Search result for "ainak" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ainak"

Nazm MATCHES FOR "ainak"

Nazm

walid ke intiqal par

vo chaaliis raato.n se soyaa na thaa
vo KHvaabo.n ko uu.nTo.n pe laade hu.e
raat ke regzaaro.n me.n chaltaa rahaa
chaandnii kii chitaa.o.n me.n jaltaa rahaa
mez par
kaa.nch ke ik pyaale me.n rakkhe hu.e
daa.nt ha.nste rahe
kaalii ainak ke shiisho.n ke piichhe se phir
motiye kii kalii sar uThaane lagii
aa.nkh me.n tiirgii muskuraane lagii
ruuh kaa haath
chhalnii hu.aa suu.ii kii nok se
KHvaahisho.n ke diye
jism me.n bujh ga.e
sabz paanii kii sayyaal parchhaa.iyaa.n
lamha lamha band me.n utarne lagii.n
ghar kii chhat me.n ja.De
das sitaaro.n ke saayo.n tale
aks dhundlaa ga.e
aks murjhaa ga.e

Adil Mansuri

Nazm

manTo

jab vo KHaalii botal phe.nk ke kahtaa hai
''duniyaa! teraa husn, yahii bad-suuratii hai''
duniyaa us ko ghuurtii hai
shor-e-salaasil ban kar guu.njne lagtaa hai
a.ngaaro.n bharii aa.nkho.n me.n ye tund savaal
kaun hai ye jis ne apnii bahkii bahkii saa.nso.n kaa jaal
baam-e-zamaa.n par phe.nkaa hai
kaun hai jo bal khaate zamiiro.n ke pur-pech dhundalko.n me.n
ruuho.n ke ifriit-kado.n ke zahr-andoz mahlako.n me.n
le aayaa hai yuu.n bin puuchhe apne aap
ainak ke barfiile shiisho.n se chhantii nazro.n kii chaap
kaun hai ye gustaaKH
taaKH ta.DaaKH!

Majeed Amjad

Nazm

shararti laDke aur qawwali

apne teacher ko nachaa.e.n to maza aa jaa.e
un kii ainak ko churaa.e.n to maza aa jaa.e
un ke DanDe ko chhupaa.e.n to maza aa jaa.e
aaj jii bhar ke sataa.e.n to maza aa jaa.e
kaun saa din hai jo teacher ne nahii.n maaraa hai
ham ne har kaam kiyaa phir bhii to phaTkaaraa hai
un kaa Gussa hai ki dahkaa hu.aa a.ngaaraa hai
aag me.n aag lagaa.e.n to maza aa jaa.e
mu.nh pe chaa.nTe bhii diye ham ne banaayaa murGaa
ham ne school se har roz ye tamGa paayaa
kitne jallaad hai.n teacher are allaah allaah
ham bhii mu.nh un kaa cha.Dhaa.e.n to maza aa jaa.e
vo pa.Dhaate hai.n to ausaan KHataa hote hai.n
haq pa.Dhaa.ii ke ye dushvaar adaa hote hai.n
ham agar rote hai.n phir aur KHafaa hote hai.n
aaj un ko bhii rulaa.e.n to maza aa jaa.e
un kii kursii pe chalo aa.o paTaaKHe baa.ndhe.n
jab vo aa.e.n to paTaaKHo.n kaa ta.Dapnaa dekhe.n
ham bhii shaagird-e-sitam-gaar hai.n itnaa maane.n
piichhe piichhe hii bhagaa.e.n to mazaa aa jaa.e
un kii jo chiiz hai chupke se chhupaa de.n aa.o
paan bii.Dii kii jo Dibiyaa hai u.Daa de.n aa.o
ham sharaarat ke na.e jaal bichhaa de.n aa.o
vo kisii jaal me.n aa.e.n to mazaa aa jaa.e
vo agar saamne aa jaa.e.n to mil kar chiiKHe.n
vo kahe.n chup raho ham aur bhii ha.ns kar chiiKHe.n
aur vo aa.nKHe.n dikhaa.e.n to aka.D kar chiiKHe.n
un ko diivaana banaa.e.n to maza aa jaa.e

Hasrat Jaipuri

Nazm

tumhein ghussa aata hai

tumhe.n
Gussa aataa hai
merii bhuulne kii aadat par
mai.n tumhaare paas
nazmo.n kii kitaab bhuul jaataa huu.n
tum
use lauTaa detii ho
mai.n apnii ainak
tumhaare paas bhuul jaataa huu.n
tum
use lauTaa detii ho
mai.n apnaa qalam tumhaare paas bhuul jaataa huu.n
tum
use lauTaa detii ho
mujhe bhii
tumhaarii tarah
apnii bhuulne kii aadat par Gussa aataa hai
mai.n kuchh na kuchh
har baar bhuul jaataa huu.n
is baar
mai.n apne aap ko
tumhaare paas bhuul aayaa huu.n
tum
mujhe lauTaanaa bhuul ga.ii ho

Mustafa Arbab

Nazm

ek alamat

isii raftaar se chaltaa hai jahaan-e-guzaraa.n
inhii qadmo.n pe zamaane ke qadam uThte hai.n
ko.ii ainak se dikhaataa hai to ham dekhte hai.n
ko.ii kaa.ndho.n pe uThaataa hai to ham uThte hai.n
ek raqqaasa-e-tannaaz kii mahfil hai jahaa.n
kabhii aate hai.n bhatiije kabhii am uThte hai.n
kabhii ik gosha-e-taariik ke viiraane me.n
kisii jugnuu ke chamakne pe fuGaa.n hotii hai
kabhii is marhamat-e-KHaas kaa andaaza nahii.n
kabhii do buu.nd chhalakne pe fuGaa.n hotii hai
kabhii manzil ke tasavvur se jigar jalte hai.n
kabhii sahraa me.n bhaTakne pe fuGaa.n hotii hai

Mustafa Zaidi

Nazm

mujhe abhi bahut dur jaana hai

kyaa pairo.n kii thakan is safar ko rok saktii hai
kyaa raaste ke ro.De mere iraade ko to.D sakte hai.n
kyaa mai.n yahaa.n se vaapas lauT jaa.uu.ngaa
kyaa mai.n aur aage chal nahii.n paa.uu.ngaa
nahii.n nahii.n
shaayad mujhe jaanaa hai bahut duur
go huu.n mai.n thakan se chuur
aur be-zaar har manzar se
jo baar baar lauT kar nazar kii uktaahaT ban jaataa hai
vahii aasmaan
vahii zamiin
vahii chaa.nd vahii sitaare
chaa.ndnii me.n chamakte aur mahakte vahii phuul
haatho.n me.n chubhte vahii babuul
vahii mere man ko salaaKHo.n me.n lahuu karne vaale aqvaal
lekin shaayad uktaahaT bhii maane na ho
qadmo.n kii
shaayad zindagii qaidii na bane lamho.n kii
ye to havaa-e-barg-o-baar kii tarah hai
jo kabhii na kabhii guzar jaa.egii
mere zehn ke KHazaane kii uuprii sat.h ko bhii
kabhii na chhuu paa.egii
shaayad abhii aage bahut duur jaanaa hai
aur in baar baar aate lamho.n
har baar aa.nkh ke saamne ubharte manzaro.n
dariyaa.o.n sahraa.o.n ja.ngalo.n
gaa.nv aur shahro.n
ke bhii.D se mujhe ko.ii nayaa ra.ng
nikaalnaa hogaa
apne paraaganda zehn ko qabr me.n dafn kar ke
nayaa but nayaa mandir banaanaa hogaa
puraane lafzo.n se nayaa lafz
puraane ma.aanii se na.e ma.aanii
KHalq karne ho.nge
yahii nahii.n
mujhe paariina kaano.n me.n
samaa.ato.n ke na.e paimaane
aa.nkho.n ke liye
na.e manzar-naame se tartiib dene ho.nge
chalte chalte mere juute bhii ghis ga.e hai.n
mujhe uff juuto.n ko hii badalnaa hogaa
aur aa.nkho.n par na.ii ainak lagaanii hogii
taaki puraane shiishe me.n na.e ra.ng
puraane na dikhaa.ii de.n
shaayad ye thakan mujhe rok na paa.e
shaayad mai.n in roado.n ko phalaa.ng duu.n
shaayad apne haatho.n se babuulo.n ko noch
phe.nkuu.n
shaayad mai.n sin kii salaaKHo.n ko to.D kar
baahar aa jaa.uu.n
aur malgajii chaa.ndnii ke aks ghar
apne lahuu se surKH-ruu kar duu.n
aur qadam ba.Dhaate aage nigal jaa.uu.n
shaayad mujhe abhii bahut duur jaanaa hai

Khaleel Mamoon

Nazm

ainak ke shishe par

ainak ke shiishe par saraktii chyuu.nTii
aage ke paa.nv uupar havaa me.n uThaa kar
pichhle paa.nv par kha.Dii
hinhinaatii hai gho.De kii tarah
ainak ke niiche dabe aKHbaar me.n
do havaa.ii jahaaz Takraa jaate hai.n
musaafiro.n se ladii ik kashtii ulaT jaatii hai
ek bas khaa.ii me.n gir pa.Dtii hai
paa.nch buu.Dhe faqiir sardii se mar jaate hai.n
ko.ila-kaan me.n paanii bhar jaataa hai
radio pukaartaa hai pachchiis paise me.n tiin
ainak kaa shiisha saaf kartii chyuu.nTii
aahista se aage ba.Dh jaatii hai

Adil Mansuri

Nazm

lekin

kaalii ainak lagaa.e ghuumte rahnaa suuraj me.n sa.Dko.n par hoTalo.n me.n
theatero.n me.n masjido.n me.n dukaano.n me.n railway platform par
bhaTiyaar galiyo.n me.n shaamil honaa bujhe bujhe chehro.n vaalii bhii.D me.n taakte rahnaa
safed diivaaro.n ko akele laaya.anii hai sab kuchh aur jo dikhaa.ii detaa hai
vo nahii.n hai phir bhii dikhaa.ii detaa hai ko.ii farq nahii.n pa.Dtaa paa.nv hai.n juraabe.n
na hone se life aur Time na pa.Dhne se yahii kyaa kam hai ki sub.h se
shaam tak jam.a karte hai.n lafzo.n ko radio sunte hai.n aur dekhte hai.n mire
hu.e kabuutar kii aa.nkh school se lauTte hu.e bachche sharaab kii jhiil me.n tairte
shikaare pachaas se kam sher kii Gazal nahii.n likhte firaaq aaj bhii qabaa.ilii
kamar se baa.ndhe phirte hai.n chaale.n gaz kii shalvaar kyaa hotaa hai naam se
yaa sher kahne se yaa din-bhar uu.nghte rahne se yaa kitaabe.n suu.nghne se
taash khelne kaa maza hii aur hai ahamadabaad ho yaa lahore har jagah hotaa hai
suuraj ghar baiThe ga.ngaa hai bhaa.ii congress me.n phuuT pa.De yaa saat
hazaar insaan maar diye jaa.e.n bhuuke uThte hai.n har sub.h bistar se kisii ne
dekhe hai.n baiket aur picasso kabaDDii ke maidaan me.n yaa gambarsong ko
istirii karte hu.e nickson se le kar muraar-jii tak ko.ii bhii rok na sakaa
chhii.nk aur khaa.nsii ab aa.nkhe.n khol diijiye hazrat dekhiye puuraa
america chhii.nk rahaa hai khaa.ns rahaa hai idhar dekhiye ye hindostaan
bhii chhii.k rahaa hai khaa.ns rahaa hai khaa.ns rahaa hai chhii.k rahaa hai
kahaa.n se shuruu.a hu.ii hai taariiKH aur kahaa.n jaa kar ruknaa hai logo.n ko
udaas rahtii hai.n haamila aurte.n bas aur cinema kii qataar me.n gher rakkhii hai
zamiin bhikaariyo.n ne aur ma.ngaa.o charas aur gaa.njaa phir bhii alag karnaa mushkil
hai puraanii ko new-delhi se laasho.n ko dekh kar mahfuuz nahii.n hote tum kaise
aadmii ho kahaa.n ga.ii.n vo tavaa.ife.n kahaa.n ga.e vo qavvaal ma.anii to har lafz
me.n maujuud hai lekin

Adil Mansuri

Nazm

duniya bhar ke dukh ka hasil

KHaalii kamra
gahrii saa.nse.n
kamre ke ik kone me.n ik TuuTii-phuuTii mez
mez pe duniyaa bhar kaa gorakh-dhandaa
kaaTh-kabaa.D
kaaTh-kabaa.D se tho.Daa aage tirchhaa paper-weight
paper-weight ke niiche kaaGaz
kaaGaz par lafzo.n kaa Dher
Dher ke paas ik TuuTii ainak
ainak ke shiisho.n ke piichhe moTe moTe harf
ainak ke shiisho.n se aage niile piile kaale dhabbe
dhabbo.n me.n au.ndhe mu.nh leTii aish-tray me.n murda saa.nse.n bujhtii cigarette
aur maachis kii aadhii tiilii
maachis kii tiilii pe chipkaa chaa.e kaa chhilkaa
aur ik TuuTii DanDii kaa cup
cup se aage mez kaa konaa
mez se aage jhuultii kursii
kursii par ik shaKHs
shaKHs bhii vo jis kii aa.nkho.n me.n duniyaa bhar kaa dukh
duniyaa bhar ke dukh kaa haasil
duniyaa bhar kaa dukh!!

Imran Shamshad Narmi

Nazm

bunai

us ke jism kaa naap liyaa
ummiido.n kii 'ainak pahnii
ek sunahrii jazbe kii baariik salaa.iyaa.n pak.Dii.n
nazm bunii

Shoaib Kiani

Nazm

abba ki ainak

kyaa kar rahii hai.n aap yahaa.n jald aa.iye
ammii kahaa.n hai abbaa kii ainak bataa.iye

Adil Jafari

Nazm

paheli

aa.nkh par moTe se shiishe kii puraanii ainak
gaal me.n paan dabaa

Ishrat Afreen

Nazm

naya daur

ainak dhuul khaa rahaa hai ghar ke kisii kone me.n
ab to vo KHud bhii kuchh dekh nahii.n saktaa
na.ii aa.nkho.n ne us kii jagah le lii hai
ab to aa.nkho.n kaa rang bhii man-chaahaa kar sakte hai.n
kaalaa niilaa piilaa yaa haraa kuchh bhii

Sachin Dev Verma

Nazm

shararat ka maza

rashiida thii yuu.n to ba.Dii nek la.Dkii
magar us me.n ye ek aadat burii thii
vo har chiiz ko chhuutii aur chhe.Dtii thii
ye baat us kii ghuTTii me.n goyaa thii
buraa.ii ho ik bhii to kaisii burii hai
bhalaa.ii kii rag kaaTne ko chhurii hai
kabhii chaa.e-daanii kaa Dhaknaa uThaatii
vo ye jhaa.nk kar dekhtii is me.n kyaa hai
kabhii ketlii ko ulaT kar giraatii
samajhtii jo dhyaan aap kaa baT gayaa hai
use rokte bhii to ruktii vo kab thii
burii us me.n aadat pa.Dii ye ajab thii
ye ik din kaa hai zikr qissa hu.aa kyaa
tipaa.ii pe daadii ne ainak ko rakhaa
thii nisvaar kii bhii vahii.n ek Dibiyaa
rashiida ne un dono.n chiizo.n ko taakaa
ye sochaa ki dekhuu.ngii chiize.n ye kyaa hai
zaraa daadii amaa.n haTe.n yaa.n se jaa.e.n
Garaz un ke haTte hii us kii ban i
usii vaqt aa.nkho.n pe ainak lagaa.ii
vo Dibiyaa bhii nisvaar kii us ko bhaa.ii
ki ra.ngiin dhakne me.n thii KHush-numaa.ii
vo ainak to pahle lagaa hii chukii thii
hu.ii fikr Dibiyaa ko ab kholne kii
kahaa dil me.n mujh se kahe.ngii ye daadii
ki beTii na chhuunaa ise bhuul kar bhii
magar shukr hai is gha.Dii vo nahii.n hai.n
na abbaa na amaa.n na aapaa kahii.n hai.n
zaraa khol kar dekh luu.n is me.n kyaa hai
abhii band kar duu.ngii phir harj kyaa hai
rashiida ne Dibiyaa kaa Dhaknaa jo kholaa
to us me.n lagaa zor kaa ek jhaTkaa
havaa me.n vo nisvaar har samt phailii
rashiida ke chehre pe u.D u.D ke i
na aa.nkhe.n na nathune na mu.nh aur Tho.Dii
jagah ek bhii us ne baaqii na chho.Dii
hu.ii naak nisvaar se us kii lat-pat
na puuchho banii us gha.Dii us kii kyaa gat
vo ghabraa ke har har taraf KHuub dau.Dii
magar phir bhii chhii.nko.n se fursat na paa.ii
na aaraam us ko milaa ek pal bhii
na mil paa.ii us ko zaraa der kal bhii
vo ghabraa.ii itnii ki ainak ko phe.nkaa
chalii phir vo paanii se dhone ko chehraa
nihaayat hii naazuk the ainak ke shiishe
vo girtii hii bas ho ga.e Tuk.De Tuk.De
milii us ko apne kiye kii sazaa ye
ki miltii hai phuuTe hiye ki sazaa ye
phir itne me.n daadii ko aate jo dekhaa
hu.aa haal abtar bahut phir to us kaa
rashiida arii tujh ko ye ho gayaa kyaa
ye daadii ne tevrii cha.Dhaa kar jo puuchhaa
to bas sharm se ga.D ga.ii.n b rashiida
ajab soch me.n pa.D ga.ii.n b rashiida
rashiida kii haalat hu.ii Gair dukh se
rahaa kaam us ko KHushii se na sukh se
kiyaa us ne va.ada ye khaa khaa ke qasme.n
ki ab bhuul kar bhii na chhe.Duu.ngii chiize.n
sunaa hai ye 'nayyar' ne logo.n kaa kahnaa
rashiida ne va.ada kiyaa apnaa puuraa

Mohammad Shafiuddin Nayyar

Nazm

ijazat

vo kahte hai.n
mai.n kabhii zinda nahii.n thaa
is liye na vo merii ha.nsii ke baare me.n kuchh bataa sakte hai.n
na aa.nsu.o.n ke baare me.n
yaa ye ki jab mai.n chaltaa thaa
to mere paa.nv zamii.n par Thiik tarah se
pa.Dte bhii the yaa nahii.n
unho.n ne hamesha mujhe be-jaan hii paayaa
aise
ki merii nabz rukii hu.ii thii
dil saakit
aur jism siyaah pa.D chukaa thaa
lekin merii aa.nkhe.n puurii tarah khulii hu.ii thii.n
jin se unhe.n KHauf aataa thaa
lekin rafta rafta
un kaa KHauf raf.a hotaa gayaa
un kaa subuut ye hai
ki vo apnii bekaar ashiyaa
merii taraf uchhaal dete the
kabhii vaslii kaa KHaalii Dubaa
ainak kii TuuTii hu.ii kamaanii
yaa be taale kii ko.ii chaabii
agarche is baat se vo puurii tarah aagaah the
ki aisaa karte hu.e
vo ek laash kii be-hurmatii kar rahe the
lekin ab vo is baat ke goyaa aadii ho ga.e the
aisaa karte hu.e
unhe.n kisii qism kii jhijak
yaa sharmindagii nahii.n hotii thii
shaayad unho.n ne kisii vaqt merii laash ko
kahii.n Thikaane lagaane ke baare me.n bhii sochaa ho
par aisaa kar na paa.e ho.n
shaayad kisii ne unhe.n aisaa karne se rok diyaa ho
shaayad vo merii khulii hu.ii aa.nkhe.n dekh kar Dar ga.e ho.n
shaayad vo KHud apnii nabze.n TaTolne
apnii dha.Dkane.n sun.ne
aur apne jism me.n ruunumaa hone vaalii tabdiiliyo.n se
burii tarah KHaa.if hone lage ho.n
apne is KHauf par qaabuu paane ke liye
shaayad unho.n ne apnii be-kaar ashiyaa
merii taraf uchhaalnii shuruu.a kar dii ho.n
shaayad yuu.n vo apne liye
kisii na.e maz.hab kii buniyaad Daal rahe ho.n
jis me.n unhe.n
laasho.n kii be-hurmatii kii khulii chhuuT de dii ga.ii ho
mai.n in kii kisii Galat fahmii ko duur karne kii koshish nahii.n karuu.ngaa
ki mere maslak me.n
laasho.n kii be-hurmatii kii ko.ii gunjaa.ish nahii.n
zindo.n kii bhii nahii.n

Saeeduddin

Nazm

KHush-chashm

tumhaarii aa.nkhe.n kitnii KHuub-suurat hai.n
hai dil-aavez nuqta-e-nazar bhii
har ik shai ko tumhaaraa dekhne kaa zaaviya kitnaa judaa hai
magar ik baat jo sab se ziyaada KHaas hai
vo ye
ki ye 'ainak bhii aa.nkho.n par tumhaarii KHuub jachtii hai

Amit Goswami

Nazm

nawa-e-gumrah-e-shab

ai KHvaab-e-KHanda
tujhe to mai.n Dhuu.nDne chalaa thaa
mujhe KHabar hii nahii.n thii tuu merii u.ngliyo.n me.n khilaa hu.aa hai
mire sadaf me.n tire hii motii hai.n
merii jebo.n me.n tere sikke khanak rahe hai.n
navaa-e-gumraah-e-dasht-e-shab ke nujuum terii hatheliyo.n par chahak rahe hai.n
mire KHalaa me.n tamaam samte.n tire KHalaa se utar rahii hai.n
mujhe KHabar hii na thii
ki merii nazar kii ainak me.n tere shiishe ju.De hu.e hai.n
tujhe to mai.n Dhuu.nDne chalaa thaa
tujhe to mai.n Dhuu.nDne chalaa thaa
kisii saliib-e-kuhan pe daar-o-rasan ke taariik raasto.n kii
thakan me.n farhaad kohkan kii sadaa-e-sad-chaak me.n kisii chuuk
mai.n ubalte hu.e lahuu me.n khile gul tifl-e-be-gunah ke bikharte ra.ngo.n
kii u.nglii thaame tujhe to mai.n Dhuu.nDne chalaa thaa

Jawayd Anwar

Nazm

kal sham

isii dauraan
ik KHvaahish hu.ii dil me.n
mirii Table pe jo tasviir rahtii hai tumhaarii
aur T.V par dikhaa.ii dene vaale chehre ko
ik baar dekhuu.n to zaraa lekin
mirii ainak kahii.n gum ho ga.ii thii

Shahram Sarmadi

Nazm

aabai makanon par sitara

zamaane bah ga.e kitne
vahii aa.ngan jo vus.at me.n mujhe duniyaa lagaa kartaa thaa
vo do jast niklaa
jis jagah daalaan thaa
ab us jagah hamvaar miTTii mu.nh chi.Daatii hai
idhar hamvaar miTTii se udhar
vo Dheriyaa.n miTTii kii kab se muntazir hai.n
ko.ii milne hii nahii.n aataa
yahii.n the vo
jo ab miTTii hai.n
jin ke KHaal-o-KHad puure badan par zor de kar yaad kartaa
huu.n
yahii.n the vo
mire bakse me.n yaado.n aur dhaago.n ju.Dii ainak to rakkhii
hai
magar daadaa kii
niilii jhilmilaate paaniyo.n jaisii do aa.nkhe.n bah ga.ii hai.n
aur daadii kii sunaa.ii sab kathaa.e.n
KHaak andar rah ga.ii hai.n
vaqt ab bhii bah rahaa hai
merii aa.nkho.n
aur qabro.n se
vahaa.n aa.ngan ke suukhe pe.D tak
saare me.n itnii KHaak u.Dtii hai
dikhaa.ii kuchh nahii.n detaa

Zeeshan Haider

Nazm

wo ek insan

vo ek insaan manhanii saa
thaa jo ba-zaahir
za.iif-o-laaGar
badan ko khaadii kii ek dhotii me.n vo chhupaa.e
chha.Dii uThaa.e
aur apnii ainak ke taar kaano.n me.n thaa pha.nsaa.e
ba.Daa hii chust aur mehnatii thaa
bahut bahaadur vo aadmii thaa

Murtaza Sahil Tasleemi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now