dukho.n ko darmiyaan
jo ek sham-e-aarzuu thii us ko lo ke saamne jhuk kar ham us
be-mehr chashm-e-munharif me.n bas zaraa sii der ko ik harf kii ta.abiir pa.Dhnaa
chaahte the aur KHamiir-e-ishq me.n guu.ndhe hu.e ik KHvaab kaa iz.haar
karnaa chaahte the aur us saarii kahaanii me.n hame.n
ye dhyaan kab thaa kaun sii gaTh.Dii me.n kis din
kaa janaaza hai
abhii tah-KHaana-e-umr-e-guzashta kaa ye darvaaza khulaa
to dhyaan aayaa hai ki itnii Dher saarii umr miTTii me.n
milaa kar jo KHasaara haath aayaa hai dobaara ho nahii.n saktaa
mudaavaa ho nahii.n saktaa
dil-e-saada
ab is aatish-numaa ke saamne ijz-e-mohabbat kaa i.aada ho nahii.n saktaa

Ayub Khawar
Nazm

irfan-gazidgi

mai.n ne apne andar andar
jitnaa jo kuchh bun rakkhaa thaa
mai.n ne apne aap se apne baare me.n
jo kuchh bhii sun rakkhaa thaa
mai.n ne apne aap ko jitnaa jaisaa farz kiyaa thaa
mai.n us se bhii aur sivaa thii
miTTii thii mai.n
mai.n paanii thii
aag bhii thii jitnii mai.n havaa thii
lekin apnii sab jihato.n se
muta.aarif ho jaanaa KHud ko kitnaa mah.ngaa pa.D saktaa hai
dekh rahii huu.n
muu.nd ke aa.nkhe.n sakhii
ki irfaa.n-gaziida aa.nkh ne dekhaa hai
ik abadii abadii KHasaara

Azra Parveen
Nazm

KHasara sare jiwan ka

abhii mat chhe.Dnaa mujh ko
abhii har zaKHm kaarii hai
abhii us kii judaa.ii kii faqat ajrak utaarii hai
abhii sadme uThaane hai.n
ka.ii lamhe mohabbat ke aziyyat me.n bitaane hai.n
mire har zaKHm ko hamdam abhii naasuur honaa hai
ba.Dii lambii masaafat hai
thakan se chuur honaa hai
abhii palko.n ko chuume.nge tumhaarii yaad ke jugnuu
tumhaare qurb kii KHushbuu tumhaarii baat kaa jaaduu
abhii kuchh bhii nahii.n big.Daa
abhii kuchh bhii nahii.n badlaa
abhii to saa.ns kii lai par har ik KHvaahish machaltii hai
abhii to mausam-e-hijraa.n gumaa.n kii ibtidaa me.n hai
abhii band-e-qabaa me.n hai
abhii to naa-tamaamii kaa samundar paar karnaa hai
abhii KHud se ulajhnaa hai
abhii KHud se mukarnaa hai
abhii hamraah rakhnaa hai KHasaaraa saare jiivan kaa
shajar dil me.n ugaanaa hai
ziyaa.n ke zard saavan kaa

Naheed Azmi
Nazm

sawal

haath dekhte ho tum
aur mujh se kahte ho
vaah kyaa muqaddar hai
aur umr bhii lambii
bas zaraa KHasaara hai
naam teraa le ke mai.n
KHud se puuchhtii huu.n ye
ba.ad tere jaane ke
aur kyaa KHasaara ye
umr chaahe lambii ho
maut ke liye aaKHir
saa.ns ruknaa laazim hai

Safiya Chaudhry
Nazm

hain KHwab mein hunuz

har ik naf.a jaa.ez nuqsaan ke batn se hai
unho.n ne jo haasil kiyaa vo ziyaada thaa
aur aaKHir shab ke kuchh KHvaab ko jo ga.nvaayaa
vo kam thaa
isii naa-tanaasub husuul-o-KHasaara kaa radd-e-amal hai
ki manzil kii aaGosh me.n bhii
unhe.n sukh nahii.n hai

Zaheer Siddiqui
Nazm

mohabbat aur tijarat

mohabbat aur tijaarat me.n
yahii ik farq baaqii hai
tijaarat kaa munaafa
zar
magar ulfat ke saude me.n
tujhe paane se
par meraa
KHasaaraa
ho gayaa hotaa

Sabeela Inam Siddiqui
Nazm

KHasara

mai.n tujh se milne kii
zid pe aataa to mil bhii letaa
na tere Dere mirriiKH par hai.n
na chaa.nd meraa hasiin maskan
janaab dono.n hai.n KHaak-zaade
janaab dono.n hai.n KHaak-zaade
to KHaak-zaado.n me.n kyaa takabbur
zido.n kii zad me.n jahl me.n lipTe
anaa ke pahiye jab apnii zaato.n ke gird ghuume to jaan paa.e
ham apnii apnii zaruurato.n ke hisaar me.n hai.n
uThaa.e kashkol bebasii kii qataar me.n hai.n
hamaarii taaqat kii markaziyat
hai ek jho.nkaa
havaa kaa jho.nkaa
jo saa.ns ban kar aTak gayaa to zamii.n ke uupar se niiche jaane me.n der kitnii
bas ek lamha
bas ek lamhe kaa khel saaraa
phir is ke baa'd janaab-e-'aalii
faqat KHasaara faqat KHasaara faqat KHasaara

Tariq Sindhi
Nazm

mazafat

chhoTe chhoTe qasbo.n ke
dukh 'ajiib hote hai.n
sukh 'ajiib hote hai.n
aa.nsu.o.n kii bastii me.n
rasne-basne vaalo.n ko
kab ko.ii Garaz is se
kaarobaar-e-hastii me.n
naf' kyaa KHasaaraa kyaa
'umr ke KHazaane me.n
besh-o-kam kaa yaaraa kyaa
un kaa apnaa maslak hai
un kii apnii duniyaa hai
un gharo.n kii chaukhaT par
vaqt baa.ng detaa hai
mu.nh a.ndhere chakkii me.n
KHvaab piise jaate hai.n
chaa.nd sii raso.ii me.n
bartano.n ke aa.iine
dukh ko mu.nh chi.Dhaate hai.n
un gharo.n ke aangan me.n
din shuruu' hotaa hai
KHvaab kaate jaane se
zindagii kii Dorii me.n
sukh piro.e jaane se
aa.nkh ke kaToro.n me.n
Gam samo.e jaane se
mehrbaa.n mashaqqat ke
bojh Dho.e jaane se
din tuluu' hotaa hai
kyaariyo.n kii miTTii me.n
giit jab nahaate hai.n
rang chahchahaate hai.n
saath kii mu.nDero.n par
KHvaab par sukhaate hai.n
bachchiyaa.n KHayaalo.n me.n
apne ghar basaatii hai.n
mom ke gharo.ndo.n me.n
zindagii kii ha.nD-kuliyaa
dhuup se pakaatii hai.n
be-zabaan gu.Diyo.n se
jin kii aa.nkh dhaage kii
jin ke ho.nT resham ke
apne dil kii sab baate.n
baarhaa bataatii hai.n
aur rumuuz jiine ke
aap siikh jaatii hai.n
un gharo.n ke aa.ngan me.n
dopahar utartii hai
ek nannhii suu.ii kii
aa.nkh ke jharoke se
ik kiran ke mokhe se
dhuup ke hinaa.ii haath
tashtarii ba.Dhaate hai.n
chaahato.n ke miiThe rang
zaa.iqo.n ke naadiida
lams chho.D jaate hai.n
chuu.Diyaa.n khanaktii hai.n
haath baat karte hai.n
ang ang ha.nstaa hai
por por ke andar
dil dha.Dakne lagtaa hai
por por rotii hai
o.Dhnii bhigotii hai
KHvaab vo pa.Dosii hai
jis ke ujle kurte kaa
roz ik button TuuTe
dil ki vo mohalla hai
jis ke basne vaalo.n se
roz ik KHushii ruuThe
jaane kitne jismo.n ko
be-riyaa mohabbat kii
aag chaaT jaatii hai
jaane kitne nau-mauluud
KHvaab dafn hote hai.n
dil ke sard-KHaane me.n
jaane kitne rishto.n ko
dafn kar ke chupke se
vaqt ke gunaaho.n par
KHaak Daalii jaatii hai
un udaas galiyo.n me.n
sardiyo.n kii raato.n me.n
duur paar se aate
dil-navaaz giito.n ke
saa.nvle salone bol
chaa.nd ko rulaate hai.n
chaa.nd bholaa-bhaalaa hai
chaa.nd ko ye kyaa maa'luum
zindagii kii nauTankii
yuu.nhii chaltii rahtii hai
muflisii kii raqqaasa
taal par zamaane kii
jaane kitnii sadiyo.n se
ek jaise bolo.n par
raqs kartii rahtii hai
sub.h se zaraa pahle
bebasii ke bistar par
vo jo aa ke Dhahtii hai
bistaro.n ke sab paivand
us ko gudgudaate hai.n
be-sabab ha.nsaate hai.n
be-sabab rulaate hai.n
un galii mohallo.n me.n
raat jab utartii hai
maa.e.n apne bachcho.n ko
loriyaa.n sunaatii hai.n
apnii sard baa.nho.n kaa
paalnaa hilaatii hai.n
KHvaab vo dikhaatii hai.n
afsarii ke shaahii ke
KHvaab kaj-kulaahii ke
chaa.nd aur gulaab un ke
madrase jo jaate hai.n
qamchiyo.n se hotaa hai
bachpane kaa istiqbaal
phuul jaise jismo.n par
bed jab barastii hai
duur tak chaTaa.ii par
ik qataar me.n baiThe
lafz thartharaate hai.n
sab varaq kitaabo.n ke
aise pha.D.pha.Daate hai.n
jaise jaan khi.nchtii ho
un kii dars-gaaho.n me.n
qamchiyaa.n mu'allim hai.n
qamchiyaa.n mudarris hai.n
qamchiyaa.n raTaatii hai.n
sabr achchhii 'aadat hai
sabr aur qanaa'at se
zindagii sa.nvartii hai
un galii mohallo.n kaa
husn kam-suKHan bhii hai
aur bholaa-bhaalaa bhii
haa.n ye kam-suKHan la.Dkaa
bhiigtii maso.n ke saath
ghar se jab nikaltaa hai
'umr kii hade.n saarii
yuu.n phalaa.ng jaataa hai
muflisii havas-pesha
phuul jaise gaalo.n kaa
rang chuus letii hai
bholii-bhaalii baato.n se
ras nicho.D letii hai
aur phir zamaane ke
biich chho.D detii hai
peT be-hayaa dallaal
dar-ba-dar phiraataa hai
sau jatan sikhaataa hai
chhoTe chhoTe qasbo.n me.n
ghar ke saamne baiThii
siidhii-saadii ummiide.n
raah taktii rahtii hai.n
'umre.n biit jaatii hai
kuchh KHabar nahii.n miltii
Daakiyaa jab aataa hai
chaahato.n kii puu.njii me.n
ik raqam ba.Dhaataa hai
aur lauT jaataa hai
siidhii-saadii ummiide.n
ghar se jaane vaalo.n ko
ek jaise lafzo.n kii
bhejtii hai.n sauGaate.n
vaqt buu.Dhaa munshii hai
jis ko KHat kaa sab mazmuun
lafz lafz azbar hai
phir bhii puuchh letaa hai
aur kyaa likhuu.n bolo
phir se ab ke saavan me.n
saa.ibaa.n Tapaktaa hai
tan kii aur ik diivaar
Dhah ga.ii hai ab ke baar
siidhii-saadii ummiide.n
roz-o-shab kii chaukhaT par
'umr kaaT detii hai.n
jism KHaak ho jaa.e
jaan raakh ho jaa.e
peT to jahannum hai
ye javaan rahtaa hai
un kii aa.nkh kaa saavan
chaahe ko.ii mausam ho
mehrbaan rahtaa hai
chhoTe chhoTe qasbo.n ke
dukh 'ajiib hote hai.n
sukh 'ajiib hote hai.n

Ishrat Afreen
Nazm

ek bar kaho tum meri ho

kyaa jhag.Daa suud KHasaare kaa
ye kaaj nahii.n banjaare kaa
sab sonaa ruupaa le jaa.e
sab duniyaa, duniyaa le jaa.e
tum ek mujhe bahuterii ho
ik baar kaho tum merii ho

Ibn۔e۔Insha
Nazm

daraKHt-e-zard

hadaf ho.nge tumhaaraa kaun tum kis ke hadaf hoge
na jaane vaqt kii paikaar me.n tum kis taraf hoge
hai ran ye zindagii ik ran jo barpaa lamha lamha hai
hame.n is ran me.n kuchh bhii ho kisii jaanib to honaa hai
so ham bhii is nafas tak hai.n sipaahii ek lashkar ke
hazaaro.n saal se jiite chale aa.e hai.n mar mar ke
shuhuud ik fan hai aur merii adaavat be-fano.n se hai
mirii paikaar azal se
ye 'KHusro' 'miir' 'Gaalib' kaa KHaraaba bechtaa kyaa hai
hamaaraa 'Gaalib'-e-aazam thaa chor aaqa-e-'bedil' kaa
so rizq-e-faKHr ab ham khaa rahe hai.n 'miir'-e-bismil kaa
sidhaarat bhii thaa sharminda ki do-aabe kaa baasii thaa
tumhe.n ma.aluum hai urdu jo hai paalii se niklii hai
vo goyaa us kii hii ik pur-numuu Daalii se niklii hai

Jaun Eliya
Nazm

dard aaega dabe panw

mushta.il ho ke abhii uTThe.nge vahshii saa.e
ye chalaa jaa.egaa rah jaa.e.nge baaqii saa.e
raat-bhar jin se tiraa KHuun-KHaraabaa hogaa
ja.ng Thahrii hai ko.ii khel nahii.n hai ai dil
dushman-e-jaa.n hai.n sabhii saare ke saare qaatil
ye ka.Dii raat bhii ye saa.e bhii tanhaa.ii bhii
dard aur ja.ng me.n kuchh mel nahii.n hai ai dil
laa.o sulgaa.o ko.ii josh-e-Gazab kaa a.ngaar
taish kii aatish-e-jarraar kahaa.n hai laa.o
vo dahaktaa hu.aa gulzaar kahaa.n hai laa.o
jis me.n garmii bhii hai harkat bhii tavaanaa.ii bhii

Faiz Ahmad Faiz
Nazm

ai dil-e-be-KHabar

ai dil-e-be-KHabar
jo havaa jaa chukii ab nahii.n aa.egii
jo shajar TuuT jaataa hai phaltaa nahii.n
vaapsii mausamo.n kaa muqaddar to hai
jo samaa.n biit jaa.e palaTtaa nahii.n
jaane vaale nahii.n lauTte umr bhar
ab kise Dhuu.nDhtaa hai sar-e-rahguzar
ai dil-e-kam-nazar ai mire be-KHabar ai mire ham-safar
vo to KHushbuu thaa agle nagar jaa chukaa
chaa.ndnii thaa hu.aa sarf-e-ra.ng-e-qamar
KHvaab thaa aa.nkh khulte hii ojhal hu.aa
pe.D thaa rut badalte hu.aa be-samar
ai dil-e-be-asar ai mire chaara-gar
ye hai kis ko KHabar!
kab havaa-e-safar kaa ishaara mile!
kab khule.n saahilo.n par safiino.n ke par
kaun jaane kahaa.n manzil-e-mauj hai!
kis jaziire pe hai shaah-zaadii kaa ghar ai mire chaara-gar
ai dil-e-be-KHabar kam-nazar mo'tabar
tuu ki muddat se hai zer-e-baar-e-safar
be-qaraar-e-safar
rail kii be-hunar pTriyo.n kii tarah
aas ke be-samar mausamo.n kii tarah
be-jahat manzilo.n kii masaafat me.n hai
rasta bhuule hu.e rahravo.n kii tarah
chob-e-naar-e-safar
e'tibaar-e-nazar kis gumaa.n par kare.n
ai dil-e-be-basar
ye to saahil pe bhii dekhtii hai bha.nvar
ret me.n kisht kartii hai aab-e-baqaa
kholtii hai havaa.o.n me.n baab-e-asar
tujh ko rakhtii hai ye zebdaar-e-safar be-qaraar-e-safar
ai dil-e-be-hunar
garm saa.nso.n kii vo KHushbu.e.n bhuul jaa
vo chahaktii hu.ii dha.Dkane.n bhuul jaa
bhuul jaa narm ho.nTo.n kii shaadaabiyaa.n
harf-e-iqraar kii lazzate.n bhuul jaa
bhuul jaa vo havaa bhuul jaa vo nagar
kaun jaane kahaa.n raushnii kho ga.ii
luT gayaa hai kahaa.n kaarvaan-e-sahar
ab kahaa.n gesu.o.n ke vo saa.e kahaa.n
us kii aahaT se chamke hu.e baam-o-dar ai dil-e-be-basar
ra.ng-e-aasuudgii ke tamaashe kahaa.n
jhuTpuTaa hai yahaa.n rahguzar rahguzar
vo to KHushbuu thaa agle nagar jaa chukaa
ab kise Dhuu.nDhtaa hai are be-KHabar
jaane vaale nahii.n lauTte umr bhar
ai dil-e-kam-nazar ai mire chaara-gar ai mire ham-safar

Amjad Islam Amjad
Nazm

sarkari aur ghair-sarkari do iden

radio ne das baje shab ke KHabar dii iid kii
aalimo.n ne raat bhar is news kii tardiid kii

Dilawar Figar
Nazm

ek barhaman ne kaha hai ki ye sal achchha hai

zulm kii raat bahut jald Talegii ab to
aag chuulho.n me.n har ik roz jalegii ab to
bhuuk ke maare ko.ii bachcha nahii.n ro.egaa
chain kii nii.nd har ek shaKHs yahaa.n so.egaa
aa.ndhii nafrat kii chalegii na kahii.n ab ke baras
pyaar kii fasl ugaa.egii zamii.n ab ke baras
hai yaqii.n ab na ko.ii shor-sharaaba hogaa
zulm hogaa na kahii.n KHuun-KHaraabaa hogaa
os aur dhuup ke sadme na sahegaa ko.ii
ab mire desh me.n beghar na rahegaa ko.ii
na.e va.ado.n kaa jo Daalaa hai vo jaal achchhaa hai
rahnumaa.o.n ne kahaa hai ki ye saal achchhaa hai
dil ke KHush rakhne ko Gaalib ye KHayaal achchhaa hai

Sabir Dutt
Nazm

nadaron ki eid

KHuu.n chuus rahaa hai paudo.n kaa ik phuul jo KHandaa.n hotaa hai
paamaal banaa kar sabzo.n ko ik sarv KHaraama hotaa hai

Nushur Wahidi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now