Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bhai.nse.n"

Nazm MATCHES FOR "bhai.nse.n"

Nazm

aql baDi ya bhains

ek thaa raaja mehdii alii KHaa.n ek thii us kii raanii
raanii kii ik maa.n thii ya.anii bachcha log kii naanii
karnaa KHudaa kaa aisaa hu.aa ik roz ko.ii ham-saaya
raaja ke darbaar me.n ik chhoTii sii chuhiyaa laayaa
dekhaa jab us chuhiyaa ko hairaan hu.e darbaarii
piitii thii vo coca-cola khaatii thii tarkaarii
a.ngrezii me.n baate.n kar ke filmii gaane gaatii
rang bira.nge Dance dikhaa kar sab kaa jii bahlaatii
parde se ye manzar dekhaa jab raanii kii maa.n ne
sochaa ham-saa.e se le le chuhiyaa kisii bahaane
bu.Dhiyaa ne sar piiTaa apnaa KHuub kiyaa vaavailaa
o.Dh liyaa phir vo dopaTTa rang thaa jis kaa mailaa
kahne lagii chillaa chillaa kar raaja terii duhaa.ii
ye hai meraa chor ki is ne merii bhai.ns churaa.ii
chhiin lo is se bhai.nse.n merii aur mu.nh par maaro chaa.nTaa
dekho dekho suukh ke merii bhai.nse.n hu.ii hai kaa.nTaa
raaja meh.ndii alii KHaa.n jo the raajaa.o.n ke raaja
kaam na kuchh bhii karte aaTho.n-pahar bajaate baajaa
garaj ke bole o marduud bataa kyuu.n bhai.ns churaa.ii
ham ne to us bhai.ns ke aage barso.n biin bajaa.ii
raaja kii ye baat sunii to kahne lagaa ham-saayaa
jiye vo saas ki chuhiyaa ko bhii jis ne bhai.ns banaayaa
raaj hai teraa is nagrii me.n KHuub sazaa de mujh ko
aql ba.Dii yaa bhai.ns bas itnii baat bataa de mujh ko

Qateel Shifai
Nazm

ab KHub hansega diwana

ab duudh na de.ngii bhai.nse.n gaa.e.n
uf uf karne lage.ngii maa.e.n
bachche mam mam chiiKHe.nge
aur uu.nghne vaale nikhTuu shauhar
''aql-e-mujassam'' chiiKHe.nge
sab darham-barham chiiKHe.nge
ab KHuub ha.nsegaa diivaana

Hafeez Jalandhari
Nazm

mera bap

khulii fazaa me.n saaf havaa ke jaisaa vo
baarish ke paanii ke jaisaa vo
gahraa thaa miTTii se rishta pairo.n kaa
us rishte ke biich na aa.ii chappal bhii
gha.Dii na baa.ndhii kabhii kalaa.ii par us ne
suuraj-taare vaqt use batlaate the
apne bal par apnii dhun me.n rahtaa thaa
nahii.n kisii se gaa.nv me.n vo Dartaa thaa
naam kii KHvaahish thii na use pahchaan kii thii
bas apne kaamo.n se matlab rakhtaa thaa
vo daana thaa vo miTTii thaa
vo paudaa thaa vo mausam thaa
vo sachchaa KHaalis insaan thaa
jaise aadam aur havvaa the
vo tanhaa thaa
ek ba.De se ghar me.n tanhaa rahtaa thaa
bhai.nse.n us ke saath thii.n
us kii baat samajhtii thii.n
vo bhii un kii hii bhaashaa me.n un se baate.n kartaa thaa
ghar par aksar lagaa ke taalaa yuu.nhii saa
khaliyaano.n me.n rahne vaalaa baap miraa
kheto.n kheto.n basne vaalaa baap miraa
aam kii chhaa.nv me.n sone vaalaa baap miraa
ab miTTii me.n sotaa hai
aam ke pe.D kii KHushk ja.Do.n me.n rotaa hai

Shakeel Azmi
Nazm

malik ka ehsan

bhai.nse.n goyaa duudh kii kaane.n kaar-aamad hai.n gho.De bail
lamha bhar ko bhii aayaa kab bechaaro.n ke dil me.n mail
kuttaa apnii khetii baa.Dii aur ghar kaa darbaan hu.aa hai
jaanvaro.n kaa mulko.n mulko.n rozaana gun-gaan hu.aa hai

Mateen Achalpuri
Nazm

anokhi duniya

ik anokhii niraalii duniyaa me.n
yuu.n samajh lo KHayaalii duniyaa me.n
apnii duniyaa se bhii bahut pahle
lo kahaanii suno ki dil bahle
naachte the sitaare chham chham chham
aur bhai.nse.n thiraktii thii.n baaham
gaa.e.n burqe me.n mu.nh chhupaatii thii.n
bachh.Do.n ko o.Dhnii u.Dhaatii thii.n
barf ke jab pahaa.D galte the
uu.nT chesTer pahan ke chalte the
kyaa zamaana thaa kyaa kahuu.n saathii
paa.ejaama pahante the haathii
machhliyaa.n sa.Dko.n par Tahaltii thii.n
park kii ghaa.ns par machaltii thii.n
pahne rahtaa thaa har qulii kamKHaab
shaahzaade uThaate the asbaab
baaz GauGaa.iyo.n se Darte the
aur kabuutar shikaar karte the
billii chuuhe se KHauf khaatii thii
kutte ko us kii dum hilaatii thii
sher kaa dil dha.Daktaa thaa dhak dhak
saare jangal kaa raajaa thaa me.nDak
bakriyaa.n par lagaa ke u.Dtii thii.n
dum havaa me.n uThaa ke u.Dtii thii.n
bail ke sii.ng ho ga.e the gum
nazar aataa thaa har gadhaa be-dum
murGiyo.n ke the maKHmalii gadde
jin pe detii thii.n baiTh kar anDe
shahd kii sii kuuniin me.n thii miThaas
dukh ko kahte the sukh to aas ko yaas
chi.Diyaa.n rozaana duudh detii thii.n
kashtiyaa.n maa.njhiyo.n ko khetii thii.n
reshmii saafa baa.ndh kar gho.De
shaan se masnado.n pe baiThe the
bachche islaah karte copy par
dau.Daa karte the race me.n teacher

Shamim Karhani
Nazm

sham

shafaq phuulii gayaa din ho ga.ii shaam
kare.nge kaam karne vaale aaraam
abhii pachchhim me.n chhup jaa.egaa suuraj
nahii.n shab bhar nazar aa.egaa suuraj
chale aate hai.n ghar ko raaj-mazduur
ki din bhar kaam karte ho ga.e chuur
mulaazim daftaro.n se aa rahe hai.n
miThaa.ii aur saudaa laa rahe hai.n
musaafir ne kamar manzil pe kholii
bhikaarii aa ga.e phailaa.e jholii
parinde u.D chale hai.n gho.nslo.n ko
qataare.n kaisii baa.ndhii hai.n vo dekho
vo gaa.e.n bhai.nse.n char kar aa rahii hai.n
ye ab apne gharo.n ko jaa rahii hai.n
havaa ke jho.nke maddham ho ga.e hai.n
daraKHt aaraam se ab so ga.e hai.n
karo ab pyaare bachcho tum bhii aaraam
shafaq phuulii gayaa din ho ga.ii shaam

Nishtar Jalandhari
Nazm

amanat

mai.n
saal-haa-saal se
ek chhoTii sii
poshiida aarzuu kaa amiin huu.n
meraa ek muKHtasar saa KHuubsuurat lak.Dii kaa makaan
aa.ngan me.n
daana chugtii hu.ii murGiyaa.n
kuchh paaltuu jaanvar
gaa.e.n bhai.nse.n bakriyaa.n
aur
chaaro.n-samt sabz rang me.n lipTe hu.e khet hii khet
miiThe paanii se labrez
gahre ku.n.e.n
aur
unhii.n kheto.n ke darmiyaan se ho kar
guzartii hu.ii ek kahkashaa.n jaisii pagDanDii
sar-niguu.n daraKHto.n ke
aadaab qubuul kartii hu.ii
lekin
nahii.n kuchh bhii nahii.n
mai.n to abhii tak
is chhoTii sii poshiida aarzuu kaa amiin huu.n

Saeed Arifi
Nazm

raste mein ek ganw

chhe yaa saat puraane ghar aapas me.n mil kar baiThe the
ik TuuTe-phuuTe chhak.De me.n ik do kutte uu.ngh rahe the
piipal ke ik pe.D ke niiche kuchh bhai.nse.n KHaamosh kha.Dii thii.n
do chiile.n suukhe kheto.n par par phailaa.e tair rahii thii.n
dhuul u.Daa.e jaataa thaa rasta kachchaa
car ke piichhe bhaag rahaa thaa ik bachcha

Mohammad Alvi
Nazm

banjara-nama

Tuk hirs-o-havaa ko chho.D miyaa.n mat des bides phire maaraa
qazzaaq ajal kaa luuTe hai din raat bajaa kar naqqaaraa
kyaa badhiyaa bhai.nsaa bail shutur kyaa gaune.n pallaa sar-bhaaraa
kyaa gehuu.n chaa.nval moTh maTar kyaa aag dhu.aa.n aur a.ngaaraa
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

hubb-e-watan

ai dil ai banda-e-vatan hoshiyaar
KHvaab-e-Gaflat se ho zaraa bedaar
o sharaab-e-KHudii ke matvaale
ghar kii chaukhaT ke chuumne vaale
naam hai kyaa isii kaa hubb-e-vatan
jis kii tujh ko lagii hu.ii hai lagan
kabhii bachcho.n kaa dhyaan aataa hai
kabhii yaaro.n kaa Gam sataataa hai
yaad aataa hai apnaa shahr kabhii
lau kabhii ahl-e-shahr kii hai lagii
naqsh hai.n dil pe kuucha-o-baazaar
phirte aa.nkho.n me.n hai.n dar-o-diivaar
kyaa vatan kyaa yahii mohabbat hai
ye bhii ulfat me.n ko.ii ulfat hai
is me.n insaa.n se kam nahii.n hai.n darind
is se KHaalii nahii.n chairnd o parind
Tuk.De hote hai.n sang Gurbat me.n
suukh jaate hai.n ruukh furqat me.n
jaa ke kaabul me.n aam kaa paudaa
kabhii parvaan cha.Dh nahii.n saktaa
aa ke kaabul se yaa.n bihii-o-anaar
ho nahii.n sakte baarvar zinhaar
machhlii jab chhuuTtii hai paanii se
haath dhotii hai zindagaanii se
aag se jab hu.aa samundar duur
us ko jiine kaa phir nahii.n maqduur
gho.De jab khet se bichha.Dte hai.n
jaan ke laale un ke pa.Dte hai.n
gaa.e, bhai.ns uu.nT ho yaa bakrii
apne apne Thikaane KHush hai.n sabhii
kahiye hubb-e-vatan isii ko agar
ham se haivaa.n nahii.n hai.n kuchh kam-tar
hai ko.ii apnii qaum kaa hamdard
nau-e-insaa.n kaa samjhe.n jis ko fard
jis pe itlaaq-e-aadmii ho sahiih
jis ko haivaa.n pe de sake.n tarjiih
qaum par ko.ii zad na dekh sake
qaum kaa haal-e-bad na dekh sake
qaum se jaan tak aziiz na ho
qaum se ba.Dh ke ko.ii chiiz na ho
samjhe un kii KHushii ko raahat-e-jaa.n
vaa.n jo nau-roz ho to iid ho yaa.n
ra.nj ko un ke samjhe maaya-e-Gam
vaa.n agar sog ho to yaa.n maatam
bhuul jaa.e sab apnii qadr-e-jaliil
dekh kar bhaa.iyo.n ko KHvaar-o-zaliil
jab pa.De un pe gardish-e-aflaak
apnii aasaa.isho.n pe Daal de KHaak

Altaf Hussain Hali
Nazm

east india company ke farzandon se KHitab

kis zabaa.n se kah rahe ho aaj tum saudaagaro
dahr me.n insaaniyat ke naam ko uu.nchaa karo
jis ko sab kahte hai.n hitler bhe.Diyaa hai bhe.Diyaa
bhe.Diye ko maar do golii pa.e-amn-o-baqaa
baaG-e-insaanii me.n chalne hii pe hai baad-e-KHizaa.n
aadamiyyat le rahii hai hichkiyo.n par hichkiyaa.n
haath hai hitler kaa raKHsh-e-KHud-sarii kii baag par
teG kaa paanii chhi.Dak do germany kii aag par
saKHt hairaa.n huu.n ki mahfil me.n tumhaarii aur ye zikr
nau-e-insaanii ke mustaqbil kii ab karte ho fikr
jab yahaa.n aa.e the tum saudaagarii ke vaaste
nau-e-insaanii ke mustaqbil se kiyaa vaaqif na the
hindiyo.n ke jism me.n kyaa ruuh-e-aazaadii na thii
sach bataa.o kyaa vo insaano.n kii aabaadii na thii
apne zulm-e-be-nihaayat kaa fasaana yaad hai
company kaa phir vo daur-e-mujrimaana yaad hai
luuTte phirte the jab tum kaarvaa.n-dar-kaarvaa.n
sar-barahna phir rahii thii daulat-e-hindostaa.n
dast-kaaro.n ke a.nguuThe kaaTte phirte the tum
sard laasho.n se ga.Dho.n ko paaTte phirte the tum
san.at-e-hindostaa.n par maut thii chhaa.ii hu.ii
maut bhii kaisii tumhaare haat kii laa.ii hu.ii
allaah allaah kis qadar insaaf ke taalib ho aaj
miir-ja.afar kii qasam kyaa dushman-e-haq thaa 'siraaj'
kyaa avadh kii begamo.n kaa bhii sataanaa yaad hai
yaad hai jhaa.nsii kii raanii kaa zamaana yaad hai
hijrat-e-sultaan-e-dehlii kaa samaa.n bhii yaad hai
sher-dil 'Tiipuu' kii KHuunii.n daastaa.n bhii yaad hai
tiisare faaqe me.n ik girte hu.e ko thaamne
kas ke tum laa.e the sar shaah-e-zafar ke saamne
yaad to hogii vo maTiyaa-burj kii bhii daastaa.n
ab bhii jis kii KHaak se uThtaa hai rah rah kar dhu.aa.n
tum ne qaisar-e-baaG ko dekhaa to hogaa baarhaa
aaj bhii aatii hai jis se haa.e 'aKHtar' kii sadaa
sach kaho kyaa haafize me.n hai vo zulm-e-be-panaah
aaj tak ragoon me.n ik qabr hai jis kii gavaah
zehn me.n hogaa ye taaza hindiyo.n kaa daaG bhii
yaad to hogaa tumhe.n jallianwala-bagh bhii
puuchh lo is se tumhaaraa naam kyuu.n taabinda hai
'dyer'-e-gurg-e-dahan-aaluud ab bhii zinda hai
vo 'bhagat-singh' ab bhii jis ke Gam me.n dil naashaad hai
us kii gardan me.n jo Daalaa thaa vo phandaa yaad hai
ahl-e-aazaadii rahaa karte the kis hanjaar se
puuchh lo ye qaid-KHaano.n ke dar-o-diivaar se
ab bhii hai mahfuuz jis par tantana sarkaar kaa
aaj bhii guu.njii hu.ii hai jin me.n ko.Do.n kii sadaa
aaj kashtii amn ke amvaaj par khete ho kyuu.n
saKHt hairaa.n huu.n ki ab tum dars-e-haq dete ho kyuu.n
ahl-e-quvvat daam-e-haq me.n to kabhii aate nahii.n
''bankii'' aKHlaaq ko KHatre me.n bhii laate nahii.n
lekin aaj aKHlaaq kii talqiin farmaate ho tum
ho na ho apne me.n ab quvvat nahii.n paate ho tum
ahl-e-haq raushan-nazar hai.n ahl-e-baatin kor hai.n
ye to hai.n aqvaal un qaumo.n ke jo kamzor hai.n
aaj shaayad manzil-e-quvvat me.n tum rahte nahii.n
jis kii laaThii us kii bhai.ns ab kis liye kahte nahii.n
kyaa kahaa insaaf hai insaa.n kaa farz-e-avvalii.n
kyaa fasaad-o-zulm kaa ab tum me.n kas baaqii nahii.n
der se baiThe ho naKHl-e-raastii kii chhaa.nv me.n
kyaa KHudaa-naa-karda kuchh moch aa ga.ii hai paa.nv me.n
guu.nj Taapo.n kii na aabaadii na viiraane me.n hai
KHair to hai asp-e-taazii kyaa shifaa-KHaane me.n hai
aaj kal to har nazar me.n rahm kaa andaaz hai
kuchh tabii.at kyaa nasiib-e-dushmanaa.n naa-saaz hai
saa.ns kyaa ukh.Dii ki haq ke naam par marne lage
nau-e-insaa.n kii havaa-KHvaahii kaa dam bharne lage
zulm bhuule raagnii insaaf kii gaane lage
lag ga.ii hai aag kyaa ghar me.n ki chillaane lage
mujrmo.n ke vaaste zebaa nahii.n ye shor-o-shain
kal 'yaziid' o 'shimr' the aur aaj bante ho 'husain'
KHair ai saudaagaro ab hai to bas is baat me.n
vaqt ke farmaan ke aage jhukaa do gardane.n
ik kahaanii vaqt likkhegaa na.e mazmuun kii
jis kii surKHii ko zaruurat hai tumhaare KHuun kii
vaqt kaa farmaan apnaa ruKH badal saktaa nahii.n
maut Tal saktii hai ab farmaan Tal saktaa nahii.n

Josh Malihabadi
Nazm

barkha-rut

garmii kii tapish bujhaane vaalii
sardii kaa payaam laane vaalii
qudrat ke ajaa.ibaat kii kaa.n
aarif ke liye kitaab-e-irfaa.n
vo shaaKH-o-daraKHt kii javaanii
vo mor-o-malaKH kii zindagaanii
vo saare baras kii jaan barsaat
vo kaun-e-KHudaa kii shaan barsaat
aa.ii hai bahut du.aa.o.n ke ba.ad
vo saik.Do.n iltijaa.o.n ke ba.ad
vo aa.ii to aa.ii jaan me.n jaa.n
sab the ko.ii din ke varna mehmaa.n
garmii se ta.Dap rahe the jaan-daar
aur dhuup me.n tap rahe the kohsaar
bhuubal se sivaa thaa reg-e-sahraa
aur khaul rahaa thaa aab-e-dariyaa
saa.nDe the bilo.n me.n mu.nh chhupaa.e
aur haa.np rahe the chaarpaa.e
thii.n loma.Diyaa.n zabaa.n nikaale
aur luu se hiran hu.e the kaale
chiito.n ko na thii shikaar kii sudh
hirno.n ko na thii qataar kii sudh
the sher pa.De kachhaar me.n sust
gha.Diyaal the ruud-baar me.n sust
Dhoro.n kaa hu.aa thaa haal patlaa
bailo.n ne diyaa thaa Daal kandhaa
bhai.nso.n ke lahuu na thaa badan me.n
aur duudh na thaa ga.uu ke than me.n
gho.Do.n kaa chhuTaa thaa ghaas daana
thaa pyaas kaa un pe taaziyaana
garmii kaa lagaa hu.aa thaa bhabkaa
aur ans nikal rahaa thaa sab kaa
tuufaan the aa.ndhiyo.n ke barpaa
uThtaa thaa baguule par baguulaa
aare the badan pe luu ke chalte
sho.ale the zamiin se nikalte
thii aag kaa de rahii havaa kaam
thaa aag kaa naam muft bad-naam
rasto.n me.n savaar aur paidal
sab dhuup ke haath se the bekal
gho.Do.n ke na aage uThte the paa.nv
miltii thii kahii.n jo ruukh kii chhaa.nv
thii sab kii nigaah suu-e-aflaak
paanii kii jagah barastii thii KHaak

Altaf Hussain Hali
Nazm

uT-paTang

kaano.n kii ik nagrii dekhii jis me.n saare kaane dekhe
ek taraf se ahmaq saare ek taraf se siyaane the
kaano.n kii is nagrii ke sab riit rivaaj alaahada the
rog alaahada bastii me.n the aur ilaaj alaahada the
do do kaane mil kar puuraa sapnaa dekhaa karte the
ga.ngaa ke sa.ngam se kaane jamunaa dekhaa karte the
chaa.ndnii raat me.n chhatrii le kar baahar jaayaa karte the
os gire to kahte hai.n vaa.n sar phaT jaayaa karte the
dariyaa pul par chaltaa thaa paanii me.n raile.n chaltii thii.n
la.nguuro.n kii dum par a.nguuro.n kii bele.n paktii thii.n
chhuut kii ik biimaarii phailii ek dafa un kaano.n me.n
bhuuk ke kii.De sunte hai.n nikle gandum ke daano.n me.n
roz ka.ii kaane bechaare marte the biimaarii me.n
kahte hai.n raajaa sotaa thaa sone kii almaarii me.n
ghanTii baa.ndh ke chuuhe jab billii se dau.D lagaate the
peT pe dono.n haath bajaa kar sab qavvaalii gaate the
tab kaanii bhai.ns ne phuul phulaa kar chhe.Daa biin kaa baajaa
aur kaalaa chashma pahan ke singhaasan par aayaa raajaa
dukh se chashme kii dono.n hii aa.nKHe.n paanii paanii thii.n
dekhaa us kaane raajaa kii dono.n aa.nKHe.n kaanii thii.n
jhuuTaa hai jo andho.n me.n kaanaa raajaa hai kahtaa hai
jaa kar dekho kaanii nagrii andhaa raajaa rahtaa hai

Gulzar
Nazm

ab jidhar bhi jate hain

pahle aisaa hotaa thaa
bhaa.nt bhaa.nt ke bandar
shahr kii fasiilo.n par
mahfile.n jamaate the
ghar me.n kuud aate the
haath me.n se bachcho.n ke
roTii noch jaate the
ab to vo madaarii bhii
KHaalii haath aataa hai
bhiik maa.ng kar ghar ghar
ghar ko lauT jaataa hai
ab gharo.n me.n chi.Diyo.n kaa
shor kyuu.n nahii.n hotaa
raat ko ko.ii ulluu
pe.D par nahii.n rotaa
pe.D par nahii.n rotaa
la.Dte la.Dte chi.Diyaa.n kyuu.n
farsh par nahii.n girtii.n
billiyaa.n chhato.n par kyuu.n
ghuumtii nahii.n phirtii.n
ab na ko.ii bulbul hai
aur na ko.ii mainaa hai
ab na ko.ii tiitar hai
aur na ko.ii totaa hai
kis se puuchhne jaa.e.n
mor kaisaa hotaa hai
Toliyaa.n kabuutar kii
kho ga.ii.n fazaa.o.n me.n
titliyo.n ke ra.ngii.n par
bah ga.e havaa.o.n me.n
mu.nh-a.ndhere ab murGaa
baa.ng kyuu.n nahii.n detaa
ghar me.n ko.ii bakrii kaa
naam kyuu.n nahii.n letaa
kyaa hu.e daraKHto.n par
gho.nsle parindo.n ke
ko.ii bhii nahii.n kahtaa
qisse ab darindo.n ke
nanhe nanhe chuuzo.n par
chiil kaa jhapaTnaa ab
dekhne kahaa.n jaa.e.n
raaste me.n saa.nDo.n kaa
pahro.n la.Dte rahnaa ab
dekhne kahaa.n jaa.e.n
chhipkilii kii jiitii dum
ab thiraktii kyaa paa.e.n
ra.ng badalte girgiT ko
maarte kahaa.n jaa.e.n
gaa.e bhai.ns kaa reva.D
ab idhar nahii.n aataa
uu.nT Te.Dhaa-me.Dhaa saa
ab nazar nahii.n aataa
ab na gho.De haathii hai.n
aur na vo baraatii hai.n
ab galii me.n kutto.n kaa
bhau.nknaa nahii.n hotaa
raat chhat pe sote hai.n
bhuut dekh kar ko.ii
chau.nknaa nahii.n hotaa
ab jidhar bhii jaate hai.n
aadmii ko paate hai.n

Mohammad Alvi
Nazm

kale safed paron wala parinda aur meri ek sham

bargad ke niiche baiTho yaa suulii cha.Dh jaa.o
bhai.nse la.Dne se baaz nahii.n aa.e.nge
maut se ham ne ek ta.aavun kar rakkhaa hai
sa.Dko.n par se har lamha ik mayyat jaatii hai
pas-manzar me.n kyaa hotaa hai nazar kahaa.n jaatii hai
saamne jo kuchh hai ra.ngo.n aavaazo.n chehro.n kaa melaa hai!

Akhtarul Iman
Nazm

jashn-e-salgirah

saalgirah KHargosh manaa.e
ja.ngal ke sab saathii aa.e
bhii.D lagii hai mehmaano.n kii
kuchh apno.n kuchh begaano.n kii
sher dahaa.De.n maartaa aa.e
haathii bhii chi.nghaa.Dtaa aa.e
kuttaa bhau.n bhau.n kartaa aayaa
saa.nbhar chauk.Dii bhartaa aayaa
gaay jab rambhaatii aa.ii
bakrii kuchh sharmaatii aa.ii
naachtaa gaataa aayaa bhaaluu
Doltaa aayaa menDhaa kaaluu
gho.Daa sarpaT dau.Daa aayaa
bhai.nso.n kaa ik jo.Daa aayaa
hirnii aa.ii lom.Dii aa.ii
billii apne bachche laa.ii
saath me.n sab hii laa.e tohfe
sab KHargosh ne paa.e tohfe
phuulo.n kaa guldasta le kar
chii.n chii.n kartaa aayaa bandar
cake banaa ke laayaa chiitaa
us ne dil KHargosh kaa jiitaa
cake kaTaa to saare KHush the
cake baTaa to saare KHush the
ik duuje se gale mile sab
bhuul ke shikve aur gile sab
bandar naache bhaaluu gaa.e
kaaluu me.nDhaa Dhol bajaa.e
saalgirah kaa jashn bapaa hai
ja.ngal jangal shor hu.aa hai

Haidar Bayabani
Nazm

aadmi

ye aadmii la.Daa.ii ko vietnam me.n gayaa
vo korea gayaa kabhii aasaam me.n gayaa
vo telaviv o qaahira o shaam me.n gayaa
ye aadmii hii muttahid-aqvaam me.n gayaa
phir aadmii ko amn sikhaataa hai aadmii
bhai.nso.n ke aage biin bajaataa hai aadmii

Syed Mohammad Jafri
Nazm

dal ki fariyaad

ek la.Dkii baghaartii hai daal
daal kartii hai arz yuu.n ahvaal
ek din thaa harii-bharii thii mai.n
saarii aafaat se barii thii mai.n
thaa haraa khet meraa gahvaara
vo vatan thaa mujhe bahut pyaaraa
paanii pii pii ke thii mai.n lahraatii
dhuup letii kabhii havaa khaatii
me.nh barastaa thaa jho.nke aate the
godiyo.n me.n mujhe khilaate the
yahii suuraj zamii.n the maa.n baavaa
mujh se karte the nek bartaavaa
jab kiyaa mujh ko paal-pos ba.Daa
aah zaalim kisaan aan pa.Daa
ga.ii taqdiir yak-ba-yak jo palaT
khet kaa khet kar diyaa talpaT
KHuub luuTaa dha.Dii dha.Dii kar ke
mujh ko gauno.n me.n le ga.e bhar ke
ho ga.ii dam ke dam me.n barbaadii
chhin ga.ii haa.e merii aazaadii!
kyaa bataa.uu.n kahaa.n kahaa.n khii.nchaa
daal-manDii me.n mujh ko jaa bechaa
ek zaalim se vaa.n pa.Daa paalaa
jis ne chakkii me.n mujh ko dal Daalaa
hu.aa taqdiir kaa likhaa puuraa
dono.n paaTo.n ne kar diyaa chuuraa
na sunii merii aah aur zaarii
KHuub baniye ne kii KHariidaarii
chhaanaa chhalnii me.n chhaaj me.n phaTkaa
qaid-KHaana miraa banaa maTkaa
phir muqaddar mujhe yahaa.n laayaa
tum ne to aur bhii Gazab Dhaayaa
khaal khii.nchii alag kiye chhilke
zaKHm kyuu.n-kar hare na ho.n dil ke
Daalii.n marche.n namak lagaayaa KHuub
rakh ke chuulhe pe jii jalaayaa KHuub
us pe kaf-giir ke bhii Thoke hai.n
aur naaKHun ke bhii kachoke hai.n
mere galne kii le rahii ho KHabar
daa.nt hai aap kaa mire uupar
garm ghii kar ke mujh ko daaG diyaa
haa.e tum ne bhii kuchh na rahm kiyaa
haath dho kar pa.Dii ho piichhe tum
jaan par aa banii havaas hai.n gum
achchhii bii-bii tumhii.n karo insaaf
zulm hai yaa nahii.n qusuur-mu.aaf
kahaa la.Dkii ne merii pyaarii daal
mujh ko ma.aluum hai tiraa sab haal
tuu agar khet se nahii.n aatii
KHaak me.n mil ke KHaak ho jaatii
yaa ko.ii gaa.e bhai.ns char letii
peT me.n apne tujh ko bhar letii
mai.n to rutba tiraa ba.Dhaatii huu.n
ab chapaatii se tujh ko khaatii huu.n
na sataanaa na jii jalaanaa thaa
yuu.n tujhe aadmii banaanaa thaa
aglii biitii kaa tuu na kar kuchh Gam
mehrbaanii thii sab, na thaa ye sitam

Ismail Merathi
Nazm

nind se chaunko

gahrii nii.nd se sone vaalo
vaqt ko apne khone vaalo
raat kaTii kuchh tum ko KHabar hai
chau.nko chau.nko vaqt-e-sahar hai
chaa.nd kii rangat ho ga.ii mailii
dekho chamak suuraj kii phailii
chalte hai.n jho.nke sard havaa ke
jhuum rahe hai.n phuul itraa ke
koyale.n kuuke.n kuu kuu kuu kuu
yaahuu bole yaahuu yaahuu
nii.nd se chau.nke.n pankh pakheruu
bol rahe hai.n shaaKHo.n pe har suu
bhuule hu.e hai.n is dam sab dhun
laal pukaare summun bukmun
khil ga.ii.n kaliyaa.n baaG kii saarii
chaar taraf hai.n nahre.n jaarii
go ki abhii tak kuchh hai a.ndheraa
chi.Diyaa.n lene aa.ii.n baseraa
gaa.e.n duub ko charne aa.ii.n
bhai.nso.n ne apnii shakle.n dikhaa.ii.n
ruk gayaa is dam bahtaa dariyaa
duur talak shaffaaf hai sahraa
uTTho uTTho ahmad uTTho
mu.nh ko dho kar kap.De pahan lo
sair karo maidaa.n kii nikal kar
phuul ko dekho baaG me.n chal kar
vaqt ko khonaa zulm hai pyaare
sun ye nasiihat dost hamaare

Shad Azimabadi
Nazm

mazdur

june kii garmii ka.Daktii dhuup luu chaltii hu.ii
har gha.Dii mazduur ke sar se qazaa Taltii hu.ii
sar pe gaare kii ka.Dhaa.ii aur diivaar-e-buland
haa.nptaa vo cha.Dh rahaa hai le ke himmat kii kamand
paa.D par pahu.nchaa to ik gaalii sunii me.amaar se
jii me.n aayaa sar ko Takraa de usii diivaar se
haa.e us mazluum kii majbuuriyaa.n naa-chaariyaa.n
jaan kaa aazaar hai.n iflaas kii biimaariyaa.n
dil me.n kahtaa hai ki ye me.amaar bhii mazduur hai
phir yahii jaan-e-hazii.n kyuu.n is qadar maqhuur hai
us kii ujrat mujh se dugunii hai magar kam hai shu.uur
tamkanat kis baat par kis chiiz par itnaa Guruur
mai.n agar naadaar huu.n ye bhii nahii.n sarmaaya-daar
bhuut vo hai kis ba.Daa.ii kaa jo us par hai savaar
ii.nT gaaraa mai.n na duu.n us ko to ye kis kaam kaa
asl me.n me.amaar mai.n huu.n ye faqat hai naam kaa
merii himmat kah rahii.n hai.n kaaKH-e-diivaan-e-buland
aah is par bhii mai.n duniyaa me.n huu.n itnaa mustamand
lag gayaa phir kaam me.n ye soch kar vo bad-nasiib
ai KHudaa duniyaa me.n itnaa bhii na ho ko.ii Gariib
din Dhalaa jis vaqt maalik bhii makaa.n kaa aa gayaa
ik sukuut-e-marg saa diivaar-o-dar par chhaa gayaa
kaa.nptaa rahtaa hai har mazduur jis ke naam se
sab usii dhun me.n the vo KHush ho hamaare kaam se
us kii peshaanii pe lekin bal zaraa aane lage
phan uThaa kar tamkanat ke saa.np lahraane lage
sab se pahle us ne gaalii dii usii me.amaar ko
apnii milkiyyat jo samjhaa thaa har ik diivaar ko
josh-e-naKHvat se kahaa us ne ki ai paajii la.ii.n
kal jahaa.n tak thii ga.ii diivaar ab bhii hai vahii.n
kyaa kiyaa hai tuu ne din-bhar me.n zaraa mujh ko bataa
yuu.n takabbur me.n vo aa kar jaa.eza lene lagaa
dil me.n vo mazduur phir kahne lagaa uf re Gazab
jo bhii is duniyaa me.n hai.n fir.aun hai.n vo sab ke sab
jis kaa jis par bas chale paamaal kartaa hai use
KHud agar KHush-haal hai bad-haal kartaa hai use
kyaa kahuu.n sarmaaya-daaro.n ke sitam kii daastaa.n
diida-e-mazduur hai mazduur se bhii KHuu.nfishaa.n
jis kii laaThii us kii bhai.ns is misl ko saadiq samajh
ye samajh kar is KHudaa-e-paak ko raaziq samajh

Arsh Malsiyani
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now