Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bisaat"

Nazm MATCHES FOR "bisaat"

Nazm

hamesha qatl ho jata hun main

bisaat-e-zindagii to har gha.Dii bichhtii hai uThtii hai
yahaa.n par jitne KHaane jitne ghar hai.n
saare
KHushiyaa.n aur Gam in.aam karte hai.n
yahaa.n par saare mohre
apnii apnii chaal chalte hai.n
kabhii mahsuur hote hai.n kabhii aage nikalte hai.n
yahaa.n par shah bhii pa.Dtii hai
yahaa.n par maat hotii hai
kabhii ik chaal Taltii hai
kabhii baazii palaTtii hai
yahaa.n par saare mohre apnii apnii chaal chalte hai.n
magar mai.n vo piyaada huu.n
jo har ghar me.n
kabhii is shah se pahle aur kabhii us maat se pahle
kabhii ik burd se pahle kabhii aafaat se pahle
hamesha qatl ho jaataa hai

Jaun Eliya
Nazm

ek pahaD aur gilahri

ko.ii pahaa.D ye kahtaa thaa ik gilahrii se
tujhe ho sharm to paanii me.n jaa ke Duub mare
zaraa sii chiiz hai is par Guruur! kyaa kahnaa!
ye aql aur ye samajh ye shu.uur! kyaa kahnaa!
KHudaa kii shaan hai naa-chiiz! chiiz ban baiThe.n!
jo be-shu.uur ho.n yuu.n baa-tamiiz ban baiThe.n!
tirii bisaat hai kyaa merii shaan ke aage
zamii.n hai past mirii aan-baan ke aage
jo baat mujh me.n hai tujh ko vo hai nasiib kahaa.n
bhalaa pahaa.D kahaa.n jaanvar Gariib kahaa.n!
kahaa ye sun ke gilahrii ne mu.nh sambhaal zaraa
ye kachchii baate.n hai.n dil se inhe.n nikaal zaraa!
jo mai.n ba.Dii nahii.n terii tarah to kyaa parvaa!
nahii.n hai tuu bhii to aaKHir mirii tarah chhoTaa
har ek chiiz se paidaa KHudaa kii qudarat hai
ko.ii ba.Daa ko.ii chhoTaa ye us kii hikmat hai
ba.Daa jahaan me.n tujh ko banaa diyaa us ne
mujhe daraKHt pe cha.Dhnaa sikhaa diyaa us ne
qadam uThaane kii taaqat nahii.n zaraa tujh me.n
nirii ba.Daa.ii hai! KHuubii hai aur kyaa tujh me.n
jo tuu ba.Daa hai to mujh saa hunar dikhaa mujh ko
ye chhaaliyaa hii zaraa to.D kar dikhaa mujh ko
nahii.n hai chiiz nikammii ko.ii zamaane me.n
ko.ii buraa nahii.n qudarat ke kaar-KHaane me.n

Allama Iqbal
Nazm

tumhaare husn ke nam

salaam likhtaa hai shaa.er tumhaare husn ke naam
bikhar gayaa jo kabhii ra.ng-e-pairahan sar-e-baam
nikhar ga.ii hai kabhii subah dopahar kabhii shaam
kahii.n jo qaamat-e-zebaa pe saj ga.ii hai qabaa
chaman me.n sarv-o-sanobar sa.nvar ga.e hai.n tamaam
banii bisaat-e-Gazal jab Dubo liye dil ne
tumhaare saaya-e-ruKHsaar-o-lab me.n saaGar-o-jaam
salaam likhtaa hai shaa.er tumhaare husn ke naam
tumhaare haath pe hai taabish-e-hinaa jab tak
jahaa.n me.n baaqii hai dildaari-e-uruus-e-suKHan
tumhaaraa husn javaa.n hai to mehrbaa.n hai falak
tumhaaraa dam hai to dam-saaz hai havaa-e-vatan
agarche ta.ng hai.n auqaat saKHt hai.n aalaam
tumhaarii yaad se shiirii.n hai talKHi-e-aiyyaam
salaam likhtaa hai shaa.er tumhaare husn ke naam

Faiz Ahmad Faiz
Nazm

aadat

muddato.n mai.n ik andhe ku.e.n me.n asiir
sar paTaktaa rahaa gi.Dgi.Daataa rahaa
raushnii chaahiye، chaa.ndnii chaahiye، zindagii chaahiye
raushnii pyaar kii, chaa.ndnii yaar kii, zindagii daar kii
apnii aavaaz suntaa rahaa raat din
dhiire dhiire yaqii.n dil ko aataa rahaa
suune sansaar me.n
bevafaa yaar me.n
daamn-e-daar me.n
raushnii bhii nahii.n
chaa.ndnii bhii nahii.n
zindagii bhii nahii.n
zindagii ek raat
vaahima kaa.enaat
aadmii be-bisaat
log kotaah-qad
shahr shahr-e-hasad
gaa.nv in se bhii bad
in a.ndhero.n ne jab piis Daalaa mujhe
phir achaanak ku.e.n ne uchhaalaa mujhe
apne siine se baahar nikaalaa mujhe
saik.Do.n misr the saamne
saik.Do.n us ke baazaar the
ek buu.Dhii zuleKHaa nahii.n
jaane kitne KHariidaar the
ba.Dhtaa jaataa thaa yuusuf kaa mol
log bikne ko tayyaar the

Kaifi Azmi
Nazm

mere pyare watan

mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan
gul-posh terii vaadiyaa.n
farhat-nishaa.n raahat-rasaa.n
tere chaman-zaaro.n pe hai
gulzaar-e-jannat kaa gumaa.n
har shaaKH phuulo.n kii chha.Dii
har naKHl-e-tuubaa hai yahaa.n
kausar ke chashme jaa-ba-jaa
tasniim har aab-e-ravaa.n
har barg ruuh-e-taazgii
har phuul jaan-e-gulsitaa.n
har baaG baaG-e-dil-kashii
har baaG baaG-e-be-KHizaa.n
dilkash charaagaahe.n tirii
Dhoro.n ke jin me.n kaarvaa.n
anjum-sifat gulhaa-e-nau
har taKHta-e-gul aasmaa.n
naqsh-e-surayyaa jaa-ba-jaa
har har ravish ik kahkashaa.n
terii bahaare.n daa.imii
terii bahaare.n jaavedaa.n
tujh me.n hai ruuh-e-zindagii
paiham ravaa.n paiham davaa.n
dariyaa vo tere tund-KHuu
jhiile.n vo terii be-karaa.n
shaam-e-avadh ke lab pe hai
husn-e-azal kii daastaa.n
kahtii hai raaz-e-sarmadii
sub.h-e-banaras kii zabaa.n
u.Dtaa hai haft-aflaak par
un kaar-KHaano.n kaa dhu.aa.n
jin me.n hai.n laakho.n mehnatii
san.at-garii ke paasbaa.n
terii banaras kii zarii
rashk-e-hariir-o-parniyaa.n
biidar kii fankaarii me.n hai.n
san.at kii sab baariikiyaa.n
azmat tire iqbaal kii
tere pahaa.Do.n se ayaa.n
dariyaa.o.n kaa paanii, tarii
taqdiis kaa andaaza-daa.n
kyaa 'bhaarte.ndu' ne kiyaa
ga.ngaa kii lahro.n kaa bayaa.n
'iqbaal' aur chakbast hai.n
azmat ke terii naGma-KHvaa.n
'josh' o 'firaaq' o 'pant' hai.n
tere adab ke tarjumaa.n
'tulsii' o 'KHusrav' hai.n terii
taariif me.n ratb-ul-lisaa.n
gaate hai.n naGma mil ke sab
uu.nchaa rahe teraa nishaa.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tere nazaaro.n ke nagii.n
duniyaa kii KHaatam me.n nahii.n
saare jahaa.n me.n muntaKHab
kashmiir kii arz-e-hasii.n
fitrat kaa ra.ngii.n mo.ajaza
firdaus bar-ruu-e-zamii.n
firdaus bar-ruu-e-zamii.n
haa.n haa.n hamii.n ast o hamii.n
sarsabz jis ke dasht hai.n
jis ke jabal hai.n surmagii.n
meve ba-kasrat hai.n jahaa.n
shiirii.n misaal-e-a.ngbii.n
har za.afaraa.n ke phuul me.n
aks-e-jamaal-e-huura.ii.n
vo maalve kii chaa.ndnii
gum jis me.n ho.n duniyaa-o-dii.n
is KHitta-e-naira.ng me.n
har ik fazaa husn-aafrii.n
har shai me.n husn-e-zindagii
dilkash makaa.n dilkash zamii.n
har mard mard-e-KHuub-ruu
har ek aurat naaznii.n
vo taaj kii KHush-paikarii
har zaaviye se dil-nashii.n
san.at-garo.n ke daur kii
ik yaadgaar-e-marmarii.n
hotii hai jo har shaam ko
faiz-e-shafaq se ahmarii.n
dariyaa kii maujo.n se alag
yaa ik bat-e-nazzaara-bii.n
yaa taa.er-e-nuurii ko.ii
parvaaz karne ke qarii.n
yaa ahl-e-duniyaa se alag
ik aabid-e-uzlat-guzii.n
naqsh-e-ajantaa kii qasam
jachtaa nahii.n arzha.ng-e-chii۔n
shaan-e-ellora dekh kar
jhuktii hai aazar kii jabii.n
chittau.D ho yaa aagara
aise nahii.n qil.e kahii.n
but-gar ho yaa naqqaash ho
tuu sab kii azmat kaa amii.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
dilkash tire dasht o chaman
ra.ngii.n tire shahr o chaman
tere javaa.n raa.anaa javaa.n
tere hasii.n gul pairahan
ik anjuman duniyaa hai ye
tuu is me.n sadr-e-anjuman
tere muGannii KHush-navaa
shaa.er tire shiirii.n-suKHan
har zarra ik maah-e-mubii.n
har KHaar rashk-e-nastarii.n
Guncha tire sahraa kaa hai
ik naafa-e-mushk-e-KHutan
ka.nkar hai.n tere be-bahaa
patthar tire laal-e-yaman
bastii se jangal KHuub-tar
baaGo.n se husn afroz ban
vo mor vo kabk-e-darii
vo chauk.Dii bharte hiran
ra.ngii.n-adaa vo titliyaa.n
baa.nbnii me.n vo naago.n ke phan
vo sher jin ke naam se
larze me.n aa.e ahrman
kheto.n kii barkat se ayaa.n
faizaan-e-rabb-e-zul-minan
chashmo.n ke shiirii.n aab se
lazzat-kashaa.n kaam-o-dahan
taabinda teraa ahd-e-nau
raushan tiraa ahd-e-kuhan
kitno.n ne tujh par kar diyaa
qurbaan apnaa maal dhan
kitne shahiido.n ko mile
tere liye daar-o-rasan
kitno.n ko teraa ishq thaa
kitno.n ko thii terii lagan
tere jafaa-kash mehnatii
rakhte hai.n azm-e-kohkan
tere sipaahii suurmaa
be-misl yaktaa-e-zaman
'bhisham' saa jin me.n hausla
'arjun' saa jin me.n baa.nkpan
aalim jo faKHr-e-ilm hai.n
fankaar naazaa.n jin pe fan
'raa.e' o 'bos' o 'shergil'
'dinkar,' 'jigar' 'maithli-sharan'
'vallathol' 'maahir', bhaartii
'bachchan', 'mahaadevii' 'suman'
'krishnan', 'niraalaa', 'prem-chand'
'tagore' o 'aazaad' o 'raman'
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
khetii tirii har ik harii
dilkash tirii KHush-manzarii
terii bisaat-e-KHaak ke
zarre hai.n mahr-o-mushtarii
jhelum kaveri naag vo
ga.ngaa kii vo ga.ngotarii
vo narbadaa kii tamkanat
vo shaukat-e-godaavarii
paakiizgii sarjuu kii vo
jamunaa kii vo KHush-gauharii
dullarba aab-e-niil-guu.n
kashmiir kii niilam-parii
dilkash papiihe kii sadaa
koyal kii taane.n mad-bharii
tiitar kaa vo haq sirrahu
tuutii kaa vo vird-e-harii
suufii tire har daur me.n
karte rahe paiGambarii
'chishtii' o 'nanak' se milii
faqr-o-Ginaa ko bartarii
adl-e-jahaa.ngiirii me.n thii
muzmar re.aayaa-parvarii
vo nau-ratan jin se hu.ii
tahziib-e-daur-e-akbarii
rakhte the afGaan-o-muGal
ik saulat-e-askandarii
raanaa.on ke iqbaal kii
hotii hai kis se ham-sarii
saava.nt vo yodhdhaa tire
tere jiyaale vo jarii
niiatii vidur kii aaj tak
kartii hai terii rahbarii
ab tak hai mash.huur-e-zamaa.n
'chanakya' kii daanish-varii
vayaas aur vishvamitr se
muniyo.n kii shaan-e-qaisarii
paatanjalii o saa.nkh se
rishiyo.n kii hikmat-parvarii
baKHshe tujhe in.aam-e-nau
har daur charKH-e-chambarii
KHush-gauharii de aab ko
aur KHaak ko KHush-jauharii
zarro.n ko mahr-afshaaniyaa.n
qatro.n ko dariyaa-gustarii
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tuu rahbar-e-nau-e-bashar
tuu amn kaa paiGaam-bar
paale hai.n tuu ne god me.n
saahib-KHirad saahib-e-nazar
afzal-tarii.n in sab me.n hai
baapuu kaa naam-e-mo'tabar
har lafz jis kaa dil-nashii.n
har baat jis kii pur-asar
jis ne lagaayaa dahr me.n
na.ara ye be-KHauf-o-KHatar
be-kaar hai.n tiir-o-sinaa.n
be-suud hai.n teG-o-tabar
hinsaa kaa rasta jhuuT hai
haq hai ahinsaa kii Dagar
darmaa.n hai ye har dard kaa
ye har maraz kaa chaara-gar
ja.ngaah-e-aalam me.n ko.ii
is se nahii.n behtar sipar
kartaa huu.n mai.n tere liye
ab ye du.aa-e-muKHtasar
raunaq pe ho.n tere chaman
sarsabz ho.n tere shajar
naKHl-e-umiid-e-behtarii
har fasl me.n ho baarvar
koshish ho duniyaa me.n ko.ii
KHitta na ho zer-o-zabar
teraa har ik baasii rahe
neko-sifat neko-siyar
har zan saliiqa-ma.nd ho
har mard ho saahib-hunar
jab tak hai.n ye arz o falak
jab tak hai.n ye shams o qamar
mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan

Arsh Malsiyani
Nazm

kya ishq ek zindagi-e-mustaar ka

merii bisaat kyaa hai tab-o-taab-e-yak-nafas
sho.ala se be-mahal hai ulajhnaa sharaar kaa

Allama Iqbal
Nazm

bebasi

vaqt ke tez gaam dariyaa me.n
tuu kisii mauj kii tarah ubhrii
aa.nkho.n aa.nkho.n me.n ho ga.ii ojhal
aur mai.n ek bulbule kii tarah
isii dariyaa ke ik kinaare par
narkulo.n ke muhiib jhaave me.n
aisaa uljhaa ki ye bhii bhuul gayaa
bulbule kii bisaat hii kyaa thii

Waseem Barelvi
Nazm

ek mohre ka safar

jab vo kam-umr hii thaa
us ne ye jaan liyaa thaa ki agar jiinaa hai
ba.Dii chaalaakii se jiinaa hogaa
aa.nkh kii aaKHirii had tak hai bisaat-e-hastii
aur vo maamuulii saa ik mohra hai
ek ik KHaana bahut soch ke chalnaa hogaa
baazii aasaan nahii.n thii us kii
duur tak chaaro.n taraf phaile the
mohre
jallaad
nihaayat hii saffaak
saKHt be-rahm
bahut hii chaalaak
apne qabze me.n liye
puurii bisaat
us ke hisse me.n faqat maat liye
vo jidhar jaataa
use miltaa thaa
har nayaa KHaana na.ii ghaat liye
vo magar bachtaa rahaa
chaltaa rahaa
ek ghar
duusraa ghar
tiisraa ghar
paas aayaa kabhii auro.n ke
kabhii duur hu.aa
vo magar bachtaa rahaa
chaltaa rahaa
go ki maamuulii saa mohara thaa magar jiit gayaa
yuu.n vo ik roz ba.Daa mohara banaa
ab vo mahfuuz hai ik KHaane me.n
itnaa mahfuuz hai ik KHaane me.n
itnaa mahfuuz ki dushman to alag
dost bhii paas nahii.n aa sakte
us ke ik haath me.n hai jiit us kii
duusre haath me.n tanhaa.ii hai

Javed Akhtar
Nazm

mahatma-gandhi ka qatl

apno.n ke liye jaam-o-sahbaa auro.n ke liye shamshiir-o-tabar
nard-e-insaa.n Taptii hii rahii duniyaa kii bisaat-e-taaqat par

Anand Narayan Mulla
Nazm

sandesa

use kahnaa
kabhii milne chalaa aa.e
hamaare paa.nv me.n jo raasta thaa
raaste me.n pe.D the
pe.Do.n pe jitnii taa.ero.n kii Toliyaa.n
ham se milaa kartii thii.n
ab vo u.Dte u.Dte thak ga.ii hai.n
vo ghanii shaaKHe.n jo ham par saayaa kartii thii.n
vo sab murjhaa ga.ii hai.n
tum use kahnaa
kabhii milne chalaa aa.e
labo.n par lafz hai.n
lafzo.n me.n ko.ii daastaa.n qissa kahaanii
jo use aksar sunaate the
kise jaa kar sunaa.e.nge
bataa.e.nge
ki ham mehraab-e-abruu me.n sitaare Taa.nkne vaale
dar-e-lab bosa-e-iz.haar kii dastak se aksar kholne vaale
kabhii bikhrii hu.ii zulfo.n me.n ham
mahtaab ke gajre banaa kar baa.ndhne vaale
charaaG aur aa.ine ke darmiyaa.n
kab se sar-e-saahil kha.De maujo.n ko takte hai.n
use kahnaa
use ham yaad karte hai.n
use kahnaa
ham aa kar KHud use milte
magar maqtal badalte mausamo.n ke KHuun me.n ra.ngiin hai
aur ham
qataar andar qataar aise bahut se mausamo.n ke darmiyaa.n
tanhaa kha.De hai.n
jaane kab apnaa bulaavaa ho
ki ham me.n aaj bhii
ik umr kii vaaraftagii aur vahshato.n kaa raqs jaarii hai
vo baazii jo bisaat-e-jaa.n pe khelii thii
abhii ham ne na jiitii hai na haarii hai
use kahnaa kabhii milne chalaa aa.e
ki ab kii baar shaayad
apnii baarii hai

Saleem Kausar
Nazm

sajjad-zahir ke nam

na ab ham saath sair-e-gul kare.nge
na ab mil kar sar-e-maqtal chale.nge
hadiis-e-dil-baraa.n baaham kare.nge
na KHuun-e-dil se sharh-e-Gam kare.nge
na lailaa-e-suKHan kii dost-daarii
na Gam-haa-e-vatan par ashk-baarii
sune.nge naGma-e-zanjiir mil kar
na shab bhar mil ke chhalkaae.nge saaGar
ba-naam-e-shaahid-e-naazuk-KHayaalaa.n
ba-yaad-e-mastii-e-chashm-e-Gazaalaa.n
ba-naam-e-imbisaat-e-bazm-e-rindaa.n
ba-yaad-e-kulfat-e-ayyaam-e-zindaa.n
sabaa aur us kaa andaaz-e-takallum
sahar aur us kaa aaGaaz-e-tabassum
fazaa me.n ek haala saa jahaa.n hai
yahii to masnad-e-piir-e-muGaa.n hai
sahar-gah ab usii ke naam saaqii
kare.n itmaam-e-daur jaam saaqii
bisaat-e-baada-o-miinaa uThaa lo
ba.Dhaa do sham-e-mahfil bazm vaalo
piyo ab ek jaam-e-al-vidaa.ii
piyo aur pii ke saaGar to.D Daalo

Faiz Ahmad Faiz
Nazm

tel ke saudagar

magar pau phaTegii
to palko.n se khodoge KHud apne murdo.n kii qabre.n
bisaat-e-ziyaafat kii KHaakistar-e-soKHta ke kinaare
bahaa.oge aa.nsuu!
bahaa.e hai.n ham ne bhii aa.nsuu!
go ab KHaal-e-hinduu kii arzish nahii.n hai
ezaar-e-jahaa.n par vo ristaa hu.aa gahraa naasuur
afra.ng kii aaz-e-KHuu.n-KHvaar se ban chukaa hai
bahaa.e hai.n ham nai bhii aa.nsuu
hamaarii nigaaho.n ne dekhe hai.n
sayyaal saayo.n ke maanind ghulte hu.e shahr
girte hu.e baam-o-dar
aur miinaar o gumbad
magar vaqt miinaar hai
aur dushman ab us kii KHamiida kamar se guzartaa hu.aa
us ke nichle ufaq par lu.Dhaktaa chalaa jaa rahaa hai
hamaare barahna o kaahiida jismo.n ne
vo qaid-o-band aur vo taaziyaane sahe hai.n
ki un se hamaaraa sitamgar
KHud apne alaav me.n jalne lagaa hai!

Noon Meem Rashid
Nazm

hum

1
bichhii hu.ii hai bisaat kab se
zamaana shaatir hai aur ham
is bisaat ke zisht-o-KHuub-KHaano.n me.n
dast-e-naadiida ke ishaaro.n pe chal rahe hai.n
bichhii hu.ii hai bisaat azal se
bichhii hu.ii hai bisaat jis kii na ibtidaa hai na intihaa hai
bisaat aisaa KHalaa hai jo vus.at-e-tasavvur se maavaraa hai
karishma-e-kaa.enaat kyaa hai
bisaat par aate jaate mohro.n kaa silsila hai
bisaat saakit hai vaqt-e-mutlaq

Zia Jalandhari
Nazm

barish ka pahla qatra

ghanghor ghaTaa tulii kha.Dii thii
par buu.nd abhii nahii.n pa.Dii thii
har qatra ke dil me.n thaa ye KHatra
naachiiz huu.n mai.n Gariib qatra
tar mujh se kisii kaa lab na hogaa
mai.n aur kii guu.n na aap jogaa
kyaa khet kii mai.n bujhaa.uu.ngaa pyaas
apnaa hii karuu.ngaa satyaanaas
KHaalii haatho.n se kyaa saKHaavat
phiikii baato.n me.n kyaa halaavat
kis birte pe mai.n karuu.n dilerii
mai.n kaun huu.n kyaa bisaat merii
har qatra ke dil me.n thaa yahii Gam
sargoshiyaa.n ho rahii thii.n baaham
khich.Dii sii ghaTaa me.n pak rahii thii
kuchh kuchh bijlii chamak rahii thii
ik qatra ki thaa ba.Daa dilaavar
himmat ke muhiit kaa shanaavar
faiyyaz o javvaad o nek-niyyat
bha.Dkii us kii rag-e-hamiyyat
bolaa lalkaar kar ki aa.o!
mere piichhe qadam ba.Dhaa.o
kar guzro jo ho sake kuchh ehsaan
Daalo murda zamiin me.n jaan
yaaro! ye hachar-machar kahaa.n tak
apnii sii karo bane jahaa.n tak
mil kar jo karoge jaa.n-fishaanii
maidaan pe pher doge paanii
kahtaa huu.n ye sab se barmalaa mai.n
aate ho to aa.o lo chalaa mai.n
ye kah ke vo ho gayaa ravaana
''dushvaar hai jii pe khel jaanaa''
har-chand ki thaa vo be-bizaa.at
kii us ne magar ba.Dii shujaa.at
dekhii jur.at jo us sakhii kii
do-chaar ne aur pairvii kii
phir ek ke baa'd ek lapkaa
qatra qatra zamii.n pe Tapkaa
aaKHir qatro.n kaa ba.ndh gayaa taar
baarish lagii hone moslaa-dhaar
paanii paanii hu.aa bayaabaa.n
sairaab hu.e chaman KHayaabaa.n
thii qaht se paa.emaal KHilqat
is me.nh se hu.ii nihaal KHilqat
jur.at qatra kii kar ga.ii kaam
baaqii hai jahaa.n me.n aaj tak naam
ai saahibo! qaum kii KHabar lo
qatro.n kaa saa ittifaaq kar lo
qatro.n hii se hogii nahr jaarii
chal nikle.ngii kashtiyaa.n tumhaarii

Ismail Merathi
Nazm

nae sur ki tamsil

kaamanii KHvaab kii lau me.n ha.nstii hu.ii kaamanii
sola baras kii taqviim me.n fasl-e-gul kaa ko.ii tazkira
tak na thaa
mai.n ne battiis battiis jha.D rute.n kaaT dii.n
ab jo tamsiil ke ek vaqfe me.n tum se milaa huu.n
to saa.nso.n me.n nam chaal me.n un zamaano.n kaa rum
jii uThaa hai
jo ahd-e-zamistaa.n me.n yaKH the
saqar saa saqar
kaamanii KHanda-e-gul kii kul zindagii
ek gulchii.n kii vahshat bharii aa.nkh hai
ye chaTaknaa ye khulnaa
bahut sehar-aavar sahii jaagne aur sone me.n ik
KHvaab-e-mauhuum se kuchh ziyaada nahii.n
KHvaab-o-KHvaahish ajab silsila hai
bahut duur bahtii hu.ii aabshaaro.n kaa ik silsila
jis me.n koh-e-tazabzub kii KHushbuu bhii hai
ahd-o-paimaa.n kaa jaaduu bhii
KHuu.n se suro.n tak
suro.n se us ik lafz tak
jis me.n raago.n kaa jauhar ba.ndhaa hai
kahii.n aimanii ras kahii.n maarvaa ThaaTh bhageshirii
bhairvii.n aur pahaa.Dii
vo sab kuchh jo apne lahuu me.n dahaktaa chahaktaa hai
jis ke tanaazur me.n ham biist-o-shash-saal
pahle ba.ndhe the
unhii aabshaaro.n se mujh ko sadaa aa rahii hai
so mai.n jaa rahaa huu.n
na.e sur uThaane
ki sargam kii farsuudgii diida-o-dil bujhaane lagii hai
nayaa sur jise lafz tartiib dete hai.n
pahu.nche to jaano ki saan.e.a ke lafzo.n se uThtii namii tum
tak aa.ii

Akhtar Usman
Nazm

numaish mein

vo kuchh doshiizgaan-e-naaz-parvar
kha.Dii hai.n ik bisaatii kii dukaa.n par
nazar ke saamne hai ek mahshar
aur ik mahshar hai mere dil ke andar
sunahraa kaam ra.ngii.n saa.riyo.n par
bisaat-e-aasmaa.n par maah-o-aKHtar
jamaal-o-husn ke pur-ro.ab tevar
numaayaa.n chaa.nd sii peshaaniyo.n par
vo ruKHsaaro.n pe halkii halkii surKHii
labo.n me.n pur-fishaa.n ruuh-e-gul-e-tar
siyah zulfo.n me.n ruuh-e-sumbulistaa.n
nazar sar-chashma-e-tasniim-o-kausar
adaa-e-naaz Garq-e-kaif-e-sahbaa
siyah mizhgaa.n sharaab-aaluuda nashtar
chamak taaro.n kii chashm-e-surmagii.n me.n
jhalak chaa.ndii kii jism-e-marmarii.n me.n
vo KHushbuu aa rahii hai pairahan se
fazaa hai duur tak jis se mo.attar
tabassum aur ha.nsii ke narm tuufaa.n
fazaa.o.n me.n musalsal baarish-e-zar
nishaat-e-ra.ng-o-buu se chuur aa.nkhe.n
sharaab-e-naab se labrez saaGar
vo mehraabe.n sii siino.n par numaayaa.n
fazaa-e-nuur me.n cupid ke shah-par
nafas ke aamad-o-shud se talaatum
shab-e-mahtaab me.n jaise samundar
sitaaro.n kii nigaahe.n jhuk ga.ii hai.n
zamii.n phir KHanda-zan hai aasmaa.n par
ko.ii aa.iina-daar-e-husn-e-faaras
kisii me.n husn-e-yuunaanii ke jauhar
kisii me.n aks-e-''ma.asuum-e-kaliisaa''
kisii me.n partav-e-asnaam-e-aazar
ye shiirii.n hai vo naushaaba hai shaayad
nahii.n yaa.n farq-e-farhaad-o-sikandar
ye apne husn me.n azraa-e-vaamiq
vo apne naaz me.n salmaa-e-'aKHtar'
ye taabaanii me.n KHurshiid-e-daraKHshaa.n
vo ra.anaa.ii me.n us se bhii fuzuu.n-tar
ha.nsii us kii tuluu-e-sub.h-e-KHandaa.n
navaa us kii suruud-e-kaif-aavar
ye sholaa-aafrii.n vo barq-afgan
ye aa.ii.na-jabii.n vo maah-paikar
vo jumbish sii hu.ii kuchh aa.nchalo.n ko
vo lahre.n sii uThii.n kuchh saa.riyo.n par
KHiraam-e-naaz se naGme jagaatii
vo chal dii.n ek jaanib muskuraa kar
kisii kii hasrate.n paamaal kartii
kisii kii hasrate.n ham-raah le kar
kabhii aa.nkhe.n dukaano.n par jamii hai.n
kabhii KHud apnii hii barnaaiyo.n par
idhar ham ne ik aah-e-sard khii.nchii
ha.nsii phir aa ga.ii apne kiye par

Asrarul Haq Majaz
Nazm

aTuT ang

miraa sar tum apne hii zaanuu pe rakh kar
mujhe puuchhtii ho!
ki me.n kaun huu.n
kyaa huu.n, kaise huu.n?
saare savaalo.n ko muTThii me.n rakh kar
zaraa merii ik baat san lo
suno! ye tumhaare badan kaa KHumaar-aashnaa kaif... narm o musalsal
mujhe lazzato.n ke umuq me.n liye jaa rahaa hai
mai.n pal pal kabhii
lahza lahza kabhii
dhiire dhiire kabhii
lamha lamha kabhii
ek dariyaa ke phailaav me.n Duubtaa jaa rahaa huu.n
sharaabor tuufaan me.n tund lahro.n kii suurat
nashiile samay
ek aaha.ng ke saath hachkole khaataa hu.aa
mai.n kisii soch kii rau me.n bahtaa chalaa jaa rahaa huu.n
miraa dil, mirii jaa.n:
dono.n hii mausuum hai.n, us tamavvuj se
jo merii nas nas me.n paiham machaltaa hu.aa
KHuun ke zer-o-bam kii kahaanii sunaataa hu.aa
bah rahaa hai
ki jis ke har ek lams kii
lazzato.n, zaa.iqo.n me.n
tumhaaraa ko.ii KHvaab hai
jaise mahtaab hai
tum to mere badan kaa ko.ii paara-e-KHaak ho
tum ko.ii Gair ho?
merii ham-zaad!
ham kashtii-e-ziist ke baadbaa.n kii tanaabe.n hai.n do
ek tum, ek mai.n
jin kaa mohtaaj hai baadbaan-e-nafas
ye zamii.n, ye zamaa.n
mere hii ahd kii daastaa.n
ham se aabaad daa.em bisaat-e-jahaa.n
apne aa.ngan kii phuulo.n-bharii kiyaariyaa.n

Azhar Ghauri Nadwi
Nazm

kar-nama

aziim kaam karuu.n ko.ii ek din sochaa
ki rahtii duniyaa me.n apnaa bhii naam rah jaa.e
magar vo kaam ho kyaa zehn me.n nahii.n aayaa
payambarii to ziyaa.n jaan kaa hai daavaa kyaa
tuu jaane suulii pe cha.Dhnaa ho yaa chale.n aare
ki zinda aag kii lapTo.n kii nazr honaa pa.De
KHayaal aayaa funuun-e-latiifa Dhero.n hai.n
sanam-taraashii hai naGmagarii ki naqqaashii
ye sab hii daa.imii shohrat kaa ik vasiila hai.n
magar na lafzo.n pe qudrat na rang qaabuu me.n
phir ik zariya siyaasat hai naam paane kaa
alaava naam ke mohre banaa ke logo.n ko
bisaat-e-arz pe shatranj khel sakte hai.n
magar ye fan bhii mirii dastaras se baahar thaa
phir aur kyaa ho bahut kuchh KHayaal dau.Daayaa
alaava in ke mujhe aur kuchh nahii.n suujhaa
zamaane baad samundar kinaare baiThaa thaa
aziim shai hai samundar bhii mere dil ne kahaa
vo kyaa tariiqa ho mai.n is kaa bhaag ban jaa.uu.n
samajh me.n aayaa nahii.n ko.ii raasta bhii jab
to jhunjhlaa ke samundar me.n kar diyaa peshaab

Akhtarul Iman
Nazm

jine marne ke darmiyan ek saat

vo jaaduugar thaa jis ne raat par pahre biThaa.e the
vagarna ab talak ye chaa.nd taare miT chuke hote
junuun-e-aagahii maanuus aa.nkho.n se chhalak jaataa
bisaat-e-zindagii ke saare mohre piT chuke hote

Shahzad Ahmad
Nazm

waqt-e-murawwat

fazaa-e-charKH me.n dau.Dii hu.ii thii ruuh-e-zuhuur
bisaat-e-KHaak pe chhaayaa hu.aa thaa ra.ng-e-numuud

Josh Malihabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now