Search result for "bane-banaa.e" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bane-banaa.e"

Nazm MATCHES FOR "bane-banaa.e"

Nazm

azal ke musawwir se

banaa banaa ke tuu kartaa hai kyo.n fanaa ham ko
ilaahii kaisaa musavvir hai tuu bataa ham ko

Sada Ambalvi

Nazm

phul

tujh se mahkaa saaraa gulshan
tujh se banaa hai pyaaraa gulshan
bhiinii bhiinii terii nik.hat
pyaarii pyaarii terii rangat
jangal me.n hai tujh se ma.ngal
jalso.n me.n hai tujh se halchal
naazish gulshan terii hastii
tujh se hai bulbul kii mastii
teraa dam bhartii hai bulbul
tere liye hai phirtii martii
tere liye hii ban se aa.ii
baaG me.n apnii bastii basaa.ii
tere liye hii baaG me.n chahkii
tere liye hii bhaTkii bahkii
baad-e-sahar ke jho.nke se tuu
khil kar phailaa detaa hai buu
jis dam phailii terii KHushbuu
dau.D ga.ii gulshan se har suu
shaaKH me.n kaisaa phuul rahaa hai
kitnii KHushii se jhuul rahaa hai
mast hu.ii hai saarii KHilqat
phailii hai terii jo nik.hat
rang hai teraa kaisaa pyaaraa
shaad hu.aa har Gam kaa maaraa
dekhte hii har Gamgii.n tujh ko
bhuulaa apne dard aur dukh ko
duniyaa bhar kaa tuu hai chahiitaa
shak nahii.n is me.n ko.ii aslan
tujh se mahkii saarii zamii.n hai
lekin tujh ko naaz nahii.n hai
tujh ko chaahe saarii duniyaa
terii hai har dil me.n tamannaa
phuul sikhaataa hai ye 'jauhar'
KHush raho tum bhii yuu.n hii din bhar
tum bhii KHush har ek ko rakkho
maza mohabbat kaa bhii chakkho

Banne Miyan Jauhar

Nazm

lalach ka phal

ik muflis ke chaar the bachche
daal aur roTii jau khaate the
khaate usii ko samajh ke ne.amat
lab pe na laate ko.ii shikaayat
lekin un me.n ik la.Dkaa thaa
us ko na bhaayaa aisaa khaanaa
ik la.Dke kaa dost banaa vo
daulat-mand bahut kuchh thaa vo
us ke ghar ko aataa jaataa
umda umda khaane khaataa
lekin apne dost se us kii
ik din ho ga.ii an-ban ko.ii
dost ne itnaa maaraa piiTaa
daa.nt gire KHuu.n mu.nh se niklaa
us dam us ko hosh ye aayaa
hirs kaa ye in.aam hai paayaa
apne haatho.n kho.ii izzat
aur uThaa.ii aisii zillat
sach hai buzurgo.n kaa ye kahnaa
laalach se tum duur hii rahnaa
mile jo daal aur roTii khaa.o
shikva lab pe na 'jauhar' laa.o

Banne Miyan Jauhar

Nazm

nind

ai mirii pyaarii ammaa.n aanaa
nindiyaa aa.ii mujh ko sulaanaa
sust hai.n a.azaa mere saare
aa.nkhe.n band hai.n nii.nd ke maare
khaanaa piinaa baate.n karnaa
kuchh bhii mujh ko ab nahii.n bhaataa
ammaa.n meraa bistar laanaa
nii.nd aa.ii hai mujh ko sulaanaa
jaldii phir uThnaa hai mujh ko
der na maktab jaane me.n ho
sub.h ko jis dam so ke uThuu.ngaa
apne khilaune tum se luu.ngaa
bhaa.ii jaan ab tum bhii aa.o
apne bistar par so jaa.o
raat hai sone hii ko banaa.ii
so raho tum bhii 'jauhar' bhaa.ii

Banne Miyan Jauhar

Nazm

dil

dil vo sahraa thaa
ki jis sahraa me.n
hasrate.n
ret ke Tiilo.n kii tarah rahtii thii.n
jab havaadis kii havaa
un ko miTaane ke liye
chaltii thii
yahaa.n miTtii thii.n
kahii.n aur ubhar aatii thii.n
shakl khote hii
na.ii shakl me.n Dhal jaatii thii.n
dil ke sahraa pe magar ab kii baar
saaneha guzraa kuchh aisaa
ki sunaa.e na bane
aa.ndhii vo aa.ii ki saare Tiile
aise bikhre
ki kahii.n aur ubhar hii na sake
yuu.n miTe hai.n
ki kahii.n aur banaa.e na bane
ab kahii.n
Tiile nahii.n
ret nahii.n
ret kaa zarra nahii.n
dil me.n ab kuchh nahii.n
dil ko sahraa bhii agar kahiye
to kaise kahiye

Javed Akhtar

Nazm

murgha banne ke fawaed

murGaa ban.ne ke favaa.ed tibb me.n paa.e be-hisaab
maulvii ne is liye murGe banaa.e be-hisaab

Ahmad Alvi

Nazm

pas raho

tum mire paas raho
mire qaatil, mire dildaar mire paas raho
jis gha.Dii raat chale,
aasmaano.n kaa lahuu pii ke siyah raat chale
marham-e-mushk liye, nashtar-e-almaas liye
bain kartii hu.ii ha.nstii hu.ii gaatii nikle
dard ke kaasnii paazeb bajaatii nikle
jis gha.Dii siino.n me.n Duube hu.e dil
aastiino.n me.n nihaa.n haatho.n kii rah takne lage
aas liye
aur bachcho.n ke bilakne kii tarah qulqul-e-mai
bahr-e-naa-suudgii machle to manaa.e na mane
jab ko.ii baat banaa.e na bane
jab na ko.ii baat chale
jis gha.Dii raat chale
jis gha.Dii maatamii sunsaan siyah raat chale
paas raho
mire qaatil, mire dildaar mire paas raho

Faiz Ahmad Faiz

Nazm

faisla

ham ek duusre kaa
libaas bane the
aur ta'alluqaat kii is KHuubsuurat maalaa me.n
hame.n KHud ko piro.e
bas do hii din hu.e the
ki yak-dam
mere dil ke kisii naa-aasuuda goshe me.n
ye ehsaas paidaa hu.aa
ki zaruur kahii.n ko.ii baat
Galat ho ga.ii hai
aur jaise is KHuubsuurat rishte kii
pahlii ii.nT hii Te.Dhii rakhii ga.ii hai
meraa dil bujh saa gayaa
lekin mai.n ne sar ko jhaTkaa
aur dil ko malaamat kii
abhii din hii kitne hu.e hai.n
vaqt guzartaa rahaa
aur ham dono.n
do muKHtalif dhaaro.n me.n
bahte chale ga.e
ye jaante hu.e
ki ham ek duusre ke liye
nahii.n banaa.e ga.e
balki hamaarii ba.az zaruurato.n se
paidaa hone vaalii
zimmadaariyo.n kii vajah se
ham ek saath rahne par majbuur hai.n
ka.ii barso.n ke baa'd
jab ham ek naa-pasandiida
magar fitrii faisla karne par majbuur hu.e
to hamaaraa libaas
pahle hii se taar-taar thaa
aur hamaare ird-gird ke log
na chaahte hu.e bhii
hamaare rishte kii uryaanii kaa
nazaara kar sakte the

Yashab Tamanna

Nazm

bachchon ka mela

zaraa in chhoTe qadmo.n se ye uThtii taan to dekho
ba.De baa.nke sipaahii hai.n niraalii shaan to dekho

Syeda Farhat

Nazm

izhaar

ham ne sochaa ab shikasta ghar muqaffal nahii.n ho sakte
kivaa.Do.n ke baGair
achchhe kivaa.D achchhii imaarat ke baGair
ham ne kuchh kaalii tijaarat se kamaa.ii kii
udhar kuchh jangalo.n ke chor apne yaar the
lak.Dii KHariidii aur kivaa.Do.n aur ka.Diyo.n me.n gha.Dii
naqshe banaa.e aur diivaare.n chunii.n ham ne chhate.n Daalii.n
na.ii ta.amiir ko har rang kii har art kii dhaj dii
phir apnii soch aur ehsaas kii raa.anaa nazar-afroz
tasviiro.n se kamro.n ko sajaa kar aa.ine ke saamne aa.e
aur ik fankaar kii naKHvat se baalo.n ko bikheraa
aur chehre ko banaavaT dii
yahii chehra hamaare saath cigarette phuu.nktaa
sa.Dko.n pe phirtaa hoTelo.n me.n chaa.e piitaa thaa
zamaane bhar kii gappe.n haa.nktaa thaa
lekin us sach kii sadaa us me.n muqaffal thii jo us ke ahd kaa sach thaa
vo guu.ngaa thaa
kivaa.Do.n kii tarah apne makaa.n me.n apnii tasviir kii suurat ham muqaffal the
aur ab jab shahr me.n ba.Dhte dhamaako.n ne
makaa.n larzaa diyaa hai to.D Daale hai.n kivaa.D aur masKH kar Daalii hai.n tasviire.n
hame.n ye dukh hai ham KHud me.n muqaffal kyo.n hu.e the
jabr kii ba.Dhtii hu.ii mii.aad me.n
sabr kii shafqat bharii buu.Dhii du.aa.e.n kyo.n nahii.n
ham ne KHud par kyo.n KHalaa ke faasle lambe kiye
sach kii KHaamoshii ke mujrim kyo.n bane
chup gavaara kyo.n hu.ii
baat guu.nge kaa ishaara kyo.n hu.ii
ham agar lab kholte
kuchh duusre bhii bolte
kuchh duusre bhii bolte

Iqbal Kausar

Nazm

nazr-e-collage

sarkash bane hai.n giit baGaavat ke gaa.e hai.n
barso.n na.e nizaam ke naqshe banaa.e hai.n

Sahir Ludhianvi

Nazm

munne ki phulwari

is ke kone me.n ik gu.Diyaa sundar ruup sajaa.e
pyaaraa albelaa ik guDDaa khiir jalebii khaa.e
Dhol baa.nsurii biin pipahrii baajaa band bajaa.e

Bekal Utsahi

Nazm

subh bedar hai

hai shikasta-dilii phailtii raat hai
aur firqo.n zabaano.n kii bohtaat hai
kho.ii rang-o-nasl me.n har ik zaat hai
aur insaaniyat ko hu.ii maat hai
is KHaraabe me.n sham' jalaa.e hu.e
sarkashii ke hai.n parcham uThaa.e hu.e
hauslo.n se saro.n ko uThaa.e hu.e
ruuh-e-millat se KHud ko jagaa.e hu.e
har 'adaavat ko dil se miTaa.e hu.e
apnii manzil kaa rasta banaa.e hu.e
'ahd-e-nau ke hai.n matvaale aa.e hu.e
lab kii jumbish se to.Dii ga.ii.n be.Diyaa.n
aur zindaa.n me.n kholii ga.ii.n khi.Dkiyaa.n

Humaira Gul Tishna

Nazm

har jada-e-shahr

shahr kii ik ik sa.Dak
phaa.nktii aa.ii hai laakho.n haadso.n kii sard dhuul
jaane kitne ajnabii ik duusre ke dost ban.ne se kinaara kar ga.e
aur kitne aashnaa.o.n ke dilo.n se miT ga.ii pahchaan bhii
sau nigaahe.n laakh zaKHm
chaar-samtii laakh jhuuT
sau tamaasho.n ke pa.De hai.n jaa-ba-jaa dhabbe
jinhe.n
gard-e-masaafat me.n chhupaane ke liye
barq-paa lamho.n ko thaame dau.Dte jaate hai.n ham
lamhe do lamhe ko dam lene kii KHaatir sust ho jaa.e.n agar
shahr kii ik ik sa.Dak
aa.nkho.n se KHuu.n rulvaa.egii
aur banaa kar ham ko bhii ik daastaa.n
dohraa.e gii
haa.nptii tahziib ke ik ik musaafir se kahegii
dau.Dte jaa.o yahii hai zindagii
mat ruko ik duusre ke vaaste
bhaagtaa hai vaqt
lekin lamha lamha
dau.Dnaa hai sab ko
lekin tanhaa tanhaa

Rajinder Manchanda Bani

Nazm

harf-e-ghair

mere ahbaab me.n ik shaa.er-e-kam-naam bhii hai
zehn hai jis kaa ajab raahat-gaah
haadse ek zamaane ke jahaa.n aa ke sukuu.n paate hai.n
jab chamak uThte hai.n kuchh haadse iz.haar kii peshaanii par
vo simaTtaa saa chalaa jaataa hai
ya.anii har nazm use aur bhii begaana banaa detii hai
shab na.ii nazm liye baiThaa thaa ahbaab ke biich
aur sab hama-tan-gosh use sunte the
nazm ke baa'd vo aalam thaa ki sannaaTaa na karvaT le paa.e
(note:Gair-pasa.ndiidagii kii vaj.h se)
is ne yuu.n dekhaa nahii.n daad-talab nazro.n se
jaise is aas me.n ho
gul ke girne kii sadaa farsh se aa.egii abhii

Rajinder Manchanda Bani

Nazm

mazdur ki bansuri

mazduur hai.n ham, mazduur hai.n ham, majbuur the ham, majbuur hai.n ham
insaaniyat ke siine me.n ristaa hu.aa ik naasuur hai.n ham
daulat kii aa.nkho.n kaa surma bantaa hai hamaarii haDDii se
mandir ke diye bhii jalte hai.n mazduur kii pighlii charbii se
ham se baazaar kii raunaq hai, ham se chehro.n kii laalii hai
jaltaa hai hamaare dil kaa diyaa duniyaa kii sabhaa ujyaalii hai
daulat kii sevaa karte hai.n Thukraa.e hu.e ham daulat ke
mazduur hai.n ham, mazduur hai.n ham sautele beTe qismat ke
sone kii chaTaa.ii tak bhii nahii.n, ham zaat ke itne heTe hai.n
ye sejo.n par sone vaale shaayad bhagvaan ke beTe hai.n
ham me.n nahii.n ko.ii tabdiilii jaa.De kii paalii raato.n me.n
baisaakh ke tapte mausam me.n, saavan kii bharii barsaato.n me.n
kap.De kii zaruurat hii kyaa hai mazduuro.n ko, haivaano.n ko
kyaa bahs hai, sardii garmii se lohe ke bane insaano.n ko
hone do charaaGaa.n mahlo.n me.n, kyaa ham ko agar diivaalii hai
mazduur hai.n ham, mazduur hai.n ham, mazduur kii duniyaa kaalii hai
mazduur ke bachche takte hai.n jab hasrat se duukaano.n ko
mazduur kaa dil detaa hai du.aa devtaa.o.n ko, bhagvaano.n ko
khaayaa miTTii ke bartan me.n, so.e to bichhaune ko tarse
muKHtaaro.n par tanqiide.n hai.n, be-chaargiyaa.n majbuuro.n kii
suukhaa chehra dahqaano.n kaa, zaKHmii piiThe.n mazduuro.n kii
vo bhuuko.n ke an-daataa hai.n, haq un kaa hai be-daad kare.n
ham kis darvaaze par jaa.e.n kis se jaa kar fariyaad kare.n
baazaar-e-tamaddun bhii un kaa duniyaa-e-siyaasat bhii un kii
maz.hab kaa iraada bhii un kaa, duniyaa-e-siyaasat bhii un kii
paaband hame.n karne ke liye sau raahe.n nikaalii jaatii hai.n
qaanuun banaa.e jaate hai.n, zanjiire.n Dhaalii jaatii hai.n
phir bhii aaGaaz kii shoKHii me.n anjaam dikhaa.ii detaa hai
ham chup hai.n lekin fitrat kaa insaaf duhaa.ii detaa hai

Jameel Mazhari

Nazm

khanDar

huduud-e-hastii se ham nikal kar kha.nDar bane the
magar kha.nDar ban ke miT bhii jaate
ki ye Gam-e-zindagii ke rasiyaa
hamaarii hastii ko apnii yaado.n se mahv kar dete bhuul jaate
na ye ki ham ko tamaasha-gaah-e-jahaa.n banaate
hamaare ibrat-kado.n ko mahfuuz kar ke rakhte
na ye ki aabaadiyo.n kii KHaatir
hamaarii barbaadiyo.n ko taariiKHii yaadgaare.n banaa.e rakhte
vo yaadgaare.n
jahaa.n pe ye log zindagii ke ijaara-daar aa sake.n to aa.e.n
dino.n ko raaho.n kii KHaak u.Daa.ii.n
vo baargaahe.n jo arsh-paaya thii.n adab-o-aadaab-e-KHusravii me.n
vahaa.n ye daraaz khisakte jaa.e.n
jahaa.n bhii jii chaahe apnaa naam aur sher likkhe.n
machaa.e.n GauGaa raqiiq be-ma.anii giit gaa.e.n
magar na auqaat-e-panj-gaana me.n
ek bhii vaqt suunii masjid me.n jhaa.nk paa.e.n
kisii kii turbat pe faatiha ke liye na ye apne haath uThaa.e.n
dino.n ko yuu.nhii fasurda raaho.n kii KHaak u.Daa.ii.n
diye jale par gharo.n ko jaa.e.n
hamaarii viiraaniyo.n ko viiraan-tar banaa kar chale hii jaa.e.n
yahaa.n pe chhaa jaa.e andhii a.ndhiyaariyo.n kaa phir vo sukuut-e-jaamid
ki yaum-o-sipar hii jis ke ham-raaz-o-ham-nafas hai.n
na din kii vahshat me.n kuchh kamii thii
ki shab kii dahshat me.n kuchh kasar ho
hamaare din-raat ek se hai.n
hamaare din-raat usii vajuud-o-adam ke ik vaqfa-e-musalsal me.n
hastii-o-niistii ke barzaKH me.n paa-ba-gul hai.n
hamaare din-raat isii daraa-e-zamaan vaqfe se muttasil hai.n
magar hame.n kab milegii is daam se rihaa.ii
hame.n milegaa adam kii maaduum-o-be-nishaa.n god kaa sukuun-e-abad KHudaayaa
hame.n azal aur abad ke chakkar se kab ataa hogii rustagaarii
KHudaa-e-qayyuum-o-hayye-o-qaa.em
janaab baarii

Mukhtar Siddiqui

Nazm

wo laDki

vo la.Dkii yaad aatii hai
vo la.Dkii ab na jaane kis ke bistar kii kiran hogii
abhii tak phuul kii maanind hogii yaa chaman hogii
sajiilii raat
ab bhii
jab kabhii ghuu.nghaT uThaatii hai
lachaktii kahkashaa.n jab bante bante TuuT jaatii hai
ko.ii albelii KHushbuu baal khole muskuraatii hai
vo la.Dkii yaad aatii hai

Nida Fazli

Nazm

ulTi ho gain sab tadbiren

khet ke chaaro.n samt lagaa.ii
mai.n ne baa.Dh ghane thohar kii
sochaa samjhaa ab ke maveshii
rau.nd na paa.e.nge faslo.n ko
khetii ab taaraaj na hogii
dhartii ab sonaa uglegii
bante bante baat banii thii
biga.D ga.ii lekin pal-bhar me.n
kaaT ke mai.n ne baa.D kaa thohar
apnii u.nglii KHud kaaTii thii

Raj Narayan Raaz

Nazm

maine bagh ki jaanib piTh kar li

mai.n ne zindagii ke pe.D se lipTe azhdahe ko
tiin baraabar hisso.n me.n taqsiim kiyaa
ek hisse se
apne sar ke liye shimla iijaad kiyaa
duusre hisse ko
izaar-band banaa kar kamar ke gird lapeTaa
jo bach rahaa
use apnii saathii aurat ke
baalo.n me.n guu.ndhaa
aur
baaG kii jaanib piiTh kar lii

Jawaz Jafri

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now