Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "a.nge"

Nazm MATCHES FOR "a.nge"

Nazm

main pal do pal ka shair hun

mai.n pal do pal kaa shaa'ir huu.n pal do pal mirii kahaanii hai
pal do pal merii hastii hai pal do pal mirii javaanii hai
mujh se pahle kitne shaa'ir aa.e aur aa kar chale ga.e
kuchh aahe.n bhar kar lauT ga.e kuchh naGme gaa kar chale ga.e
vo bhii ik pal kaa qissa the mai.n bhii ik pal kaa qissa huu.n
kal tum se judaa ho jaa.uu.ngaa go aaj tumhaaraa hissa huu.n
pal do pal me.n kuchh kah paayaa itnii hii sa'aadat kaafii hai
pal do pal tum ne mujh ko sunaa itnii hii ‘inaayat kaafii hai
kal aur aa.e.nge naGmo.n kii khiltii kaliyaa.n chun.ne vaale
mujh se behtar kahne vaale tum se behtar sun.ne vaale
har nasl ik fasl hai dhartii kii aaj ugtii hai kal kaTtii hai
jiivan vo mah.ngii madiraa hai jo qatra qatra baTtii hai
saagar se ubhrii lahar huu.n mai.n saagar me.n phir kho jaa.uu.ngaa
miTTii kii ruuh kaa sapnaa huu.n miTTii me.n phir so jaa.uu.ngaa
kal ko.ii mujh ko yaad kare kyuu.n ko.ii mujh ko yaad kare
masruuf zamaana mere liye kyuu.n vaqt apnaa barbaad kare

Sahir Ludhianvi
Nazm

andesha

baat niklegii to phir duur talak jaa.egii
log be-vaj.h udaasii kaa sabab puuchhe.nge
ye bhii puuchhe.nge ki tum itnii pareshaa.n kyuu.n ho
jagmagaate hu.e lamho.n se gurezaa.n kyuu.n ho
u.ngliyaa.n uTThe.ngii suukhe hu.e baalo.n kii taraf
ik nazar dekhe.nge guzre hu.e saalo.n kii taraf
chuu.Diyo.n par bhii ka.ii tanz kiye jaa.e.nge
kaa.npte haatho.n pe bhii fiqre kase jaa.e.nge
phir kahe.nge ki ha.nsii me.n bhii KHafaa hotii hai.n
ab to 'ruuhii' kii namaaze.n bhii qazaa hotii hai.n
log zaalim hai.n har ik baat kaa ta.ana de.nge
baato.n baato.n me.n miraa zikr bhii le aa.e.nge
in kii baato.n kaa zaraa saa bhii asar mat lenaa
varna chehre ke ta.assur se samajh jaa.e.nge
chaahe kuchh bhii ho savaalaat na karnaa un se
mere baare me.n ko.ii baat na karnaa un se
baat niklegii to phir duur talak jaa.egii

Kafeel Aazar Amrohvi
Nazm

falastini bachche ke liye lori

(2)
mat ro bachche
ro ro ke abhii
terii ammii kii aa.nkh lagii hai
mat ro bachche
kuchh hii pahle
tere abbaa ne
apne Gam se ruKHsat lii hai
mat ro bachche
teraa bhaa.ii
apne KHvaab kii titlii piichhe
duur kahii.n pardes gayaa hai
mat ro bachche
terii baajii kaa
Dolaa paraa.e des gayaa hai
mat ro bachche
tere aa.ngan me.n
murda suuraj nahlaa ke ga.e hai.n
chandarmaa dafnaa ke ga.e hai.n
mat ro bachche
ammii, abbaa, baajii, bhaa.ii
chaa.nd aur suuraj
tuu gar ro.egaa to ye sab
aur bhii tujh ko rulvaa.e.nge
tuu muskaa.egaa to shaayad
saare ik din bhes badal kar
tujh se khelne lauT aa.e.nge

Faiz Ahmad Faiz
Nazm

gham na kar, gham na kar

dard tham jaa.egaa Gam na kar, Gam na kar
yaar lauT aa.e.nge, dil Thahar jaa.egaa, Gam na kar, Gam na kar
zaKHm bhar jaa.egaa
Gam na kar, Gam na kar
din nikal aa.egaa
Gam na kar, Gam na kar
abr khul jaa.egaa, raat Dhal jaa.egii
Gam na kar, Gam na kar
rut badal jaa.egii
Gam na kar, Gam na kar

Faiz Ahmad Faiz
Nazm

ek dost ke nam

la.Dkii!
ye lamhe baadal hai.n
guzar ga.e to haath kabhii nahii.n aa.e.nge
in ke lams ko piitii jaa
qatra qatra bhiigtii jaa
bhiigtii jaa tuu jab tak in me.n nam hai
aur tire andar kii miTTii pyaasii hai
mujh se puuchh
ki baarish ko vaapas aane kaa rasta kabhii na yaad hu.aa
baal sukhaane ke mausam an-pa.Dh hote hai.n!

Parveen Shakir
Nazm

ramayan ka ek scene

ruKHsat hu.aa vo baap se le kar KHudaa kaa naam
raah-e-vafaa kii manzil-e-avval hu.ii tamaam
manzuur thaa jo maa.n kii ziyaarat kaa intizaam
daaman se ashk po.nchh ke dil se kiyaa kalaam
iz.haar-e-be-kasii se sitam hogaa aur bhii
dekhaa hame.n udaas to Gam hogaa aur bhii
dil ko sa.nbhaaltaa hu.aa aaKHir vo naunihaal
KHaamosh maa.n ke paas gayaa suurat-e-KHayaal
dekhaa to ek dar me.n hai baiThii vo KHasta-haal
saktaa saa ho gayaa hai ye hai shiddat-e-malaal
tan me.n lahuu kaa naam nahii.n zard rang hai
goyaa bashar nahii.n ko.ii tasviir-e-sa.ng hai
kyaa jaane kis KHayaal me.n gum thii vo be-gunaah
nuur-e-nazar ye diida-e-hasrat se kii nigaah
jumbish hu.ii labo.n ko bharii ek sard aah
lii gosha-ha-e-chashm se ashko.n ne ruKH kii raah
chehre kaa rang haalat-e-dil kholne lagaa
har muu-e-tan zabaa.n kii tarah bolne lagaa
aaKHir asiir-e-yaas kaa qufl-e-dahan khulaa
afsaana-e-shadaa.id-e-ra.nj-o-mehan khulaa
ik daftar-e-mazaalim-e-charKH-e-kuhan khulaa
vaa thaa dahaan-e-zaKHm ki baab-e-suKHan khulaa
dard-e-dil-e-Gariib jo sarf-e-bayaa.n hu.aa
KHuun-e-jigar kaa rang suKHan se 'ayaa.n hu.aa
ro kar kahaa KHamosh kha.De kyuu.n ho merii jaa.n
mai.n jaantii huu.n jis liye aa.e ho tum yahaa.n
sab kii KHushii yahii hai to sahraa ko ho ravaa.n
lekin mai.n apne mu.nh se na hargiz kahuu.ngii haa.n
kis tarah ban me.n aa.nkho.n ke taare ko bhej duu.n
jogii banaa ke raaj-dulaare ko bhej duu.n
duniyaa kaa ho gayaa hai ye kaisaa lahuu sapiid
andhaa kiye hu.e hai zar-o-maal kii umiid
anjaam kyaa ho ko.ii nahii.n jaantaa ye bhed
soche bashar to jism ho larzaa.n misaal-e-biid
likkhii hai kyaa hayaat-e-abad in ke vaaste
phailaa rahe hai.n jaal ye kis din ke vaaste
letii kisii faqiir ke ghar me.n agar janam
hote na merii jaan ko saamaan ye baham
Dastaa na saa.np ban ke mujhe shaukat-o-hasham
tum mere laal the mujhe kis saltanat se kam
mai.n KHush huu.n phuu.nk de ko.ii is taKHt-o-taaj ko
tum hii nahii.n to aag lagaa duu.ngii raaj ko
kin kin riyaazato.n se guzaare hai.n maah-o-saal
dekhii tumhaarii shakl jab ai mere naunihaal
puuraa hu.aa jo byaah kaa armaan thaa kamaal
aafat ye aa.ii mujh pe hu.e jab safed baal
chhaTtii huu.n un se jog liyaa jin ke vaaste
kyaa sab kiyaa thaa mai.n ne isii din ke vaaste
aise bhii naa-muraad bahut aa.e.nge nazar
ghar jin ke be-charaaG rahe aah 'umr bhar
rahtaa miraa bhii naKHl-e-tamannaa jo be-samar
ye jaa-e-sabr thii ki du'aa me.n nahii.n asar
lekin yahaa.n to ban ke muqaddar biga.D gayaa
phal phuul laa ke baaG-e-tamannaa uja.D gayaa
sarzad hu.e the mujh se KHudaa jaane kyaa gunaah
ma.njdhaar me.n jo yuu.n mirii kashtii hu.ii tabaah
aatii nazar nahii.n ko.ii amn-o-amaa.n kii raah
ab yaa.n se kuuch ho to 'adam me.n mile panaah
taqsiir merii KHaaliq-e-aalam bahal kare
aasaan mujh Gariib kii mushkil ajal kare
sun kar zabaa.n se maa.n kii ye fariyaad-e-dard-KHez
us KHasta-jaa.n ke dil pe chalii Gam kii teG-e-tez
'aalam ye thaa qariib ki aa.nkhe.n ho.n ashk-rez
lekin hazaar zabt se rone se kii gurez
sochaa yahii ki jaan se bekas guzar na jaa.e
naashaad ham ko dekh ke maa.n aur mar na jaa.e
phir arz kii ye maadar-e-naashaad ke huzuur
maayuus kyuu.n hai.n aap alam kaa hai kyuu.n vafuur
sadma ye shaaq 'aalam-e-piirii me.n hai zaruur
lekin na dil se kiijiye sabr-o-qaraar duur
shaayad KHizaa.n se shakl 'ayaa.n ho bahaar kii
kuchh maslahat isii me.n ho parvardigaar kii
ye jaa'l ye fareb ye saazish ye shor-o-shar
honaa jo hai sab us ke bahaane hai.n sar-ba-sar
asbaab-e-zaahirii me.n na in par karo nazar
kyaa jaane kyaa hai parda-e-qudrat me.n jalva-gar
KHaas us kii maslahat ko.ii pahchaantaa nahii.n
manzuur kyaa use hai ko.ii jaantaa nahii.n
raahat ho yaa ki ranj KHushii ho ki intishaar
vaajib har ek rang me.n hai shukr-e-kird-gaar
tum hii nahii.n ho kushta-e-naira.ng-e-rozgaar
maatam-kade me.n dahr ke laakho.n hai.n sogvaar
saKHtii sahii nahii.n ki uThaa.ii ka.Dii nahii.n
duniyaa me.n kyaa kisii pe musiibat pa.Dii nahii.n

Chakbast Braj Narayan
Nazm

chand-chehra sitara-ankhen

mire KHudaayaa mai.n zindagii ke azaab likkhuu.n ki KHvaab likkhuu.n
ye meraa chehra ye merii aa.nkhe.n
bujhe hu.e se charaaG jaise
jo phir se chalne ke muntazir ho.n
vo chaa.nd-chehra sitaara-aa.nkhe.n
vo mehrbaa.n saaya-daar zulfe.n
jinho.n ne paimaa.n kiye the mujh se
rafaaqato.n ke mohabbato.n ke
kahaa thaa mujh se ki ai musaafir rah-e-vafaa ke
jahaa.n bhii jaa.egaa ham bhii aa.e.nge saath tere
bane.nge raato.n me.n chaa.ndnii ham to din me.n saa.e bikher de.nge
vo chaa.nd-chehra sitaara-aa.nkhe.n
vo mehrbaa.n saaya-daar zulfe.n
vo apne paimaa.n rafaaqato.n ke mohabbato.n ke
shikast kar ke
na jaane ab kis kii rahguzar kaa manaara-e-raushnii hu.e hai.n
magar musaafir ko kyaa KHabar hai
vo chaa.nd-chehra to bujh gayaa hai
sitaara-aa.nkhe.n to so ga.ii hai.n
vo zulfe.n be-saaya ho ga.ii hai.n
vo raushnii aur vo saa.e mirii ataa the
so merii raaho.n me.n aaj bhii hai.n
ki mai.n musaafir rah-e-vafaa kaa
vo chaa.nd-chehra sitaara-aa.nkhe.n
vo mehrbaa.n saaya-daar zulfe.n
hazaaro.n chehro.n hazaaro.n aa.nkho.n
hazaaro.n zulfo.n kaa ek sailaab-e-tund le kar
mire ta.aaqub me.n aa rahe hai.n
har ek chehra hai chaa.nd-chehra
hai.n saarii aa.nkhe.n sitaara-aa.nkhe.n
tamaam hai.n
mehrbaa.n saaya-daar zulfe.n
mai.n kis ko chaahuu.n mai.n kis ko chuumuu.n
mai.n kis ke saa.e me.n baiTh jaa.uu.n
bachuu.n ki tuufaa.n me.n Duub jaa.uu.n
na meraa chehra na merii aa.nkhe.n
mire KHudaayaa mai.n zindagii ke azaab likkhuu.n ki KHvaab likkhuu.n

Obaidullah Aleem
Nazm

na jaane kya ho

baat niklegii to phir duur talak jaa.egii
log be-vajah udaasii kaa sabab puuchhe.nge
ye bhii pochhe.nge ki tum itnii pareshaa.n kyuu.n ho
u.ngliyaa.n uTThe.ngii suukhe hu.e baalo.n kii taraf
ik nazar dekhe.nge guzre hu.e saalo.n kii taraf
chuu.Diyo.n par bhii ka.ii tanz kiye jaa.e.nge
kaa.npte haatho.n pe fiqre bhii kase jaa.e.nge
log zaalim hai.n har ik baat kaa ta.ana de.nge
baato.n baato.n me.n miraa zikr bhii le aa.e.nge
un kii baato.n kaa zaraa saa bhii asar mat lenaa
varna chehre ke ta.assur se samajh jaa.e.nge
chaahe kuchh bhii ho savaalaat na karnaa un se
mere baare me.n ko.ii baat na karnaa un se
baat niklegii to phir duur talak jaa.egii

Kafeel Aazar Amrohvi
Nazm

aalam kitne

laala-o-gul ke tabassum se shafaq phuulegii
har taraf rang nazar aa.e.nge baaham kitne

Jan Nisar Akhtar
Nazm

alwida

na.e saathii tire aa.ngan me.n jab dhuume.n machaa.e.nge
to shaayad ham bhii ai school tujh ko yaad aa.e.nge

Abdul Ahad Saaz
Nazm

etimad

mai.n ne sochaa thaa ki is baar nigaaho.n ke salaam
aa.e.nge aur ba-andaaz-e-digar aa.e.nge
phuul hii phuul fazaa.o.n me.n bikhar jaa.e.nge

Kafeel Aazar Amrohvi
Nazm

ghaalib

tum jo aa jaa.o aaj dillii me.n
KHud ko paa.oge ajnabii kii tarah
tum phiroge bhaTakte rasto.n me.n
ek be-chehra zindagii kii tarah
din hai dast-e-KHasii.n kii maanind
raat hai daaman-e-tahii kii tarah
panja-e-zar-garii o zar-giirii
aam hai rasm-e-rahzanii kii tarah
aaj har mai-kade me.n hai kohraam
har galii hai tirii galii kii tarah
vo zabaa.n jis kaa naam hai urdu
uTh na jaa.e kahii.n KHushii kii tarah
ham-zabaa.n kuchh idhar udhar saa.e
nazar aa.e.nge aadmii kii tarah
tum the apnii shikast kii aavaaz
aaj sab chup hai.n munsifii kii tarah
aa rahii hai nidaa bahaaro.n se
ek gumnaam raushnii kii tarah
is a.ndhere me.n ik rupahlii lakiir
ek aavaaz-e-haq nabii kii tarah!

Makhdoom Mohiuddin
Nazm

ai mere soch-nagar ki rani

tujh se jo mai.n ne pyaar kiyaa hai tere liye? nahii.n apne liye
vaqt kii be-unvaan kahaanii kab tak be-unvaan rahe
ai mire soch-nagar kii raanii ai mire KHuld-e-KHayaal kii huur
itne dino.n jo mai.n ghultaa rahaa huu.n tere binaa yuu.nhii duur hii duur
soch to kyaa phal mujh ko milaa mai.n man se gayaa phir tan se gayaa
shahr-e-vatan me.n ajnabii Thahraa aaKHir shahr-e-vatan se gayaa
ruuh kii pyaas bujhaanii thii par yahaa.n ho.nTo.n kii pyaas bhii bujh na sakii
bachte sambhalte bhii ek sulagtaa rog banii mire jii kii lagii
duur kii baat na soch abhii mire haat me.n tuu zaraa haat to de
tujh se jo mai.n ne pyaar kiyaa hai tere liye? nahii.n apne liye
baaG me.n hai ik bele kaa taKHta bhiinii hai is bele kii sugandh
ai kaliyo kyuu.n itne dino.n tum rakkhe rahii.n ise god me.n band
kitne hii ham se ruup ke rasiyaa aa.e yahaa.n aur chal bhii diye
tum ho ki itne husn ke hote ek na daaman thaam sake
sehn-e-chaman par bhau.nro.n ke baadal ek hii pal ko chhaa.e.nge
phir na vo jaa kar lauT sake.nge phir na vo jaa kar aa.e.nge
ai mire soch-nagar kii raanii vaqt kii baate.n rang aur buu
har ko.ii saath kisii kaa Dhuu.nDe gul ho.n ki bele mai.n huu.n ki tuu
jo kuchh kahnaa hai abhii kah le jo kuchh sun.naa hai sun le
tujh se jo mai.n ne pyaar kiyaa hai tere liye? nahii.n apne liye

Ibn۔e۔Insha
Nazm

aah gandhi

tire maatam me.n shaamil hai.n zamiin o aasmaa.n vaale
ahinsaa ke pujaarii sog me.n hai.n do jahaa.n vaale
tiraa armaan puuraa hogaa ai amn-o-amaa.n vaale
tire jhanDe ke niiche aa.e.nge saare jahaa.n vaale
mire buu.Dhe bahaadur is bu.Dhaape me.n javaa.n-mardii
nishaa.n golii ke siine par hai.n golii ke nishaa.n vaale
nishaa.n hai.n goliyo.n ke yaa khile hai.n phuul siine par
usii ko maar Daalaa jis ne sar uu.nchaa kiyaa sab kaa
na kyuu.n Gairat se sar niichaa kare.n hindostaa.n vaale
mire gaa.ndhii zamii.n vaalo.n ne terii qadr jab kam kii
uThaa kar le ga.e tujh ko zamii.n se aasmaa.n vaale
zamii.n par jin kaa maatam hai falak par dhuum hai un kii
zaraa sii der me.n dekho kahaa.n pahu.nche kahaa.n vaale
pahu.nchtaa dhuum se manzil pe apnaa kaarvaa.n ab tak
agar dushman na hote kaarvaa.n ke kaarvaa.n vaale
sunegaa ai 'naziir' ab kaun mazluumo.n kii fariyaade.n
fuGaa.n le kar kahaa.n jaa.e.nge ab aah-o-fuGaa.n vaale

Nazeer Banarasi
Nazm

inqalab

chho.D de mutrib bas ab lillaah piichhaa chho.D de
kaam kaa ye vaqt hai kuchh kaam karne de mujhe
terii taano.n me.n hai zaalim kis qayaamat kaa asar
bijliyaa.n sii gir rahii hai.n KHirman-e-idraak par
ye KHayaal aataa hai rah rah kar dil-e-betaab me.n
bah na jaa.uu.n phir tire naGmaat ke sailaab me.n
chho.D kar aayaa huu.n kis mushkil se mai.n jaam-o-subuu!
aah kis dil se kiyaa hai mai.n ne KHuun-e-aarzuu
phir shabistaan-e-tarab kii raah dikhlaataa hai tuu
mujh ko karnaa chaahtaa hai phir KHaraab-e-ra.ng-o-buu
mai.n ne maanaa vajd me.n duniyaa ko laa saktaa hai tuu
mai.n ne ye maanaa Gam-e-hastii miTaa saktaa hai tuu
mai.n ne ye maanaa Gam-e-hastii miTaa saktaa hai tuu
mai.n ne maanaa terii mausiiqii hai itnii pur-asar
jhuum uThte hai.n farishte tak tire naGmaat par
haa.n ye sach hai zamzame tere machaate hai.n vo dhuum
jhuum jaate hai.n manaazir, raqs karte hai.n nujuum
tere hii naGme se vaabasta nashaat-e-zindagii
tere hii naGme se kaif-o-imbisaat-e-zindagii
terii saut-e-sarmadii baaG-e-tasavvuf kii bahaar
tere hii naGmo.n se be-KHud aabid-e-shab-zinda-daar
bulbule.n naGma-saraa hai.n terii hii taqliid me.n
tere hii naGmo.n se dhuume.n mahfil-e-naahiid me.n
mujh ko tere sehr-e-mausiiqii se kab inkaar hai
mujh ko tere lahn-e-daa.uudii se kab inkaar hai
bazm-e-hastii kaa magar kyaa rang hai ye bhii to dekh
har zabaa.n par ab salaa-e-ja.ng hai ye bhii to dekh
farsh-e-giitii se sakuu.n ab maa.il-e-parvaaz hai
abr ke pardo.n me.n saaz-e-ja.ng kii aavaaz hai
phe.nk de ai dost ab bhii phe.nk de apnaa rubaab
uThne hii vaalaa hai ko.ii dam me.n shor-e-inqalaab
aa rahe hai.n ja.ng ke baadal vo ma.nDlaate hu.e
aag daaman me.n chhupaa.e KHuun barsaate hu.e
koh-o-sahraa me.n zamii.n se KHuun ublegaa abhii
ra.ng ke badle gulo.n se KHuun Tapkegaa abhii
ba.Dh rahe hai.n dekh vo mazduur darraate hu.e
ik junuu.n-a.ngez lai me.n jaane kyaa gaate hu.e
sar-kashii kii tund aa.ndhii dam-ba-dam cha.Dhtii hu.ii
har taraf yalGaar kartii har taraf ba.Dhtii hu.ii
bhuuk ke maare hu.e insaa.n kii fariyaado.n ke saath
faaqa-masto.n ke jilau me.n KHaana-barbaado.n ke saath
KHatm ho jaa.egaa ye sarmaaya-daarii kaa nizaam
ra.ng laane ko hai mazduuro.n kaa josh-e-intiqaam
gir pa.De.nge KHauf se aivaan-e-ishrat ke sutuu.n
KHuun ban jaa.egii shiisho.n me.n sharaab-e-laala-guu.n
KHuun kii buu le ke jangal se havaa.e.n aa.e.ngii
KHuu.n hii KHuu.n hogaa nigaahe.n jis taraf bhii jaa.e.ngii
jho.npa.Do.n me.n KHuu.n, mahal me.n KHuu.n, shabistaano.n me.n KHuu.n
dasht me.n KHuu.n, vaadiyo.n me.n KHuu.n, bayaabaano.n me.n KHuu.n
pur-sukuu.n sahraa me.n KHuu.n, betaab dariyaa.o.n me.n KHuu.n
dair me.n KHuu.n, masjid me.n KHuu.n, kaliisaa.o.n me.n KHuu.n
KHuun ke dariyaa nazar aa.e.nge har maidaan me.n
Duub jaa.e.ngii chaTaane.n KHuun ke tuufaan me.n
KHuun kii ra.ngiiniyo.n me.n Duub jaa.egii bahaar
reg-e-sahraa par nazar aa.e.nge laakho.n laala-zaar
KHuun se ra.ngii.n fazaa-e-bostaa.n ho jaa.egii
nargis-e-maKHmuur chashm-e-KHuu.n-fishaa.n ho jaa.egii
kohsaaro.n kii taraf se ''surKH-aa.ndhii'' aa.egii
jaa-ba-jaa aabaadiyo.n me.n aag sii lag jaa.egii
to.D kar be.Dii nikal aa.e.nge zindaa.n se asiir
bhuul jaa.e.nge ibaadat KHaanqaaho.n me.n faqiir
hashr-dar-aaGosh ho jaa.egii duniyaa kii fazaa
dau.Dtaa hogaa har ik jaanib farishta maut kaa
surKH ho.nge KHuun ke chhii.nTo.n se baam-o-dar tamaam
Garq ho.nge aatishii.n malbuus me.n manzar tamaam
is tarah legaa zamaana ja.ng kaa KHuunii.n sabaq
aasmaa.n par KHaak hogii, farq par ra.ng-e-shafaq
aur is ra.ng-e-shafaq me.n baa-hazaaraa.n aab-o-taab!
jagmagaa.egaa vatan kii hurriyat kaa aaftaab

Asrarul Haq Majaz
Nazm

dilli se wapsi

yaad aa.e.nge mujhe tere zamiin-o-aasmaa.n
rah chuke hai.n merii jaulaa.n-gaah tere bostaa.n

Asrarul Haq Majaz
Nazm

sal-girah ki raat

aaj darvaaze khule rahne do
yaad kii aag dahak uTThii hai
shaayad is raat hamaare shohdaa aa jaa.e.n
aaj darvaaze khule rahne do
jaante ho kabhii tanhaa nahii.n chalte hai.n shahiid?
mai.n ne dariyaa ke kinaare jo pare dekhe hai.n
jo charaaGo.n kii lave.n dekhii.n hai.n
vo lave.n boltii thii.n zinda zabaano.n kii tarah
mai.n ne sarhad pe vo naGmaat sune hai.n ki jinhe.n
kaun gaa.egaa shahiido.n ke sivaa?
mai.n ne ho.nTo.n pe tabassum kii na.ii tez chamak dekhii hai
nuur jis kaa thaa halaavat se sharaabor
azaano.n kii tarah!
abhii sarhad se mai.n lauTaa huu.n abhii,
mai.n abhii haa.np rahaa huu.n mujhe dam lene do
raaz vo un kii nigaaho.n me.n nazar aayaa hai
jo hama-giir thaa naadiida zamaano.n kii tarah!
yaad kii aag dahak uTThii hai
sab tamannaa.o.n ke shahro.n me.n dahak uTThii hai
aaj darvaaze khule rahne do
shaayad is raat hamaare shohdaa aa jaa.e.n!
vaqt ke paa.nv ulajh jaate hai.n aavaaz kii zanjiiro.n se
un kii jhankaar se KHud vaqt jhanak uThtaa hai
naGma martaa hai kabhii, naala bhii martaa hai kabhii?
sansanaahaT kabhii jaatii hai mohabbat ke bujhe tiiro.n se?
mai.n ne dariyaa ke kinaare unhe.n yuu.n dekhaa hai
mai.n ne jis aan me.n dekhaa hai unhe.n
shaayad is raat,
is shaam hii,
darvaazo.n pe dastak de.nge!
shohdaa itne subuk-paa hai.n ki jab aa.e.nge
na kisii so.e parinde ko KHabar tak hogii
na daraKHto.n se kisii shaaKH ke girne kii sadaa guu.njegii
pha.Dpha.DaahaT kisii zambuur kii bhii kam hii sunaa.ii degii
aaj darvaaze khule rahne do!
abhii sarhad se mai.n lauTaa huu.n abhii
paar jo guzregii us kaa hame.n Gam hii kyuu.n ho?
paar kyaa guzregii ma.aluum nahii.n
ek shab jis me.n
pareshaanii-e-aalaam se ruuho.n pe giraanii taarii
ruuhe.n sunsaan yatiim
un pe hamesha kii jafaa.e.n bhaarii
buu-e-kaafuur agar baste gharo.n se jaarii
be-panaah KHauf me.n ruuyaa-e-shikasta kii fuGaa.n uTThegii
bujhtii sham.o.n kaa dhu.aa.n uTThegaa
paar jo guzregii ma.aluum nahii.n
apne darvaaze khule rahne do

Noon Meem Rashid
Nazm

sal-e-nau

ye kis ne phone pe dii saal-e-nau kii tahniyat mujh ko
tamannaa raqs kartii hai taKHayyul gungunaataa hai
tasavvur ik na.e ehsaas kii jannat me.n le aayaa
nigaaho.n me.n ko.ii ra.ngiin chehra muskuraataa hai
jabii.n kii chhuuT pa.Dtii hai falak ke maah-paaro.n par
ziyaa phailii hu.ii hai saaraa aalam jagmagaataa hai
shafaq ke nuur se raushan hai.n mehraabe.n fazaa.o.n kii
surayyaa kii jabii.n zohra kaa aariz timtimaataa hai
puraane saal kii ThiThurii hu.ii parchhaa.iyaa.n simTii.n
na.e din kaa nayaa suuraj ufuq par uThtaa aataa hai
zamii.n ne phir na.e sar se nayaa raKHt-e-safar baa.ndhaa
KHushii me.n har qadam par aaftaab aa.nkhe.n bichhaataa hai
hazaaro.n KHvaahishe.n a.ng.Daa.iyaa.n letii hai.n siine me.n
jahaan-e-aarzuu kaa zarra zarra gungunaataa hai
umiide.n Daal kar aa.nkho.n me.n aa.nkhe.n muskuraatii hai.n
zamaana jumbish-e-mizhgaa.n se afsaane sunaataa hai
masarrat ke javaa.n mallaah kashtii le ke nikle hai.n
Gamo.n ke naa-KHudaa.o.n kaa safiina Dagmagaataa hai
KHushii mujh ko bhii hai lekin mai.n ye mahsuus kartaa huu.n
masarrat ke is aa.ii.ne me.n Gam bhii jhilmilaataa hai
hamaare daur-e-mahkuumii kii muddat ghaTtii jaatii hai
Gulaamii ke zamaane me.n izaafa hotaa jaataa hai
yahii andaaz gar baaqii hai.n apnii sust-gaamii ke
na jaane aur kitne saal aa.e.nge Gulaamii ke

Ali Sardar Jafri
Nazm

ek husn-farosh se

mohabbat aah terii ye mohabbat raat bhar kii hai
tirii ra.ngiin KHalvat kii lataafat raat bhar kii hai
tire shaadaab ho.nTo.n kii inaayat raat bhar kii hai
tire mastaana boso.n kii halaavat raat bhar kii hai
mah-e-raushan hai tuu aur terii tal.at raat bhar kii hai
gul-e-shabbuu hai tuu aur terii nik.hat raat bhar kii hai
tuu kyaa jaane ki saudaa-e-mohabbat kis ko kahte hai.n
mohabbat aur mohabbat kii lataafat kis ko kahte hai.n
Gam-e-hijraa.n hai kyaa aur soz-e-ulfat kis ko kahte hai.n
junuu.n hotaa hai kaisaa aur vahshat kis ko kahte hai.n
tuu kyaa jaane Gam-e-shab-haa-e-furqat kis ko kahte hai.n
tire iz.haar-e-ulfat kii fasaahat raat bhar kii hai
nigaah-e-mast se dil ko mire ta.Dpaa rahii hai tuu
ada-e-shauq se jazbaat ko bha.Dkaa rahii hai tuu
mujhe bachche kii suurat naaz se phuslaa rahii hai tuu
khilaune de ke boso.n ke mujhe bahlaa rahii hai tuu
magar naadaan hai tuu aah dhokaa khaa rahii hai tuu
tiraa ruu-e-daraKHshaa.n hai ba-zaahir maahtaab-aasaa
tire ho.nTo.n kii shaadaabii hai ra.ngat me.n sharaab-aasaa
tire ruKHsaar kii mahtaabiyaa.n hai.n aaftaab-aasaa
magar in kii haqiiqat hai habaab-aasaa saraab-aasaa
ki Gaaze kii sabaahat us pe chhaa.ii hai naqaab-aasaa
aur is Gaaze kii bhii jhuuTii sabaahat raat bhar kii hai
ye maanaa terii KHalvat kii fazaa ruuh-e-gulistaa.n hai
tirii KHalvat kaa har faanuus ik mahtaab-e-larzaa.n hai
tiraa abreshmii bistar nahii.n ik KHvaab-e-KHandaa.n hai
tiraa jism aafat-e-dil teraa siina aafat-e-jaa.n hai
tuu ik zinda sitaara hai jo tanhaa.ii me.n taabaa.n hai
magar kahte hai.n taaro.n kii hukuumat raat bhar kii hai
lataafat se hai.n KHaalii tere kumhlaa.e hu.e bose
taraavat se hai.n KHaalii tere murjhaa.e hu.e bose
nazaakat se hai.n KHaalii tere ghabraa.e hu.e bose
haqiiqat se hai.n KHaalii tere sharmaa.e hu.e bose
mohabbat se hai.n KHaalii tere ghabraa.e hu.e bose
aur in boso.n kii ye jhuuTii halaavat raat bhar kii hai
tire zahriile bose mujh ko jis dam yaad aa.e.nge
mire ho.nTo.n pe kaale naag ban kar thartharaa.e.nge
pashemaanii ke jazbe mujh ko diivaana banaa.e.nge
mire inkaar ko nafrat ke KHanjar gudgudaa.e.nge
mire dil kii rago.n me.n Gam ke sho.ale tair jaa.e.nge
mai.n samjhaa! aah samjhaa! ye masarrat raat bhar kii hai
mujhe diivaana karne kii masarrat be-KHabar kab tak
rahegii mere dil me.n terii ulfat kaargar kab tak
mujhe mas.huur rakkhegaa ye ishq-e-be-samar kab tak
haqiiqat kii sahar aaKHir na hogii parda-dar kab tak
mujhe maGluub kar ke KHush hai tuu zaalim magar kab tak
tirii ye fat.h merii ye haziimat raat bhar kii hai

Akhtar Shirani
Nazm

jaras-e-gul ki sada

jab bhii abruu-e-dar-e-yaar ne irshaad kiyaa
jis bayaabaa.n me.n bhii ham ho.nge chale aa.e.nge
dar khulaa dekhaa to shaayad tumhe.n phir dekh sake.n
band hogaa to sadaa de ke chale jaa.e.nge

Faiz Ahmad Faiz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now