Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bataate"

Nazm MATCHES FOR "bataate"

Nazm

intisab

aaj ke naam
aur
aaj ke Gam ke naam
aaj kaa Gam ki hai zindagii ke bhare gulsitaa.n se KHafaa
zard patto.n kaa ban
zard patto.n kaa ban jo miraa des hai
dard kii anjuman jo miraa des hai
clerko.n kii afsurda jaano.n ke naam
kirm-KHurda dilo.n aur zabaano.n ke naam
post-mano.n ke naam
taa.nge vaalo.n kaa naam
rail-baano.n ke naam
kaar-KHaano.n ke bhuuke jiyaalo.n ke naam
baadshaah-e-jahaa.n vaalii-e-maa-sivaa, naa.eb-ul-allaah fil-arz
dahqaa.n ke naam
jis ke Dhoro.n ko zaalim ha.nkaa le ga.e
jis kii beTii ko Daaku uThaa le ga.e
haath bhar khet se ek a.ngusht paTvaar ne kaaT lii hai
duusrii maaliye ke bahaane se sarkaar ne kaaT lii hai
jis kii pag zor vaalo.n ke paa.nv-tale
dhajjiyaa.n ho ga.ii hai
un dukhii maa.o.n ke naam
raat me.n jin ke bachche bilakte hai.n aur
nii.nd kii maar khaa.e hu.e baazu.o.n me.n sambhalte nahii.n
dukh bataate nahii.n
minnato.n zaariyo.n se bahalte nahii.n

Faiz Ahmad Faiz
Nazm

hamare ustad

kitnii mehnat se pa.Dhaate hai.n hamaare ustaad
ham ko har ilm sikhaate hai.n hamaare ustaad
to.D dete hai.n jahaalat ke a.ndhero.n kaa tilism
ilm kii sham.a jalaate hai.n hamaare ustaad
manzil-e-ilm ke ham log musaafir hai.n magar
raasta ham ko dikhaate hai.n hamaare ustaad
zindagii naam hai kaa.nTo.n ke safar kaa lekin
raah me.n phuul bichhaate hai.n hamaare ustaad
dil me.n har lamha taraqqii kii du.aa karte hai.n
ham ko aage hii ba.Dhaate hai.n hamaare ustaad
sab ko tahziib-o-tamaddun kaa sabaq dete hai.n
ham ko insaan banaate hai.n hamaare ustaad
ham ko dete hai.n ba-har-lamha payaam-e-ta.aliim
achchhii baate.n hii bataate hai.n hamaare ustaad
KHud to rahte hai.n bahut ta.ng-o-pareshaan magar
daulat-e-ilm luTaate hai.n hamaare ustaad
ham pe laazim hai ki ham log kare.n un kaa adab
kis mohabbat se ba.Dhaate hai.n hamaare ustaad

Kaif Ahmed Siddiqui
Nazm

online aashiq

text me.n log mohabbat kii KHataa bhejte hai.n
ghar bataate nahii.n office kaa pataa bhejte hai.n

Khalid Irfan
Nazm

mori arj suno

is suurat se
arz sunaate
dard bataate
nayyaa khete
minnat karte
rasta takte
kitnii sadiyaa.n biit ga.ii hai.n
ab jaa kar ye bhed khulaa hai
jis ko tum ne arz guzaarii
jo thaa haath paka.Dne vaalaa
jis jaa laagii naav tumhaarii
jis se dukh kaa daaruu maa.ngaa
tore mandir me.n jo nahii.n aayaa
vo to tumhii.n the
vo to tumhii.n the

Faiz Ahmad Faiz
Nazm

jatri

ek aayaa gayaa duusraa aa.egaa der se dekhtaa huu.n yuu.nhii raat us kii guzar jaa.egii
mai.n kha.Daa huu.n yahaa.n kis liye mujh ko kyaa kaam hai yaad aataa nahii.n yaad bhii TimTimaataa
hu.aa ik diyaa ban ga.ii jis kii ruktii hu.ii aur jhijaktii hu.ii har kiran be-sadaa qahqaha hai
magar mere kaano.n ne kaise use sun liyaa ek aa.ndhii chalii chal ke miT
bhii ga.ii aaj tak mere kaano.n me.n maujuud hai saa.e.n saa.e.n machaltii hu.ii aur
ubaltii hu.ii phailtii phailtii der se mai.n kha.Daa huu.n yahaa.n ek aayaa gayaa
duusraa aa.egaa raat us kii guzar jaa.egii ek ha.ngaama barpaa hai dekhe.n jidhar
aa rahe hai.n ka.ii log chalte hu.e aur Tahalte hu.e aur rukte hu.e phir se
ba.Dhte hu.e aur lapakte hu.e aa rahe jaa rahe hai.n idhar se udhar aur udhar se
idhar jaise dil me.n mire dhyaan kii lahar se ek tuufaan hai vaise aa.nkhe.n
mirii dekhtii hii chalii jaa rahii hai.n ki ik TimTimaate diye kii kiran zindagii ko phisalte
hu.e aur girte hu.e Dhab se zaahir kiye jaa rahii hai mujhe dhyaan
aataa hai ab tiirgii ik ujaalaa banii hai magar is ujaale se ristii chalii jaa rahii
hai.n vo amrit kii buu.nde.n jinhe.n mai.n hathelii pe apnii sambhaale rahaa huu.n hathelii
magar TimTimaataa hu.aa ik diyaa ban ga.ii thii lapak se ujaalaa hu.aa lau girii phir a.ndheraa saa
chhaane lagaa baiThtaa baiThtaa baiTh kar ek hii pal me.n uThtaa hu.aa jaise aa.ndhii ke
tiikhe thape.Do.n se darvaaze ke taaq khulte rahe.n band hote rahe.n
pha.D.pha.Daate hu.e taa.ir-e-zaKHm-KHurda kii maanind mai.n dekhtaa hii rahaa ek aayaa
gayaa duusraa aa.egaa soch aa.ii mujhe paa.nv ba.Dhne se inkaar karte
ga.e mai.n kha.Daa hii rahaa dil me.n ik buu.nd ne ye kahaa raat yuu.nhii guzar jaa.egii
dil kii ik buu.nd ko aa.nkh me.n le ke mai.n dekhtaa hii rahaa pha.D.pha.Daate hu.e taa.ir
zaKHm-KHurda kii maanind darvaaze ke taaq ik baar jab mil ga.e mujh ko aahista aahista
ehsaas hone lagaa ab ye zaKHmii parinda na ta.Dpegaa lekin mire dil ko har vaqt
ta.Dpaa.egaa mai.n hathelii pe apnii sambhaale rahuu.ngaa vo amrit kii buu.nde.n jinhe.n aa.nkh
se merii risnaa thaa lekin mirii zindagii TimTimaataa hu.aa ik diyaa ban ga.ii jis kii ruktii hu.ii
aur jhijaktii hu.ii har kiran be-sadaa qahqaha hai ki is tiirgii me.n ko.ii baat aisii nahii.n
jis ko pahle a.ndhere me.n dekhaa ho mai.n ne safar ye ujaale a.ndhere kaa chaltaa
rahaa hai to chaltaa rahegaa yahii rasm hai raah kii ek aayaa gayaa duusraa
aa.egaa raat aise guzar jaa.egii TimTimaate sitaare bataate the raste kii
naddii bahii jaa rahii hai bahe jaa is uljhan se aise nikal jaa ko.ii siidhaa manzil pe jaataa
thaa lekin ka.ii qaafile bhuul jaate the anjum ke daur-e-yagaanaa ke mub.ham ishaare magar vo
bhii chalte hu.e aur ba.Dhte hu.e shaam se pahle hii dekh lete the maqsuud kaa band
darvaaza khulne lagaa hai magar mai.n kha.Daa huu.n yahaa.n mujh ko kyaa kaam hai meraa darvaaza
khultaa nahii.n hai mujhe phaile sahraa kii so.ii hu.ii reg kaa zarra zarra yahii kah rahaa hai
ke aise KHaraabe me.n suukhii hathelii hai ik aisaa talvaa ke jis ko kisii KHaar kii nok chubhne pe bhii
kah nahii.n saktii mujh ko ko.ii buu.nd apne lahuu kii pilaa do magar mai.n kha.Daa huu.n yahaa.n kis liye
kaam ko.ii nahii.n hai to mai.n bhii in aate hu.e aur jaate hu.e ek do tiin
laakho.n baguulo.n me.n mil kar yuu.nhii chalte chalte kahii.n Duub jaataa ke jaise yahaa.n
bahtii lahro.n me.n kashtii har ek mauj ko thaam letii hai apnii hathelii ke phaile ka.nval
me.n mujhe dhyaan aataa nahii.n hai ki is raah me.n to har ik jaane vaale ke bas
me.n hai manzil mai.n chal duu.n chaluu.n aa.iye aa.iye aap kyuu.n is jagah
aise chup-chaap tanhaa kha.De hai.n agar aap kahiye to ham ik achhuutii sii Tahnii se
do phuul bas bas mujhe is kii ko.ii zaruurat nahii.n hai mai.n ik
dost kaa raasta dekhtaa huu.n magar vo chalaa bhii gayaa hai mujhe phir bhii
taskiin aatii nahii.n hai ki mai.n ek sahraa kaa baashinda maaluum hone lagaa huu.n KHud
apnii nazar me.n mujhe ab ko.ii band darvaaza khultaa nazar aa.e ye baat mumkin nahii.n hai
mai.n ik aur aa.ndhii kaa mushtaaq huu.n jo mujhe apne parde me.n yaksar chhupaa le
mujhe ab ye mahsuus hone lagaa hai suhaanaa samaa.n jitnaa bas me.n thaa mere
vo sab ek bahtaa saa jho.nkaa banaa hai jise haath mere nahii.n rok sakte
ki merii hathelii me.n amrit kii buu.nde.n to baaqii nahii.n hai.n faqat ek phailaa hu.aa
KHushk be-barg be-ra.ng sahraa hai jis me.n ye mumkin nahii.n mai.n kahuu.n
ek aayaa gayaa duusraa aa.egaa raat merii guzar jaa.egii

Meeraji
Nazm

aurat

jaanaa gayaa na mujh ko kabhii mere naam se
rishto.n me.n mujh ko baa.ndhaa gayaa ehtimaam se
nisbat jo log apnii bataate hai.n raam se
ban-baas mujh ko dete hai.n siitaa ke naam se

Meena Naqvi
Nazm

purane sahilon par naya git

samundar chaa.ndnii me.n raqs kartaa hai
parinde baadalo.n me.n chhup ke kaise gungunaate hai.n
zamii.n ke bhed jaise chaa.nd taaro.n ko bataate hai.n
havaa sargoshiyo.n ke jaal buntii hai
tumhe.n fursat mile to dekhnaa
lahro.n me.n ik kashtii hai
aur kashtii me.n ik tanhaa musaafir hai
musaafir ke labo.n par vaapsii ke giit
lahro.n kii subuk-gaamii me.n Dhalte
daastaa.n kahte
jaziiro.n me.n kahii.n bahte
puraane saahilo.n par guu.njte rahte
kisii maa.njhii ke naGmo.n se gale mil kar palaTte hai.n
tumhaarii yaad kaa safha ulaTre hai.n
abhii kuchh raat baaqii hai
tumhaaraa aur meraa saath baaqii hai
a.ndhero.n me.n chhupaa ik raushnii kaa haath baaqii hai
chale aanaa
ki ham us aane vaalii sub.h ko ik saath dekhe.nge

Saleem Kausar
Nazm

madrase ka ek hi kamra

master jii baahar ga.e hai.n
master jii ga.e zaraa baahar
ab nazar kyaa rahe kitaabo.n par
dil hii dil me.n hai.n saare la.Dke shaad
goyaa qaidii the ab hu.e aazaad
ab kitaabe.n kahaa.n sabaq kis kaa
pa.Dhnaa-va.Dhnaa KHayaal se khiskaa
ek ha.nstaa hai ek gaataa hai
aur ik chuTkiyaa.n bajaataa hai
ek baiThe hii baiThe sotaa hai
aur ik jhuuT-muuT rotaa hai
mashvare kar rahe hai.n do baaham
aa.o chupke se uTh ke chal de.n ham
ek goshe me.n goliyaa.n khele.n
yaa ground me.n chal ke Da.nD pele.n
copy ik jald jald bhartaa hai
duusraa us se naqal kartaa hai
ghar se laa.e nahii.n hai.n kar ke savaal
master jii se ab kare.nge chaal
ik ne baa.ndhaa hai gaal par ruumaal
taaki puuchhe.n na is se ko.ii savaal
daa.Dh ke dard kaa bahaanaa hai
chhuTTii lenii hai ghar ko jaanaa hai
saath baate.n bhii hotii jaatii hai.n
shoKH ghaate.n bhii hotii jaatii hai.n
ek kahtaa hai nazm yaad nahii.n
master saahab aa na jaa.e.n kahii.n
yuu.n hii TarKHaa.uu.ngaa sune.nge jab
aataa-vaataa mujhe nahii.n matlab
ma.anii mujh ko sujhaate jaanaa tum
chupke chupke bataate jaanaa tum
aur geograph chup are chup kar
miim alif siin maas Te re Tar

Hafeez Jalandhari
Nazm

purane dushman

ik suuraj hai jo shaam-Dhale mujhe pursaa dene aataa hai
un phuulo.n kaa jo mere lahuu me.n khilne the aur khile nahii.n
un logo.n kaa jo kisii mo.D par milne the aur mile nahii.n
ik KHushbuu hai jo bastii bastii meraa piichhaa kartii hai
aur apne jii kii baat bataate Dartii hai
ik dariyaa hai jo janam janam kii pyaas bujhaane aataa hai
aur a.ngaare barsaataa hai
aur ye suuraj aur ye KHushbuu aur ye dariyaa
mirii aan-baan ke bairii hai.n
sab merii jaan ke bairii hai.n

Iftikhar Arif
Nazm

shaffafiyan

hame.n tum muskuraahaT do
tumhe.n ham khilkhilaate roz o shab de.nge
ye kaise ho
ki tum bauchha.D do
to ham tumhe.n jal-thal na de de.n
aur sahraa.o.n ko farsh-e-aab na kar de.n
hamaaraa dhyaan rakho tum
tumhe.n duniyaa me.n rakhe.nge ham apnii aarzu.o.n kii
ye kaise ho
ki tum sochaa karo
aur ham tumhaarii soch ko tajsiim na kar de.n
muravvaj chaahato.n ke
be-lachak aa.iin me.n tarmiim na kar de.n
tumhe.n ye bhii bataate hai.n
agar ko.ii KHalish hai yaa ko.ii ib.haam hai dil me.n
to phir aage nahii.n ba.Dhnaa
ki ham shaffaaf hai.n
shaffaafiyaa.n hii chaahte hai.n
be-nazar shiisho.n me.n apne aks ko mailaa nahii.n karte
tumhe.n ye bhii bataate hai.n
agar tum chhab dikhaa ke chhup ga.e
to ham tumhe.n Dhuu.nDe.nge chaahe aap kho jaa.e.n

Waheed Ahmad
Nazm

lapata

mai.n laapataa ho gayaa huu.n
ka.ii hafte hu.e
police ko report likhvaa.e
tab se roz thaane jaataa huu.n
havaldaar se puuchhtaa huu.n
meraa kuchh pataa chalaa
hamdard police afsar maayuusii se sar hilaataa hai
pha.nsii pha.nsii aavaaz me.n kahtaa hai
abhii tak tumhaaraa kuchh suraaG nahii.n milaa
phir vo tasallii detaa hai
kisii na kisii din
tum mil hii jaa.oge
behosh
kisii sa.Dak ke kinaare
yaa burii tarah zaKHmii
kisii aspataal me.n
yaa laash kii suurat
kisii nadii me.n
merii aa.nkho.n me.n aa.nsuu aa jaate hai.n
mai.n baazaar chalaa jaataa huu.n
apnaa istiqbaal karne ke liye
gul-farosh se phuul KHariidtaa huu.n
apne zaKHmo.n ke liye
chemist se
marham-paTTii kaa saamaan
tho.Dii ruu.ii
aur dard-kushaa goliyaa.n
apnii aaKHirii rusuumaat ke liye
masjid kii dukaan se ek kafan
aur apnii yaad manaane ke liye
ka.ii mom-battiyaa.n
kuchh log kahte hai.n
kisii ke marne par
mom-battii nahii.n jalaanii chaahiye
lekin vo ye nahii.n bataate
ki aa.nkh kaa taara laapataa ho jaa.e
to raushnii kahaa.n se laa.e.n
ghar kaa charaaG bujh jaa.e
to phir kyaa jalaa.e.n

Mubashshir Ali Zaidi
Nazm

siyasat

baa.ndh ke ghu.nghruu siyaasat hii nachaatii hai hame.n
aur ham naachte rahte hai.n tavaa.if kii tarah
aur hukuumat ke ishaaro.n pe hamaare Thumke
ye bataate hai.n ki ham bhii hai.n razaa-mand yahaa.n
kaun hai.n kans yaa raavan ke taraf-daar kaho
kaun ham me.n se hai zaalim kaa taraf-daar kaho
vaqt be-vaqt mile zaKHm ke naasuur to hai.n
ham bhii iisaa pe hu.e zulm se ranjuur to hai.n
sun bhii lo hazrat-e-shabbiir pe rone vaalo
in mazaalim pe yahaa.n ashk-baar ham bhii to hai.n
hai.n agar raam hamaare to tumhaare bhii to hai.n
bas mohammad hai.n musalmaa.n ke to aisaa bhii nahii.n
gaamzan raah-e-sadaaqat pe agar hai.n ham bhii
to ye naanak pe kisii qaum kaa da.avaa kyo.n ho
ab hame.n kaun pa.Dhaataa hai ye nafrat ke sabaq
ye vahii qaum hai kahte hai.n siyaasat jis ko
baa.ndh ke ghu.nghruu siyaasat hii nachaatii hai hame.n
aur ham naachte rahte hai.n tavaa.if kii tarah

Raj Kumar Kori Raz
Nazm

na-shanas

kaun se des me.n rahte hai.n vo monis jin kii
roz ik baat sunaate the sunaane vaale
Thokaro.n me.n hai mataa.a-e-dil-e-viiraa.n kab se
kyaa hu.e Gam ko sar aa.nkho.n pe biThaane vaale
raat sunsaan hai be-nuur sitaare maddham
kyaa hu.e raah me.n palko.n ko bichhaane vaale
ab to vo din bhii nahii.n hai.n ki mire naam ke saath
aap kaa naam bataate the zamaane vaale

Mustafa Zaidi
Nazm

zaitun ka daraKHt

mere paas
ko.ii baaG nahii.n hai dost
kuchh adhuure KHvaab ek balcony
aur do tiin gamle hai.n
jo mujhe duniyaa me.n daraKHto.n ke
baaqii rahne kii vajuuhaat bataate hai.n
aur ja.ngalo.n ko jalaa diye jaane kii KHabre.n pahu.nchaate hai.n
merii bahan mere kamzor pairo.n me.n
zaituun ke tel se jaan Daalne kii koshish kartii hai
maa.n hotii to vo bhii yahii kartii
kaash saarii duniyaa me.n
zaituun ke tel ke ku.e.n ho.n
aur kamzor pairo.n me.n jaan pa.D jaa.e
aur ham apne pyaaro.n ke saath
mohabbat ke baaG me.n roz chahal-qadmii kar sake.n
ek daraKHt tumhaare naam kaa bhii hogaa
mere dost
taaki ham hamesha mohabbat aur shifaa-yaabii ke mo.ajaze me.n
ek duusre ke shariik rahe.n

Zeeshan Sahil
Nazm

wo aalam KHwab ka tha

vo aalam KHvaab kaa thaa
so rahe the sab
magar ik vo
akelaa jaag uThaa thaa
kuchh aise nii.nd TuuTii thii
ki har har uzv be-kal thaa
badan saaraa
taGayyur kii talab me.n
maahii-be-aab kii suurat ta.Daptaa thaa
junuun-o-be-qaraarii ne
rago.n me.n bijliyaa.n bhar dii.n
hazaaro.n saal se rakkhe hu.e patthar ko sarkaayaa
vo apne Gaar se baahar nikal aayaa
nigaahe.n raushnii se chaar ho kar juu.n hii palTii.n
us ne KHud ko
zindagii se vasl ke imkaan me.n paayaa
bahut lambaa bahut dushvaar rasta tai kiyaa us ne
na jaane kitne dariyaa koh-o-sahraa darmiyaa.n aa.e
tilism-o-haft-KHvaa.n aa.e
tab us shahr-e-buland-o-baala-o-pur-kaif me.n pahu.nchaa
jahaa.n insaan aur haivaan sab bedaar rahte the
ba.De be-KHaar hote the
zabaa.n thii suukh ke kaa.nTaa
papoTe phuul ke kuppaa
ki us par jaagte rahne kaa aisaa shauq Gaalib thaa
badan vahshat kaa taalib thaa
magar ye kyaa
use ma.aluum ye kab thaa
zaraa jo muKHtalif ho
shahr-e-bedaaraa.n me.n us par kyaa guzartii hai
dukaane.n jin kii uu.nchii thii.n
use muKHbir samajhte the
jo maasha-KHor the pherii lagaate the
use paagal bataate the
vahaa.n baazaar me.n ko.ii use kuchh bhii na detaa thaa
jo sikke paas the us ke unhe.n ko.ii na letaa thaa
vo vaapas jaa na saktaa thaa
KHudaa-e-lam-yazal ke hukm se
us Gaar kaa mu.nh band thaa phir se
ajab be-yaavarii naa-aashnaa.ii thii
sazaa mahz us ne
aa.nkh khul jaane kii paa.ii thii

Harris Khalique
Nazm

hum ko dekhe jo aankh wala ho

ham sadaa Dafliyaa.n bajaate hai.n
saarii duniyaa ko varGalaate hai.n
aur sab ko chuGad banaate hai.n
Gaib kii baat ham bataate hai.n
munfarid aur be-badal hai.n ham
haa.n miyaa.n intellectual hai.n ham

Mohammad Yusuf Papa
Nazm

meri shaeri aur naqqad

tiira-o-taar sii ye raat, bhayaanak sii fazaa
Dagmagaate hu.e qadmo.n ko mire dost ba.Dhaa
ik zaraa aur bulandii pe KHudaa-raa aa jaa
dekh is vus.at-e-taariik ke sannaaTe ko
devtaa maut kaa khole hu.e jaise shahpar
aur is vus.at taariik ke sannaaTe me.n
ko.ii chhiine liye jaataa hai sitaaro.n kii damak
ko.ii be-nuur kiye detaa hai sho.alo.n kii lapak
ko.ii kaliyo.n ko masaltaa hai to phir kyaa kiije
zaKHm-e-gul tujh ko mahaknaa hai to ha.ns ha.ns ke mahak
kaun sayyaad kii nazro.n se bhalaa bachtaa hai
taa.ir-e-gosha-nashii.n! KHuub chahak! KHuub chahak!
jaagtii zard sii aa.nkhe.n na kahe.n lag jaa.e.n
dard-e-iflaas! zaraa aur chamak aur chamak!
la.al-o-gauhar ke KHazaane bhii kahii.n bharte hai.n
araq-e-mehnat-e-majbuur! Tapak aur Tapak!
hai tire zo.af pe kuchh mastii-e-sahbaa kaa gumaa.n
ai qadam aur bahak! aur bahak aur bahak!
vo chamaktii hu.ii aa.ii tire sar par shamshiir
mizha-e-tiflak-e-maasuum jhapak! jald jhapak!
siina-e-KHaak me.n be-kaar hu.aa jaataa hai jazb
ruKH-e-be-daad pe ai KHuun jhalak! aah jhalak!
qatra qatra yuu.nhii Tapkaataa rahegaa ko.ii zahr
tuu bhii ai sabr ke saaGar yuu.nhii tham tham ke chhalak!
maut kaa raqs bhii kiyaa chiiz hai ai sham-e-hayaat!
haa.n zaraa aur bha.Dak aur bha.Dak aur bha.Dak!
har taraf kaargah-e-dahr me.n uThtaa hai dhu.aa.n
har taraf maut ke aasaar, tabaahii ke nishaa.n
sard ajsaam bataate nahii.n manzil kaa pataa
raahe.n viiraan hai.n, milte nahii.n raahii ke nishaa.n
zulmat-e-Gam hai ki ba.Dhtii hii chalii jaatii hai
haa.n magar kis ne jalaa.e hai.n ye hikmat ke diye
aa.nkhe.n chiiKHe.n ki nikal aayaa vo ummiid kaa chaa.nd
chau.nkaa diivaana ki daamaan-e-dariida ko siye
dau.Daa mai-KHvaar ki ik jaam-e-mai-e-tund piye
KHvaahish-e-marg mire siine me.n hone lagii zab.h
Duubte dil ne du.aa maa.ngii kii kuchh aur jiye

Moin Ahsan Jazbi
Nazm

wo jo astronaut chand se aae hain

chaa.nd kii badaltii
chaa.ndnii se ka.ii dil ju.De hai.n
vo chaa.nd kii aThkheliyo.n ko
ko.ii vigyaan bataate hai.n
kahte hai.n ek upgrah hai
are ham to bachpan
se maamaa kahte hai.n
vo jo astronaut
chaa.nd se aa.e hai.n
pata nahii.n kahaa se
jhuuTii tasviire.n laa.e hai.n

Kamal Upadhyay
Nazm

apne jaise aashiqon ke nam

mai.n ta.Daptaa huu.n
mai.n bahut ta.Daptaa huu.n
ki vahaa.n lauT jaa.uu.n jahaa.n se merii umr shuruu.a hu.ii thii
jahaa.n mere din raat merii miTTii kii mahak se mahakte the
zamiin bhar kii dhuup me.n se mere hisse kii dhuup
mere rome rome ko se.nktii thii
sitaaro.n bhare aasmaan me.n se mere naam kaa sitaara
badan kii agnii ban ke mere hisse kii dulhan ko
nadii ke paanii se banii hu.ii sej pe utaartaa thaa
aur an-dekhii tah me.n tairtii machhliyo.n kii saa.ns ko sa.ngiit kar detaa thaa
raat me.n chhupe hu.e din ko
aur din me.n chhupii hu.ii raat ko
ek duusre ke paas laa ke KHud kahii.n chhup jaataa thaa
phir jhaag se jhaag nikaltaa thaa
aur jhaag se an-ginat muurtiyaa.n bantii thii.n
tab unhe.n puujne kii tijaarat iijaad nahii.n hu.ii thii
tab aag harii ghaas ko nahii.n jalaatii thii
sivaa.e is ke ki paa.nv par re.ngtii hu.ii chyuu.nTii haath kii paka.D me.n aa jaatii thii
kaa.enaat bhar kii bhuuk aur pyaas kii
sii.nchaa.ii karte hu.e kisaan aur khudaa.ii karte hu.e mazduur
abhii khet aur fasl aur kachche pakke ghar aur diivaaro.n aur jiivan maran
aur shamshaan bhuum aur qabro.n se pahchaane to jaate the
abhii baazaaro.n me.n ghuumte phirte na.nge paagalo.n
aur un ke hisse kii gaaliyo.n aur pattharo.n kii pahchaan se zindagii kii pahchaan to hotii thii
abhii raat ke safar me.n kisii an-dekhe jahaan se
merii duniyaa ke ja.ngalo.n me.n utarte jugnu.o.n ke jhunD chahak chahak ke
sudhaarii hu.ii ruuho.n kaa ataa pataa bataate the
afsos ab mai.n vahaa.n lauTnaa chaahuu.n bhii
to KHud par itnaa guzar chukaa huu.n ki lauT nahii.n saktaa

Ahmad Hamesh
Nazm

mohammad muskuraate the

mohammad kii tarah mai.n bhii
hamesha muskuraa.uu.ngaa
mai.n jab jannat me.n un se
KHud miluu.ngaa ye bataa.uu.ngaa
mujhe un se mohabbat hai
mai.n un se pyaar kartaa huu.n
ki jab mai.n chhoTaa bachcha thaa
to un ko sochtaa thaa
yaad kartaa muskuraataa thaa
ki tab har raat ko
sone se kuchh pahle
mujhe abbuu bataate the
mohammad muskuraate the
hamesha muskuraate the

Qudsiya Jabeen
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now