Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bahaal"

Nazm MATCHES FOR "bahaal"

Nazm

itna malum hai!

naam bhuule se jo meraa kahii.n aayaa hogaa
Gair-mahsuus tariiqe se vo chau.nkaa hogaa
ek jumle ko ka.ii baar sunaayaa hogaa
baat karte hu.e sau baar vo bhuulaa hogaa
ye jo la.Dkii na.ii aa.ii hai kahii.n vo to nahii.n
us ne har chehra yahii soch ke dekhaa hogaa
jaan-e-mahfil hai magar aaj faqat mere baGair
haa.e kis darja vahii bazm me.n tanhaa hogaa
kabhii sannaaTo.n se vahshat jo hu.ii hogii use
us ne be-saaKHta phir mujh ko pukaaraa hogaa
chalte chalte ko.ii maanuus sii aahaT paa kar
dosto.n ko bhii kis uzr se rokaa hogaa
yaad kar ke mujhe nam ho ga.ii ho.ngii palke.n
''aa.nkh me.n pa.D gayaa kuchh'' kah ke ye Taalaa hogaa
aur ghabraa ke kitaabo.n me.n jo lii hogii panaah
har satar me.n miraa chehra ubhar aayaa hogaa
jab milii hogii use merii alaalat kii KHabar
us ne aahista se diivaar ko thaamaa hogaa
soch kar ye ki bahal jaa.e pareshaanii-e-dil
yuu.nhii be-vaj.h kisii shaKHs ko rokaa hogaa!

Parveen Shakir
Nazm

aurat

uTh mirii jaan mire saath hii chalnaa hai tujhe
qalb-e-maahaul me.n larzaa.n sharar-e-ja.ng hai.n aaj
hausle vaqt ke aur ziist ke yak-ra.ng hai.n aaj
aabgiino.n me.n tapaa.n valvala-e-sa.ng hai.n aaj
husn aur ishq ham-aavaaz o ham-aaha.ng hai.n aaj
jis me.n jaltaa huu.n usii aag me.n jalnaa hai tujhe
uTh mirii jaan mire saath hii chalnaa hai tujhe
tere qadmo.n me.n hai firdaus-e-tamaddun kii bahaar
terii nazro.n pe hai tahziib o taraqqii kaa madaar
terii aaGosh hai gahvaara-e-nafs-o-kirdaar
taa-ba-kai gird tire vahm o ta.ayyun kaa hisaar
kau.nd kar majlis-e-KHalvat se nikalnaa hai tujhe
uTh mirii jaan mire saath hii chalnaa hai tujhe
tuu ki be-jaan khilauno.n se bahal jaatii hai
taptii saa.nso.n kii haraarat se pighal jaatii hai
paa.nv jis raah me.n rakhtii hai phisal jaatii hai
ban ke siimaab har ik zarf me.n Dhal jaatii hai
ziist ke aahanii saa.nche me.n bhii Dhalnaa hai tujhe
uTh mirii jaan mire saath hii chalnaa hai tujhe
zindagii jehd me.n hai sabr ke qaabuu me.n nahii.n
nabz-e-hastii kaa lahuu kaa.npte aa.nsuu me.n nahii.n
u.Dne khulne me.n hai nik.hat KHam-e-gesuu me.n nahii.n
jannat ik aur hai jo mard ke pahluu me.n nahii.n
us kii aazaad ravish par bhii machalnaa hai tujhe
uTh mirii jaan mire saath hii chalnaa hai tujhe
goshe goshe me.n sulagtii hai chitaa tere liye
farz kaa bhes badaltii hai qazaa tere liye
qahr hai terii har ik narm adaa tere liye
zahr hii zahr hai duniyaa kii havaa tere liye
rut badal Daal agar phuulnaa phalnaa hai tujhe
uTh mirii jaan mire saath hii chalnaa hai tujhe
qadr ab tak tirii taariiKH ne jaanii hii nahii.n
tujh me.n sho.ale bhii hai.n bas ashk-fishaanii hii nahii.n
tuu haqiiqat bhii hai dilchasp kahaanii hii nahii.n
terii hastii bhii hai ik chiiz javaanii hii nahii.n
apnii taariiKH kaa unvaan badalnaa hai tujhe
uTh mirii jaan mire saath hii chalnaa hai tujhe
to.D kar rasm kaa but band-e-qadaamat se nikal
zof-e-ishrat se nikal vahm-e-nazaakat se nikal
nafs ke khii.nche hu.e halqa-e-azmat se nikal
qaid ban jaa.e mohabbat to mohabbat se nikal
raah kaa KHaar hii kyaa gul bhii kuchalnaa hai tujhe
uTh mirii jaan mire saath hii chalnaa hai tujhe
to.D ye azm-shikan daGdaGa-e-pand bhii to.D
terii KHaatir hai jo zanjiir vo saugand bhii to.D
tauq ye bhii hai zamurrad kaa guluu-band bhii to.D
to.D paimaana-e-mardaan-e-KHirad-mand bhii to.D
ban ke tuufaan chhalaknaa hai ubalnaa hai tujhe
uTh mirii jaan mire saath hii chalnaa hai tujhe
tuu falaatuun o arastuu hai tuu zahraa parvii.n
tere qabze me.n hai garduu.n tirii Thokar me.n zamii.n
haa.n uThaa jald uThaa paa-e-muqaddar se jabii.n
mai.n bhii rukne kaa nahii.n vaqt bhii rukne kaa nahii.n
la.Dkha.Daa.egii kahaa.n tak ki sambhalnaa hai tujhe
uTh mirii jaan mire saath hii chalnaa hai tujhe

Kaifi Azmi
Nazm

daraKHt-e-zard

tumhaarii jo hamaasa hai bhalaa us kaa to kyaa kahnaa
hai shaayad mujh ko saarii umr us ke sehr me.n rahnaa
magar mere Gariib ajdaad ne bhii kuchh kiyaa hogaa
bahut tuchchaa sahii un kaa bhii ko.ii maajraa hogaa
ye ham jo hai.n hamaarii bhii to hogii ko.ii nauTa.nkii
hamaaraa KHuun bhii sach-much kaa sehne par bahaa hogaa
hai aaKHir zindagii KHuun az-bun-e-naaKHun bar-aavar-tar
qayaamat saaneha matlab qayaamat faaje.a parvar

Jaun Eliya
Nazm

jashn-e-ghaalib

ye jashn ye ha.ngaame dilchasp khilaune hai.n
kuchh logo.n kii koshish hai kuchh log bahal jaa.e.n
jo vaada-e-fardaa par ab Tal nahii.n sakte hai.n
mumkin hai ki kuchh arsa is jashn pe Tal jaa.e.n

Sahir Ludhianvi
Nazm

ramayan ka ek scene

ruKHsat hu.aa vo baap se le kar KHudaa kaa naam
raah-e-vafaa kii manzil-e-avval hu.ii tamaam
manzuur thaa jo maa.n kii ziyaarat kaa intizaam
daaman se ashk po.nchh ke dil se kiyaa kalaam
iz.haar-e-be-kasii se sitam hogaa aur bhii
dekhaa hame.n udaas to Gam hogaa aur bhii
dil ko sa.nbhaaltaa hu.aa aaKHir vo naunihaal
KHaamosh maa.n ke paas gayaa suurat-e-KHayaal
dekhaa to ek dar me.n hai baiThii vo KHasta-haal
saktaa saa ho gayaa hai ye hai shiddat-e-malaal
tan me.n lahuu kaa naam nahii.n zard rang hai
goyaa bashar nahii.n ko.ii tasviir-e-sa.ng hai
kyaa jaane kis KHayaal me.n gum thii vo be-gunaah
nuur-e-nazar ye diida-e-hasrat se kii nigaah
jumbish hu.ii labo.n ko bharii ek sard aah
lii gosha-ha-e-chashm se ashko.n ne ruKH kii raah
chehre kaa rang haalat-e-dil kholne lagaa
har muu-e-tan zabaa.n kii tarah bolne lagaa
aaKHir asiir-e-yaas kaa qufl-e-dahan khulaa
afsaana-e-shadaa.id-e-ra.nj-o-mehan khulaa
ik daftar-e-mazaalim-e-charKH-e-kuhan khulaa
vaa thaa dahaan-e-zaKHm ki baab-e-suKHan khulaa
dard-e-dil-e-Gariib jo sarf-e-bayaa.n hu.aa
KHuun-e-jigar kaa rang suKHan se 'ayaa.n hu.aa
ro kar kahaa KHamosh kha.De kyuu.n ho merii jaa.n
mai.n jaantii huu.n jis liye aa.e ho tum yahaa.n
sab kii KHushii yahii hai to sahraa ko ho ravaa.n
lekin mai.n apne mu.nh se na hargiz kahuu.ngii haa.n
kis tarah ban me.n aa.nkho.n ke taare ko bhej duu.n
jogii banaa ke raaj-dulaare ko bhej duu.n
duniyaa kaa ho gayaa hai ye kaisaa lahuu sapiid
andhaa kiye hu.e hai zar-o-maal kii umiid
anjaam kyaa ho ko.ii nahii.n jaantaa ye bhed
soche bashar to jism ho larzaa.n misaal-e-biid
likkhii hai kyaa hayaat-e-abad in ke vaaste
phailaa rahe hai.n jaal ye kis din ke vaaste
letii kisii faqiir ke ghar me.n agar janam
hote na merii jaan ko saamaan ye baham
Dastaa na saa.np ban ke mujhe shaukat-o-hasham
tum mere laal the mujhe kis saltanat se kam
mai.n KHush huu.n phuu.nk de ko.ii is taKHt-o-taaj ko
tum hii nahii.n to aag lagaa duu.ngii raaj ko
kin kin riyaazato.n se guzaare hai.n maah-o-saal
dekhii tumhaarii shakl jab ai mere naunihaal
puuraa hu.aa jo byaah kaa armaan thaa kamaal
aafat ye aa.ii mujh pe hu.e jab safed baal
chhaTtii huu.n un se jog liyaa jin ke vaaste
kyaa sab kiyaa thaa mai.n ne isii din ke vaaste
aise bhii naa-muraad bahut aa.e.nge nazar
ghar jin ke be-charaaG rahe aah 'umr bhar
rahtaa miraa bhii naKHl-e-tamannaa jo be-samar
ye jaa-e-sabr thii ki du'aa me.n nahii.n asar
lekin yahaa.n to ban ke muqaddar biga.D gayaa
phal phuul laa ke baaG-e-tamannaa uja.D gayaa
sarzad hu.e the mujh se KHudaa jaane kyaa gunaah
ma.njdhaar me.n jo yuu.n mirii kashtii hu.ii tabaah
aatii nazar nahii.n ko.ii amn-o-amaa.n kii raah
ab yaa.n se kuuch ho to 'adam me.n mile panaah
taqsiir merii KHaaliq-e-aalam bahal kare
aasaan mujh Gariib kii mushkil ajal kare
sun kar zabaa.n se maa.n kii ye fariyaad-e-dard-KHez
us KHasta-jaa.n ke dil pe chalii Gam kii teG-e-tez
'aalam ye thaa qariib ki aa.nkhe.n ho.n ashk-rez
lekin hazaar zabt se rone se kii gurez
sochaa yahii ki jaan se bekas guzar na jaa.e
naashaad ham ko dekh ke maa.n aur mar na jaa.e
phir arz kii ye maadar-e-naashaad ke huzuur
maayuus kyuu.n hai.n aap alam kaa hai kyuu.n vafuur
sadma ye shaaq 'aalam-e-piirii me.n hai zaruur
lekin na dil se kiijiye sabr-o-qaraar duur
shaayad KHizaa.n se shakl 'ayaa.n ho bahaar kii
kuchh maslahat isii me.n ho parvardigaar kii
ye jaa'l ye fareb ye saazish ye shor-o-shar
honaa jo hai sab us ke bahaane hai.n sar-ba-sar
asbaab-e-zaahirii me.n na in par karo nazar
kyaa jaane kyaa hai parda-e-qudrat me.n jalva-gar
KHaas us kii maslahat ko.ii pahchaantaa nahii.n
manzuur kyaa use hai ko.ii jaantaa nahii.n
raahat ho yaa ki ranj KHushii ho ki intishaar
vaajib har ek rang me.n hai shukr-e-kird-gaar
tum hii nahii.n ho kushta-e-naira.ng-e-rozgaar
maatam-kade me.n dahr ke laakho.n hai.n sogvaar
saKHtii sahii nahii.n ki uThaa.ii ka.Dii nahii.n
duniyaa me.n kyaa kisii pe musiibat pa.Dii nahii.n

Chakbast Braj Narayan
Nazm

uTTho marne ka haq istimal karo

zulm ke hote amn kahaa.n mumkin yaaro
ise miTaa kar jag me.n amn bahaal karo
jiine kaa haq saamraaj ne chhiin liyaa
uTTho marne kaa haq istimaal karo

Habib Jalib
Nazm

mujrim

shiddat-e-faaqa se rote hu.e nanhe bachche
ek roTii ke nivaale se bahal jaate hai.n
yaa sar-e-shaam hii so jaate hai.n bhuuke pyaase
maa.n kii suukhii hu.ii chhaatii ko dabaa kar mu.nh me.n

Shakeb Jalali
Nazm

badnam ho raha hun

faryaadii-e-jafaa-e-ayyaam ho rahaa huu.n
paamaal-e-jaur-e-baKHt-e-naakaam ho rahaa huu.n
sargashta-e-KHayaal-e-anjaam ho rahaa huu.n
bastii kii la.Dkiyo.n me.n badnaam ho rahaa huu.n
bad-naam ho rahaa huu.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
salmaa se dil lagaa kar salmaa se dil lagaa kar
us huur-vash ke Gam me.n duniyaa-o-dii.n ga.nvaa kar
hosh-o-havaas kho kar sabr-o-sukuu.n luTaa kar
baiThe biThaa.e dil me.n Gam kii KHalish basaa kar
har chiiz ko bhulaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
kahtii hai.n sab ye kis kii ta.Dpaa ga.ii hai suurat
salmaa kii shaayad is ke man bhaa ga.ii hai suurat
aur us ke Gam me.n itnii murjhaa ga.ii hai suurat
murjhaa ga.ii hai suurat kumhlaa ga.ii hai suurat
sa.nvlaa ga.ii hai suurat
salmaa se dil lagaa kar
bastii kii la.Dkiyo.n me.n badnaam ho rahaa huu.n
panghaT pe jab ki saarii hotii hai.n jam.a aa kar
gaagar ko apnii rakh kar, ghu.nghaT uThaa uThaa kar
ye qissa chhe.Dtii hai.n mujh ko bataa bataa kar
salmaa se baate.n karte dekhaa hai is ko jaa kar
ham ne nazar bachaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
raato.n ko giit gaane jab mil kar aatii hai.n sab
taalaab ke kinaare dhuume.n machaatii hai.n sab
ja.ngal kii chaa.ndnii me.n ma.ngal manaatii hai.n sab
to mere aur salmaa ke giit gaatii hai.n sab
aur ha.nstii jaatii hai.n sab
salmaa se dil lagaa kar
bastii kii la.Dkiyo.n me.n badnaam ho rahaa huu.n
kheto.n se lauTtii hai.n jab din chhupe makaa.n ko
tab raaste me.n baaham vo merii daastaa.n ko
dohraa ke chhe.Dtii hai.n salmaa ko merii jaa.n ko
aur vo hayaa kii maarii sii letii hai zabaa.n ko
ki chhe.De is bayaa.n ko
salmaa se dil lagaa kar
bastii kii la.Dkiyo.n me.n badnaam ho rahaa huu.n
kahtii hai rahm khaa kar yuu.n ek maah-e-tal.at
ye shahrii naujavaa.n thaa kis darja KHuub-suurat
aa.nkho.n me.n bas rahii hai ab bhii vo pahlii ra.ngat
do din me.n aah kyaa hai kyaa ho ga.ii hai haalat
allaah terii qudarat
salmaa se dil lagaa kar
bastii kii la.Dkiyo.n me.n badnaam ho rahaa huu.n
us sham.a-ruu kaa jab se parvaana ban gayaa huu.n
bastii kii la.Dkiyo.n me.n afsaana bin gayaa huu.n
har maah-vash ke lab kaa paimaana ban gayaa huu.n
diivaana ho rahaa huu.n diivaana ban gayaa huu.n
diivaana ban gayaa huu.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
un kii zabaa.n pe merii jitnii kahaaniyaa.n hai.n
kyaa jaane.n ye ki dil kii sab mehrbaaniyaa.n hai.n
kam-sin hai.n be-KHabar hai.n uThtii javaaniyaa.n hai.n
kyaa samjhe.n Gam ke haatho.n kyuu.n sar-giraaniyaa.n hai.n
kyuu.n KHuu.n-fishaaniyaa.n hai.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
har ik ke rahm kaa yuu.n iz.haar ho rahaa hai
bechaare ko ye kaisaa aazaar ho rahaa hai
dekhe to ko.ii jaane biimaar ho rahaa hai
kis darja zindagii se bezaar ho rahaa hai
naa-chaar ho rahaa hai
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik puuchhtii hai aa kar tum be-qaraar kyuu.n ho
kuchh to hame.n bataa.o yuu.n dil-figaar kyuu.n ho
kyaa rog hai kaho to tum ashk-baar kyuu.n ho
diivaane kyuu.n hu.e ho diivaana vaar kyuu.n ho
baa-haal-e-zaar kyuu.n ho
salmaa se dil lagaa kar
bastii kii la.Dkiyo.n me.n badnaam ho rahaa huu.n
jaa.uu.n shikaar ko gar baa-hamrahaan-e-sahraa
kheto.n se ghuurtii hai.n yuu.n duKHtaraan-e-sahraa
bijlii kii raushnii ko jaise miyaan-e-sahraa
taariik shab me.n dekhe.n kuchh aahuvaan-e-sahraa
hairat kushaan-e-sahraa
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik shoKH chhe.Dtii hai is tarah paas aa kar
dekho vo jaa rahii hai salmaa nazar bachaa kar
sharmaa ke muskuraa kar aa.nchal se mu.nh chhupaa kar
jaa.o naa piichhe piichhe do baate.n kar lo jaa kar
kheto.n me.n chhup chhupaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
goyaa hame.n hasad se kuchh naazniin nigaahe.n
salmaa kii bhaa ga.ii hai.n kyuu.n dil-nashii.n nigaahe.n
un se zyaada dilkash hai.n ye hasii.n nigaahe.n
al-qissa ek dil hai sau KHashmagii.n nigaahe.n
shauq aafrii.n nigaahe.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik shoKH taaza daarad sasuraal se ghar aa kar
sakhiyo.n se puuchhtii hai jis dam mujhe bataa kar
ye kaun hai to zaalim kahtii hai.n muskuraa kar
tum is kaa haal puuchho salmaa ke dil se jaa kar
ye giit use sunaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n

Akhtar Shirani
Nazm

etizar

tum samajhtii ho ye gul-daan me.n ha.nste hu.e phuul
merii afsurdagi-e-dil ko miTaa hii de.nge
ye hasii.n phuul ki hai.n jaan-e-gulistaan-e-bahaar
mere so.e hu.e naGmo.n ko jagaa hii de.nge
tum ne dekhii hai.n damaktii hu.ii sham.e.n lekin
tum ne dekhe nahii.n bujhte hu.e diipak hamdam
vahii diipak jo nigaaho.n kaa sahaaraa paa kar
ek lamhe ke liye jalte hai.n bujh jaate hai.n
kabhii ik ashk se dhul jaate hai.n sadiyo.n ke Gubaar
kaa.enaat aur nikhar aur sa.nvar jaatii hai
kabhii naakaam tamannaa kii sadaa-e-mub.ham
qahqaha ban ke fazaa.o.n me.n bikhar jaatii hai
TuuTte taaro.n ke sa.ngiit sune hai.n tum ne
vo bhii naGme hai.n jo ho.nTo.n se gurezaa.n hii rahe
pha.D.pha.Daate hu.e dekhe hai.n fazaa.o.n me.n kabhii
vo fasaane jo nigaaho.n se bayaa.n ho na sake
kabhii kaa.nTo.n se bahal jaatii hai ruuh-e-Gamgii.n
aur ma.asuum shaguufo.n kii rasiilii KHushbuu
neshtar ban ke rag-e-jaa.n me.n utar jaatii hai
haa.n yahii phuul yahii jaan-e-gulistaan-e-bahaar
naag ban kar kabhii ehsaas ko Das lete hai.n

Ada Jafarey
Nazm

dil-ashob

tirii chaah me.n dekhaa ham ne ba-haal-e-KHaraab ise
par ishq o vafaa ke yaad rahe aadaab ise
tiraa naam o maqaam jo puuchhaa, ha.ns kar Taal gayaa

Ibn۔e۔Insha
Nazm

maqtal mein mukalima

qatl-gaah kii raunaq
hasb-e-haal rakhnii hai
Gam bahaal rakhnaa hai
jaa.n sambhaal rakhnii hai
zor-e-baazuu-e-qaatil
intihaa kaa rakhnaa hai
dashna tez rakhnaa hai
aur balaa kaa rakhnaa hai
aur kyaa mire qaatil
intizaam baaqii hai
ko.ii baat honii hai
ko.ii kaam baaqii hai
vaqt par nazar rakhnaa
vaqt ek jaada hai
haa.n bataa mire qaatil
teraa kyaa iraada hai
vaqt kam rahaa baaqii
yaa abhii ziyaada hai
mai.n to qatl hone tak
muskuraa.e jaa.u.ngaa

Pirzada Qasim
Nazm

ai mere ajnabi

tuu chalaa jaa.egaa
vaqt aa.nsuu hii aa.nsuu me.n Dhal jaa.egaa
vaqt aaho.n me.n merii badal jaa.egaa
vaqt yaado.n se terii bahal jaa.egaa
jism laave kii suurat pighal jaa.egaa
zehn paare kii suurat phisal jaa.egaa
tuu chalaa jaa.egaa
ai mere ajnabii

Meena Kumari Naz
Nazm

holi

judaa na ham se ho ai KHush-jamaal holii me.n
ki yaar phirte hai.n yaaro.n ke taal holii me.n
har ek aish se haigaa bahaal holii me.n
bahaar aur kuchh ab ke hai saal holii me.n
mazaa hai sair hai har suu kamaal holii me.n

Nazeer Akbarabadi
Nazm

aaj insan kahan hai

mai.n huu.n jis kaa shaa.er
vo insaan kahaa.n hai
saarii duniyaa jise maantii rahii hai
vo bhagvaan kahaa.n hai
hasiin chehre
phuul aur kaliyaa.n
jhuumtii shaaKHe.n
daraKHt aashiyaa.n
hariyaalii
nahre.n dariyaa saagar
uu.nche uu.nche kohsaaro.n kii bulandiyaa.n
naachne vaale
hazaar-haa ra.ngiin parinde
shaam o sahar ko phuulne vaalii shafaq
barkhaa-rut kii sat-ra.ngii dhanak
suuraj chaa.nd sitaare
raato.n ko jhilmilaatii kahkashaa.n
jin ke dekhe se
bahal jaa.e.n dil
sukh paa.e.n paraan
ab vo dil vo sukh un paraano.n kaa
naam-o-nishaa.n kahaa.n hai
me.n huu.n jis kaa shaa.er
vo insaan kahaa.n hai
saarii duniyaa jise maantii rahii hai
vo bhagvaan kahaa.n hai
be-hisaab sadiyo.n kii aa.nkhe.n
ek pal me.n
an-ginat baar jhapaktii palke.n
nazar na aane vaalii nazre.n
chhaatii se bachcho.n ko lipTaa.e hu.e maataa.e.n
khanak-daar chuu.Diyo.n bharii kalaa.iyaa.n
jin par duudh pilaatii maataa.o.n kii
jhukii hu.ii sharmiilii aa.nkhe.n
aa.nchalo.n me.n chhupe hu.e nanhe nanhe baalak
chorii chorii maataa.o.n kaa chehra taake.n

Niyaz Haidar
Nazm

an-paDh gunge ka rajaz

be-zabaano.n ko muzhda ho
haqiiqat kaa aslii tanaazur bahaal hone ko hai
tumhaare dushman fasiilo.n ke tasavvur me.n mahsuur hai.n
siyaah aa.iine kii ye maKHluuq
jis kii manhuus parchhaa.ii.n ne
har taraf shor machaa rakkhaa hai
KHud hii apnaa madfan hai
merii aaKHirii yalGaar se ho jaa.e.nge saare manaazir
saarii aavaaze.n
aazaad
naa-malfuuz....

Ahmad Javaid
Nazm

pal-do-pal

bas
pal-do-pal kii baat hai
be-sabab pareshaa.n hote ho
tumhe.n kis baat kaa Gam hai
kyuu.n udaas rahte ho
dekho
in nazaaro.n ko
mast aabshaaro.n ko
nadiyo.n aur pahaa.Do.n ko
suuraj
chaa.nd
sitaaro.n ko
galiyo.n ko baazaaro.n ko
shaayad tum bahal jaa.o
socho jab tum aa.e the
is tarah ro rahe the
jaise bachche ke haath se khilaunaa chhin gayaa ho
phir tum ne jo kuchh liyaa yahii.n se liyaa
jo kuchh bhii diyaa yahii.n pe diyaa
phir kyuu.n udaas rahte ho
bas pal-do-pal kii baat hai
tum be-sabab pareshaa.n hote ho

Afroz Alam
Nazm

bas ana ko bahaal rakhna hai

apne apne hii KHol me.n ham tum
kaise KHud ko chhupaa ke baiTh ga.e
ham ko apnii anaa kaa paas rahaa
aur saare KHayaal bhuul ga.e
KHvaab jo ham ne saath dekhe the
saare vo kaise taar taar hu.e
saare va.ade vafaa ke TuuT ga.e
aur armaan sab hii KHaak hu.e
dekhne me.n to mai.n shagufta huu.n
tum bhii shaadaab sab ko lagte ho
ik haqiiqat magar mai.n jaantii huu.n
ye ba-zaahir nazar jo aataa hai
aa.ina vo hamaare dil kaa nahii.n
ham to ik duusre kii furqat me.n
zinda rahnaa muhaal kahte the
aks vo bhii hamaarii zaat kaa thaa
aks ye bhii hamaarii zaat kaa hai
hai udaasii to chaaro.n-samt magar
zeb-tan kar ke KHol KHushiyo.n kaa
ham ko apnaa bharam bhii rakhnaa hai
chaahe Gam ke pahaa.D jitne gire.n
bas anaa ko bahaal rakhnaa hai

Sabeela Inam Siddiqui
Nazm

ek mojiza

us kii bholii aa.nkho.n me.n
aasmaa.n kii pariyo.n ne
kaajale.n lagaa.ii.n thii.n
us ke dono.n gaalo.n par
KHuld ke gulaabo.n ne
laaliyaa.n bikherii.n thii.n
us kii zulf kii chhaa.o.n
jaa.n-ba-lab parindo.n kii
jaa.n bahaal kartii thii
rang us ke ho.nTo.n kaa
mo'jize dikhaataa thaa
vo kalaam kartii thii
dil laraztaa jaataa thaa

Kazim Rizvi
Nazm

wapsi

zindaa.n kii hado.n me.n kho ga.e hai.n
diivaane bahal ke so ga.e hai.n

Akhtarul Iman
Nazm

nakaam muzakaraat

mak.Dii ke jaale kaalii satre.n aur log
ek hii ghar me.n rahte hai.n
lekin anjaan rahte hai.n
ek duusre ke naamo.n se
is liye bahaal nahii.n ho paate
un ke sifaaratii ta.alluqaat
rakhii rah jaatii hai.n kono.n khudro.n me.n
zehnii ham-aaha.ngii kii saarii file.n
aur log
rubber-band kii tarah un par
cha.Dh jaate hai.n

Sidra Sahar Imran
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now