Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "agastya'"

Nazm MATCHES FOR "agastya'"

Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

mera hona na hona

miraa honaa na honaa munhasir hai
ek nuqte par
vo ik nuqta
jo do harfo.n ko aapas me.n milaa kar
lafz kii tashkiil kartaa hai
vo ik nuqta simaT jaa.e to
hone kaa har ik imkaa.n
na hone tak kaa saaraa faasla
pal-bhar me.n tai kar le
vahii nuqta bikhar jaa.e
to har ik shai
na hone ke qafas kii tiiliyo.n ko to.D kar rakh de
vo ek nuqta mirii aa.nkho.n me.n akasr
raushnii ke saath ra.ngo.n ko ugaataa hai
mire idraak me.n shabnam kii suurat
yaa sitaare kii tarah lauh-e-yaqii.n par jagmagaataa hai
vahii nuqta mujhe tashkiik ke jangal me.n
jugnuu ban ke manzil kii taraf rasta dikhaataa hai
mujhe akasr bataataa hai
miraa honaa na hone kaa amal se
mire hone kii bhii takmiil hotii hai
vo ik nuqta kahaa.n hai
kaun hai
kis ke labo.n me.n chhup ke har isbaat ko
inkaar me.n tabdiil kartaa hai
jo do harfo.n ko aapas me.n milaa kar lafz kii tashkiil kartaa hai
ye nukta bhii isii nuqte me.n muzmar hai
vo ek nuqta ki ab tak jis ke hone kaa amii.n huu.n mai.n
vo ifshaa ho to mai.n samjhuu.n
ki huu.n bhii yaa nahii.n huu.n mai.n

Mohsin Naqvi
Nazm

kheti

vaqt kii khetii hai.n ham
vaqt botaa hai ugaataa paaltaa hai
aur ba.Dhne ke mavaaqe bhii hame.n detaa hai vaqt
sabz ko zarrii.n bataane kii ijaazat marhamat kartaa hai aur
naachne detaa hai baad-e-shoKH kii maujo.n ke saath
jhuumne detaa hai suuraj kii kiran kii ham-damii me.n
chaa.ndnii pii kar hame.n ba-dast paataa hai to KHush hotaa hai vaqt
phuulne phalne kii tadbiire.n bataataa hai hame.n
haa.n magar anjaam kaar
kaaT lenaa hai hame.n
ham bil-aaKHir us ke naGme
ham bil-aaKHir us kii fasl

Ameeq Hanafi
Nazm

naya sal

dhartii par baaruud ugaayaa amn ke gaane gaa.e
ek-duuje ke KHuun se ham ne kaise jashn manaa.e

Sarfaraz Syed
Nazm

hamein nabud mat karna

agarche suut se takle ne dhaage ko na khii.nchaa thaa
mire reshe bunat ke marhale me.n the
rage.n maa.n kii duriido.n se na bichh.Dii thii.n
mai.n apne jism se kuchh faasle par thaa
magar mere aqiide kaa ta.ayyun karne vaalo.n ne
mire maslak ke baare me.n
jo sochaa thaa use tajsiim kar Daalaa
mai.n jis dam apne hone par utar aayaa
mujhe taqsiim kar Daalaa
kisii ne mere maathe par tilak daaGaa
saliibo.n ko mirii chhaatii pe khii.nchaa
aur kaano.n me.n azaa.n bhar dii
phir is ke ba.ad
peshaanii pe a.ngaare
saliibe.n apne siine par
samaa.at par namiida za.ng ke taale sambhaale
mai.n ne saarii umr
duniyaa ke tasarruf me.n guzaarii hai
mirii fitrat simaTnaa aur
qismat TuuT jaanaa hai
mai.n paara huu.n
mujhe duniyaa masaltii hai
nafii isbaat kii zarbe.n
mujhe taqsiim kartii hai.n
bikhartaa huu.n
mire zarre thirakte hai.n
to kahte hai.n
hame.n naabuud mat karnaa
ki jab taqsiim hone kaa amal mumkin nahii.n rahtaa
to phir zarra
zaraa bhar choT khaane par
dhamaake ko ugaltaa hai
dhamaake ko samajhte ho
dhamaaka jis se harf-e-kun Tapaktaa hai
hame.n naabuud mat karnaa

Syed Mubarak Shah
Nazm

nafsiyati maraz

miir to nahii.n huu.n mai.n
jaane phir bhii aisaa kyuu.n
roz roz hotaa hai
raat ke samundar me.n
chaa.nd jo ki machhlii hai
motiyaa.n ugaltaa hai
aur ek motii se
jal-parii nikaltii hai
aur mujh se kahtii hai
kyuu.n udaas rahte huu.n
''nii.nd kyuu.n nahii.n aatii''
kaun yaad aataa hai
kis kaa Gam sataataa hai
ulfato.n ke maare ho
chaahato.n ke pyaase ho
raat ik samundar hai
jis kii mauj-e-zulmat me.n
aashiqo.n ke naalo.n kaa
an-kahe savaalo.n kaa
zahr KHuub hotaa hai
sair ho ke pii lenaa
phir gale lagaa lenaa
maut kii dulhan ko tum
daf.atan ye hotaa hai
aarzuu kii chaukhaT par
dil ke TuuT jaane se
dard chiiKH uThtaa hai
ishq! terii tauba hai

Khalid Mubashshir
Nazm

bulbul aur gulab

gulaab
ai rang bhare taraane vaalii
gulshan me.n bahaar gaane vaalii
ai baaG kii laa-javaab chi.Diyaa
ai shefta-e-gulaab chi.Diyaa
jis ne tujhe chahchahe diye hai.n
dilchasp ye zamzame diye hai.n
us ne mujhe phuul hai banaayaa
ik pe.D kii shaaKH se ugaayaa
sab phuul hai.n mere aage saada
us baaG kaa huu.n mai.n shaahzaada
mujh saa nahii.n aur ko.ii KHush-baKHt
hai mere liye bihaar kaa taKHt

Seemab Akbarabadi
Nazm

gungi iltija

rabb-ul-izzat
vo zamiin jise tuu ne banii aadam ke liye jannat banaayaa thaa
aur amn ke gahvaare kaa naam diyaa thaa
jahaa.n hamaarii aazmaa.ish ke liye shajar-e-mamnuu.a ke saath saath
hamaarii rubuubiyat ke liye tuu ne shajar-e-hayaat bhii ugaayaa thaa
hamaarii vo zamiin paanii havaa aur KHushkii kii maKHluuq kaa mushtarka ghar thii
is pyaarii zamiin par aabaad saarii maKHluuq ek duusre se raazii thii
aur jis kii saarii maKHluuq ko baaham raazii dekh kar tuu bhii ham se raazii thaa
ai rabb-ul-izzat ham ne vo zamiin apne haatho.n barbaad kar ke rakh dii hai
hamaaraa tujh par ko.ii haq nahii.n ki zid kare.n
lekin tuu ne tauba kaa darvaaza to khulaa rakkhaa hai
be-shak tauba kii ibtidaa e'tiraaf se hotii hai
magar is kii intihaa hamesha du.aa se hotii aa.ii hai
mere paas du.aa ke laa.eq alfaaz nahii.n hai.n
lekin tere paas merii guu.ngii iltijaa sun.ne ke liye bahut achchhe kaan hai.n
husn-e-samaa.at tujh par KHatm hai
is liye ki tuu azal se muztaro.n kii suntaa aur murda zamiino.n ko zinda kartaa aayaa hai
sun ai samii.a sun
ek martaba phir is zamiin par amn ummiid aur masarrat ke pharere lahraa de
ek martaba phir is ke beTe beTiyo.n kaa haath paka.D
unhe.n adhuure-pan se najaat de de
puuraa kar de unhe.n
vo havas aur be-sabrii kii khaultii daldal me.n
bad-suurat me.nDako.n kii tarah au.ndhe mu.nh pa.De hai.n
unhe.n puure qad se kha.Daa kar de
un kii azmat-e-aadam lauTaa de
unhe.n ek duusre par e'timaad karnaa sikhaa de
taufiiq de unhe.n ki terii ataa karda quvvat-e-taKHliiq se
zamiin ko husn aur ma.anii se maalaa-maal kar de.n
ehtiraam Daal de in ke dil-o-dimaaG me.n is zamiin ke liye
apnii us maa.n ke liye
us kii saarii maKHluuq ke liye
nasl aqiide jins aur saqaafat kaa farq in kii vahdat me.n na.e rang bhare
vo puure kurra-e-arz par phaile ho.n lekin ek duusre kaa haath paka.D kar
vo puure kurra-e-arz ko ek aise dastarKHvaa.n kii shakl de de.n
jis par zamiin kaa saaraa rizq zamiin kii saarii maKHluuq ke liye aam ho
chhe arab insaan hii nahii.n zamiin kii saarii maKHluuq sairaab-o-shaad-kaam ho
ai rabb-ul-izzat
tuu ne is zamiin kii suurat me.n jo jannat hame.n dii thii
ham ne use apne liye jahannam banaa liyaa hai
ye jahannam sirf nifaaq aur nafrat hii nahii.n KHauf se bhii labrez hai
ek duusre se KHauf apne aap se KHauf
aur KHauf to mohabbat kii nafii hotaa hai
aur saarii mohabbato.n kii ibtidaa aur intihaa
hame.n ek martaba phir mohabbat se sarshaar kar de
ki mohabbat ke baGair hame.n na to sachchaa amn nasiib hogaa aur na sachchii zindagii
ham mohabbat se mahruum rahe to KHvaah to zamiin ko sau martaba bhii jannat banaa de
ham hazaar martaba use jahannam banaa ke rakh de.nge
ham ne nafrat nifaaq aur KHauf ko aazmaa kar dekh liyaa hai
ai rabb-ul-izzat
hamaare vajuud mohabbat ke liye is tarah taras rahe hai.n
jaise pyaasii zamiin baarish ke liye tarastii hai
hame.n mohabbat nasiib kar de

Mohammad Haneef Rame
Nazm

miTTi

mubaarak chiiz hai ne.amat hai miTTii
ki is se aadmii ne jism paayaa
binaa-e-rizq hai daulat hai miTTii
ki is ne daana-e-gandum ugaayaa
jahaa.n me.n baa.is-e-rahmat hai miTTii
ki insaano.n ne is se ghar banaayaa
magar ik din ye miTTii misl-e-azhdar
nigal jaa.egii ham ko tum ko 'aKHtar'

Akhtar Bastavi
Nazm

nafrat

mujhe nafrat se nafrat hai
ye vo ifriit hai
jo gulshan-e-lab pe sajaataa hai
ridaa-e-KHaar-e-dushnaamii
ye dast-e-be-zarar me.n
KHanjar-e-qaatil ugaataa hai
ye un aa.nkho.n ko jo
ma.asuum-tar hai.n
ziyaa-e-qahr-e-naa-zebaa dikhaa kar
surKH kartaa hai
ye ha.nste khelte aabaad ghar ko
bilaktii siskiyo.n se
aur ashko.n se samaataa hai
Garaz ye kaj-adaa ifriit
KHush-haalii ke rishto.n kii rukaavaT hai
mujhe nafrat se nafrat hai

Asim Wasti
Nazm

aise mein teri yaad aati hai

har zarra mauj-e-fazaa me.n jab fitrat ke raaz ugaltaa hai
lab band kalii ke saa.nche me.n jab phuul kaa paikar Dhaltaa hai
aise me.n tirii yaad aatii hai
yaad aane vaale ye to bataa kyaa mai.n bhii tujhe yaad aataa huu.n

Syed Mehmood Hasan Qaisar Amrohvi
Nazm

ras ki khir

ek roz kii baat hai bhaa.ii
ras kii ham ne khiir pakaa.ii
pahle ras kaa mel nikaalaa
aur patiilii me.n phir Daalaa
degchii phir chuulhe pe cha.Dhaa.ii
us ke niiche aag jalaa.ii
Daale ras me.n chaaval suthre
aur chalaayaa dhiire dhiire
khich khich kar ke paktii jaatii
ham sab se ye kahtii jaatii
chaaval bolo kis ne banaayaa
khet me.n gannaa kis ne ugaayaa
pak kar jab tayyaar hu.ii to
tohfa diyaa pa.Dosan b ko
KHush ho kar ham sab ne khaa.ii
khiir pa.Dosan ko bhii bhaa.ii
shukr hai us allaah kaa bhaa.ii
jis ne ham ko khiir khilaa.ii

Khaleel Mahmoodi
Nazm

ek daraKHt

us ne apne dil kii kaalii dhartii par ek daraKHt ugaayaa thaa
pahle is par ummiido.n ke phal aate the
is kii shaaKHe.n KHushbu.o.n ke patto.n se bhar jaatii thii.n
yaado.n kii KHushbu.e.n fazaa me.n bikhar jaatii thii.n
kabhii kabhii raato.n kii maayuusii kii shabnam
saare daraKHt ko dho detii thii
phuulo.n me.n nokiile kaa.nTe bo detii thii
phir bhii mai.n duniyaa kii jaltii dhuup se ghabraa kar
akasr is ke saa.e me.n aa jaataa thaa
sukh paataa thaa
lekin ab ye daraKHt to jaise sa.ng-e-safed kaa hai
is kii shaaKHe.n duudhiyaa dhaat kii hai.n
ab is par Te.Dhe-me.Dhe maKHruutii aur murabba shaklo.n vaale
lohe ke phal aate hai.n
is kaa saaya garm dahakte a.ngaaro.n kii aag hai
is kii KHushbuu bahte KHuun kaa raag hai
mere dil kii miTTii par ab ko.ii daraKHt nahii.n hai naag hai
phan phailaa kar baiThaa hai aur apne jism ko Dastaa hai
jism ab is kaa jism nahii.n hai
piile KHuun kaa rasta hai

Shahzad Ahmad
Nazm

nazm

al-amaa.n
taaziyaane gunahgaar haatho.n me.n hai.n be-gunaaho.n kii KHair
vo jo qaazii adaalat gavaah o sanad ilm-o-daanish aur tahriir se munsalik ik rivaayat kii tahziib thii
vo kahii.n kho ga.ii
ek lambaa safar ruk gayaa
kis liye ruk gayaa
al-hazar
al-hazar! ye darinda-sifat niim vahshii mubtalaa-e-junuu.n taaziyaane liye
taazyaano.n kii zad me.n ta.Daptaa badan KHuu.n ugaltaa badan
kaisii kuchlii hu.ii KHvaahisho.n vahshiyaana havas-kaariyo.n kaa nishaana banaa
kis jibillat kii taskii.n kaa saamaa.n hu.aa
al-madad al-madad ai KHudaa!
taaziyaane gunahgaar haatho.n me.n hai.n
be-gunaaho.n kii KHair!

Fatima Hasan
Nazm

KHala mein luDhakti zamin

zamii.n
baa.njh chehro.n ke ham-raah
chaltii chalii jaa rahii hai
KHalaa
apnii barfaab sii vus.ato.n me.n
zamaane ugaltaa hu.aa chal rahaa hai
safar
zaaviyo.n kii panaaho.n me.n baiThaa hu.aa
KHvaab me.n Dhal rahaa hai
zamii.n
baa.njh chehro.n ke ham-raah
chaltii chalii jaa rahii hai
havaa
apnii saa.nso.n ke baaruud me.n
KHvaahisho.n ko ulaTtii hu.ii bah rahii hai
zamii.n
baa.njh chehro.n ke ham-raah
chaltii chalii jaa rahii hai

Sarwat Zehra
Nazm

yaqin se bahar bikhra sach

mai.n kyaa sochuu.n
mirii soche.n mire apne lahuu me.n Duub jaatii hai.n
hai ko.ii zaKHm aisaa jo musalsal KHuu.n ugaltaa hai
lahuu kii dhaar girtii hai
KHayaal-o-KHvaab ke uupar

Hamida Shaheen
Nazm

anar

mai.n suurat me.n achchhaa nahii.n huu.n magar
mujhe dekh lo tum zaraa to.D kar
mai.n andar se aa.u.ngaa tum ko pasand
mire peT me.n surKH motii hai.n band
vo motii agar kuchh dino.n khaa.oge
to tum KHud ko tandurust bhii paa.oge
jo daa.nto.n me.n apne dabaa.oge tum
to miiThaa araq mu.nh me.n paa.oge tum
miraa naam hai pyaare bachcho anaar
karo shukr rab kaa adaa baar baar
ki ne.amat banaa kar usii ne mujhe
zamii.n par ugaayaa tumhaare liye

Murtaza Sahil Tasleemi
Nazm

tezab, aakar KHushbu ka

meraa baap daa.nto.n me.n dynamite dabaa.e
u.ngliyo.n ke poro.n me.n tezaab ke ban ugaataa hai
aur piile murda mariyal kaaGaz ke chehre par
lahuu ke phuul kaa.Dhtaa hai

Farooq Nazki
Nazm

sabz inqalab

kaar-KHaano.n me.n lohaa pighaltaa hu.aa
aur khaliyaan sonaa ugaltaa hu.aa

Saghar Mehdi
Nazm

nae log

vo ab ke aa.e to sach un ke saath thaa lekin
ajiib tarah kaa be-dard sach thaa
kahte the tumhaaraa jhuuT hai na.ngaa yahii to ik sach hai
ham un se kah na sake
hamaare izn pe jo qasr-o-baam ugaataa thaa
vo jin hame.n me.n thaa vo mar chukaa hai ham lekin
ji.e.n to kaise ji.e.n
aur mare.n to kaise mare.n
ki tan barahna pa.De hai.n
na jaane kaun saa hai dasht samt hai na ufuq
bas ek manzar-e-be-ra.ng-o-saut hai us ko
KHalaa kahe.n ki adam

Aziz Qaisi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now