Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "anaa-inkaar"

Nazm MATCHES FOR "anaa-inkaar"

Nazm

painting

terii tasviir banaate hu.e
mai.n ne nazm mukammal kar lii hai
aur KHud ko adhuuraa chho.D diyaa hai
tum chaaho
to mujhe mukammal kar saktii ho
apnii aa.nkho.n me.n kaajal lagaate hu.e
apne baal sa.nvaarte hu.e
yaa us vaqt
jab kamre me.n ko.ii na ho
aur aa.iina
tumhaare haq me.n bayaan dene se inkaar kar de

Ali Sahil
Nazm

ajib log hain

ajiib log the
suuraj kii raushnii ke tale
KHud apne-aap ko pahchaan bhii rahe the
aur
labo.n pe da.avaa-e-inkaar-e-aaftaab bhii thaa
vo jaante the ki suuraj kii raushnii ke sivaa
ko.ii charaaG mayassar nahii.n hai aisaa jo
talaash-e-asl-e-haqiiqat ke ziine cha.Dhte hu.e
be-imtiyaazii me.n is aaftaab jaisaa ho
ajiib log the
suuraj ke nuur-KHaane me.n
kiraa.e-daar bhii the aur sar-niguu.n nahii.n the
kisii sharaar-e-munaafiq ne un ke siino.n me.n
zabaa.n-daraazii kii us aag ko havaa dii thii
jise qabiila-e-Gaflat ke KHushk logo.n ne
anaa ke KHabt pe aflaak se nikaale hu.e
kisii darinda-e-be-shakl kii tasallii par
baraa.e-nashsha-e-haivaaniyat uThaa liyaa thaa
magar ye kyaa
ki phir aaj is hamaarii bastii me.n
ajiib log hai.n
suuraj kii raushnii ke tale
KHud apne-aap ko pahchaan bhii rahe hai.n
aur
labo.n pe da.avaa-e-inkaar-e-aaftaab bhii hai
ajiib log hai.n
suuraj ke nuur-KHaane me.n
kiraa.e-daar bhii hai.n
aur sar-niguu.n nahii.n hai.n

Sarfraz Arish
Nazm

nazara darmiyan hai

ko.ii mujh se kahtaa hai sargoshiyo.n me.n
kabhii aa.iine ko
sa.nvaaro sajaa.o to dekho
ki is aa.ine me.n tumhaare sivaa
aur ko.ii nahii.n hai
ye parchhaa.iyaa.n ye shabiihe.n
to sab aks hai.n
un zamaano.n kaa aise maazii kaa
taariiKH jis ko apnaa banaane se
inkaar kartii hai
ki is me.n ko.ii aks jhuuTaa nahii.n hai
magar sach bhii to is kahaanii kaa ek nahii.n hai
tumhaaraa tasavvur
tumhaaraa taKHayyul to ek devtaa hai
vahii devtaa jo azal se
mohabbat kaa markaz
mohabbat kaa mehvar rahaa hai

Shaista Yusuf
Nazm

parastar

vo jo kahlaataa thaa diivaana tiraa
vo jise hifz thaa afsaana tiraa
jis kii diivaaro.n pe aavezaa.n thii.n
tasviire.n tirii
vo jo dohraataa thaa
taqriire.n tirii
vo jo KHush thaa tirii KHushiyo.n se
tire Gam se udaas
duur rah ke jo samajhtaa thaa
vo hai tere paas
vo jise sajda tujhe karne se
inkaar na thaa
us ko dar-asl kabhii tujh se
ko.ii pyaar na thaa
us kii mushkil thii
ki dushvaar the us ke raste
jin pe be-KHauf-o-KHatar
ghuumte rahzan the
sadaa us kii anaa ke dar pe
us ne ghabraa ke
sab apnii anaa kii daulat
terii tahviil me.n rakhvaa dii thii
apnii zillat ko vo duniyaa kii nazar
aur apnii bhii nigaaho.n se chhupaane ke liye
kaamyaabii ko tirii
tirii futuuhaat
tirii izzat ko
vo tire naam tirii shohrat ko
apne hone kaa sabab jaantaa thaa
hai vajuud us kaa judaa tujh se
ye kab maantaa thaa
vo magar
pur-KHatar raasto.n se aaj nikal aayaa hai
vaqt ne tere baraabar na sahii
kuchh na kuchh apnaa karam us pe bhii farmaayaa hai
ab use terii zaruurat hii nahii.n
jis kaa da.avaa thaa kabhii
ab vo aqiidat hii nahii.n
terii tahviil me.n jo rakkhii thii kal
us ne anaa
aaj vo maa.ng rahaa hai vaapas
baat itnii sii hai
ai saahib-e-naam-o-shohrat
jis ko kal
tere KHudaa hone se inkaar na thaa
vo kabhii teraa parastaar na thaa

Javed Akhtar
Nazm

f b friend

jhaa.nke vo lafzo.n ke andar maa'nii aKHz kare
she'r ke aa.iine me.n utre shaa'ir tak pahu.nche

Munir Anwar
Nazm

hum ki insan nahin aankhen hain

kyaa faqat dekhte rahne se masaa.il kii girah khultii hai
kyaa faqat aa.nkh kii putlii me.n hai mahfuuz KHudaa.ii saarii
ham ki insaan nahii.n aa.nkhe.n hai.n
ham ne aa.nkho.n ko KHudaa samjhaa KHudaa.ii jaanaa
aa.ina dekhaa to in aa.nkho.n ne KHud ko bhii nahii.n pahchaanaa

Shahzad Ahmad
Nazm

dusra jism

aaj pat-jha.D se jiivan me.n pahle-pahal
mere be-rang banjar badan kii zamii.n
kulbulaane lagii
zalzala jism me.n aisaa barpaa hu.aa
sab dafiine KHaziine badan se ubalne lage
aablo.n aur chhaalo.n ke ankur nikalne lage
laal piile hare bai.nganii kattha.ii
zaKHm ke phuul khilne lage
mere be-rang banjar badan kii zamii.n lahlahaane lagii
merii hairat ba.Dhaane lagii
merii miTTii bhii upjaa.uu hai is qadar
mai.n ne sochaa na thaa
ik mahiine me.n
zaKHmo.n kii chhe saat fasle.n kaTii.n
zindagii-bhar kii mahruumiyo.n kaa gila miT gayaa
jism kii lahlahaatii zamii.n dekh kar meraa jii KHush hu.aa
zaKHm pahlaa jo thaa daaG hai
duusraa suukhne ke maraahil me.n hai
tiisraa phuul kii tarah khiltaa hu.aa
aur chauthaa kalii kii tarah hai chaTaktaa hu.aa
paa.nchvaa.n huu-bahuu hai kalii
aur chhaTaa kechu.e kii tarah
giilii miTTii me.n aahista se re.ngtaa hai abhii
saatvaa.n kulbulaataa hai zer-e-zamii.n
aaTHvaa.n ha.ns rahaa hai falak par kahii.n
paa.nv jaise mire mor ke ho ga.e
haath phuulo.n kaa dasta hu.aa
jism par daaG ke chaa.nd taare chamakne lage
ai KHudaa is navaazish pe teraa bahut shukr hai
lekin ab
is badan kii zamii.n
aane vaalii na.ii fasl ke vaaste tang pa.Dne lagii
mere maalik tuu ab
aablo.n kii na.ii fasl ko rok de
yaa mujhe duusraa jism de

Ateeq Anzar
Nazm

silsila-e-mukalimat-e-KHud-kalami

aadam-e-KHaakii kii paidaa.ish se pahle
jin kaa kahnaa thaa zamii.n par
KHuun bahaa.egaa ye naahaq
aur machaa.egaa fasaad
ab vahii peshengo umiid-vaar
is ke gun gaate hu.e thakte nahii.n
imtihaan-gaah-e-muqaddar ho to aisii
jis me.n pur-taab-o-tavaa.n ham
kaar-pardaazaan-e-fitrat laa-javaab
aur aadam us kii tiinat me.n to goyaa
hal-shuda pahle se the saare savaal
jin mazaahir kii taraf dekhaa nazar bhar kar
ma.aanii ke damak aThe unhii.n me.n muzmiraat
hikmat-e-ashyaa ke saa.nche me.n Dhalii
be-saaKHta ism-aafriinii marhabaa
KHaak-e-be-miqdaar ke zarraat me.n
jauhar-e-nutq-o-bayaa.n aisaa bhii maKHfii hai
kise ma.aluum thaa
imtihaa.n KHatm
aur masjuud-e-malaa.ik ban ga.ii insaa.n kii zaat
mai.n ne lekin sheva-e-inkaar apnaayaa
ki mai.n aatish-e-nihaad
martabe me.n KHaak-e-uftaada se bartar
asl me.n vaalaa guhar
chaahe aflaak-o-zamiin par
phail kar chhaa jaa.e ye musht-e-Gubaar
harba tasKHiir lekin kaargar mujh par bhii ho is kaa
yahii ik marhala hai ma.arke kaa
imtihaa.n ye saKHt-tar hai
kaamyaabii is me.n bhii paa.e yahii
umiid-vaar KHush-gumaa.n
aasaa.n nahii.n
merii apnii ik luGat hai
jis me.n asmaa ke ma.aanii baar-baar
ik na.ii ta.abiir ke aa.iina-daar
mansab-e-aazaadgii aadam kaa
ik parvaana-e-Gaarat-garii
is me.n likhaa hai
aur aagaahii
tabaahii ke vasaa.el tak rasaa.ii kaa javaaz
is me.n chhapaa hai
al-Garaz is khel kaa mohara vahii
ilm-e-asmaa hai magar
ik pur-fusuu.n taqliib-kaarii kaa shikaar
ik pur-fusuu.n taqliib-kaarii kaa shikaar

Shafiq Fatima Shera
Nazm

hai meri soch mein raqsan sabhi jazbaat ka rang

hai mirii soch me.n raqsaa.n sabhii jazbaat kaa rang
aur har rang se ba.Dh kar hai tirii zaat kaa rang

Ain Seen
Nazm

shahr mein

baa.ns kii ko.npalo.n kii tarah raat kii raat ba.Dhtii hu.ii la.Dkiyo
aa.ine ke har ik zaaviye se ulajhtii hu.ii la.Dkiyo
tasht-e-siimaab jhalkaatii jhuktii hu.ii la.Dkiyo
nit-na.e mausamo.n kii tarah mujh pe biitii hu.ii la.Dkiyo
mere hone ko tasliim kar lo to aage ba.Dhii.n
KHvaab-dar-KHvaab bas ek hii KHvaab hai
mere hone kaa KHvaab
bhaagte raasto.n me.n ko.ii sang raftaar-paimaa bataa de
ki mai.n chal rahaa thaa
bhii.D me.n chalte chalte achaanak ko.ii mujh ko kahnii se aage ba.Dhaa de
ki mai.n rahnumaa thaa
ko.ii fan kii devii
surayyaa se utre
mujhe apne andar samo le
ko.ii merii aa.nkho.n me.n chubhte hu.e zarra-e-reg ke vaaste
apne aa.nchal kaa konaa bhigo le
mujhe rishta-e-jism-o-jaa.n me.n piro le
ko.ii bas gha.Dii-do-gha.Dii saath ho le
yaa mujhe qulzum-e-KHud-faraamoshii-e-maavaraa me.n Dubo le
KHvaab-dar-KHvaab bas ek hii KHvaab hai
mere hone kaa KHvaab
saa.nvlii la.Dkiyo champa.ii la.Dkiyo nit-na.ii la.Dkiyo
mere hone ko tasliim kar lo to aage ba.Dhe.n
kaun jaane daraKHto.n ke piichhe na.ii KHushbu.e.n
raaste bhar hamaaraa svaagat kare.n
kaun jaane ki aahaT se Dartii hu.ii fa.Dfa.Daatii hu.ii faaKHtaa.e.n
hamaare suro.n par sipar taan de.n
aur ham sarsaraate hu.e aa.nchalo.n kii hu.aa o.Dh kar so rahe.n
yaa mirii jaan-e-jaa.n
kaun jaane ki aate dino.n me.n kisii roz andhii sa.Dak par
kisii chiiKHte bhuu.nkte kaale kutte se Darte hu.e
ham achaanak kahii.n aa mile.n
ajnabii raasto.n kii taraf chal pa.De.n
zehn me.n KHvaab kaa silsila phailtaa ho
aa.nkh me.n nii.nd kaa zaa.iqa tairtaa ho

Mohammad Anvar Khalid
Nazm

ek lamha

tum aanaa chaahtii ho dil kii dha.Dkan rok detii hai
ye kaisii kashmakash hai paa.nv rukte hai.n na chalte hai.n
na iqraar-e-tamanna hai na inkaar-e-mohabbat hai
ye kaise diip hai.n zaalim ki bujhte hai.n na jalte hai.n

Qaisarul Jafri
Nazm

ek makDa aur makkhi

ik din kisii makkhii se ye kahne lagaa mak.Daa
is raah se hotaa hai guzar roz tumhaaraa
lekin mirii kuTiyaa kii na jaagii kabhii qismat
bhuule se kabhii tum ne yahaa.n paa.nv na rakkhaa
Gairo.n se na miliye to ko.ii baat nahii.n hai
apno.n se magar chaahiye yuu.n khi.nch ke na rahnaa
aa.o jo mire ghar me.n to izzat hai ye merii
vo saamne sii.Dhii hai jo manzuur ho aanaa
makkhii ne sunii baat jo mak.De kii to bolii
hazrat kisii naadaan ko diijegaa ye dhokaa
is jaal me.n makkhii kabhii aane kii nahii.n hai
jo aap kii sii.Dhii pe cha.Dhaa phir nahii.n utraa

Allama Iqbal
Nazm

insan

ko.ii daanaa ye puuchhtaa thaa savaal
KHaakii insaa.n me.n aisaa kyaa hai kamaal
naa.eb allaah kaa ye ban baiThaa
nahii.n miltii kahii.n bhii is kii misaal
is kaa uqda nahii.n khulaa ab tak
kyo.n kiyaa is ko yuu.n buland-iqbaal
ye to majbuur apnii zaat me.n hai
vo ahad vo samad vo izz-o-jalaal
ye taGayyur ke saath jiitaa hai
shaan us kii kamaal-e-istiqlaal
yuu.n to maKHluuq hai magar phir bhii
kahii.n ausaaf me.n kabhii ho visaal
is kii taariif kyaa kare ko.ii
jab majaazii sifaat-e-husn-o-jamaal
us kii taariif kyaa bayaan karuu.n
chaahiye ik KHaziinat-ul-amsaal
jam.a azdaad is ke vasf me.n hai.n
aur vo ausaaf me.n kamaal-e-kamaal
is ke dil ko TaToliye to kabhii
nuur hai nuur kaa kabhii ibtaal
ik taraf intihaa pe hai.n hasanaat
ik taraf muntahaa-e-sharr-o-zalaal
kabhii aflaak tak rasaa.ii hai
kabhii tahtussaraa me.n ruu-ba-zavaal
kabhii allaah kaa payambar hai
ko.ii fir.aun saa shanii’ KHisaal
kabhii inkaar me.n anaa rabbii
aur anal-haq kabhii ba-pesh-e-jamaal
kabhii duniyaa me.n jannate.n aabaad
kabhii firdaus chho.Dne pe malaal
kabhii mehnat-kashii me.n laa-saanii
aur kabhii Garq-e-bahr-e-KHvaab-o-KHayaal
kabhii qaaruun kii shahanshaahii
kabhii faaqo.n ke saath akl-e-halaal
kabhii daanish me.n ye hai aflaatuun
aur kabhii fahm me.n hai jehl misaal
kabhii darmaandagii se pazhmurda
kabhii ummiid se qu.aa hai.n bahaal
kabhii ajraam par kamand-rasaa
aur kabhii zaaviyo.n me.n mast bahaal
kabhii uzlat-nashii.n pahaa.Do.n me.n
kabhii masruufiyat me.n jang-o-jidaal
kabhii andesha-haa-e-suud-o-ziyaa.n
aur kabhii aql se tahii a.amaal
kabhii ta.amiir kaa alam-bardaar
kabhii taKHriib par kare na malaal
kabhii naaquus o dair kaa hai asiir
kabhii sahraa.o.n me.n sadaa-e-bilaal

Salman Ghazi
Nazm

ye aankh muntazir hai kisi inqalab ki

sho.ale bha.Dak rahe hai.n
inaad-o-fasaad ke
is daur-e-aagahii me.n
to jiinaa azaab hai
makr-o-fareb kaa yahaa.n hai
jaal saa bichhaa
sach kaa yahaa.n to rahnaa hii
mutlaq haraam hai
taaza havaa bhii kaise mile
nasl-e-nau ko jab
aab-o-havaa me.n phailii buu
aaluudgii sii ho
manzar ye saare dekh ke
aa.nkhe.n baras pa.Dii.n
hai jaan kii amaa.n na hii
mahfuuz maal-o-zar
yaa-rab du.aa hai raat kii
kaalii ghaTaa haTe
ho jaa.e.n baarishe.n yahaa.n
anvaar-e-sahar kii
suurat nazar me.n aa.e
kisii chaaraagar kii ab
ye aa.nkh muntazir hai
kisii inqalaab kii

Sabeela Inam Siddiqui
Nazm

haiku

mushkil hai dar-pesh
dil ke andar rahtaa hai
kab se ik darvesh

Sabeela Inam Siddiqui
Nazm

kala patthar

meraa chehra aa.iina hai
aa.iine par daaG jo hote
lahuu kii barkhaa se mai.n dhotaa

Shakeb Jalali
Nazm

nannhi chiDiya

mere andar
kahii.n chup sii pa.Dii hai
ek nannhii chi.Diyaa
vo ab nahii.n phudaktii
nahii.n chahaktii
na hii baarish me.n
apne par bhigotii hai
Dar kar bijlii se
kisii vasii.a siine me.n
simaTnaa nahii.n chaahtii
bas aa.iine me.n
apnii cho.nch paTaktii hai
jaane kyaa kahnaa chaahtii hai
mere andar kii
nannhii chi.Diyaa

Asha Parbhat
Nazm

anar

mai.n suurat me.n achchhaa nahii.n huu.n magar
mujhe dekh lo tum zaraa to.D kar
mai.n andar se aa.u.ngaa tum ko pasand
mire peT me.n surKH motii hai.n band
vo motii agar kuchh dino.n khaa.oge
to tum KHud ko tandurust bhii paa.oge
jo daa.nto.n me.n apne dabaa.oge tum
to miiThaa araq mu.nh me.n paa.oge tum
miraa naam hai pyaare bachcho anaar
karo shukr rab kaa adaa baar baar
ki ne.amat banaa kar usii ne mujhe
zamii.n par ugaayaa tumhaare liye

Murtaza Sahil Tasleemi
Nazm

uDan

man kaa ye aa.nchal
chaahtaa to hai
khule aasmaan me.n u.Dnaa
hausla hai
dishaa.e.n hai.n
aur pa.nkh bhii hai.n u.Dne ke liye
magar
use u.Dne se inkaar hai
ki
ab bhii us kaa ko.ii siraa
zamiin se ju.Daa hai
shaayad

Ruchi Darolia
Nazm

ajnabi

muzmahil KHaal-o-KHad
ajnabii silvaTe.n
aur aa.nkho.n me.n kuchh
Gair maanuus sii uljhane.n
aaj sub.h shave karte hu.e
aa.iine me.n lagaa
mai.n nahii.n huu.n
ko.ii aur hai
ko.ii aisaa
jise mai.n nahii.n jaantaa

Munir Anwar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now