Search result for "aqaa.ed" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "aqaa.ed"

Nazm MATCHES FOR "aqaa.ed"

Nazm

ek darKHwast

zindagii ke jitne darvaaze hai.n mujh pe band hai.n
dekhnaa hadd-e-nazar se aage ba.Dh kar dekhnaa bhii jurm hai
sochnaa apne aqiido.n aur yaqiino.n se nikal kar sochnaa bhii jurm hai
aasmaa.n-dar-aasmaa.n asraar kii parte.n haTaa kar jhaa.nknaa bhii jurm hai
kyuu.n bhii kahnaa jurm hai kaise bhii kahnaa jurm hai
saa.ns lene kii to aazaadii mayassar hai magar
zinda rahne ke liye insaan ko kuchh aur bhii darkaar hai
aur is kuchh aur bhii kaa tazkira bhii jurm hai
ai KHudaavandaan-e-aivaan-e-aqaa.ed
ai hunar-mandaan-e-aa.iin-o-siyaasat
zindagii ke naam par bas ik inaayat chaahiye
mujh ko in saare jaraa.em kii ijaazat chaahiye

Ahmad Nadeem Qasmi

Nazm

nai tahzib

aqaa.ed par qayaamat aa.egii tarmiim-e-millat se
nayaa ka.aba banegaa maGribii putle sanam ho.nge

Akbar Allahabadi

Nazm

jahan zad

buu.Dhaa attaar vo kiimiyaa-gar ki jis ne
zamaano.n ke jangal se
chehro.n ke phuul aur buuTe chune
vo mujhe aur tujhe jaantaa thaa magar
mai.n ne baazaar me.n
tujh se aa.nkho.n kaa aur dil kaa saudaa kiyaa
ai hasan mere ek ik dariiche pe
kohna rivaayaat o zaalim aqaa.ed kaa jangal ugaa thaa
hasan
kaash to merii aa.nkho.n se mere dariiche ko taktaa
to ye jaan saktaa
jahaa.n tuu kha.Daa thaa vahaa.n ek ik darz se
merii aa.nkhe.n miraa jism
chhan chhan ke kaT kaT ke girtaa rahaa thaa

Ishrat Afreen

Nazm

qabil ka saya

magar is daur me.n ko.ii KHudaa aisaa nahii.n kartaa
ki ab shahro.n kii haalat agle sahraa.o.n se behtar hai
ki ab shahro.n me.n maar o azhdar o kargas nahii.n milte
kutub-KHaano.n me.n afkaar-o-aqaa.ed jalva-farmaa hai.n
hazaaro.n dars-gaahe.n daa.ii-e-aqdaar-e-insaa.n hai.n
siyah sa.Dko.n pe kaare.n hai.n fazaa.o.n me.n hai.n tayyaare
imaaraat-e-buland apne falak-paimaa dariicho.n se
mako.Do.n kii tarah chalte hu.e jismo.n ko taktii hai.n
hamaare shahr maaman hai.n hamaare shahr gulshan hai.n
ab in shahro.n me.n farsuuda KHudaa kii kyaa zaruurat hai

Sahar Ansari

Nazm

tulsidas

apnii naadaanii kahe.n yaa apnii qismat kaa qusuur
diid ke zarrii.n aqaa.ed se hu.e jaate the duur
apne maz.hab ke masaa.il se tabii.at thii nufuur
rahte the zikr-e-butaan-e-siim-tan kii dhun me.n chuur

Jagat Mohan Lal Ravan

Nazm

jahan-zad

ai hasan-kuuzaa-gar
tuu ne jaanaa ki mai.n
jism-o-jaa.n ke ta'alluq kii raushan guzargaah se
ik jahaa.n kaa safar jhel kar
is rifaaqat kii dahliiz tak aa.ii huu.n
ai hasan kaash tuu jaan saktaa
ki is sahn-e-KHaana se dahliiz tak ke safar me.n
jahaa.n-zaad ko kyo.n zamaane lage hai.n
hasan
is safar me.n jahaa.n-zaad ko ek ik gaam par
vaqt ke taaziyaane lage hai.n
hasan
vaqt maalik bhii hai devtaa bhii
muhaafiz bhii hai aur KHvaaja-saraa bhii
ye dekhaa hai mai.n ne
ki jab bhii dariicho.n me.n taaza shaguufa khilaa hai
havaa se vo ha.ns kar zaraa saa gale bhii milaa hai
to KHvaaja-saraa kii nazar se kahaa.n bach sakaa hai
magar dekh mujh ko
ki mai.n ne yahaa.n Thiik nau saal tak
phuul kaa.Dhe hai.n KHvaabo.n ke bistar pe lekin
abhii tak ko.ii in pe soyaa nahii.n
phuul taaza shagufta aur aazurda hai.n
mai.n ne nau saal suurat-garii kii hai tere har ik lams kii
raat bhar mai.n ne aa.nkhe.n bhigo.ii hai.n kuuzo.n me.n aur sub.h-dam
halq ko tar kiyaa aa.nsu.o.n se bahut
ye masaafat
ye nau saal kii be-mahaabaa masaafat
tire dar ke aage mujhe khii.nch laa.ii
magar tuu yahaa.n chaak par apnii dhun me.n magan hai
nigaahe.n uThaa
dekh to mai.n jahaa.n-zaad terii tire saamne huu.n
magar tuu ne sach hii kahaa thaa
zamaana jahaa.n-zaad vo chaak hai
jis pe miina-o-jaam-o-subuu aur faanuus-o-gul-daa.n kii maanind
bante biga.Dte hai.n insaa.n
so ab ham jo sadiyo.n kii lambii masaafat se lauTe hai.n
tuu apne ranjuur kuuzo.n me.n juujhaa hu.aa hai
ye teraa qusuur aur na merii KHataa hai
ko.ii kuuza-gar to hamaaraa bhii hogaa
so ye us kii hikmat
ki us ne hame.n chaak par Dhaalte vaqt
lamho.n kaa pher is nazaakat se rakkhaa
ki ham apnii apnii jagah sirf shashdar kha.De the
ka.ii dast-e-chaabuk ke be-jaan putle
mire aur tire darmiyaa.n saj ga.e the
so ye us kii hikmat
magar vaqt is darja saffaak kyo.n hai
ye mashshaata-e-zindagii itnii chaalaak kyo.n hai
mire aur tire darmiyaa.n nau baras jis ne laa kar bichhaa.e
ye nau saal kis tarh mai.n ne bitaa.e
ki saahil se kashtii tak aate hu.e
jaise taKHte ke hamraah dil Dagmagaa.e
vahii nau baras
jo mire aur tire darmiyaa.n vaqt kii kirchiyaa.n hai.n
zamaana bhii kaisii 'ajab kahkashaa.n hai
ye duniyaa-e-sayyaargaa.n hai ki jis me.n
hazaaro.n kavaakib
musalsal kisii chaak par ghuumte hai.n
ye ajsaam ke gird ajsaam kaa raqs hii zindagii hai mirii jaa.n
mirii jaan tuu chaak ke saath miTTii ke rishte ko pahchaantaa thaa
hasan tuu ne miTTii ke be-jaan putlo.n se
taKHliiq ke jaa.n-gusil marhalo.n me.n
sadaa guftuguu
sau tarah guftuguu kii
zihaanat ke putle mohabbat ke KHaaliq
faqat ye bataa de
ki tere 'anaasir ke ajzaa-e-tarkiibii me.n
vaahima kaise aayaa
hasan tuu vahaa.n jho.npa.De me.n
akelaa gale mil ke royaa thaa kis se
labiib aur tuu aur mai.n
aur haqiiqat me.n ko.ii nahii.n thaa
tiraa vaahima
mere lab mere gesuu se lipTaa rahaa thaa
labiib ek saayaa
jise tuu ne rog apnii jaa.n kaa banaayaa
ye saayaa kahii.n gar haqiiqat bhii hotaa
to aaKHir ko tuu is haqiiqat se kyo.n be-KHabar thaa
ki har jism ke saath ik aaftaab aur mahtaab laazim
ye tasliis qaa.em hai qaa.em rahegii
hasan mai.n tire saamne aa.ina thii
tire hijr aur vasl kaa aa.ina
inhimaak-o-ta'alluq kii miTTii se guu.ndhe hu.e jism ko
terii aa.nkho.n kii hiddat ne chamkaayaa thaa
terii KHalvat kii hairat ne vo rang-o-roGan kiye the
ki aa.iine shashdar kha.De rah ga.e the
magar terii KHalvat kii hairat me.n vahshat kaa jo shaa.iba thaa
nigaaho.n se merii kahaa.n chhup sakaa thaa
mire aur tire darmiyaa.n vasl kii har gha.Dii me.n
na jaane kahaa.n se
vahii soKHta-baKHt terii
ki jo jaa.n-fishaanii ke sho'lo.n se dahke hu.e
zindagii ke abad-taab tannuur par
u.ngliyaa.n tere bachcho.n kii thaame kha.Dii
bhuuk se barsar-e-jang thii
jis ke nazdiik ye
tere kuuze tiraa fan tirii aag sab
merii aa.nkhe.n mire phuul aur KHvaab sab
zindagii ke abad-taab tannuur kii raakh the
terii is soKHta-baKHt ko kyaa KHabar
jab zamii.n apne mehvar kii tajdiid me.n
harf-e-laa se guzar jaa.egii
to hazaaro.n baras baa'd bhii
ye azal ke gharo.ndo.n kii miTTii me.n madfuun
phuul aur buuTe ye kuuze
aur un me.n unhii qaaf aa.nkho.n se chhalke hu.e
surKH paanii kii talchhaT
kisii kuuza-gar ke javaa.n lams se jii uThe to
jahaa.n-zaad us ke liye phir janam legii
aur nau baras raqs karte guzar jaa.e.nge
terii is soKHta-baKHt ko kyaa KHabar
vo raat
vo halab kii kaarvaa.n-saraa kaa hauz
jis ko mai.n ne jism-o-jaa.n kii KHushbu.e.n kashiid kar ke
qatra-qatra nau baras me.n aa.nsu.o.n se pur kiyaa
vo ek raat sirf ek raat me.n
tamaam KHushk ho gayaa
ham apne vasl kii tamaazato.n me.n aise jal-bujhe
ki raakh tak nahii.n bachii
ye ek jaa.n kii tishnagii
mujhe tujhe ba-yak-zamaa.n
bhalaa kahaa.n kahaa.n na khii.nchtii phirii
magar ye tuu ne kyaa kahaa
ki tere jaisii 'aurate.n jahaan-zaad
aisii uljhane.n hai.n jin ko aaj tak ko.ii nahii.n suljhaa sakaa
ki 'aurato.n kii saaKHt hai vo tanz apne aap par
javaab jin kaa ham nahii.n
to phir ye jaam-o-miinaa-o-subuu-o-hauz-o-ruud-e-niil
is zamii.n kii god me.n
azal ke harf-giir taabnaak KHvaab ke liye
kahii.n bhii kuchh raqam nahii.n
ai hasan
chaak par se zaraa apnii nazre.n haTaa
tuu mire nau baras tak banaa.e ga.e phuul to dekh le
phuul taaza shagufta aur aazurda hai.n
yuu.n na ho ki inhe.n
bhuuk aur muflisii ke sataa.e hu.e
mere bachche bhii niilaam kar aa.e.n jaa kar kahii.n
tere kuuzo.n ke maanind baGdaad me.n
ai hasan
daaman-e-vaqt par jitne phuul aur buuTe saje hai.n
jahaa.n-zaad kii zaKHmii poro.n ne
rang un me.n apne junuu.n ke bhare hai.n
ye taavaan hai.n champa.ii u.ngliyo.n kaa
tire jaam-o-miinaa pe
jis KHaal-o-KHad kii nazaakat kii parchhaa.iiyaa.n thii.n
tujhe kyaa KHabar ye kin aa.nkho.n kii biinaa.iyaa.n thii.n
hasan ye mohabbat
ki jis ko tirii soKHta-baKHt gardaantii hai
amiiro.n kii baazii
to mere ta.ii.n ye amiiro.n kii baazii kahaa.n
sirf baaziigarii thii
mohabbat hamesha se muflis kaa sarmaaya-e-jaa.n rahii hai
yahii to vo puu.njii hai
jis tak amiiro.n ke haath ab bhii pahu.nche nahii.n hai.n
tujhe ye gumaa.n thaa
ki 'aurat mohabbat kii baazii me.n be-jaan patte kii suurat
kisii dast-e-chaabuk kii marhuun-e-minnat
vo is khel me.n ek mohre kii suurat
ki jab jis ne chaahaa
ise ek ghar se uThaa kar
kisii duusre ghar kaa maalik banaayaa
ki 'aurat faqat ek patthar kii muurat
ye tasviir-e-hairat
yuu.nhii chup kha.Dii hai
yuu.nhii chup rahegii
magar yuu.n nahii.n hai
hasan tuu ne dekhaa
ki mai.n qaid-e-auhaam o band-e-rivaayaat me.n
buu.Dhe 'attaar yuusuf kii dukkaan par
apnii aa.nkhe.n tujhe nazr kartii rahii
buu.Dhaa 'attaar vo kiimiyaa-gar
ki jis ne zamaano.n ke jangal se
chehro.n ke phuul aur buuTe chune
vo mujhe aur tujhe jaantaa thaa magar
mai.n ne baazaar me.n
tujh se aa.nkho.n kaa aur dil kaa saudaa kiyaa
ai hasan
mere ek ik dariiche pe
kohna rivaayaat o zaalim 'aqaa.ed kaa jangal ugaa thaa
hasan
kaash tuu merii aa.nkho.n se mere dariiche ko taktaa
to ye jaan saktaa
jahaa.n tuu kha.Daa thaa vahaa.n ek ik darz se
merii aa.nkhe.n miraa jism
chhan chhan ke
kaT kaT ke girtaa rahaa thaa

Ishrat Afreen

Nazm

faisla

nahii.n mere liye kuchh bhii
ko.ii rishta nahii.n meraa kisii se bhii
aqaa.ed tajrabe jho.nke havaa.o.n ke
har ik saaya paraayaa hai
har ik ummiid jhuuTii hai
mai.n tanhaa hii chalaa thaa apne ghar se jab chalaa thaa mai.n
rahaa huu.n umr bhar tanhaa
akelaa hii chalaa jaa.uu.ngaa ik lambe safar par mai.n
kisii din dekh le.nge sab
na khulvaa.o zabaa.n merii
likhii hai aa.nsuu.o.n ne daastaa.n merii
har ik kaavish ga.ii hai raa.egaa.n merii
nahii.n ta.abiir ko.ii mere KHvaabo.n kii
nahii.n qiimat yahaa.n merii kitaabo.n kii
pa.Dhaa kis ne mujhe aaKHir
likhaa hai jis qadar mai.n ne
mujhe lagtaa hai sab dhu.ndlii lakiire.n hai.n
yahaa.n ke saare daanish-var yahaa.n ke saare diida-var
sabhii ahl-e-basiirat ahl-e-dil miinaar azmat ke
merii suurat to kyaa hai naam se vaaqif nahii.n ko.ii
yahii ehsaa.n karo mujh par mire sab harf jhuTlaa do
mujhe gumnaamiyo.n me.n dafn kar do aur itraa.o

Naseer Parwaz

Nazm

bechaini

KHayaal-o-KHvaab-o-aqaa.ed kii sehar-kaarii tak
ghuTe ghuTe se shab-o-roz the bujhii sii fazaa
na jaan.ne se chalii baat jaan.ne kii taraf
sukuut-e-maut hai lekin sukuut KHatm hu.aa

Daur Afridi

Nazm

lauh-e-ayyam

aqaa.ed kirm-KHurda
KHatt-e-naa-maaluum me.n likkhii kitaabo.n me.n
kahii.n mahfuuz hai.n
ma.aluum kii buniyaad naa-maaluum par
ik maz.haka
ye silsila mansuuKH kab hogaa
mai.n jo kuchh maantaa huu.n jaantaa hogaa
mujhe ye jaan.naa hogaa
ki mai.n ik din
daruun-e-qabr, zer-e-KHaak
KHaak-e-sard o naa-hamvaar me.n so jaa.uu.ngaa
aur mere chehre ho.nTo.n aa.nkho.n me.n
chale.ngii chyuu.nTiyaa.n raste banaa de.ngii
hu.aa thaa ruunumaa jis se mujhe us me.n milaa de.ngii
mujhe ye jaan.naa hogaa
ki ik din mai.n nahii.n huu.ngaa
magar ye roz o shab
ye shaadii o Gam
dasht dariyaa koh
aur ye zindagii kaa shor-e-baa-taG.iir sab baaqii rahegaa
haa.n mujhe ye jaan.naa hogaa
ki garche mai.n nahii.n huu.ngaa
ye meraa haq-o-naa-haq
sabt hotaa jaa rahaa hai
aur sadaa baaqii rahegaa

Shahram Sarmadi

Nazm

ya KHuda

saare afkaar-o-aqaa.ed ke tilism
saare asnaam-e-KHayaal
ham ne vo but-shikanii kii hai ki mismaar hai.n sab
apne ghar baar kii mahfuuz fasiile.n ham ne
yuu.n giraa.ii hai.n ki ab
duur-o-nazdiik kii har tund havaa
sab charaaGo.n ko bas ik phuu.nk me.n gul kar jaa.e
ham ki har silsila-o-qaid kii zanjiir se aazaad hu.e
aise majlis ke makii.n hai.n ki jahaa.n
ko.ii darvaaza ko.ii rauzan-e-diivaar nahii.n
yaa KHudaa
ko.ii Gam aisaa ki har Gam ko subuksaar kare
ko.ii aag aisii ki har aag ko KHaashaak kare
ko.ii mafhuum ko.ii naqsh-e-tamannaa ki jise
apne dil-o-jaa.n kaa lahuu nazr karuu.n
surKH-ruu ho ke kahuu.n
ziist kii ye mohlat do-ek nafas
itnii be-rang na thii
itnii faromaaya na thii

Mahmood Ayaz

Nazm

asas

hamaarii saarii zaruurate.n bhii hai.n ek jaisii
mohabbate.n bhii sadaaqate.n bhii
numaa.ishe.n bhii rifaaqate.n bhii
hamaare siino.n me.n zau-fishaa.n hai.n
lahuu kii suurat hamaare andar ravaa.n-davaa.n hai.n
tumhe.n jo Gam hai usii ne aksar mujhe chhu.aa hai
hayaat kaa kaa.enaat kaa Gam
tahaarat-e-vaajibaat kaa Gam
taqaddus-e-iltifaat kaa Gam
magar ye lagtaa hai har qadam par
tamaam sachchaa.iyaa.n pahan kar
dilo.n kii gahraa.iyaa.n pahan kar
vafaa kii parchhaa.iyaa.n pahan kar
hamaare andar hazaar-haa faasle to ab tak bichhe hu.e hai.n
kahii.n usuulo.n kii dhuup dil ko tapaa rahii hai
kahii.n aqaa.ed kii aa.ndhiyaa.n hai.n
kahii.n KHudii raaste kaa patthar
anaa kahii.n sar pe saaya-afgan
na tum hamaare na ham tumhaare
ghuTan hamaare nasiib me.n hai
na jii rahe hai.n na mar rahe hai.n
KHud apne saa.e se Dar rahe hai.n
qariib rah kar judaa judaa hai.n
Gamo.n me.n Duubii ko.ii sadaa hai.n
KHud apne idraak se KHafaa hai.n
pas-e-vafaa naqsh-e-bevafaa hai.n
hamaare andar
abhii bhii sadiyo.n kii duuriyaa.n hai.n
abhii bhii sadiyo.n ke faasle hai.n
adhuure tum bhii adhuure ham bhii
na aas ko.ii sukuun dil kii
na raushnii kaa ko.ii asaasa
kahii.n nahii.n silsila yaqii.n kaa
nasiib hogaa kise KHiraaj-e-nigaah-e-ulfat
kise pata ki kahaa.n milegii zamii.n pe qurbat
tum apne ghar me.n ham apne ghar me.n
udaas tum bhii udaas ham bhii
barahna-paa be-libaas ham bhii
hai.n be-karaa.n faaslo.n kii zad me.n
Gamo.n kii zad me.n
na tum salaamat na ham salaamat
yahii muqaddar yahii sadaaqat
yahii hai bas aaKHirii haqiiqat
ki KHvaab sii lag rahii hai ab raushnii kii saa.at

Naseer Parwaz

Nazm

nazm

kaash hotaa na zamaane me.n yuu.n adyaan kaa farq
nasl kaa chehre kaa KHad-KHaal kaa pahchaan kaa farq
ahl-e-hinduu kaa masiihii kaa musalmaan kaa farq
dahr ke bejaa aqaa.ed kaa aur iimaan kaa farq

Manzar Suhai

Nazm

shair

chhuT rahii hai nabz-e-hastii aa rahaa hai inqalaab
uTh rahaa hai aaj farsuuda aqaa.ed kaa suhaag

Akhtar Payami

Nazm

iblis ka etiraf

tuu ne jis vaqt ye insaan banaayaa yaa-rab
us gha.Dii mujh ko to ik aa.nkh na bhaayaa yaa-rab
is liye mai.n ne sar apnaa na jhukaayaa yaa-rab
lekin ab palTii hai kuchh aisii hii kaayaa yaa-rab
aql-mandii hai isii me.n ki mai.n tauba kar luu.n
sochtaa huu.n ki ab insaan ko sajda kar luu.n
ibtidaa.an thii ba.Dii narm tabii'at is kii
qalb-o-jaa.n paak the shaffaaf thii tiinat is kii
phir ba-tadriij badalne lagii KHaslat is kii
ab to KHud mujh pe musallat hai sharaarat is kii
is se pahle ki mai.n apnaa hii tamaashaa kar luu.n
sochtaa huu.n ki ab insaan ko sajda kar luu.n
bhar diyaa tuu ne bhalaa kaun saa fitna is me.n
paktaa rahtaa hai hamesha ko.ii laavaa is me.n
ek ik saa.ns hai ab suurat-e-sho.ala is me.n
aag maujuud thii kyaa mujh se ziyaada is me.n
apnaa aatish-kada-e-zaat hii ThanDaa kar luu.n
sochtaa huu.n ki ab insaan ko sajda kar luu.n
ab to ye KHuu.n ke bhii rishto.n se aka.D jaataa hai
baap se bhaa.ii se beTe se bhii la.D jaataa hai
jab kabhii taish me.n hatthe se ukha.D jaataa hai
KHud mire shar kaa tavaazun bhii biga.D jaataa hai
ab to laazim hai ki mai.n KHud ko hii siidhaa kar luu.n
sochtaa huu.n ki ab insaan ko sajda kar luu.n
merii nazro.n me.n to bas miTTii kaa maadhav thaa bashar
mai.n samajhtaa thaa ise KHud se bahut hii kamtar
mujh pe pahle na khule is ke siyaasii jauhar
kaan mere bhii katartaa hai ye leader ban kar
shaitanat chho.D ke mai.n bhii yahii dhandaa kar luu.n
sochtaa huu.n ki ab insaan ko sajda kar luu.n
ab jhijhaktaa hai na Dartaa hai na sharmaataa hai
nit na.ii fitna-garii roz ye dikhlaataa hai
ab ye zaalim mere bahkaave me.n kab aataa hai
mai.n buraa sochtaa rahtaa huu.n ye kar jaataa hai
kyaa abhii is kii muriidii kaa iraada kar luu.n
sochtaa huu.n ki ab insaan ko sajda kar luu.n
ab jagah ko.ii nahii.n mere liye dhartii par
mere shar se bhii sivaa hai yahaa.n insaan kaa shar
ab to lagtaa hai yahii faisla mujh ko behtar
is se pahle ki pahu.nch jaa.e yaa.n superpower
mai.n kisii aur hii sayyaare pe qabza kar luu.n
sochtaa huu.n ki ab insaan ko sajda kar luu.n
zulm ke daam bichhaa.e hai.n niraale is ne
nit na.e pech 'aqaa.ed me.n bhii Daale is ne
kar diye qaid a.ndhero.n me.n ujaale is ne
kaam jitne the mire saare sa.nbhaale is ne
ab to KHud ko mai.n har ik bojh se halkaa kar luu.n
sochtaa huu.n ki ab insaan ko sajda kar luu.n
istaqaamat thii kabhii is kii musiibat mujh ko
apne Dhab par ise laanaa thaa qayaamat mujh ko
karnii pa.Dtii thii bahut is pe mashaqqat mujh ko
ab ye 'aalam hai ki din-raat hai fursat mujh ko
ab kahii.n gosha-nashiinii me.n guzaara kar luu.n
sochtaa huu.n ki ab insaan ko sajda kar luu.n
mast thaa mai.n tere insaa.n kii hiqaarat kar ke
KHud pe naazaa.n thaa bahut tujh se baGaavat kar ke
kyaa milaa mujh ko magar aisii himaaqat kar ke
ab yahii kahtaa huu.n mai.n KHud pe malaamat kar ke
kyaa ye mumkin hai ki phir terii itaa'at kar luu.n
sochtaa huu.n ki ab insaan ko sajda kar luu.n

Talib Khund Meri

Nazm

aaya hai naya sal

iThlaataa hu.aa jhuum ke aaya hai nayaa saal
lahraataa hu.aa jhuum ke aaya hai nayaa saal
aaya hai nayaa saal
ai sa.ii-e-musalsal tire e.ajaaz ke sadqe
haasil ko ga.e saal kii me.araaj mubaarak
kirno.n se a.ndhere kii qabaa kholne vaale
aaGaaz ko is saal kaa ye aaj mubaarak
paiGaam ka.ii tarah ke laayaa hai nayaa saal
in.aam ka.ii tarah ke laayaa hai nayaa saal
aaya hai nayaa saal
be-laus mohabbat ke uKHuvvat ke karam se
har samt jidhar dekhe.n masarrat kii fazaa hai
afsaana-e-jamhuur kii rangiin haqiiqat
tahziib-o-tamaddun kii muravvat kii fazaa hai
har dil ke rag-o-resha pe chhaayaa hai nayaa saal
har zehn ke aa.iine pe chhaayaa hai nayaa saal
aaya hai nayaa saal
paikar the rifaaqat ke vatan-dost saraasar
maidaan-e-taraqqii me.n hamesha jo baham the
chalte rahe har haal salaabat kii Dagar par
vaabasta-e-manzil vo hamaare hii qadam the
jhelaa hai jo ik saal to paayaa hai nayaa saal
khoyaa hai jo ik saal to paayaa hai nayaa saal
aaya hai nayaa saal
nairangii-e-afkaar-o-aqaa.ed se labaalab
har chand ra.ngaa-rang hai paimaana-e-jamhuur
ik ruuh-e-vatan husn-e-saqaafat ke karam se
yak-rang hii yak-rang hai mai-KHaana-e-jamhuur
kirdaar-e-musaavaat kaa jaayaa hai nayaa saal
ik-tarfa karaamaat kaa jaayaa hai nayaa saal
aaya hai nayaa saal
laazim hai ki a.amaal ko ik aisii adaa de.n
jamhuur ke kirdaar ko kuchh aur uThaa de.n
nafrat ko ta.assub ko tah-e-KHaak sulaa de.n
tafriiq kaa taKHriib kaa har naqsh miTaa de.n
har tesha-e-ta.amiir ko mehnat kii jilaa de.n
tadbiir se jamhuur kii taqdiir banaa de.n
ham kyaa hai.n sar-e-dast zamaane ko bataa de.n
har KHvaab ko ta.abiir kii sarhad se milaa de.n
kis aan se kis baan se aaya hai nayaa saal
haa.n dekhiye kis shaan se aaya hai nayaa saal
aaya hai nayaa saal
aaya hai nayaa saal

Ram Parkash Rahi

Nazm

daraKHt-e-zard

hadaf ho.nge tumhaaraa kaun tum kis ke hadaf hoge
na jaane vaqt kii paikaar me.n tum kis taraf hoge
hai ran ye zindagii ik ran jo barpaa lamha lamha hai
hame.n is ran me.n kuchh bhii ho kisii jaanib to honaa hai
so ham bhii is nafas tak hai.n sipaahii ek lashkar ke
hazaaro.n saal se jiite chale aa.e hai.n mar mar ke
shuhuud ik fan hai aur merii adaavat be-fano.n se hai
mirii paikaar azal se
ye 'KHusro' 'miir' 'Gaalib' kaa KHaraaba bechtaa kyaa hai
hamaaraa 'Gaalib'-e-aazam thaa chor aaqa-e-'bedil' kaa
so rizq-e-faKHr ab ham khaa rahe hai.n 'miir'-e-bismil kaa
sidhaarat bhii thaa sharminda ki do-aabe kaa baasii thaa
tumhe.n ma.aluum hai urdu jo hai paalii se niklii hai
vo goyaa us kii hii ik pur-numuu Daalii se niklii hai

Jaun Eliya

Nazm

sone se pahle ek KHayal

mujhe november kii dhuup kii tarah mat chaaho
ki is me.n Duubo to tamaazat me.n nahaa jaa.o
aur is se alag ho to
ThanDak ko por por me.n utartaa dekho
mujhe saavan ke baadal kii tarah chaaho
ki us kaa saaya bahut gahraa
nas nas me.n pyaas bujhaane vaalaa
magar us kaa vajuud pal me.n havaa
pal me.n paanii kaa Dher
mujhe shaam kii shafaq kii tarah mat chaaho
ki aasmaan ke qurmuzii ra.ngo.n kii tarah
mere gaal surKH
magar lamha-bhar ba.ad
hijr me.n nahaa kar, raat sii mailii mailii
mujhe chaltii havaa kii tarah mat chaaho
ki jis ke qayaam se dam ghuTtaa hai
aur jis kii tez-ravii qadam ukhe.D detii hai
mujhe Thahre paanii kii tarah mat chaaho
ki mai.n is me.n ka.nval ban ke nahii.n rah saktii huu.n
mujhe bas itnaa chaaho
ki mujh me.n chaahe jaane kii KHvaahish jaag uThe!

Kishwar Naheed

Nazm

shararti laDke aur qawwali

apne teacher ko nachaa.e.n to maza aa jaa.e
un kii ainak ko churaa.e.n to maza aa jaa.e
un ke DanDe ko chhupaa.e.n to maza aa jaa.e
aaj jii bhar ke sataa.e.n to maza aa jaa.e
kaun saa din hai jo teacher ne nahii.n maaraa hai
ham ne har kaam kiyaa phir bhii to phaTkaaraa hai
un kaa Gussa hai ki dahkaa hu.aa a.ngaaraa hai
aag me.n aag lagaa.e.n to maza aa jaa.e
mu.nh pe chaa.nTe bhii diye ham ne banaayaa murGaa
ham ne school se har roz ye tamGa paayaa
kitne jallaad hai.n teacher are allaah allaah
ham bhii mu.nh un kaa cha.Dhaa.e.n to maza aa jaa.e
vo pa.Dhaate hai.n to ausaan KHataa hote hai.n
haq pa.Dhaa.ii ke ye dushvaar adaa hote hai.n
ham agar rote hai.n phir aur KHafaa hote hai.n
aaj un ko bhii rulaa.e.n to maza aa jaa.e
un kii kursii pe chalo aa.o paTaaKHe baa.ndhe.n
jab vo aa.e.n to paTaaKHo.n kaa ta.Dapnaa dekhe.n
ham bhii shaagird-e-sitam-gaar hai.n itnaa maane.n
piichhe piichhe hii bhagaa.e.n to mazaa aa jaa.e
un kii jo chiiz hai chupke se chhupaa de.n aa.o
paan bii.Dii kii jo Dibiyaa hai u.Daa de.n aa.o
ham sharaarat ke na.e jaal bichhaa de.n aa.o
vo kisii jaal me.n aa.e.n to mazaa aa jaa.e
vo agar saamne aa jaa.e.n to mil kar chiiKHe.n
vo kahe.n chup raho ham aur bhii ha.ns kar chiiKHe.n
aur vo aa.nKHe.n dikhaa.e.n to aka.D kar chiiKHe.n
un ko diivaana banaa.e.n to maza aa jaa.e

Hasrat Jaipuri

Nazm

tarah-e-nau

sehn-e-jahaa.n me.n raqs-kunaa.n hai.n tabaahiyaa.n
aaqaa-e-hast-o-buud kii san.at-garii kii KHair

Sahir Ludhianvi

Nazm

tum hanste kyun ho

kyaa ab raat aise hii
guzar jaa.egii
ye raat hii to hai
jo tahliil ho jaatii hai ek nuqte me.n
aur ghuumtii hai
mere gird kaale bhinbhinaate hu.e
bha.nvre kii tarah
vo mere kaano.n mirii aa.nkho.n
merii gardan aur mere ro.e.n ro.e.n me.n
bhinbhinaatii hai
merii baGlo.n ke baalo.n se ulajhtii hu.ii
mere jism ke kone khudro.n me.n
gudgudaatii hu.ii
ye raat mere uupar phail jaatii hai
achaanak
o.Dh letii hai mujhe
mere jism kii por por me.n
ek jal-tara.ng chhe.D detii hai
mai.n nii.nd me.n uThtii huu.n
miraa halq KHushk ho rahaa hai
paanii kaa ek gilaas ThanDaa yaKH
mere ho.nTo.n mere halq mere siine
ko tar kartaa hu.aa
mere jism kii jal-tara.ng me.n mil jaataa hai
mai.n darvaaze par dastak detii huu.n
tum sun rahe ho
raat kii jal-tara.ng mere jism se
phuuT rahii hai
darvaaza khultaa hai
mai.n tumhaare aadhe na.nge badan ko
daboch letii huu.n
tumhaarii naaf ke ga.Dhe me.n
naak kii nok ghuse.Dtii huu.n
tum muskuraa rahe ho
raat kii sharaarat mere jism par
phaile hu.e dekh kar
tum ha.nste
raat kono.n khudro.n me.n phail rahii hai
mai.n tumhaare kap.De utaar detii huu.n
aur vo khel kheltii huu.n
jo raat mere saath khel rahii thii
mai.n tumhaare jism ke gird
apnii zabaan apne daa.nto.n aur naaKHuno.n ke saath
bhinbhinaane lagtii huu.n
tum muskuraa rahe ho
tumhaarii muskuraahaT
mere jism kii poro.n ko aur khol rahii hai
mai.n zaKHmii kar detii huu.n tumhe.n
tum ha.ns rahe ho
raat ke paro.n pe savaar bha.nvre kii tarah
mujhe bhinbhinaate dekh kar
tumhaarii kushaada aa.nkho.n ke kone
phailne lagte hai.n
tumhaaraa jism aka.D jaataa hai
nahii.n aaj tum
tum khilkhilaate ho
mai.n tumhaare ak.De hu.e jism par
apnii khulii hu.ii poro.n ko rakh detii huu.n
tumhaaraa jism raat ke jhaag se bhar jaataa hai
tum ha.nste ho
ha.nste hii rahte ho

Azra Abbas

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now